ໄວ້ວາງໃຈໃນພຣະຜູ້ເປັນເຈົ້າ
ຄວາມສຳພັນຂອງເຮົາກັບພຣະເຈົ້າຈະເຕີບໂຕຂຶ້ນໄດ້ ກໍຕໍ່ເມື່ອເຮົາເຕັມໃຈທີ່ຈະໄວ້ວາງໃຈພຣະອົງເທົ່ານັ້ນ.
ໃນຄອບຄົວຂອງເຮົາ, ບາງເທື່ອເຮົາກໍຫລິ້ນເກມໜຶ່ງທີ່ເອີ້ນວ່າ “ເກມໄວ້ວາງໃຈ.” ທ່ານອາດເຄີຍຫລິ້ນເກມນີ້ມາແລ້ວເຊັ່ນກັນ. ຄົນສອງຄົນຢືນຫ່າງກັນປະມານສອງສາມຟຸດ, ຄົນໜຶ່ງປິ່ນຫລັງໃສ່ອີກຄົນໜຶ່ງ. ດ້ວຍສັນຍານຈາກຄົນທີ່ຢູ່ທາງຫລັງ, ຄົນທີ່ຢູ່ທາງໜ້າຈະຫງາຍຫລັງລົ້ມລົງໃສ່ອ້ອມແຂນຂອງໝູ່ທີ່ກຳລັງລໍຖ້າ.
ຄວາມໄວ້ວາງໃຈ ແມ່ນຮາກຖານຂອງຄວາມສຳພັນທັງໝົດ. ເກນຄຳຖາມຕໍ່ຄວາມສຳພັນໃດໆແມ່ນ “ເຮົາຈະສາມາດໄວ້ວາງໃຈຄົນຄົນນີ້ໄດ້ບໍ່?” ຄວາມສຳພັນຈະເກີດຂຶ້ນໄດ້ ກໍຕໍ່ເມື່ອຜູ້ຄົນເຕັມໃຈທີ່ຈະໄວ້ວາງໃຈຊຶ່ງກັນແລະກັນ. ມັນບໍ່ແມ່ນຄວາມສຳພັນ ຖ້າຄົນໜຶ່ງໄວ້ວາງໃຈຈົນໝົດໃຈ ແຕ່ອີກຄົນໜຶ່ງບໍ່ມີ.
ເຮົາແຕ່ລະຄົນແມ່ນບຸດ ຫລື ທິດາທາງວິນຍານທີ່ຮັກຫອມຂອງພຣະບິດາເທິງສະຫວັນທີ່ຊົງຮັກ.1 ແຕ່ຂະນະທີ່ລຳດັບເຊື້ອສາຍທາງວິນຍານມອບຮາກຖານໃຫ້, ຕົວມັນເອງບໍ່ໄດ້ສ້າງຄວາມສຳພັນທີ່ມີຄວາມໝາຍກັບພຣະເຈົ້າ. ຄວາມສຳພັນສາມາດສ້າງຂຶ້ນໄດ້ ກໍຕໍ່ເມື່ອເຮົາເລືອກຈະໄວ້ວາງໃຈໃນພຣະອົງ.
