O Aso e Le Tatau ona Faagaloina

O’u uso e ma tuafafine pele, o le talafaasolopito o Le Ekalesia a Iesu Keriso o le Au Paia o Aso e Gata Ai i lenei tisipenisione, ua matuā iloga ona faatumulia i aafiaga paia o loo faapupula mai ai le ala o loo taialaina ai e le Alii Lana Ekalesia. Ae, e i ai se vaitau e tasi e sefulu tausaga i lo tatou talafaasolopito, o loo matuai tumatila i luga a’e o isi—o le sefulu tausaga mai le 1820 e oo i le 1830. Na amata i le aafiaga o le Perofeta o Iosefa Samita i le Vao Paia i le tautotogo o le1820, ina ua ia vaai i le Atua le Tama ma Lona Alo o Iesu Keriso, ma faaauau ai seia oo i le aso 6 Aperila 1830, o lena sefulu tausaga e le pei lava o se isi.

Mafaufau i nei mea ofoofogia na tutupu! Sa talanoa le perofeta talavou ma le agelu o Moronae, sa faaliliuina papatusi auro, ma lolomi le Tusi a Mamona. Sa avea o ia ma meafaigaluega lea na ala mai ai le toefuataiina mai o le Perisitua Arona ma le Perisitua Mekisateko, ona ia faatulagaina lea o le Ekalesia! Na faamatalaina foi e Oliva Kaotui lena vaitau: “O aso nei e le tatau ona faagaloina.” O loo faaauau pea ona tutupu mea faavavega e oo mai i le aso lenei.

Tuu mai se’i ou matua lototoa e faapea atu, o le tausaga lenei ua tatou amatalia ai se sefulu tausaga e ono faamaonia lona tumatila e pei o isi foi na sosoo mai ma lena sefulu tausaga e le mafaatusalia na faavaeina ai le Ekalesia lea ua toeitiiti atoa le lua seneturi talu ai.

Se’i o’u faamatala atua. I le va o le 2024, ma le 2034, o le a tatou vaaia ai mea musuia e tutupu ona o avanoa le mafaatusalia e auauna atu ai, e soofaatasi ai ma tagata o le au paia ma uo, ma folasia atu Le Ekalesia a Iesu Keriso o le Au Paia o Aso e Gata Ai i le tele o isi tagata nai lo le taimi muamua.

O lea ua tatou faatoa molimauina le mana o se taimi faasolopito moni, ina ua tatou faamanatuina ma le fiasefulu miliona le aso soifua lona 100 o Peresitene Russell M. Nelson.

I le lipotiina o le aso soifua o Peresitene Nelson, na tusia ai e le, Newsweek se tala tomua na faitauina faapea, “O Le Taitai Faalelotu Aupito Matua Ua Aulia Lona 100 Tausaga.” Ona latou lisiina ai lea o ta’ita’i faatuatua aupito matutua e to’a 10—na muamua Peresitene Nelson i se lisi na aofia ai Pope Francis ma le Dali Lama.

O le faamatalaga lenei mai se tusiga a le New York Times na avea ma sui o le tele o tala faavaomalo: “I se faataamilosaga o palota faaperesitene i le [Iunaite Setete], lea na musuia ai le mafaufau loloto e uiga i le loa o le soifua ma le taitaiga, o le tulaga iloga ua ausia e Mr. Nelson ua fautuaina mai ai e faapea, pe ā i lana lava ekalesia, o se aso soifua ua tolu mata’i-numera e le aofia ai se atuatuvalega tele. O loo tumau pea o ia o se tamalii lauiloa i tagata o le ekalesia, o ē vaai atu i lo latou peresitene e le na o se ta’ita’i faapitoa ae o se ‘perofeta, tagatavaai, ma se talifaaaliga.’”

Oka so tatou faafetai ona ua avea le aso soifua iloga o Peresitene Nelson ma se avanoa mo i tatou e folasia atu ai se aofia i le lalolagi atoa i se perofeta a le Atua, o se faamanatuga e le tatau lava ona faagaloina.

I le amataga o le tautotogo, sa tatalaina ai se nofoaga mo faatauga sa toefaafouina i le lotoa o le malumalu—na aofia ai se faaaliga o fu’a faavaomalo e fai ma sui o atunuu o loo aloa’ia ai le Ekalesia. O le faitotoa ulufale o le nofoaga mo faatauga e makaina i se maafaamanatu maamora ua vane ai upu faaperofeta nei: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai.”

