Eb’ li ralal ut xrab’in li Dios

Anajwan nawaj aatinak chirix jun reheb’ li yaal sa’ li evangelio li jwal sa, nim ru, ut nim xwankil li kixkanab’ li Dios. A’ut wankeb’ li neke’xwech’ qix chirix li na’leb’ a’in. Moko naab’al chihab’ ta anajwan kink’ul jun na’leb’ li kixchamob’resi lin rahom chirix li yaal a’in sa’ li evangelio.

Jo’ aj k’ehol uuchil re li iglees, jun sut kinb’oqe’ sa’ jun ch’utam b’ar wi’ kiyeeman naq k’ulub’anb’ilaq chalen sa’ li kutan a’an chixjunil li kub’iha’ taab’aanumanq sa’ chixjunil li iglees aj Kristiano, wi li k’anjel taab’aanumanq rik’in ha’ ut sa’ xk’ab’a’ li Yuwa’b’ej, li K’ajolb’ej, ut li Santil Musiq’ej. Chirix a’an ke’xch’olob’ naq li na’leb’ a’in moko k’ulub’ej ta choq’ re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Chirix li ch’utub’aj-ib’ kinru chixchamob’resinkil innawom chirix k’a’ut naq laj b’eresinel kixk’e li esil a’in. Xchaq’al ru li koo’aatinak wi ut naab’al li kiqatzol.

Kixch’olob’ chiwu naq ink’a’ k’ulub’anb’il li qapaab’aal laa’o sa’ xk’ab’a’ li qana’leb’ chirix li roxichal li Dios. Kinb’antioxi chiru naq kixk’e xhoonal re xch’olob’ankil chiwu li naxpaab’ ut xchaq’rab’il lix iglees. Sa’ xraqik li qaatin, kiqaq’alu qib’ ut kiqachaq’rab’i qib’.

Naq yookin chixtz’ilb’al rix li qaatin, aal sa’ lin k’a’uxl li kixye laj b’eresinel naq eb’ laj Santil Paab’anel sa Roso’jikeb’ li Kutan ink’a’ neke’xtaw ru li neke’xk’ab’a’i a’an jo’ “li muqmuukil naʼlebʼ re li roxichal li Dios.” K’a’ru kiraj xyeeb’al? Us, wan rilom rik’in chan ru naqataw ru lix wanjik li Dios. Naqapaab’ naq li Dios Yuwa’b’ej “a’an jun winq taqenaq xloq’al” rik’in jun xxaqalil li tib’ ut b’aq okenaq li naru nach’e’man jo’ chanru li re winq; jo’kan ajwi’ li K’ajolb’ej.” Naq noko’aatinak chirix lix kristiaanil li Dios, yooko ajwi’ chi aatinak chirix li qakristiaanil laa’o.

Ut yaal a’in moko xb’aan ta naq chiqajunilo kooyiib’aak “jo’ chanru xjalam-uuch, jo’ chanru rilob’aal,” xb’aan b’an ajwi’ jo’ kixtz’iib’a laj salmista, li Dios kixye, “Laa’in xinye; Diosex laa’ex, ralalex li Nimajwal Dios chejunilex.” A’an a’in choq’ qe jun tzol’leb jwal loq’ li kik’utun wi’chik sa’ li k’ojlajik wi’chik. Li neke’raj xk’utb’al li misioneer jo’ xb’een esil, xb’een raqal, xb’een aatin, a’an naq “li Dios a’an li qaChoxahil Yuwa’, ut laa’o li ralal xk’ajol.”

Maare taaye, “A’b’an naab’al li kristiaan neke’xnaw naq laa’o ralal xk’ajol li Dios.” Yaal ut a’an, a’b’an lix nawomeb’ maare najala b’ayaq chiru li k’a’ru naqapaab’ laa’o. Choq’ reheb’ laj Santil Paab’anel sa’ Roso’jikeb’ li Kutan, li na’leb’ a’in moko yal k’oxlanb’il ta. Chi yaal b’an, naqapaab’ naq chiqajunilo ralal xk’ajol li Dios. A’an “xYuwa’ li qamusiq’,”⁶ ut sa’ xk’ab’a’ a’an wan qak’ulub’ re wulak rik’in a’an, li ch’a’aj b’ayaq xpaab’ankil choq’ reheb’ jalan.

Numenaq 200 chihab’ anajwan naq li xb’een k’utb’esink kixte rokeb’aal lix k’ojlajik li evangelio. Sa’ li kutan a’an, li saaj al aj Jose Smith kixsik’ xtenq’ sa’ choxa re xnawb’al k’a’ru iglees taaxik wi’. Rik’in li k’utb’esink kixk’ul sa’ li kutan a’an, ut rik’ineb’ li ak’ k’utb’esink k’eeb’il re, li profeet aj Jose kixk’ul xnawom chirix lix kristiaanil li Dios ut li qawanjiik rik’in a’an jo’ ralal xk’ajol.