ພຣະບິດາເທິງສະຫວັນປາດຖະໜາທີ່ຈະສ້າງຄວາມສຳພັນທີ່ໃກ້ຊິດ ແລະ ເປັນສ່ວນຕົວກັບລູກໆທາງວິນຍານຂອງພຣະອົງແຕ່ລະຄົນ.2 ພຣະເຢຊູໄດ້ສະແດງຄວາມປາດຖະໜານັ້ນ ເມື່ອພຣະອົງອະທິຖານວ່າ, “ເພື່ອໃຫ້ພວກເຂົາທັງໝົດເປັນອັນໜຶ່ງອັນດຽວກັນ, ໂອ້ ພຣະບິດາເອີຍ, ຂໍໂຜດໃຫ້ພວກເຂົາຢູ່ໃນເຮົາທັງສອງເໝືອນກັນ, ເໝືອນດັ່ງພຣະອົງສະຖິດຢູ່ໃນຂ້ານ້ອຍ, ແລະ ຂ້ານ້ອຍຢູ່ໃນພຣະອົງ, ຂໍໃຫ້ພວກເຂົາເປັນອັນໜຶ່ງອັນດຽວກັນ.”3 ຄວາມສຳພັນທີ່ພຣະເຈົ້າສະແຫວງຫາກັບລູກທາງວິນຍານແຕ່ລະຄົນນັ້ນມີຄວາມໃກ້ຊິດ ແລະ ເປັນສ່ວນຕົວຫລາຍ ຈົນວ່າພຣະອົງຈະແບ່ງປັນທຸກສິ່ງທີ່ພຣະອົງມີ ແລະ ທຸກຢ່າງທີ່ພຣະອົງເປັນ.4 ຄວາມສຳພັນທີ່ເລິກເຊິ່ງ ແລະ ຍືນຍົງນັ້ນສາມາດພັດທະນາໄດ້ ກໍຕໍ່ເມື່ອມັນຖືກສ້າງຂຶ້ນເທິງຄວາມໄວ້ວາງໃຈທີ່ດີພ້ອມ ແລະ ທັງໝົດເທົ່ານັ້ນ.
ສຳລັບສ່ວນຂອງພຣະອົງ, ພຣະບິດາເທິງສະຫວັນໄດ້ເຮັດວຽກຕັ້ງແຕ່ຕົ້ນ ເພື່ອສື່ສານຄວາມໄວ້ວາງໃຈທີ່ແນ່ນອນຂອງພຣະອົງໃນສັກກະຍະພາບແຫ່ງສະຫວັນຂອງລູກໆຂອງພຣະອົງແຕ່ລະຄົນ. ຄວາມໄວ້ວາງໃຈເປັນຮາກຖານຂອງແຜນທີ່ພຣະອົງໄດ້ນຳສະເໜີ ເພື່ອຄວາມເຕີບໂຕ ແລະ ຄວາມກ້າວໜ້າຂອງເຮົາ ກ່ອນທີ່ເຮົາຈະມາສູ່ແຜ່ນດິນໂລກ. ພຣະອົງຈະສິດສອນເຮົາກ່ຽວກັບກົດນິລັນດອນ, ການສ້າງໂລກ, ມອບຮ່າງກາຍທີ່ເປັນມະຕະແກ່ເຮົາ, ມອບຂອງປະທານໃນການເລືອກດ້ວຍຕົວເອງແກ່ເຮົາ, ແລະ ອະນຸຍາດໃຫ້ເຮົາຮຽນຮູ້ ແລະ ເຕີບໂຕ ໂດຍການເລືອກຂອງເຮົາເອງ. ພຣະອົງປະສົງໃຫ້ເຮົາເລືອກທີ່ຈະຕິດຕາມກົດຂອງພຣະອົງ ແລະ ກັບຄືນໄປຊື່ນຊົມກັບຊີວິດນິລັນດອນກັບພຣະອົງ ແລະ ພຣະບຸດຂອງພຣະອົງ.
