Iren Mahsen en Padahk en Pas, Mahs 2010
Kakehlailih Pwoson Koht Sahm oh Sises Krais sang Pein Onopiki Pwuhk Sarawi Kan
Padahngki iren pwuhk sarawi oh iren mahsen pwukat de, ma mie anahnepe, ehu padahk tohrohr me pahn kapaiada lih akan me ke kin pwarek. Kihda ahmw kadehde en padahko. Luke irail akan me ke kin pwarek en ehukihda me re pehmada oh esehla.
“Ni ansou me I pwopwoud kapw, … I luklahng mwongen souwas rehn koaros lih pirien kan en Pwihn en Sawas en Lih nan ahi ward me wadekehr ehu rehn Pwuken Mormon de ehu pwuhk mwotomwot en poadoapoad en Mwomwohdiso. Ansouo I ekis soukautiala wadek pwuhk sarawi kan, eri pwe ien kak iang towehda mwengen souwaso I wadek pwuhk mwotomwoto pwe e mengei oh sohte pahn kawehla mwahl laud ahi ansou. Ni ahi wie mwengemwenge rahno, I ahniki madamadau kehlail me pwuken poadoapoado mwahu, ahpw I uhdahn konehng wadek Pwuken Mormon. Ngehn Sarawi ketin kamwakidie ansouo en wekidala ahi mwekid en wadek pwuhk sarawi kan. Rahnohte I tepida wadek Pwuken Mormon, oh I sohte uhdi lel met. … Pwehki ahi tepida wadek pwuhk sarawi kan rahn koaros, I eselahr duwen Semei Nanleng, Sapwellime Iehros Sises Krais, oh dah me I anahne wia pwehn duwe Ira. …
“… Lih koaros kak wia sounpadahk en rongamwahuo nan imwe, oh lih koaros nan Mwomwohdiso anahne wehwe nan rongamwahuo ni duwen kaun oh sounpadahk. Ma ke saikinte kaiahnehda kemwekid en onopiki iren pwuhk sarawi kan rahn koaros, tepida met oh nantihlahte nan onohnop pwehn kaunop pein kowe ong ahmw pwukoa kan nan mour wet oh nan mour soutuk.”1
Julie B. Beck, president lap en Pwihn en Sawas en Lih.
“Onop en pwuhk sarawi kan pahn sewese atail kadehde kan oh kadehde kan en tohn atail peneinei. Rahnwet neitail serihkan kekeirda ni arail kapilkipene ngihl kan me kin kangoange irail en soikala me pwung oh uhd rapahki, me kaperen kan en sampah. Ma irail sohte pahn ahniki poahsoan tengeteng nan rongamwahu en Sises Krais, kadehde en mehlelo, oh koasoandi en mour pwung, irail pahn luwetehng kaweid suwed pwukat. Iei atail pwukoa en kakehlailih oh sileiraildi.”2
President Thomas S. Monson.
“Se kupwurki riat lih akan en samanih pwuhk sarawi kan. … Ke anahne en ahniki wehwe mwahu en sapwellime mehlel soutuk kan ong pein omw mour mwahu, oh ong kahrepe kan en padahkih pein noumwail serihkan oh koaros mehteikan me pahn kohdo pahn omw kaweid.”3
“Se kupwurki ihmwatail kan en kapaikihda lih akan me samanih pwuhk sarawi kan—mehnda ma kumwail kiripw de pwopwoud, pwulopwul de mah, liohdi de momour nan peneinei ehu. … Samaniala pwuhk sarawi kan—kaidehn pwehn kihdi mehteikan, ahpw en pwekirailda!”4
President Spencer W. Kimball (1895–1985).
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen Visiting Teaching Message, March 2010. Pohnpeian. 09363 885
Sawas kan ong Padahk en Pas
Ansoun omw pas, kihda peidek kan oh ehukipene madamadau kan ni doadoahngki pwuhk sarawi kan. Kihda kadehde duwen onopiki pwuhk sarawi kan eh kakehlailih ahmw pwoson. Peki rehn lih me ke kin pas reh en ehukihda duwen onopiki pwuhk sarawi kan eh kakehlailih imwe oh ah peneinei.
Kaunop en Pein Emenemen
Sohn 5:39
2 Timoty 3:14–17
2 Nephi 9:50–51; 31:20; 32:3–5
D&C 138:1–11