E moni lava, o mea iloga o le a tutupu i le isi 10 tausaga e aofia ai se faaaliga e tasi o lenei valoaga a Isaia ua faataunuuina.

Mafaufau i le aofaiga le mafaatusalia o faletatala mo maimoaga i malumalu ma faapaiaga ua fuafuaina e fai i le isi sefulu tausaga, o se aofaiga faaolioli o le 164 malumalu ma isi. Manatu i le fiasefulu o miliona o outou ma a outou uo o savavali atu i se maota o le Alii. O le ogatotonu faafaatusa o nei mea e tutupu, o le toefaapaiaga o le Malumalu o Sate Leki, ma gaoioiga e ‘auga faatasi i ai. O aso mautinoa nei e le tatau lava ona faagaloina.

O le tausaga 2030 o le a aumaia ai avanoa i le lalolagi atoa e faamanatu ai le lua seneturi o le faatulagaina o le Ekalesia. E ui ina ua fai si vave ona fai atu i le auala o le a aloa’ia ai e le Ekalesia lenei tulaga iloga, ae o le a mautinoa le faatagaina o i tatou e valaaulia aiga, uo, paaga, ma malo faaaloalogia e “o mai ma vaai” ma ia malamalama lelei atu i le aafiaga mamana ua faia e le Ekalesia i olaga o tagata auai o le Ekalesia.

I le 2034, e faitau afe tamalii aloaia, le ‘au asiasi, ma le ‘au afeleti mai le lalolagi atoa o le a faatumulia ai magaala o le Aai o Sate Leki, o le tulaga o Taaloga a le Olimipeka i le Taumalulu. Atonu e leai se isi faataitaiga sili atu o le lotogatasitasi i le lalolagi atoa nai lo lea e aofia ai i Taaloga o le Olimipeka. O le a tulimatai e le lalolagi le Ekalesia ma ona tagata, o le a maua se anoanoai o avanoa e volenitia ai, auauna atu, ma faasoa atu tala fiafia e ala i galuega alofa—o se mea e le tatau ona faagaloina.

E nei mea o loo lupe, o le a maua ai e tagata o le ekalesia i soo se mea avanoa faateleina e faasoa atu ai tala fiafia o le talalelei a Iesu Keriso e ala i le upu ma galuega, o se sefulu tausaga e le tatau ona faagaloina.

I se fonotaga i na o nai vaiaso a o loma lona aso soifua, sa faasoa mai ai e Peresitene Nelsona le mafuaaga na te faapelepelea ai le fasifuaitau “tala fiafia.” E manino lava, na ia ta’ua, o le fasifuaitau e aumaia ai le olioli ma le fiafia. Peitai, o “tala fiafia” e tele atu mea o loo aumaia ai nai lo lena. Na ia faamatala faapea, o lenei fasifuaitau e sau mai le upu faapogai Eleni o le euangelion, o lona uiga moni lava o le “tala e lelei” po o le “talalelei.” O le fiafia ma le olioli i lenei olaga ma le isi, e soofaatasi i taimi uma ma le talalelei a Iesu Keriso. O le mea lea, o le fasifuaitau “tala fiafia” o loo pu’e mai ai le uiga faaluaina i se ala matagofie.

“Ua i ai [alii ma tamaitai], ina ia latou maua le olioli.” Ua saunia e le Tama Faalelagi le fuafuaga o le fiafia e mafai ai ona maua le olioli e ala i Ana faamanuiaga. E aofia ai i nei faamanuiaga le ola ai i Lona afioaga e faavavau o ni aiga. O le Togiola a Iesu Keriso e totonugalemu i le fuafuaga a le Atua e togiola ai i tatou. Ina ia maua le ola e faavavau, e tatau ona tatou o mai ia Keriso. A o tatou faia o lea “ma fesoasoani atu i isi e faia lena lava mea e tasi, ua tatou auai i le galuega a le Atua o le faaolataga ma le faaeaga.”

O lenei savali o le tala fiafia o le talalelei a Iesu Keriso o le savali aupito taua lea i le lalolagi. Ma o iina la e i ai le matafaioi taua a le autalavou ma talavou matutua o le Ekalesia.

