Iren Mahsen en Presidensi Keieu, Senweri 2010
Kolokoloweite Pil Ekis
Ehu padahk katapan me tengeteng sang nan mwehin Kirtland iei me ngenitail kan anahne kakehlail ansou koaros. Kitail anahne karanih Kauno rahn koaros ma kitail pahn powehdi kasongosong kan me kitail koaros anahne sohpai.
Nan ansoun kommoaldi en sukuhl nan pahr samwalahro ngehi oh ahi pwoud wahda nein nait seri mpwer pwutak riemen kohla Kirtland, Ohio. E wia ansou mwahu kesempwal oh keneinei ong kiht en patpene ansou kis mwohn ara mwesel kohla ni ara misin.
Ansou me se mwemweit wasao, se ekis wehwehkihla duwen irair kan me Soukohp Joseph Smith oh Souleng kan me mihmi nan Kirtland ahniki ansouo. Mwehio nan poadoapoad en Mwomwohdiso wia ansoun kahpwal laud ahpw pil kapai laud.
Nan Kirtland Kauno ketkihda ekei kasansal oh kisakis en pali ngehn sang nanleng me keieu kapwuriamwei me sampah alehdi. Pali meh weneisek-limau en Doctrine and Covenants alahldi nan Kirtland oh wasahkan me karanih —kaudiahl me wahdo marain oh wehwe duwen me pid Ketido Keriau, epwelpen me anahn, pilahn en komour, manaman en priesthood, Mahsen en Eripit, meiroang en eisek-kis-ehu, tehnpas sarawi, oh kosonned en consecration de loaloapwoat unsek me audepe iei pahrekpene sang ni tohnmetei.1
E wia mwehi en keirdahn pali ngehn me inenen lap mehlel. Mehlel me, Ngehn en Koht ansouo duwehte kisiniei wie lullul. Moses, Elaisa, oh tohtohn meninkeder teikan sang nanleng pwarodo ansouo, oh iangahki Samatail Nanleng oh Sapwellime Iehros, Sounkomour en sampah, Sises Krais.2
Ehu kisehn kaudiahl tohto me Joseph alehdi nan Kirtland wia kaudiahl me e mahsanih “tehn tuhke olip … me dondolsang Tuhkehn Paradais, oh Sapwellimen Kauno iren mahsen en popohl ong kitail” (kapehse ong D&C 88). Kisehn audepen kaudiahl kaselel wet iei luk kesempwal kitail en karanih Kauno pwe E pahn ketin karanih kitail; kitail en ngoangki rapahki pwe kitail pahn diar Ih (Tehk D&C 88:63). Ni Souleng kan en Kirtland arail karanih Kauno, E ketin karanih irail mehlel, ketin ketkihda kapai kan en lahng pohn moangen irail me loaloapwoat.