B’antiox re a’an, naqatzol chi saqen ru naq li qaChoxahil Yuwa kixk’ut li loq’laj na’leb’ a’in sa’ xtiklajik. Nawaj xwotzb’al wiib’ li seraq’ sa’eb’ li loq’laj hu re reetalinkil chi us a’in.

Maare nanaq sa’ eech’ool li kixye li Dios re laj Moises sa’ li Q’ol Nim Xtz’aq.

Naqil naq “li Dios kiraatina laj Moises, ut kixye: Kʼe reetal, laaʼin li Qaawaʼ Dios Nimajwal, ut Maakʼaʼ Rosoʼjik, aʼan inkʼabʼaʼ.” Sa’ jalan chik aatin, laj Moises, Laa’in nawaj taanaw anihin laa’in. Chirix a’an kixye, “Ut k’e reetal, laa’at li walal.” Toja’ naq kixye, “Ut wan jun ink’anjel choq’ aawe, at Moises, li walal; ut laa’at wankat choq’ xjalam-uuch li Junaj Yo’lajenaq chiwu.” Toja’ naq kixraq rik’in, “Ut anajwan, k’e reetal, li jun chi na’leb’ a’in nink’ut chawu, at Moises, li walal.”

Chanchan naq li Dios k’ojk’o xch’ool chixk’utb’al chiru laj Moises li na’leb’ a’in: “Laa’at li walal,” ut kixye a’an oxib’ sut re. Moko kiru ta xyeeb’al ka’ajwi’ xk’ab’a’ laj Moises chi ink’a’ ta raj kixye naq a’an li ralal.

A’b’anan, chirix naq laj Moises kikana xjunes, kireek’a rib’ chi maak’a’ chik xmetz’ew xb’aan naq moko wan ta chik chiru rilob’aal li Dios. Kichal laj tza chiraalenkil. Ma nekeril li eetalil? Li k’a’ru kixye xb’een wa a’an, “At Moises, ralalat li winq, loq’onihin.”

Li rajom laj tza naq taaloq’oniiq maare ka’ajwi’ a’an re xjalb’ehinkil xch’ool laj Moises. Jun li aaleek jwal ch’a’aj kixnumsi laj Moises sa’ li hoonal a’an, a’an xnawb’al naq yal “ralal li winq” sa’ xna’aj ralal li Dios.

“Ut kikʼulman naq laj Moises kiril laj Satanas, ut kixye: Anihat laaʼat? Xbʼaan naq kʼe reetal, laaʼin jun ralal li Dios, joʼ xjalam-uuch li Junaj Yoʼlajenaq chiru.” Chi yaal, laj Moises, moko sachso ta xna’leb’ ut moko kixk’e ta rib’ chi b’alaq’iik. Kixtzol chi tz’aqal re ru ani tz’aqal a’an.

Li xkab’ li seraq’ natawman sa’ Mateo 4. Eb’ laj tzolonel ke’xk’e jo’ xk’ab’a’ “eb’ li oxib’ sut xyalb’al rix li Jesus” chanchan ta wi’ naq yal oxib’ sut taayale’q rix li Qaawa’, ut moko yaal ta a’an.

Ak xe’oksiman naab’al galon chi b’on re xch’olob’ankil ut re xk’utb’al xyaalal li aaleek a’an. Jo’ naqanaw li ch’ol naxtikib’ xch’olob’ankil naq li Jesus naxik sa’ li chaqi ch’och’, “ut naq ak xkuy xsa’ chiru ka’k’aal kutan ut ka’k’aal q’ojyin, kitz’okaak.”

Lix b’een raalehom laj tza chanchan naq wan rilom rik’in xq’axtesinkil li k’a’ru ajb’il ru sa’ tib’elej xb’aan li Qaawa’. “Ye naq eb’ li pek a’in che’jaltesiiq choq’ wa,” chan re li Kolonel.

Xkab’ li raalehom maare wan rilom rik’in xyalb’al rix li Dios, “Kut aawib’ taq’a xb’aan naq tz’iib’anb’il sa’ li Santil Hu: Tixtaqlaheb’ chaq li x’anjel chawilb’al.”

Sa’ xraqik, li rox raalehom laj tza a’an chirix li jayalihom ut choxahilal re li ruchich’och’. Chirix naq kixk’ut chiru li Jesus “li xninqal ru tenamit li wank sa’ ruchich’och’, … [laj Satanas] kixye re, “Chixjunil a’in tink’e aawe, wi taahupub’ aawib’ chi woq ut tinaaloq’oni.””