ໂດຍທີ່ຮູ້ວ່າເຮົາຈະບໍ່ເລືອກແຕ່ສິ່ງທີ່ດີສະເໝີໄປ, ພຣະອົງຍັງໄດ້ກະກຽມຫົນທາງສຳລັບເຮົາເພື່ອໜີຈາກຜົນສະທ້ອນຂອງການເລືອກທີ່ບໍ່ດີ. ພຣະອົງໄດ້ປະທານພຣະຜູ້ຊ່ວຍໃຫ້ລອດໃຫ້ແກ່ເຮົາ—ພຣະບຸດຂອງພຣະອົງ, ພຣະເຢຊູຄຣິດ—ໃຫ້ຊົດໃຊ້ການບາບຂອງເຮົາ ແລະ ເຮັດໃຫ້ເຮົາສະອາດອີກຄັ້ງ ໂດຍມີການກັບໃຈເປັນເງື່ອນໄຂ.5 ພຣະອົງເຊື້ອເຊີນໃຫ້ເຮົາໃຊ້ຂອງປະທານອັນລໍ້າຄ່າແຫ່ງການກັບໃຈເປັນປະຈຳ.6
ພໍ່ແມ່ທຸກຄົນຮູ້ວ່າ ມັນຍາກເທົ່າໃດທີ່ຈະເຊື່ອໃຈລູກຫລາຍພໍ ທີ່ຈະປ່ອຍໃຫ້ເຂົາຕັດສິນໃຈດ້ວຍຕົວເອງ, ໂດຍສະເພາະເມື່ອພໍ່ແມ່ຮູ້ວ່າ ລູກມີແນວໂນ້ມທີ່ຈະເຮັດຜິດພາດ ແລະ ຕ້ອງທົນທຸກທໍລະມານກັບຜົນທີ່ຕາມມາ. ແຕ່ພຣະບິດາເທິງສະຫວັນອະນຸຍາດໃຫ້ເຮົາເຮັດການເລືອກ ທີ່ຈະຊ່ວຍໃຫ້ເຮົາເອື້ອມເຖິງສັກກະຍະພາບແຫ່ງສະຫວັນຂອງເຮົາ! ດັ່ງທີ່ແອວເດີ ແດວ ຈີ ເຣັນລັນ ໄດ້ສິດສອນ, “ເປົ້າໝາຍຂອງ [ພຣະອົງ] ໃນການເປັນພໍ່ແມ່ ບໍ່ແມ່ນຈະໃຫ້ລູກໆຂອງພຣະອົງ ເຮັດ ສິ່ງທີ່ຖືກຕ້ອງ; ແຕ່ແມ່ນໃຫ້ລູກໆຂອງພຣະອົງ ເລືອກ ທີ່ຈະເຮັດສິ່ງທີ່ຖືກຕ້ອງ ແລະ ໃນທີ່ສຸດກາຍເປັນເໝືອນດັ່ງພຣະອົງ.”7
ເຖິງແມ່ນວ່າ ພຣະເຈົ້າຈະໄວ້ວາງພຣະໄທໃນຕົວເຮົາກໍຕາມ, ຄວາມສຳພັນຂອງເຮົາກັບພຣະອົງຈະເຕີບໂຕຂຶ້ນໄດ້ ກໍຕໍ່ເມື່ອເຮົາເຕັມໃຈທີ່ຈະໄວ້ວາງໃຈໃນພຣະອົງເທົ່ານັ້ນ. ຄວາມທ້າທາຍກໍຄືວ່າ ເຮົາຢູ່ໃນໂລກທີ່ຕົກ ແລະ ທຸກຄົນກໍເຄີຍປະສົບກັບການທໍລະຍົດຕໍ່ຄວາມໄວ້ວາງໃຈ ຊຶ່ງເປັນຜົນມາຈາກຄວາມບໍ່ຊື່ສັດ, ການໃຊ້ເລ່ຫລ່ຽມ, ການບັງຄັບຈາກຄົນອື່ນ, ຫລື ສະພາບການອື່ນໆ. ເມື່ອຖືກທໍລະຍົດເທື່ອໜຶ່ງແລ້ວ, ເຮົາອາດຍາກທີ່ຈະໄວ້ວາງໃຈອີກຄັ້ງ. ປະສົບການການໄວ້ວາງໃຈໃນທາງລົບກັບມະນຸດທີ່ບໍ່ດີພ້ອມເຫລົ່ານີ້ ອາດຈະສົ່ງຜົນກະທົບຕໍ່ຄວາມເຕັມໃຈຂອງເຮົາ ທີ່ຈະໄວ້ວາງໃຈພຣະບິດາເທິງສະຫວັນທີ່ດີພ້ອມນຳອີກ.