Kepwilipwildohn Kapai Kan en Pali Ngehn
Mwein me keieu kesempwal nanpwungen kasalada kan en pali ngehn wiawi ni ansoun kasarawi en Tehnpas Sarawi en Kirtland ni Mahs 27, 1836. Emen me iang towe rahno iei William Draper me sounpar rieisek-waluh, me koasoaiahda duwen rahno me iei “rahn en Pendekos.” Duwen me e ntingih: “Ansouo uwen pwilidohn Ngehn en Kauno, me I sohte kak ntingihdi ni unsek de leweie pil sohte kak koasoaiahda. Ahpw I pahn nda met me Ngehno ketin kepwilipwildo oh ketido duwehte kisinieng lap me uk oh audehda ihmwo, ni uwe ehu me elehieng dir tohn wasao en lokaia ni mahsen kapwonopwon kan oh ahniki kasansal kan oh kilangada tohnleng kan oh kihda kokohp kan, oh ahniki ansou en kaping ni uwe ehu me sohte kin wiawi erein mwehi en dih wet.”3
Kasansal en pali ngehn pwukat sohte irairdi ongete irail me mih nan tehnpas sarawio, pwe “tohn nan kahnihmwo pil tangkipene (arail rongada ngihl ehusoahng kohkohdo sang nan tehnpaso, oh ni arail kilangada uhr en kisiniei ehu pohnangin Tehnpas Sarawio), oh pwuriamweiki dah me wihwiawi.”4
Lorenzo Snow (1814–1901), me mwuhr wiahla President en Mwomwohdiso, wie koukousoan nan Kirtland ni ansou kapaida wet. E mahsanih, “Emen pahn mwein medewe me mwurin soangen kasalada kaselel pwukat sohte kasongosong pahn kak kesehdi Souleng ko.”5
Ahpw, uhdahn, irair kaselel kan en pali ngehn sohte kin doareikitailsang kahpwal oh kasongosong kan. Sounpwong kei mwurin kasarawi en tehnpas sarawio, kahpwal en apwal en mwohni oh doadoahk lel wehin United States, oh kahnihmw en Kirtland iang alehdi lipwen apwalo. Bank kan lelohng nan apwal, elehieng tohto aramas en mih nan apwal en mwohni. Pwehn pil ahpwete kadoarehla, tohtohn Souleng ko me kohkohlahng Kirtland lella ni arail wesik kepwe malaulau, oh sohte ese dah me irail pahn wia ni ansou me re lella de pil ia duwen arail pahn mour.
Mwohn ansou reirei, kalokolok kan pil pwarada oh pwihn suwed kan pil uhwengada Souleng ko. Towe kan en Mwomwohdiso—lella pil ekei irail me keieu karanih Soukohpo, tohto me iang mih nan tehnpaso ni ansoun kasarawio—pwupwila oh uhwengada Joseph ni arail nda me e wia soukohp pwupwila.
Ni ansou me ngehi, ahi pwoud on nein nait ko alialu limwahn Tehnpas Sarawi en Kirtland, I medewehla duwen kempoakehn ekei irail ar sohte kak tengeteng ni loaloapwoat mendahte arail iang kilang kasalada kan en pali ngehn. Ia uwen kempoakehn arail sohte kak en kanengamahieng kepit oh lipahned en irail me sohte kamehlele. Ia uwen kempoake me, ni ansou me irail mih nan apwal en mwohni oh kahpwal teikan, irail sohte kak diarada pein loalarail kehlail en kolokolte arail pwoson. Ia uwen kansensuwed me irail manokehla manaman kaselel me irail iang paikihda ni kasarawi en tehnpas sarawio.
Padahk Kan
Dah me kitail kak en esehla sang mwehi kapwuriamwei wet nan poadoapoad en Mwomwohdiso?
Ehu padahk katapan tengeteng sang nan mwehin Kirtland iei me ngenitail kan anahne kakehlail ansou koaros. Duwen me President Harold B. Lee (1899–1973) padahngki: “Kadehde sohte wia mehkot me komw pahn ahniki rahnwet oh kolokol ansou koaros. Kadehde pahn kekeirda lao lel marain en kamehlele douluhl, de e pahn tikitikla lao sohrala, atail mwekid me pahn koasoanehdi mehnia rehra me pahn pweida. I nda me, kadehde me kitail kin ahniki nan ehuehu rahn iei met me kin doareikitailsang lidip kan en imwintihtio.”6 Kitail anahne karanih Kauno rahn koaros ma kitail pahn powehdi kasongosong kan me kitail koaros anahne sohpai.
Ni mwohmw kei atail mour rahnwet kerenieng duwehte Kirtland nan pahr kan en 1830 samwa. Kitail pil iang wie momour rahnwet nan ansou en kahpwal en mwohni. Miehte rahnwet me kin uhweng oh kailongki Mwomwohdiso wet oh towe kan. Kasongosong kan me pid emenemen oh me pid kitail koaros kin mwomwen pahn poweikitaildi.
