Fesoasoani ia i Latou o Loo Tauivi ma le Tosina Atu i Itupa Tutusa
Na saofai faasaga mai ia te au se alii talavou aulelei pe faatoa 20 ma ona tupu ona tausaga. Na faatosina lava si ana ataata, e ui ina sa le o taimi uma na ataata ai i le taimi na ma talanoa ai. O le mea na sili ona ou matauina o le tiga faalelagona lea na ou iloa atu lava i ona mata.
“Ou te le iloa pe tatau pea ona avea au ma se tagata o le Ekalesia,” o lana tala lea. “Ailoga ou te agavaa.”
“Aisea o le a e le agavaa ai?” na ou fesili atu ai.
“Ou te tosina i isi alii.”
Ou te lagona sa faapea o ia o le a ou te’i. E leai. “Ia … ?” o la’u fesili lea.
Na ou vaaia se vaaiga o le matuu ese o le mamafa mai ona foliga, a o ia lagonaina le faaauau pea o lo’u popole alofa. “Ou te le tosina atu i tamaitai. Ou te tosina i alii. Sa ou taumafai e lafoai nei lagona pe suia foi, peitai …”
Na mapuea o ia. “Aisea ua ou faapenei ai? E matuai moi lava ia lagona.”
Sa ou nofonofo ona ou faapea atu lea, “Ou te manaomia nai nisi faamatalaga ae ou te le’i fautuaina oe. E te iloa, o le tosina atu i le itupa tutusa, e le o se agasala, ae o le faatinoina o na lagona o le agasala—e pei lava foi o lagona i itupa eseese. O e solia le tulafono o le ola mama?”
Na lulu lona ulu. “Leai, ou te le o solia.”
Na ou faalagolago atu i luma ma fai atu, “Faafetai lava mo lou manao e talanoaina lenei faafitauli. E manaomia ai le lototele, ma e to lo’u pulou ia te oe ona o lou tausia o lou lava mama.
“Ae mo le mafuaaga ua e faapena ai, e le mafai ona ou taliina lena fesili. Atonu e aofia ai ni vaega se tele, ma e mafai ona eseese lava e pei foi ona eseese o tagata. O nisi mea e aofia ai le mafuaaga o ou lagona, atonu e le mafai lava ona tatou iloaina i lenei olaga. Ae o le iloaina o le mafuaaga ua e maua ai lagona faapena, e le pei le taua o le iloaina e te le’i agasala. Afai o loo ogatasi lou olaga ma poloaiga, o lona uiga o loo e agavaa e auauna atu i le Ekalesia, olioli i le faaaumeaina atoa ma tagata o le ekalesia, alu atu i le malumalu, ma maua faamanuiaga uma o le Togiola a le Faaola.”
Na saofai sa’o teisi ae o ia. Sa faaauau pea ona ou fai atu, “E le lelei lou faiga o oe lava pe afai e tele ina e faailoaina oe i le itupa o loo e tosina i ai. E le na o le pau lena o ou uiga, o le mea lea aua e te ano tele i ai. O le mea muamua lava ma le taua, o oe o se atalii o le Atua, ma e alofa o Ia ia te oe.
“Ma le isi, ou te alofa ia te oe. E alolofa ou Uso o le Au Pulega Aoao ia te oe. Ou te manatuaina ai se saunoaga na faia e Peresitene Boyd K. Packer a o saunoa atu ia i latou o e tosina atu i itupa tutusa. Fai mai a ia, ‘Matou te le teena outou. E le mafai ona matou teenaina outou, aua o outou o atalii ma afafine o le Atua. O le a matou le teenaina outou, aua matou te alolofa ia te outou.’”
Sa ma talanoa mo le isi 30 minute pe a. I le iloaina e le mafai ona avea au ma faufautua patino ia te ia, na ou faatonuina ai e alu i ona taitai perisitua i le lotoifale. Ona ma faamavae lea. Ou te manatu pei uma na ou iloaina atu se vaaiga o le faamoemoe i ona mata lea sa le i ai iina i le taimi muamua. E ui ina i ai pea ona luitau e tatau ona taumafai e foia—pe tau lava o le onosaia—ae sa ia te au se lagona o le a lelei ona ia taulimaina.