ເມື່ອຫລາຍປີກ່ອນ, ເພື່ອນສອງຄົນຂອງຂ້າພະເຈົ້າ, ເລໂອນິດ ແລະ ວາເລັນທີນາ, ໄດ້ສະແດງຄວາມສົນໃຈໃນການກາຍເປັນສະມາຊິກຂອງສາດສະໜາຈັກ. ຂະນະທີ່ເລໂອນິດເລີ່ມຮຽນຮູ້ພຣະກິດຕິຄຸນ, ລາວໄດ້ພົບວ່າ ການອະທິຖານເປັນເລື່ອງຍາກ. ໃນຊີວິດຂອງລາວກ່ອນໜ້ານີ້, ເລໂອນິດໄດ້ທົນທຸກຈາກການໃຊ້ສິດອຳນາດໃນທາງທີ່ຜິດ ແລະ ການໃຊ້ເລ່ຫລ່ຽມ ແລະ ການບັງຄັບໂດຍຜູ້ບັນຊາການ ແລະ ໄດ້ພັດທະນາຄວາມບໍ່ໄວ້ວາງໃຈໃນຜູ້ມີສິດອຳນາດ. ປະສົບການເຫລົ່ານີ້ໄດ້ມີຜົນກະທົບຕໍ່ຄວາມສາມາດຂອງລາວ ທີ່ຈະເປີດໃຈ ແລະ ສະແດງຄວາມຮູ້ສຶກຂອງລາວຕໍ່ພຣະບິດາເທິງສະຫວັນ. ເມື່ອເວລາຜ່ານໄປ ແລະ ດ້ວຍການສຶກສາ, ເລໂອນິດກໍໄດ້ມີຄວາມເຂົ້າໃຈທີ່ດີຂຶ້ນກ່ຽວກັບລັກສະນະຂອງພຣະເຈົ້າ ແລະ ໄດ້ປະສົບກັບຮູ້ສຶກເຖິງຄວາມຮັກຂອງພຣະເຈົ້າ. ໃນທີ່ສຸດ, ການອະທິຖານກໍໄດ້ກາຍເປັນວິທີທີ່ທຳມະຊາດສຳລັບລາວທີ່ຈະສະແດງຄວາມຂອບຄຸນ ແລະ ຄວາມຮັກທີ່ລາວໄດ້ຮູ້ສຶກຕໍ່ພຣະເຈົ້າ. ຄວາມໄວ້ວາງໃຈທີ່ເພີ່ມຂຶ້ນຂອງລາວໃນພຣະເຈົ້າ ໃນທີ່ສຸດກໍເຮັດໃຫ້ລາວ ແລະ ວາເລັນທີນາເຂົ້າສູ່ພັນທະສັນຍາສັກສິດ ເພື່ອເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງເຂົາເຈົ້າກັບພຣະເຈົ້າ ແລະ ກັນແລະກັນ.
ຖ້າການສູນເສຍຄວາມໄວ້ວາງໃຈກ່ອນໜ້ານີ້ ເຮັດໃຫ້ທ່ານບໍ່ໄວ້ວາງໃຈພຣະເຈົ້າ, ກະລຸນາເຮັດຕາມຕົວຢ່າງຂອງເລໂອນິດ. ຈົ່ງອົດທົນສືບຕໍ່ຮຽນຮູ້ຫລາຍຂຶ້ນກ່ຽວກັບພຣະບິດາເທິງສະຫວັນ, ບຸກຄະລິກຂອງພຣະອົງ, ຄຸນລັກສະນະຂອງພຣະອົງ, ແລະ ຈຸດປະສົງຂອງພຣະອົງ. ຊອກຫາ ແລະ ບັນທຶກປະສົບການທີ່ຮູ້ສຶກເຖິງຄວາມຮັກ ແລະ ອຳນາດຂອງພຣະອົງໃນຊີວິດຂອງທ່ານ. ສາດສະດາທີ່ມີຊີວິດຢູ່ຂອງເຮົາ, ປະທານຣະໂຊ ເອັມ ແນວສັນ, ໄດ້ສິດສອນວ່າ ຍິ່ງເຮົາຮຽນຮູ້ກ່ຽວກັບພຣະເຈົ້າຫລາຍເທົ່າໃດ, ມັນກໍຈະຍິ່ງງ່າຍສຳລັບເຮົາທີ່ຈະໄວ້ວາງໃຈພຣະອົງຫລາຍເທົ່ານັ້ນ.8
