Iren Mahsen en Presidensi Keieu, Suhn 2010
Kisin Pwiliet me Pehsehs Pohn Peh Kan
Kerenieng sounpar 60 samwalahro, ni ansou me I wie papah ni duwen pisop pwulopwul men, Kathleen McKee, liohdi men nan ahi ward kapinsalehdala. Ahn liho dipwisou kan iangahki kisin pwiliet silimen. Riemen, me poh kaselel oangoahng, kohieng kempoakepah kan. Me kesilimeno, Billie, poh oangoahng ahpw mwomw suwedkihla pehsehs ni peh kan. Sister McKee ntingihdi nan kisin likou ongie mwohn ah mehlao: “Kowe oh ahmw peneinei kak uhd apwalih kisin Billie? E sohte nohn kaselel, ahpw ah koul me keieu ngilamwahu.”
Sister McKee duwehte kisin pwiliet oangoahngo me pehsehs pohn peh kan. Liho sohte kapaikihda masamwahu de kaselel, de mpahi, de pil ahniki wahu sang naineki seri. Ahpw ah koul kin sewese mehteikan en kehlailda pahn arail wesik toutou kan oh en kehlail ong arail pwukoa kan.
Sampah inenen direki kisin pwiliet oangoahng kan me pehsehs pohn pehrail kan. Me kempoake iei me malaulauiehn irail esehier koul. Ekei me pwulopwul sehse ihs irail, dah me re kak wiahla de pil dah me re men wiahla; ihte me re men wia iei en wia aramas me mie katepe. Ekei mwein mahlahr, toutoukilahr pwunod, de direkilahr peikasal—momourki mour kan me mih pahnangin arail koahiek mehlel kan.
Pwehn momour mwahu, kitail anahne kaiahnehda koahiek en sohpai kahpwal ni soupeikasal, kansensuwed ni pereperen, oh kana ni karakarahk. Komw pahn peidek, “Ia duwen aht kak en kapwaiada soahng pwukat me kitail kaskasik?” I sapengki, “Sang ni atail pahn alehda kamarain mehlel en ihs kitail ni mehlel!” Kitail iei mwahnakapw kan oh peinakapw kan en Koht ieias, me kepikipikda duwehte Ih. Medewe mahs met: kepikipikda ni mwomwen Koht. Kitail sohte kak ahniki madamadau wet ni mehlel oh sohte ahniki loalatail pepehm kapw en kehlail oh manaman.
Nan sampah, loalen aramas kin kalapw wia mehkot me mwomwen keriauih de sohte kesempwal duwehte masamwahu de mwohmw me lingan. Ahpw sangete mahs sapwellimen Kauno kaweid ong Samuel soukohpo iei: “Aramas kin kasawih mwomwen aramas, ahpw ngehi, I kin kasawih nan mohngiong en aramas akan” (1 Samuel 16:7).
Ni ansou me Sounkomouro rapahki ohl en pwoson, E sohte pilada emen sang nanpwungen woloh kan me lemeleme me re mour mwahu me kin kalapw mih nan sinakoke kan. Ahpw, E ketin malipe ohl pwoson men sang nanpwungen soused kan en Kapernaum. Ahniki peikasal, sohte sukuhl, lipwurupwurur Saimon wiahla Piter, Wahnpoaron en pwoson. Kisin pwiliet oangoahng me pehsehs pohn peh kan warohngala en kohwa sapwellimen Kauno likilik oh limpoak poatoapoat.
Ni ansou me Sounkomouro pilada misineri men me ahniki ngoang oh manaman, E sohte ketin diarada nanpwungen irail akan me kin uhki Ih ahpw nanpwungen irail akan me kin uhweng Ih. Sohl me kin kaloke souleng kan wiahla Pohl soun kalohk.
Soundoaro pilada aramas me sohte unsek en padahk duwen ahl me kohlahng unsekla. Ih met me e ketin wia mahs. Ih me e kin ketin wia met—lella kisin pwiliet oangoahng kan me pehsehs pohn pehrail kan. E kin ketin malipe kowe oh ngehi en papah Ih nan sampah wet. Atail loaloapwoat anahne en unsek. Oh ni atail nannanti, ma kitail pahn dipekelekel, kitail en peki ni ngidingid: “Komw ketin kahluwa kiht, kahluwa kiht, soun Kaweliakapw lap en aramas, sang nan rotorot pwehn pwurehng mour oh wenla mwowe.”1
Ahi kapakap iei me kitail koaros en idawehn karasaras en Ohl en Kalili me kin dierek mihmiseli rehn me semwehmwe kan, me pwupwidi kan, me toutoulahr kan, oh me soumwahu kan. Koul mehlel en kohdahsang nan atail mohngiong kan ni atail pahn wia met.
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen First Presidency Message, June 2010. Pohnpeian. 09366 885
Padapadahk sang Iren Mahsen Wet
Ni omw pahn padahk … , e kin kalapw sawas ma irail me sukusukuhl kan kak rongada de kilangada mehkot me komw pahn kaweidkinirail en rapahki” (Teaching, No Greater Call [1999], 55). Pwehn sewese tohn peneinei kan en wehwehki iren mahsen wet sang President Monson, medewe en pekihda irail en ehukihda mehot me irail wehwehki sang iren mahsen wet mwurin amwail pahn wadekpene. Luke emenemen aramas en ehukihda dah me e medemedewe kesempwal nan iren mahsen wet. Keimwsengkihla omw pahn kihda ahmw kadehde me pid iren mahsen wet sang President Monson.
Padapadahk mahsen en Koht, duwen me kin kohda sang Sapwellime soukohp akan, kak en mie lipwe kehlail nan mour en irail akan me kitail kin padahkih (tehk Teaching, No Greater Call, 50). President Monson mahsanih me mie kehlail oh manaman en atail pahn esehla me kitail sapwellimen Koht. Mwurin wadek iren mahsen wet, pekihda peneineio en ehukihda dah me kin sewese irail en tamataman ihs irail.