Pweng sin Mwet Forfor Luti, Jacnweri 2010
In Kuh In-Sifacna
Luti ma suhmuhslah ac fahk inge kuh, fin enenweyuck, sie pac ip yohk srihpac ma ac fah ahkinsewowoye tahmtahel ma kom muhtwacta yohroh an. Fahkwack luhlahlfongi ke mwe luti an. Suli mwet kom muhtwacta yuhroh an in akacsruhi ke ma elos puhlakihn ac lotwelah an.
Meac Kuh In-Sifacna?
“‘Kalmeyacn kuh-in-sifacna pa in orekmakihn nohfohn mwe insewowo lasr sin Pahpah Lucng in karihngihn kuht sifacna ac sucu lasr uh ac in sokwack inkacnek nuh ke elyah lasr sifacna uh. Kais sie sesr oasr kunohkohn se la in srihke in kahingkihn elyah uh met liki ac sikyak uh ac in lotwelah in kuhtanglah ma upac ke ac sikyak uh. …
“Kuht ac oruh fuhkah in kuh-in-sifacna? Kuht kuh-in-sifacna ke eisyacn etwacack fal, lutlut, ac kuh in rit ac sihm; ke lahlmwetmwet in liyacacng mani ac kasrpen acn uh, in kuh in fokoko ke nguhn, ahkolah nuh ke pacl elyah ac ma kuh in sikyak uh; ac ke oasr luhn kuh in mahno ac fokokoiyen toeni ac puhla uh.”1
Julie B. Beck, prestuhn luhlahp luhn Rilif Sosaiti.
Kunohkohn Se ke Wosasuc
“Ke kuht kapkapwack in moul ac ahkyohkye mwe sang ac talan lasr uh, kuht ac kuh-in-sifacna. Kuh-in-sifacna uh eis kunohkohn nuh ke kahsruh nuh ke ma luhn nguhn ac mahno lasr sifacna uh ac nuh selos suc Pahpah Lucng el luhlahlfongi nuh ke karihngihnyuck lasr uh. Ke kuht kuh-in-sifacna muhkwena uh pa ke kuht arulacna oruh in oacna Mwet Lahngo ke kuhlwacnsapuh ac ahkinsewowo mwet sahyac uh.
“Arulacna yohk srihpac in kahlwem kac lah kuh-in-sifacna uh pa sie inkacnek in oraclah uh. Finsrak yohk se emet lasr uh pa in oacna Mwet Lahngo, ac lah finsrak sacn ahkyohkyeyuck ke kuhlwacnsap wowo lasr nuh sin mwet sahyac an. Kuh lasr in kuhlwacnsap uh yohkwaclihk kuh srihkeni ke luhpan kuh-in-sifacna lasr uh.”2
Elder Robert D. Hales ke U luhn Mwet Sap Singucul Luo.
“Kuh-in-sifacna uh pa sie fukun orekma lasr ac tahpuhk orekma in kahsruh nuh kwewa sahyac uh. Ma se inge sie ip ma yohk srihpac nuh ke nguhnasr oacpacna nuh ke moul in mahno lasr uh. Nuh ke ip yohk srihpac se inge, Prestuhn Marion G. Romney [1897–1988] el fahk: ‘Lwelah kuht in orekma nuh ke ma kuht enenuh uh. Lwelah kuht in kuh-in-sifacna ac kuh in muhkwena. Molwelah uh tiac kuh in eisyuck ke kuhtwena mwe luti sahyac. Molwelah uh pa sie ohiyac luhn kais sie, ac kuht enenuh in sifacna orwaclah molwelah lasr nuh ke moul in mahno uh oacpacna nuh ke ma luhn nguhn uh.’ …
“Prestuhn Spencer W. Kimball [1985–] el tahfwelah in luti ke kuh-in-sifacna: ‘Kunohkohn luhn kais sie mwet ke toeni, puhla, nguhnnguhn, mahno, kuh kasrpacn acn uh som emet nuh sel sifacna, ahk luo nuh sin sucu lal an, ac ahk tolu Alu uh fin el mempucr fokoko se kac.’”3
Prestuhn Thomas S. Monson.
© 2010 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke English: 6/09. Ahkkweyeyucklac ke lewng: 6/09. Lwenglah luhn Visiting Teaching Message, January 2010. Kosraean. 09361 868