ບາງເທື່ອ ວິທີທີ່ດີທີ່ສຸດໃນການຮຽນຮູ້ທີ່ຈະໄວ້ວາງໃຈພຣະເຈົ້າ ກໍຄືການໄວ້ວາງໃຈພຣະອົງ. ເຊັ່ນດຽວກັບ “ເກມໄວ້ວາງໃຈ” ບາງຄັ້ງເຮົາພຽງແຕ່ເຕັມໃຈຫງາຍຫລັງ ແລະ ປ່ອຍໃຫ້ພຣະອົງຮັບເຮົາ. ຊີວິດມະຕະຂອງເຮົາເປັນການທົດສອບ. ຄວາມທ້າທາຍທີ່ຍືດເຮົາຈົນເກີນຄວາມສາມາດຂອງເຮົາ ຈະເກີດຂຶ້ນເລື້ອຍໆ. ເມື່ອຄວາມຮູ້ ແລະ ຄວາມເຂົ້າໃຈຂອງເຮົາບໍ່ພຽງພໍ, ແລ້ວເຮົາຈະຊອກຫາແຫລ່ງທີ່ຈະຊ່ວຍເຫລືອເຮົາໂດຍທຳມະຊາດ. ໃນໂລກທີ່ເຕັມໄປດ້ວຍຂໍ້ມູນ, ເຮົາຈະບໍ່ພົບແຫລ່ງຂໍ້ມູນຢ່າງຫລວງຫລາຍທີ່ສົ່ງເສີມແນວທາງແກ້ໄຂບັນຫາໃຫ້ກັບຄວາມທ້າທາຍຂອງເຮົາ. ເຖິງຢ່າງໃດກໍຕາມ, ຄຳແນະນຳທີ່ລຽບງ່າຍ ແລະ ທົດສອບການເວລາໃນສຸພາສິດ ໃຫ້ແຫລ່ງທີ່ດີທີ່ສຸດ: “ຈົ່ງໄວ້ວາງໃຈໃນ [ພຣະຜູ້ເປັນເຈົ້າ] ດ້ວຍສຸດໃຈຂອງເຈົ້າ.”9 ເຮົາສະແດງຄວາມໄວ້ວາງໃຈຂອງເຮົາໃນພຣະເຈົ້າ ໂດຍການຫັນໄປຫາພຣະອົງກ່ອນ ເມື່ອປະເຊີນກັບຄວາມທ້າທາຍຂອງຊີວິດ.
ຫລັງຈາກທີ່ຂ້າພະເຈົ້າຈົບໂຮງຮຽນກົດໝາຍໃນລັດຢູທາ, ຄອບຄົວຂອງຂ້າພະເຈົ້າໄດ້ປະເຊີນກັບການຕັດສິນໃຈທີ່ສຳຄັນວ່າ ຈະທຳງານຢູ່ບ່ອນໃດ ແລະ ສ້າງບ້ານຂອງພວກເຮົາຢູ່ໃສ. ຫລັງຈາກໄດ້ປຶກສານຳກັນ ແລະ ກັບພຣະຜູ້ເປັນເຈົ້າແລ້ວ, ພວກເຮົາຮູ້ສຶກໄດ້ຮັບການຊີ້ນຳໃຫ້ຍ້າຍຄອບຄົວຂອງພວກເຮົາໄປຍັງລັດທາງຕາເວັນອອກ, ໄກຈາກພໍ່ແມ່ ແລະ ອ້າຍເອື້ອຍນ້ອງ. ຕອນທຳອິດ, ທຸກຢ່າງເປັນໄປດ້ວຍດີ, ແລະ ພວກເຮົາຮູ້ສຶກໄດ້ຮັບການຢືນຢັນໃນການຕັດສິນໃຈຂອງພວກເຮົາ. ແຕ່ແລ້ວສິ່ງຕ່າງໆກໍໄດ້ປ່ຽນໄປ. ໄດ້ມີການລົດຂະໜາດຢູ່ທີ່ສຳນັກງານກົດໝາຍ, ແລະ ຂ້າພະເຈົ້າໄດ້ປະເຊີນກັບການຕົກງານ ຫລື ສູນເສຍປະກັນໄພສຸຂະພາບ ໃນເວລາດຽວກັນກັບຕອນທີ່ລູກສາວຂອງພວກເຮົາ ດໍຣາ ໄດ້ເກີດມາກັບຄວາມທ້າທາຍທາງການແພດທີ່ຮ້າຍແຮງ ແລະ ຄວາມຕ້ອງການພິເສດໄລຍະຍາວ. ຂະນະທີ່ປະເຊີນກັບຄວາມທ້າທາຍເຫລົ່ານີ້, ຂ້າພະເຈົ້າໄດ້ຮັບການເອີ້ນໃຫ້ຮັບໃຊ້ ຊຶ່ງຕ້ອງໃຊ້ເວລາ ແລະ ຄວາມມຸ່ງໝັ້ນຫລາຍ.
