Ewe Samon Jises Kraist Epwe War Safan

Pwii me fefinei achengicheng, Ngang uwa unusen kinisou pwe ewe Samon a fen efeiechuei ai upwe kapas ngeni kemi.

Non ei mwichenap, ewe Samon a fen kapas ngeni kich non Neun kewe chon angang. Uwa pesei kemi oupwe kaeo ar pworous. Aea ren asisinen tesin met mi pung, me met ese pung, non kan wonu maram repwe feito.

Ewe ekkesiwinin me forsafanin ewe Salt Lake Tempel me ekkoch neni non Temple Square a fen fifis non ukukun nimu ier. Ren eukuk iei a pwari pwe ei angang epwe wesino nesopwonon 2026. Sia unusen kinisou ngeni meinisin ekkewe ra angang won ei watten angang.

Otun kewe wonu maram a wesino, sia fen epinano ika epini safani tiu tempel non nimu fonu. Nefinen iei me nesopwon ei ier, kich sipwe epinono pwan nimu.

Ikenai sia kinisou me esinei kokotun keutan pwan 17 tempel. Oupwe eusening non mosonoson ika uwa esinesin won kewe neni.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Pwii me fefinei achengicheng, ami mi kuna met a fis memwen mesach? Ngang uwa iotek pwe sisapw tumunungaw ngeni ei amwararen fansoun! Ewe Samon a fen emwitirano An ei angang.

Pwata kich sia keuta tempel non ei keukun fetanin? Pwata? Pwokiten ewe Samon a fen aitikich ach sipwe fori. Ekkewe feiechun kewe tempel ra anisi kochufengenin Israel won ewe veil me ruepek. Ekkei feiech ra pwan anisi me amonata ew mwichen aramas ewe epwe anisi me amonata ewe fonufan fan iten ewe Oruwen Niwinsafanito an ewe Samon.

Usun ewe soufos Isaiah a fen osuni, me an a fen achem non Handel Messaiah, nupwen Jises Kraist a niwin, “ewe amwararen ewe Samon epwe pwano, me meinisin futuk repwe kuna fengeni.”

Non ena ran, “ewe government epwe nonnom won afaran: iwe itan epwe iteni Amwarar, Chon Aninis, Ewe Kot mi Napanap, Ewe Sam Esemuch, Ewe Samonun Kinamwe.”

Jises Kraist epwe pwisin nemenem seni me ruu minen nomwun Jerusalem me ewe Minafon Jerusalem epwe “foruta non ewe eif Merika.” Seni ekkei ruu neni, I epwe emweni angangen An ewe Mwichefen.

Non ena ran, ewe Samon epwe sinneno pwe ewe “Kingen King, me Samonun Samon.” Ekkewe ra nomw ren I repwe “kokko, me kefinita, me nukuchar.”

Pwii me fefinei, iei ei fansoun en me ngang sipwe enukunuk ngeni ewe Oruwen Niwinsefanito an ach Samon me Chon Amanau, Jises Kraist. Iei ewe fansoun sipwe fori wisach chon kuno repwe kon watte euchear. Non ew fonufan mi masoweni osukosuk, ifa usun sipwe tongeni fori?

Pin ngeni iteitan non ewe tempel epwe anisikich. Non ewe imwen ewe Samon, kich sia anonga won Jises Kraist. Kich sia kaeo usun I. Sia fori pwon mi pin ach sipwe tapwei I. Kich sinei I ekis me ekis. Ach sia apwonueta ach kewe pwonen non tempel, sia aechueno ach tour ngeni an ewe Samon pechekun. Non ewe tempel, kich sia angei eppetich seni ekkewe osukosuken fonufan. Sia sinei usun ewe unusechun tong an Jises Kraist me Samach non Nang non wachemwukan! Kich sia mefi kinamwe me epechekunen ngunuch, non awewen ngeni kewe osukosuken ewe fonufan.

Iei ai pwon ngeni kemi: Iteiten chon ennetin kutta Jises Kraist repwe kuna I non ewe tempel. Ami oupwe mefi An chen. Ami oupwe kuna penuwen ami kewe eurekin kapas eis. Ami oupwe wewechuti amwararen An ewe Kapas allim.

Ngang uwa fen sinei ewe kapas eis mi namot kich meinisin sipwe penueni: Ngeni ion ika ngeni met Upwe ngeni manawei?

Ai finata pwe upwe tapwei Jises Kraist ina ew wachemwuken euchean ai finata Ngang uwa keran fori. Fansoun ai sukunen safei, Ngang uwa angei ai pwarata usun ennetin Kot ewe Sam me Noun we, Jises Kraist. Seni ena fansoun ach Chon Amanau a fen ewe faw minne Ngang uwa fen euweta manawei won. Ena finata a fen fori meinisin kewe sokofesen! Ena finata a fen fori chommong ekkoch finata ra mecheres. Ena finata a ngeniei pwopwun me fetanin Apwan anisiei ne fiu ngeni ekkewe osukosuken non manau. Mwut ngeniei upwe ngeni kemi ruu awewe.