Ni soangen ansou pwukat me kitail anahne, laudsang mahs, en karanih Kauno. Ni atail pahn wia met, kitail pahn esehla wehwehn Kauno eh pahn ketin karanih kitail. Ni atail pahn rapahki Ih ni ngoang, kitail pahn uhdahn diar Ih. Kitail pahn kilang ni sansal me Kauno sohte pahn ketin soikala Sapwellime Mwomwohdiso de Sapwellime Souleng loaloapwoat kan. Pwoaren mesatail kan pahn duwarpeseng, oh kitail pahn patohwan Ih ni eh pahn ketin ritingada wenihmw kan en nanleng oh kamwerehdieng pohtail laudlahn Sapwellime marain. Kitail pahn diar kehl en pali ngehn en mourla mehnda ma ni pwohng me keieu rotorot.
Mehndahte ekei Souleng kan en Kirtland arail manokehla irair kan en pali ngehn me irail ahniki, pali laud sohte manokehla. Pali laud, me iangahki William Draper, koledi teng marain en pali ngehn me Koht ketkihieng irail oh doulahte ni arail idawehn Soukohpo. Ni arail weweid kohla irail ahniki kahpwal me inenen doarsang mahs ahpw irail pil ahniki keirdahn pali ngehn me inenen kaselel lao, ni imwila, irail me dadaurete lel imwi “mihla … nan irair en popohl soutuk” (Mosiah 2:41).
Kumwail Kak Kolokoloweite
Ma mie ansou me kumwail sohla ahniki koapwoaroapwoar de kasongosong en soikala amwail pwoson, tamataman irail Souleng poadedi kan me kolokolte mehlelo nan Kirtland. Kolokoloweite Pil Ekis. Kumwail kak wia met! Kumwail wia kisehn ehu dih kesempwal. Kumwail onopehr oh kaunopdahr pwehn momour pohn sampah ni ansou kesempwal wet nan mour en sampah kaselel wet. Kumwail ahniki sohso sarawi sang nanleng eri kumwail ahniki koahiek koaros me anahn pwehn elehieng amwail mour en pweida poatoapoat.
Kauno ketkihieng kumwailehr kadehde en mehlelo. Kumwail kehnehr Sapwellime kaweid oh kadehdehier Sapwellime manaman. Oh ma kumwail pahn doulahte oh rapahki Ih, E pahn ketin doulahte oh ketkihieng kumwail irair sarawi kan. Pwehki met oh kisakis teikan en pali ngehn, kumwail pahn alehdi manaman en wekidala pein amwail mour ong mwahu kaidehn ihte met ahpw en pil kapaida imwamwail kan, ward oh prans kan, kousapw kan, kahnihmw kan, wehi kan, oh wehi laud kan pwehki amwail mwahu.
E pahn mwein ekei pak apwal en kilangada lipwe, ahpw kolokoloweite pil ekis, pwe “soahng kan me aramas saikinte kilang de rong, soahng kan me aramas saikinte lemehda en kak wiawi, iei me Koht ketin kaunopadahng irail kan me kin poakoahng ih” oh pahsan Ih (1 Korint 2:9; pil kilang D&C 76:10; 133:45).
I kadehdehki mehlelpen rongamwahu kowpurupwurdo en Sises Krais oh mehlelpen met, Sapwellime Mwomwohdiso. I kadehdehki koaros mohngiongi oh ngeni unsek me Koht ketin ieias, me Sises Krais iei Sapwellime Iehros me ketin moangehda Mwomwohdiso lap wet. Kitail pil pwurehng ahniki pohn sampah soukohp, met me iei President Thomas S. Monson.
Kitail en tamataman erein, padahk en Kirtland oh kolokoloweite pil ekis—mehnda ma soahng koaros sohte nohn mwahu. Ese oh tamataman met: Kauno ketin poakohng kumwail. E ketin tamataman kumwail. Oh E pahn ketin utungada irail akan me kin dadaurete ni pwoson lel imwi (tehkD&C 20:25).
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen First Presidency Message, January 2010. Pohnpeian. 09361 885