ຂ້າພະເຈົ້າບໍ່ເຄີຍປະເຊີນກັບຄວາມທ້າທາຍເຊັ່ນນັ້ນມາກ່ອນ ແລະ ຮູ້ສຶກໜັກໃຈຫລາຍ. ຂ້າພະເຈົ້າເລີ່ມສົງໄສກັບການຕັດສິນໃຈທີ່ພວກເຮົາໄດ້ເຮັດ ແລະ ການຢືນຢັນທີ່ມາພ້ອມກັບມັນນັ້ນ. ພວກເຮົາໄດ້ໄວ້ວາງໃຈໃນພຣະຜູ້ເປັນເຈົ້າ, ແລະ ສິ່ງທີ່ຄວນຈະໄດ້ຜົນ. ຂ້າພະເຈົ້າໄດ້ຫງາຍຫລັງ, ແລະ ຕອນນັ້ນເບິ່ງຄືວ່າຈະບໍ່ມີໃຜຮັບຂ້າພະເຈົ້າໄວ້.
ມື້ໜຶ່ງຖ້ອຍຄຳທີ່ວ່າ “ບໍ່ຕ້ອງຖາມວ່າ ເປັນຫຍັງ; ໃຫ້ຖາມວ່າ ເຮົາຕ້ອງການໃຫ້ເຈົ້າຮຽນຮູ້ຫຍັງ” ໄດ້ເຂົ້າມາສູ່ຈິດໃຈ ແລະ ຫົວໃຈຂອງຂ້າພະເຈົ້າຢ່າງຊັດເຈນ. ບັດນີ້ຂ້າພະເຈົ້າຍິ່ງສັບສົນຫລາຍກວ່າເກົ່າ. ໃນເວລານັ້ນເອງ ຂະນະທີ່ຂ້າພະເຈົ້າສັບສົນກັບການຕັດສິນໃຈກ່ອນໜ້ານັ້ນ, ພຣະເຈົ້າໄດ້ເຊື້ອເຊີນໃຫ້ຂ້າພະເຈົ້າໄວ້ວາງໃຈພຣະອົງຫລາຍຍິ່ງຂຶ້ນ. ເມື່ອເບິ່ງຄືນຫລັງແລ້ວ, ນີ້ເປັນຈຸດວິກິດໃນຊີວິດຂອງຂ້າພະເຈົ້າ—ເປັນຊ່ວງເວລາທີ່ຂ້າພະເຈົ້າຮັບຮູ້ວ່າ ວິທີທີ່ດີທີ່ສຸດໃນການຮຽນຮູ້ທີ່ຈະໄວ້ວາງໃຈໃນພຣະເຈົ້າ ກໍຄືການພຽງໄວ້ວາງໃຈພຣະອົງ. ໃນອາທິດຕໍ່ໆມາ, ຂ້າພະເຈົ້າໄດ້ເບິ່ງດ້ວຍຄວາມປະຫລາດໃຈ ເມື່ອພຣະຜູ້ເປັນເຈົ້າໄດ້ເປີດເຜີຍແຜນຂອງພຣະອົງ ເພື່ອເປັນພອນໃຫ້ກັບຄອບຄົວຂອງພວກເຮົາ.