Aewin, nupwen pwunuwei we Dantzel a mano, Ngan use tongeni tikeri neum kewe. Ikena Ngang uwa, akanamon, nichipung, me kechiwen aninis. Unusen kinisou, non An Manaman, ewe Samon a aitiei pwata atongei Dantzel a fen no ngeni nenian. Fiti ena weweiti, Ngang uwa kinamwe. Fansoun ra no, Ngang uwa tongeni ne ekisaano ai netipeta. Mwirinon, Ngang uwa epwupwunu ngeni atongei we pwunuwei Wendy. I ewe nukanapen kinikinin ai ewe oruwen awewe.

Nupwen Wendy me Ngang auwa nomw won am angang won fonu towaw, kewe chon sona ra afanga pistor ngeni chamwei me ra tikienong ewe pekkin. Nge ewe pistor ewe pek. Seni ena fansoun, manawem me ruemem ra nuokus. Inamwo Wendy me Ngang auwa mefi kinamwe ese wor tapin. Ina ewe kinamwe “minne sise tongeni weweiti.”

Pwii me fefinei, ewe Samon epwe pwan ekinamweuk! I epwe apochokunok. I epwe efeiechuk non kinamwe, fen otun osukosuk.

Kose mwochen ausening ngeni ei pwon an Jises Kraist ngonuk: Ngang upwe nom won penien mwanemi me penien fefinemi, me Nguni epwe nom non netipemi, me nei kewe chon nang repwe pwenikemino, me apochokuna kemita.

Ese wor keukun an ewe Chon Amanau epwe anisi kemi. An riaffou sisap weweiti non Gethsemane won Calvary a fis fan itemi! An ewe Achesafan esemwuch fan itemi!

Ngang uwa pesei kemi oupwe awora fansoun iteien wiik—non unusen manauemi—oupwe awateno ami weweiti ewe Achesafanin Jises Kraist. Ngasangasei a metek ren ekkewe ra nomw non tipis me rese sinei ifa usun ar repwe tou. Ngang uwa kechiw fan iten ekkewe ra riaffou non ngunur ika ekkewe ra ekichou pwokiten rese weweiti met Jises Kraist a fori fan iter.

Jises Kraist a eki won Winikapan ami tipis, ami metek, ami netipengaw, me ami nipwakingaw. Ousap ekii won winikapemi! I epwe epichikemino nupwen oua aier. I epwe efeiochu kemi ren met oua mwochen. I epwe emweni ngunumi mi kinas. Ren ami fang manauemi ngeni I, ami kekichou epwe pwaseno. Ika oupwe fori me anomwu pwon ami oupwe tapwei Jises Kraist, oupwe kuna pwe kewe fansoun mi metek non manauemi rachok mwochomwoch. Ami kewe riaffou repwene “nemenemeno non ewe pwapwan Kraist”

Esa mwo mwitir ika mang ren ami oupwe winiti chon kaeo neun Jises Kraist. Iwe oupwe kuna unusechun feiechun An Achesafan. Oupwe pwan angangech ne aninis ne ochufengeni Israel.

Pwii me fefinei kana achengicheng, non ew ran epwe war, Jises Kraist epwe niwin ngeni fenufan pwe i ewe Messiah ren engorou ier. Iwe ikanai uwa kokkori kemi oupwe fang manauemi ngeni Jises Kraist. Ngang uwa kokkori kemi oupwe aninis ne ochufengeni Israel mi toropas me amonata fonufan ngeni ewe Oruwen Niwinsafanin ewe Samon. Ngang uwa kokkor kemi oupwe kapas usun Kraist, pwarata usun Kraist, awora ami nuku non Kraist, me pwapwa non Kraist!

Feito ngeni Kraist “fangono unusen [manauemi]” ngeni I. Iei ewe mwonomwonen manauen pwapwa!

Ewe echun ese mwo fen war, achengicheng pwii me fefinei, pwokiten ewe Chon Amanau epwe niwin safan! Ewe echun ese mwo fen war pwokiten ewe Samon a awateno An angang Ewe echun ese mwo fen war ren ach sia ekkesiwini netipach me manawach ngeni Jises Kraist.

Ngang uwa tekison ne pwarata pwe Jises Kraist I ewe Noun Kot. Ngang Noun chon kaeo. Ngang uwa kinisou ren ai emon Noun chon angang. Ren An Oruwen Niwinsafan, “ningen ewe Samon epwe pwano, o aramas meinisin repwe kuna.” Ena ran epwe ureno ren pwapwan kewe mi nuku!

Non ewe pechekunen ewe kien pristut mi pin uwa kamwoch, Ngang uwa pwarano ei ennet ngeni kemi me ngeni unusen fonufan! Non iten Jises Kraist, amen.