Yaal naq lix raqik li raalehom laj tza maare maak’a’ rilom rik’in li oxib’ chi yalok-ix kixb’aanu xb’een wa ut wan b’an chik rilom rik’in raalenkil li Jesukristo chixtz’ilb’al rix lix choxahilal. Chiru wiib’ sut li aaleek li jwal kaw kixb’aanu laj tza a’an: “Wi laa’at Ralal li Dios”—wi tz’aqal yaal naq nakapaab’, chab’aanu a’in malaj a’an.

K’ehomaq reetal li kik’ulman rik’in li Jesus naq ak xik re sa’ li yamyookil ch’och’ chi tijok ut chixkuyb’al xsa’: Naqataw li seraq’ chirix lix kub’iha’ li Kristo. Ut naq ki’el chaq sa’ li ha, “ki’ab’iik jun xyaab’ kuxej kichal chaq sa’ choxa, A’an a’in li walal raaro inb’aan, rik’in a’in nasaho’ inch’ool.”

Ma naqil xjuntaq’eetal? Ma nokoru chixk’eeb’al reetal li eetalil arin?

Moko nasachb’esin ta ch’oolej rajlal naq nak’ute’ chiqu chirix li qachoxahilal ut qeechanihom, laj tza, li xik’ na’ilok re li tiikilal, nokoraale chixtz’ilb’al rix.

Maak’a’jo’ raj xjalanil li naqasik’ ru naq naqanaw raj chi yaal aniho laa’o.

Wanko sa’ jun ruchich’och’ aj yalol-ix, jun ruchich’och’ re choqink, b’ar wi’ li tiikil kristiaan neke’xyal xq’e chixk’eeb’al chi uub’ej li qatiikilal, naq wanko sa’ junaq iglees ut naq naqaq’alu jun evangelio li naxtaqsi li qilob’aal ut nokoxb’oq sa’ li choxahilal.

Lix taqlahom li Jesus naq texwanq chi “tz’aqalaq eere eeru jo’ chanru li qaYuwa’ wan sa’ choxa tz’aqal re ru” a’an jun reheb’ lix saqenkil ru royb’enihom ut li tooruq chi wulak wi’. Maajun re a’in taak’ulmanq sa’ junpaat. Sa’ li raatin li Awa’b’ej Jeffrey R. Holland, taak’ulmanq a’an “sa’ xkutankil.” A’b’an li yeechi’ihom naq wi “nokochal rik’in li Kristo,” a’an naq taatz’aqloq qe qu rik’in.” A’an naraj naab’al li k’anjelak—moko yalaq k’a’ ta chi k’anjel, a’an b’an jun choxahil k’anjel. Lix k’anjel!

Jo’kan b’i’, li chaab’il esil a’an naq li qaChoxahil Yuwa’ kixye, “Xb’aan naq k’e reetal, a’in lin k’anjel ut lin loq’al—xk’eeb’al chi uxmank lix kolb’al chiru li kamk ut lix yu’am chi junelik li winq.”

Lix b’oqom li Awa’b’ej Russell Nelson “chixk’oxlankil li k’a’ru re choxa” naxk’e chiqak’oxla li qachoxahil wanjik, li naqajayali, ut li toowulaq wi’. Ka’ajwi’ naru naqak’ul li choxahilal sa’ xk’ab’a’ xtojb’al rix li maak xb’aan li Jesukristo.

Maare jo’kan naq laj tza kiraale li Jesus rik’in li yalb’a-ix a’in sa’ xtiklajik toj sa’ roso’jik lix k’anjel sa’ li ruchich’och’. Jo’ kixtz’iib’a laj Mateo, naq li Jesus k’eeb’il chiru krus, eb’ laj numelb’e “neke’xkut chi aatin, … rik’in xyeeb’al, … Wi Ralalat li Dios, kub’en chaq chiru li krus.” Loq’oninb’il taxaq li Dios sa’ xk’ab’a’ naq ink’a’ kixk’e a’an sa’ xch’ool, kixkawresi b’an li b’e re naq taqak’ul chixjunileb’ li choxahil osob’tesink.

Junelik taajultiko’q qe naq terto xtz’aq kitoje’ lix sahil qach’ool.

Ninch’olob’ xyaalal jo’ li apostoI aj Pablo naq “a’ ajwi’ li Musiq’ej rochb’een li qaam naxch’olob’ xyaalal naq ralalo li Dios: Ut wi laa’o li alal k’ajolb’ej, too’eechaninq ajwi’ maatan, taqeechani xyeechi’ihom li Dios, sum’eechaninelaqo qochb’een li Kriisto, xb’aan naq qochb’een a’an naqak’ul rahilal re naq qochb’een ajwi’ a’an taanimaaq qaloq’al.” Sa’ xk’ab’a’ li Jesukristo, amen.