E Alofa le Atua i Ana Fanau
Ina ua fesili atu se agelu ia Nifae e uiga i le Atua, na tali Nifae, “Ua ou iloa e alofa o ia i ana fanau; ae ui i lea, ou te le iloa le uiga o mea uma” (1 Nifae 11:17). O au foi ou te lagolagoina e alofa le Atua i Ana fanau uma ma faapea atu o le tele o fesili, e aofia ai nisi fesili e faatatau i le tosina atu i itupa tutusa, e tatau ona faatali mo se tali i le lumanai, atonu i le olaga a sau.
O le mea e faanoanoa ai, ua manatu nisi tagata ua ia te i latou ia tali uma i le taimi nei ma ua faaali mai o latou manatu i le tele o nofoaga. O le mea e lelei ai, o na ituaiga tagata e le o tautatala e fai ma sui O Le Ekalesia a Iesu Keriso o le Au Paia o Aso e Gata Ai.
E ui ou te talitonu o loo naunau tagata o le ekalesia e faaali atu le agalelei ia i latou e ese mai ia i latou lava, ae o le natura o le tagata pe a fetaiai ma se tulaga tatou te le malamalama i ai, tatou te solomuli mai ai. E tele ina sao lenei manatu i le tosina i itupa tutusa. E matuai laitiiti lava ni faamatalaga faatuatuaina e uiga i ai, lea e tuua ai i latou o e mananao e fesoasoani atu ma ni lagona o le le mautonu. O le tauina atu o lo’u lava le malamalama atoatoa i lenei tulaga ae ou te manao pea e fesoasoani atu, ou te ofoina atu ai ni nai fautuaga e fesoasoani ai ia i latou o e o i ai nisi e pele ia i latou po o ni uo e tosina atu i itupa tutusa.
O Le Fuafuaga o le Fiafia a lo Tatou Tama
Muamua, ia tatou matuai malamalama i le mea o loo finagalo i ai le Atua mo i tatou taitoatasi. E finagalo o Ia ina ia tatou maua uma faamanuiaga o le ola faavavau. E finagalo o Ia ina ia tatou avea faapei o Ia. Ina ia fesoasoani ia i tatou i le faia o lena mea, ua Ia tuuina mai ai ia i tatou se fuafuaga. O lenei fuafuaga ua faavae lea i upumoni e faavavau ma e le suia lava e tusa ai ma aga masani o lenei vaitaimi.
O le tasi o vaega ua sili ona taua o lenei fuafuaga o le mauaina lea o ni fanau, o se tasi o mafuaaga taua na tuua ai e Atamu ma Eva le Faatoaga o Etena (tagai 2 Nifae 2:19–25; Mose 5:10–12). Na poloaiina i laua ina “ia fanafanau ma uluuluola” (Mose 2:28), ma sa laua filifili e tausia lena poloaiga. E tatau ona tatou mulimuli ia i laua i le faaipoipoina ma saunia ni tino faaletino mo fanau agaga a le Tama Faalelagi. O le mea moni, o se mafutaga [a se ulugalii] e itupa tutusa e le ogatasi ma lenei fuafuaga.
Mo mafuaaga eseese e le vave maua ai e tagata uma ni faaipoipoga ma ni fanau. O isi atonu o le a leai se talosaga mo se faaipoipoga e maua. Atonu foi e tusa lava pe ua faaipoipoina e i ai le le mafai ona maua se fanau. Pe atonu foi o le taimi nei e le o i ai ni lagona o le tosina atu i se tagata o le isi itupa. Po o le a lava le mafuaaga, e iu lava ina maua e Lana fanau uma ia faamanuiaga silisili a le Atua, pe afai latou te mama ma faamaoni.
E ala i le faaalia o le faatuatua, taumafaiga a le tagata lava ia, ma le faalagolago i le mana o le Togiola, e mafai ai e isi ona faatoilaloina i le olaga nei le tosina atu i itupa tutusa ma faaipoipoina. Ae peitai, o isi, atonu o le a le saoloto lava mai le tosina atu i itupa tutusa i lenei olaga.
I le avea ai ma tagata o le Ekalesia, aiga, ma uo, e tatau ona tatou iloaina o i latou e tosina atu i itupa tutusa o loo feagai ma ni faatapulaaina tulaga ese e faatatau i le faaalia o o latou lagona. E ui o nisi tosina i itupa tutusa e moi, ae e le tatau ona i ai le faaalia faaletino o lenei tosina atu. O le manao mo le faamalieina o tuinanau faaletino e le faatagaina ai le ola le mama o soo se tasi, e tusa lava po o le a le itupa e tosina atu i ai. O na lagona e mafai ona malolosi, ae e le taitai lava ona malolosi atu e aveeseina mai ai i se tasi le saolotoga e filifili ai amioga tatau.
O le tuuina atu o lenei faamatalaga, ou te fia faamanino atu ai o le tosina atu lava ia, po o le a lava le faigata, e le avea lena ma tulaga e le agavaa ai se tagata. Na saunoa mai le Au Peresitene Sili, “E i ai le eseesega i le va o mafaufauga ma lagona le mama ma le auai i amioga le mama ma le isi itupa po o le itupa lava e tasi.” Afai e te le’i faia ia faaosoosoga, [o lona uiga] e te le’i solitulafono.
O le le malamalama i lena eseesega o nisi taimi e oo atu ai i le faanoanoa. Ou te lagona le tiga alofa mo i latou o e le malamalama o soo se faamanuiaga ua ofoina mai e le Atua e mafai ona maua e tagata uma o e usitai i tulafono e autu ai na faamanuiaga folafolaina (tagai MFF 130:20–21). E le tatau i se tagata e ola i le talalelei ona faanoanoa. E oo mai le faamoemoe ma le filemu mai le Fesoasoani, ma o le tali i le faanoanoa o le valaaulia lea o le Agaga Paia i o tatou olaga.
Auala e Fesoasoani Ai
Ia faapea la o oe le tagata o le aiga po o le uo a se tagata e tosina atu i itupa tutusa, ua sau ia te oe mo se fesoasoani. O le a sau tala e fai atu? O le a lau mea o le a fai?
O le a ou amata i le faailoa atu o le lototele na aumaia ai lou atalii, afafine, sou tei, po o se uo ia te oe. O le a ou faailoa atu le faatuatuaga ua tuuina mai e lena tagata. O le talanoaina o le mataupu faatasi ma se tagata faatuatuaina o se laasaga muamua lelei lea e taulimaina ai lagona le mautonu, ma e taua tele ia faafetaiaia nei laasaga muamua ma le agalelei.
O le isi, afai o oe o se matua o le tagata e tosina atu i itupa tutusa, aua nei e manatu o oe ua mafua ai na lagona. E leai se tasi, e aofia ai ma le tagata o loo tauivi ma le faafitauli, e tatau ona taumafai e tuuaia ia lava. Pe tatau foi ona tuuaia e se tasi se isi tagata—e aofia ai ma le Atua. Ia savali i le faatuatua, ma fesoasoani i le pele ia te oe ina ia ona taulimaina i le auala e sili ona lelei lenei luitau.
I le faia o lenei mea, ia iloa o le faaipoipoga e le o se tali lea e talafeagai i faafitauli uma. O le tosina atu i itupa tutusa e matuai o’oo’o lava, ma o le taumafai e fai faamalosia se mafutaga ma le isi itupa e le faapea o le a suia ai ia tosinaga. Tatou te matuai fiafia uma i se tagata na tauivi ma nei lagona pe a mafai ona faaipoipo, tausia se fanau, ma maua le fiafia faaleaiga. Peitai o isi taumafaiga ua iu i le loto nutimomoia ma aiga malepelepe.
Ma le vaega e sili ona taua, ia tatala pea lau laina o fesootaiga. O fesootaiga malamalama i le va o matua ma fanau o se faaaliga manino lea o le alofa, ma le alofa mama, e faaalia ma le agalelei, e mafai ona liua ai sootaga faaleaiga. Peitai o le alofa i se tagata o le aiga e le aofia ai le taliaina o amioga amioletonu. E moni e taliaina lau fanau e nonofo i lou fale, ae ua ia te oe le aia tatau uma e aveesea ai mai lou fale soo se amioga e faapea ona faatiga ai le Agaga o le Alii.