Ia, e ui o lea sefulu tausaga o loma nei e ono faatumulia i aso e le tatau ona faagaloina mo tagata uma o le Ekalesia, e mafai ona faapitoa le moni o lea mea mo outou na o le tupulaga faia’e. Ua outou i ai iinei i le lalolagi ona sa filifilia outou e i ai iinei i le taimi nei. Ua ia te outou le malosiaga ma le mana e avea ma soo o Keriso i se ala e le mafaatusalia.

Na aoao mai Peresitene George Q. Cannon, “Ua faapolopoloina e le Atua agaga mo lenei tisipenisione o e ua i ai le lototoa ma le naunautai e fetaiai ma le lalolagi, ma mana uma o le tiapolo, [ma ia] … fausia le Siona a lo tatou Atua e le fefefe i soo se taunuuga.”

Ona o lena itu, ou te fia talanoa atu ai ia te outou o le tupulaga faia’e, e valaaulia outou e mafaufau i le sagisagi fiafia o le isi sefulu tausaga, o se tasi e le tatau ona faagaloina, e mafai ona avea mo oe. Ou te ofoina atu foi ni nai upu faigofie o le fautua, ma le faamalosiauga e mafai ona faamamanaina ai outou i le isi sefulu tausaga a sau.

E faapei o le toatele o outou, e i ai sa’u telefonipoto, e i ai taimi e aunoa ma se faama’ite, na te tuufaatasia se lola o atapu’e e faaali mai ai mea sa ou faia i se aso faapitoa. O se mea e ofo ai i taimi uma le tele o mea ua suia mo a’u ma lo’u aiga i na o nai tausaga.

Mafaufau i atapu’e o le a faia e lau telefoni seia oo i le 10 tausaga mai le taimi nei! E mafai ona e vaaia oe lava o faauu mai le aoga maualuga po o le kolisi, maua ou faaeega paia, alu i se misiona, faaipoipo, ma maua lau uluai pepe. Mo oe lava ia, o le a avea lenei sefulu tausaga ma tausaga e le tatau ona faagaloina. Ae o le a faaluaina o lea la afai e te tauivi malosi e avea o se malamalama i le lalolagi, i le ala e mafai ai e le tala fiafia o le talalelei a Iesu Keriso ona faamau’oaina ma faalauteleina e le gata i o outou olaga ae o i latou o outou aiga, uo, ma le au taumulimuli ia te oe i fesootaiga faaonaponei.

Atonu e te taumafaufau pe faapefea ona faia lenei mea.

Ua aoaoina i tatou e perofeta a le Atua e faia lenei mea e ala i gaoioiga faigofie e fa, ua faasino i ai o ni tiutetauave ua tofia mai le lagi: muamua, ola i le talalelei a Iesu Keriso; lua, tausia o i latou e manaomia le fesoasoani; tolu, valaaulia i latou uma e talia le talalelei; ma le lona fa, soofaatasi aiga mo le faavavau. O se mea ofoofogia, e mafai ona faia mea taitasi i ni auala e sili ona faalenatura ma masani ai.

Ou te folafola atu ia te outou o le a avea lenei sefulu tausaga ma vaitau e le tatau ona faagaloina mo outou pe afai tou te taliaina lelei nei tiutetauave ua tofia mai le lagi. Tatou mafaufau pe o a mea e ono aofia ai.

Muamua, ola i le talalelei a Iesu Keriso. Suesue upu a perofeta ma aoao ia e alofa i lou Tama o i le Lagi. Tuu atu o outou loto ia te Ia ma tauivi e savavali i Ona ala. Ia faagaeetia e ala i le “talitonuga mautu i feagaiga” lea na faamatala mai e Elder Ulisses Soares. O lea talitonuga mautu e maua mai le osia o feagaiga e mulimuli ia Iesu Keriso, ma le iloa o le a liliu mai le Faaola ma faamalolosia ma lagolagoina outou.

Tuu atu ia iloa mai e a outou uo le olioli e te lagonaina i le ola ai i le talalelei, ma o le a avea ma savali sili o le talalelei ua o latou faatoa mauaina.