ຄູສອນ ແລະ ຄູຝຶກທີ່ດີຮູ້ວ່າ ການເຕີບໂຕທາງສະຕິປັນຍາ ແລະ ຄວາມເຂັ້ມແຂງດ້ານຮ່າງກາຍ ສາມາດເກີດຂຶ້ນໄດ້ ກໍຕໍ່ເມື່ອຈິດໃຈ ແລະ ກ້າມເນື້ອຖືກຍືດອອກເທົ່ານັ້ນ. ເຊັ່ນດຽວກັນ, ພຣະເຈົ້າເຊື້ອເຊີນໃຫ້ເຮົາເຕີບໂຕໂດຍການໄວ້ວາງໃຈໃນການສິດສອນທາງວິນຍານຂອງພຣະອົງ ຜ່ານທາງປະສົບການທີ່ຍືດຈິດວິນຍານ. ດັ່ງນັ້ນ, ເຮົາສາມາດແນ່ໃຈໄດ້ວ່າ ບໍ່ວ່າເຮົາຈະເຄີຍສະແດງຄວາມໄວ້ວາງໃຈແບບໃດໃນອະດີດກໍຕາມ, ອິກປະສົບການໜຶ່ງທີ່ຍືດຄວາມໄວ້ວາງໃຈກໍຍັງລໍຖ້າເຮົາຢູ່ທາງໜ້າ. ພຣະເຈົ້າສຸມໃສ່ການເຕີບໂຕ ແລະ ຄວາມກ້າວໜ້າຂອງເຮົາ. ພຣະອົງເປັນອາຈານສອນທີ່ຊ່ຽວຊານ, ເປັນຄູຝຶກທີ່ສົມບູນແບບ ຜູ້ທີ່ຈະຍືດເຮົາສະເໝີ ເພື່ອຊ່ວຍໃຫ້ເຮົາຮັບຮູ້ເພີ່ມຂຶ້ນ ເຖິງສັກກະຍະພາບແຫ່ງສະຫວັນຂອງເຮົາ. ນັ້ນຈະລວມທັງການເຊື້ອເຊີນໃນອະນາຄົດຢູ່ສະເໝີ ໃຫ້ໄວ້ວາງໃຈພຣະອົງເພີ່ມຂຶ້ນອີກໜ້ອຍໜຶ່ງ.
ພຣະຄຳພີມໍມອນສິດສອນແບບແຜນທີ່ພຣະເຈົ້າໃຊ້ຍືດເຮົາເພື່ອສ້າງຄວາມສຳພັນທີ່ແໜ້ນແຟ້ນກັບເຮົາ. ໃນປຶ້ມ ຈົ່ງຕາມເຮົາມາ, ເຮົາໄດ້ສຶກສາເມື່ອບໍ່ດົນມານີ້ກ່ຽວກັບວ່າ ຄວາມໄວ້ວາງໃຈໃນພຣະເຈົ້າຂອງນີໄຟໄດ້ຖືກທົດລອງແນວໃດ ເມື່ອເພິ່ນ ແລະ ອ້າຍນ້ອງຂອງເພິ່ນໄດ້ຖືກບັນຊາໃຫ້ກັບຄືນໄປຍັງນະຄອນເຢຣູຊາເລັມ ເພື່ອໄປເອົາແຜ່ນຈາລຶກທອງເຫລືອງ. ຫລັງຈາກທີ່ຄວາມພະຍາຍາມໃນຕອນທຳອິດຂອງເຂົາເຈົ້າລົ້ມເຫລວ, ອ້າຍນ້ອງຂອງເພິ່ນໄດ້ຍອມແພ້ ແລະ ໄດ້ກຽມທີ່ຈະກັບຄືນໄປໂດຍບໍ່ມີແຜ່ນຈາລຶກ. ແຕ່ນີໄຟໄດ້ເລືອກທີ່ຈະໄວ້ວາງໃຈໃນພຣະຜູ້ເປັນເຈົ້າຢ່າງໝົດສິ້ນ ແລະ ໄດ້ປະສົບຜົນສຳເລັດໃນການໄດ້ແຜ່ນຈາລຶກມາ.10 ປະສົບການນັ້ນໄດ້ເພີ່ມຄວາມເຂັ້ມແຂງຂອງນີໄຟໃນພຣະເຈົ້າ ເມື່ອທະນູຂອງເພິ່ນຫັກ ແລະ ຄອບຄົວຂອງເພິ່ນໄດ້ປະເຊີນກັບຄວາມອຶດຢາກໃນຖິ່ນແຫ້ງແລ້ງກັນດານ. ອີກຄັ້ງ, ນີໄຟໄດ້ເລືອກທີ່ຈະໄວ້ວາງໃຈໃນພຣະເຈົ້າ, ແລະ ຄອບຄົວຂອງເພິ່ນກໍໄດ້ລອດຊີວິດ.11 ປະສົບການທີ່ຕໍ່ເນື່ອງເຫລົ່ານີ້ ໄດ້ເຮັດໃຫ້ນີໄຟມີຄວາມໝັ້ນໃຈຫລາຍຂຶ້ນໃນພຣະເຈົ້າດ້ວຍຊໍ້າ ສຳລັບວຽກງານຕໍ່ເນື່ອງອັນໃຫຍ່ໂຕ ແລະ ຍືດຄວາມໄວ້ວາງໃຈໃນການສ້າງເຮືອໃຫຍ່ທີ່ເພິ່ນຈະປະເຊີນໃນບໍ່ຊ້າ.12
ໂດຍຜ່ານປະສົບການເຫລົ່ານີ້, ນີໄຟໄດ້ເພີ່ມຄວາມເຂັ້ມແຂງໃຫ້ຄວາມສຳພັນຂອງເພິ່ນກັບພຣະເຈົ້າ ໂດຍການໄວ້ວາງໃຈພຣະອົງຢ່າງສະໝໍ່າສະເໝີ ແລະ ຢ່າງຕໍ່ເນື່ອງ. ພຣະເຈົ້າໃຊ້ແບບແຜນດຽວກັນນີ້ກັບເຮົາ. ພຣະອົງເຊື້ອເຊີນເຮົາເປັນການສ່ວນຕົວ ເພື່ອເຮັດໃຫ້ຄວາມໄວ້ວາງໃຈຂອງເຮົາໃນພຣະອົງເຂັ້ມແຂງ ແລະ ເລິກເຊິ່ງຍິ່ງຂຶ້ນ.13 ແຕ່ລະເທື່ອທີ່ເຮົາຍອມຮັບ ແລະ ປະຕິບັດຕາມຄຳເຊື້ອເຊີນ, ຄວາມໄວ້ວາງໃຈໃນພຣະເຈົ້າກໍເຕີບໂຕຂຶ້ນ. ຖ້າເຮົາເມີນເສີຍ ຫລື ປະຕິເສດຄຳເຊື້ອເຊີນແລ້ວ, ຄວາມກ້າວໜ້າຂອງເຮົາກໍຈະຢຸດຈົນກວ່າເຮົາຈະພ້ອມທີ່ຈະປະຕິບັດຕາມຄຳເຊື້ອເຊີນໃໝ່.
ຂ່າວດີກໍຄື ບໍ່ວ່າເຮົາຈະເຄີຍເລືອກທີ່ຈະໄວ້ວາງໃຈພຣະເຈົ້າໃນອະດີດຫລືບໍ່ກໍຕາມ, ເຮົາສາມາດເລືອກທີ່ຈະໄວ້ວາງໃຈພຣະເຈົ້າໃນມື້ນີ້ ແລະ ຕໍ່ໆໄປ. ຂ້າພະເຈົ້າສັນຍາວ່າ ທຸກເທື່ອທີ່ເຮົາເຮັດ, ພຣະເຈົ້າຈະຢູ່ທີ່ນັ້ນເພື່ອຮັບເຮົາ, ແລະ ຄວາມສຳພັນແຫ່ງຄວາມໄວ້ວາງໃຈຂອງເຮົາຈະແຂງແກ່ນຂຶ້ນເລື້ອຍໆ ຈົນເຖິງວັນທີ່ເຮົາເປັນໜຶ່ງໃນພຣະອົງ ແລະ ພຣະບຸດຂອງພຣະອົງ. ແລ້ວເຮົາຈະປະກາດເໝືອນດັ່ງນີໄຟວ່າ, “ໂອ້ ພຣະອົງເຈົ້າເອີຍ, ຂ້ານ້ອຍໄວ້ວາງໃຈໃນພຣະອົງ, ແລະ ຂ້ານ້ອຍຈະໄວ້ວາງໃຈໃນພຣະອົງຕະຫລອດໄປ.”14 ໃນພຣະນາມຂອງພຣະເຢຊູຄຣິດ, ອາແມນ.