Sohte Emen Unsek

I kin sangete mahs men duwehte Nephi: peik douluhl, loaloapwoat douluhl, oh ahniki pwoson laud. Ni duwen ahi kilikilang Nephi me wia karasaras keieu ileile en mwahu. Soahng malaulau me I kin inangih laudsang medemedewe ien kekeirda duweduwehla ih—de ni uwe me keieu tikitik en tepida ahniki ekiste en ah mwahu.

Ehu rahno I mih nan kisin kahpwal, me tepikihda pepehm kan en souitar. Soahng tohto me I men wia oh men kapwaiada. Ahpw likamwete I sohte kak kapwaiada mehkot. Ni pilen mesei kan en soukoapwoaroapwoar ahr wie kereker, I kasalehieng ahi pahpao pepehm pwukat. Ahnsouohte e kesihnenda, aluhlahng dewen pwuhko, oh kihiei ehu nah koapi kan en Pwuken Mormon. Ni eh sohte lokaia, e pahkalahng 2 Nephi 4 oh tepida wadek iretikitik 17.

Idin kilie uhda duwehte lioal tang nan paliwereiet ni ahi rong lepin mahsen kehlail ko: “O ohl suwed emen me duwe ngehi et!” Nan moangeie piripir. Ia duwen Nephi, me I kin kilengdahng oh wiahki karasaras mwahu, eh kak nda me e “suwed”? Ma e suwed, ngehi dah?

Lioalo pwurehng tang nan paliwereie ansou me ahi pahpao wadek iretikitik 28: “Ngeni, pirida! Dehr luwetala nan dihp.” Likamwete depwek rotorot kan nan moangeie kohpeseng oh sohrala pwehn kasalehda karakar oh lingan en mesen lahng poh mei me langada oh ketipin marain. I sohte kak kawehwe duwen ire tikitik wet eh kamarainiada ngeni. Malaulau iren pwuhk sarawi me audehkinie uwen koapwoaroapwoar, kamarain, oh peren me metkinin wia.

Nan iretikitik 30, Nephi nda dah me I wie medemedewe ahpw ihte ni koasoai me kaselelsang pein ahi koasoai: “Ngeni en kin peren kihda komwi, ei Koht, oh ei paipen komour.” Ire tikitik wet wahdo pepehm kan en meleilei oh kalahngan pwehki sapwellimen Kauno mahk oh limpoak.

Ahi pahpao kihpene pwuhko oh kawehwe me iretikitik pwukat ekei pak kin kahdaneki melkahka en Nephi. Ih eri padahkihiengie ni kadek me lella aramas me keieu lapalap pohn sampah sohte unsek, oh aramas pwukat anahne pein wehwehki arail soitar akan pwe ma soh irail pahn pohnmwaso oh, eri sohte lapalap.

I wehwehki. Pwehki ahi ahniki luwet akan sohte wehwehki me I pahn sohte kak en duwehla Nephi. Ni ahi wehwehki ahi luwet akan, I ekis kerenlahng mwomwen Nephi. Nephi lapalap pwehki, me patehng ah peik oh loaloapwoat, e aktikitik oh kin kak kasawiada pein ah luwet akan.

Sangete irairo, I kin kesempwaliki ahn Nephi lepin mahsen pwukat. Ansou koaros me I kin wadek iretikitik pwukat, I kin pwurehng pehmada irair ko en peren oh kamarain duwehte ansou me I tepin wadekada. Ire tikitik pwukat kin koulkihiengie me ngehi sapwellimen Koht serepein, me ahniki koahiek laudsang uwen me I kak medewe. I ese me ma I pahn loaloapwoat oh nantihla mwowe, kapai kan me sohte kasansalda pahn nekinek ong ie.