Lona lua, aapa atu i le agaalofa e tausia i latou e manaomia le fesoasoani. O la outou tupulaga e tulagaese le mafaufau i ē le tagolima. Soo se taimi e tula’i mai ai ni mala ma faanatinati atu tagata o le Ekalesia e fesoasoani e faamamā le otaota ma faamafanafana ē mafatia, e foliga mai o le toatele lava e ofuina le mitiafu o “Lima Fesoasoani” o talavou ma le ‘au ta’i luasefulu ma ona tupu tausaga. O loo i ai i lo outou natura le “tauave avega [a le tasi ma le isi] ma le “faamafanafana atu ia te i latou o e e manaomia le faamafanafanaga.” O le faia o lenei mea ua tatou “faataunuuina ai le tulafono a Keriso.”

O Evan, o se tamaitiiti o le vaitausaga o le Peraimeri, sa tonu ia te ia e faaalu lana tuuaga o le taumafanafana mai le aoga, e ao ai sapalai mo le pata pinati ma sanuisi siamu e foai atu i la latou faleteuoa mo meaai i le lotoifale. Sa ia maua lea poloketi i luga o le uepisaite o le JustServe. Sa lesitala e Evan laitiiti lana vasega atoa o le aoga e fesoasoani e ao le silia ma le 700 fagu siamu! Tuu atu ia iloa e tagata o loo e auauna i ai, o lou popolega mo i latou e faavae i lou alofa i le Atua ma lou manao e fai i ou tuaoi ia faapei o oe lava.

Lona tolu, valaaulia tagata uma ia talia le talalelei. O le tausaga nei sa tatou tatalaina ai ni misiona fou se 36 i le salafa o le lalolagi ia taulima ai i latou uma ua mananao e faamisiona tala’i. I se vaitau ua toatele le autalavou ua filifili e o ese mai gaoioiga aloaia faalelotu, o se mea ofoofogia lenei ma o loo tautala i le natura ofoofogia o a outou molimau. Pe o le auauna atu o se faifeautalai faamisiona pe leai, faamolemole ia iloa lou gafatia iloga e faatosina lau tupulaga a o e alofa, faasoa atu, ma valaaulia i latou e sailiili i le talalelei a Iesu Keriso.

Lona fa, soofaatasi aiga mo le faavavau. A o o’u asia malumalu i le salafa o le lalolagi, ou te maofa i ni aofa’iga tetele na’ua o talavou o laulaututu, e faatalitali i le potu papatiso ma le aofaiga faateleina o talavou matutua ua auauna atu o ni tagata fai sauniga. Talu ai nei, sa i ai se vaega o talavou e silia ma le 600 mai Sikotilani ma Aialani, sa malaga atu i le Malumalu o Preston Egelani, e faia sauniga e 4,000, o le toatele o o latou lava tuaa ua maliliu! Ou te uunaia outou ia gauai e galulue i talafaasolopito o aiga, faaalu se taimi i le malumalu, ma saunia ma le faaeteete oe lava ia avea ma ituaiga o alii po o se tamaitai ua sauni e faaipoipo i se soa e faapena foi lona agavaa i le malumalu. Ia atia’e se mamanu i lou olaga i le taimi nei ia avea le malumalu o se vaega masani o outou olaga.

Ou uso e ma tuafafine pele, a’u uo pele, atonu o le a i ai ni faigata mo i tatou taitoatasi i aso a sau. Peitai, a o tatou ulufale atu i le sefulu tausaga o loo loma o taimi e le mafaatusalia, talosia ia tatou faasoa atu le tala fiafia e ala i gaoioiga faigofie o le ola, tausia, valaaulia, ma le soofaatasia. A o tatou faia na mea, o le a faamanuiaina tatou e le Alii i ni aafiaga e le tatau ona faagaloina.

Ou te molimau atu o i latou o e faalatalata atu i le Alii ma se loto faamaoni ma le faamoemoe moni, o i latou ua i ai le suafa o le Faaola i o latou laugutu ma le Agaga Paia i o latou agaga, o i latou o e feosofi i luga o lenei faigamalaga maoae ma le mamalu, o le a outou iloaina ma vaaia ai le anoanoai o faamanuiaga faaselesitila, ma maua ai se molimau e faafofogaina outou e le Atua, e silafia outou, ma e alofa ia te outou. O le a outou oo i ni aso e le mafai lava ona faagaloina. I le suafa o Iesu Keriso, amene.