O Le Mataupu Faavae i le Togalaau
O le isi, mafaufau i se mataupu faavae na aoaoina i le faiga o togalaau. Fai mai se tasi tagata, afai tatou te totoina se togalaau i fatu lelei, o le a tau le manaomia tele le naifi sua vao. E faapena foi, afai tatou te faatumuina o tatou olaga i meaai faaleagaga, o le a faigofie atu ona tatou puleaina [o tatou] tuinanauga. O le uiga o lenei mea o le fausia o se siosiomaga lelei i totonu o o tatou aiga lea e manino le i ai o se aafiaga tele a le Agaga. O se siosiomaga lelei e aofia ai le faia e le aunoa faaletagata lava ia ma faaleaiga o tapuaiga, tatalo, anapogi, faitauina o tusitusiga paia, auauna atu, ma le faamasani i talanoaga, musika, tusi faitau, ma isi faasalalauga faagaeetia.
O lenei lava foi siosiomaga e oo atu i aafiaga i le lotu. O nisi tagata e tosina atu i itupa tutusa o loo i ai ni atugaluga e le’i foiaina ma e tiga ai [o latou loto] i le lotu ae le’i faamoemoeina e faatiga i ai. I se isi itu, o nisi tagata o le ekalesia latou te vavaeeseina mai a latou lio o faauoga i latou e ese mai. Afai o a tatou amioga po o upu e faavaivaiina ai se tagata mai le avea atoatoa ma se tagata o le Ekalesia, ua tatou toilalo ia i latou—faapea ma le Alii. E atili malosi atu le Ekalesia pe a tatou faaaofia ai tagata uma o le ekalesia ma faamalosi e le tasi le isi i le auauna atu ma le alofa (tagai MFF 84:110).
Atonu e uunaia oe e faamalosiau atu i le tagata o loo e taumafai e fesoasoani i ai ina ia alu atu i le taitai perisitua o le o loo umia ki o fautuaga musuia. Faamolemole e fai lena mea, ma le iloa ua talosaga mai le Au Peresitene Sili ina ia le faalauaiteleina le talanoaina o nei mataupu ma ia faia i se agaga o le alofa faaKeriso.
I Aao o le Alii
E le’i mamao atu na ou mauaina ai se tusi mai se alii e 30 ma ona tupu ona tausaga, o le o loo tauivi ma le tosina atu i itupa tutusa. E le’i faigofie lana tauiviga, ma e le’i faaipoipo lava. Ae sa ia tusia, “o loo fesoasoani mai le Alii ia te au i lo’u feagai ai ma tulaga o loo ou i ai nei, ma ou te fiafia lava e fai le mea sili ou te mafaia ma tuu atu lo’u ola i Ona aao.”
Ou te tagi ma le faamemelo ma le faaaloalo i le faatuatua ma le lototele o se alii faapena, o le o loo ola ma se luitau ou te le’i oo lava i ai. Ou te alofa ia te ia ma le faitau afe o i latou e pei o ia, alii po o tamaitai, o e o loo “tau le taua lelei”(1 Timoteo 6:12). Ou te faaviiviia ona uiga ia i latou uma o e o loo tauivi ma le—po o e o loo fesoasoani atu i isi o loo tauivi ma le—tosina atu i itupa tutusa.
Fesoasoani faaopoopo
O nisi o manatu ma gagana o loo i lenei tusiga e mai se tamaitusi na saunia e le Au Peresitene Sili ma le Korama a Aposetolo e Toasefululua mo i latou o e tosina atu i itupa tutusa. Ua faaautuina E Alofa le Atua i Ana Fanau (aitema nu. 04824). Afai e maua le tamaitusi i lau gagana, e mafai ona maua mai se kopi mai le faletusi pe kopi mai foi i le initoneti mai le www.lds.org/same-gender-attraction.