Tiqib’omaq eerib’ rik’in li Qaawa’ Jesukristo

Naq yookeb’ chaq chi k’iik lin kok’al wiib’, kintaweb’ li hu li neke’sahob’resin ut neke’ajsin a’b’an neke’roksiheb’ ajwi’ eetalil sa’ li seraq’ wankeb’ chi sa’. Naq naqileb’ li hu ewu, kiwulak chiwu xtenq’ankileb’ lin kok’al chixtawb’aleb’ ru li eetalil naroksi laj tz’iib’anel re xk’utb’al xnimal ru li na’leb’, jo’ ajwi’ li na’leb’ re li evangelio.

Kink’e reetal naq yoo chi k’anjelak a’in sa’ jun kutan naq lin yum iitz’inb’ej toj saaj. A’an yoo chixtikib’ankil jun ak’ hu ut yal kiraj xyalb’al xsahil li seraq’, a’b’an sa’ xk’a’uxl yoo chixsik’b’al xchamal li na’leb’ sa’ chixjunil li naril. Yoo chi oso’k xkuyum a’an, a’b’an sa’ li waam laa’in yookin chi se’ek.

Li Jesus kik’utuk rik’ineb’ li seraq’ ut li eetalil—jun riyajil li mostaas re xk’utb’al lix wankil li paab’aal, jun karneer sachenaq re xk’utb’al lix loq’al li aamej, jun alalb’ej sachenaq re xk’utb’al lix wanjik li Dios. Lix jaljookil ru aatin a’aneb’ eetalil kiroksi re xk’utb’al xnimal ru na’leb’ reheb’ li ani ke’wan “xxik [re] ab’ink.” A’b’an li ani ink’a’ neke’xsik’ xninqal ru na’leb’ ink’a’ te’xtaw ru, jo’ chanru naq naab’aleb’ li ke’ril ajwi’ li hu kiwil rik’ineb’ lin kok’al ink’a’ ke’xnaw naq neke’tawman xninqal ru ut xkomon chik li na’leb’ sa’eb’ li seraq’ a’an.

Naq li Dios Yuwa’b’ej kixq’axtesi li Ralal Junaj Chiribʼil jo’ mayej sa’ qak’ab’a’, li Jesukristo ki’ok choq’ eetalil li q’axal nim re lix junelikil rahom li qaYuwa’ sa’ Choxa choq’ qe chiqajunilo. Li Jesukristo kiwulak chi wank choq’ xKarneer li Dios.

Usilanb’ilo ut osob’tesinb’ilo chi b’oqe’k sa’ sumwanjik rik’in li Dios, ut chi jo’kan li qayu’am laa’o naru nawan jo’ reetalil li sumwank a’an. Eb’ li sumwank neke’xk’uub’ jun sumwanjik li naxk’e xwankil li Dios re qajalb’al rik’in xnumik li hoonal ut qawaklesinkil chi wulak jo’ li Kolonel, li nokoxjilosi rik’in a’an ut li qaYuwa’ ut nokoxkawresi re sutq’iik rik’ineb’ a’an.

Li junjunq chi kristiaan sa’ li ruchich’och’ a’an jun ralal malaj xrab’in li Dios ut raaro xb’aan. Naq naqasik’ ru okenk sa’ li sumwank, a’an naxnimob’resi ut naxchamob’resi li qawanjik rik’in a’an. Li Awa’b’ej Russell M. Nelson kixk’ut naq wi naqasik’ ru ok sa’ sumwank rik’in li Dios, naru nokonach’o rik’in a’an jo’ ink’a’ kooruhan rub’elaj li ok sa’ sumwank, ut a’an naxk’e xwankil chiqosob’tesinkil rik’in xkomon chik li ruxtaan ut lix rahom, jun rahok re sumwank li k’ab’a’inb’il hesed sa’ li aatinob’aal Hebreo. Lix b’ehil li sumwank nareetali li qasumwanjik rik’in li Dios—li qawanjik re hesed rik’in.

Li qaYuwa’ naraj wank chi nach’ rik’in chixjunileb’ li ralal ut lix rab’in, a’b’an laa’o tento taqasik’ ru. Naq naqasik’ ru jilok rik’in a’an sa’ sumwanjik rik’in, a’an naxk’e xwankil a’an chi jilok qik’in ut chiqosob’tesinkil.

Li Dios naxxaqab’ li chaq’rab’inb’il ut li teneb’anb’il sa’ li sumwank noko’ok wi’. Naq naqasik’ ru ok sa’ li sumwanjik a’an, naqak’ut xyaalal chiru a’an, rik’ineb’ li b’aanuhom re li junjunq chi sumwank, naq wan qach’ool chixpaab’ankil li chaq’rab’ kixxaqab’ a’an. Naq naqoxloq’iheb’ li qasumwank, naqak’e xwankil li Dios chixhoyb’aleb’ chi numtajenaq li yeechi’inb’il osob’tesihom sa’ xk’ab’a’ li sumwank a’an, jo’ xkomon chik li wankilal re jalaak ut wulak jo’ li qaKolonel. Li Jesukristo wan sa’ xyi chixjunileb’ li sumwank noko’ok wi’, ut eb’ li rosob’tesihom li sumwank k’eeb’ileb’ xwankil xb’aan lix mayej aj tojol-ix.

Li kub’iha’ chi sub’b’il rub’el ha’ nareetali li okeb’aal noko’ok wi’ re ok sa’ sumwank rik’in li Dios. Li sub’e’k ut li elk chaq rub’el ha’ nareetali lix kamik li Kolonel ut lix waklijik chi yo’yo. Naq laa’o nakub’siiik qaha’, laa’o, jo’ jun eetalil, nokokam ut nokoyo’la wi’chik sa’ lix junkab’al li Kristo ut naqak’ut xyaalal naq wan qach’ool chixk’ulb’al sa’ qab’een lix k’ab’a’ a’an. Laa’o noko’ok choq’ reetalil li sumwank a’an. Sa’ li Ak’ Chaq’rab’ naqil, “Jo’ k’ihalex li ak kub’enaq eeha’ re li Kristo, xetiqib’ eerib’ rik’in li Kristo.” Naq nakub’e qaha’, jo’ jun eetalil, naqatiqib’ qib’ rik’in li Kristo.

Li k’ojob’anb’il k’anjel re li loq’laj wa’ak jayalinb’il ajwi’ rik’in li Kolonel. Li kaxlan wa ut li ha’ neke’reetali lix tib’el ut lix kik’el li Kristo li kixhoy sa’ qak’ab’a’. Li maatan re lix tojb’al rix li maak k’eeb’il jo’ eetalil qe rajlal xamaan naq jun aj k’amol re li tijonelil, li nareetali li Kolonel, naxyeechi’i li kaxlan wa ut li ha’ qe. Naq naqatzeka ut naquk’ li reetalil lix tib’el ut lix kik’el, jo’ jun eetalil, li Kristo nawulak choq’ xkomon li qacha’al. Naqatiqib’ ajwi’ qib’ rik’in li Kristo naq noko’ok sa’ jun ak’ sumwank rajlal xamaan.

Naq noko’ok sa’ sumwank rik’in li Dios sa’ li rochoch li Qaawa’, naqakawob’resi li qasumwanjik rik’in a’an. Chixjunil li naqab’aanu sa’ li santil ochoch jayalinb’il rik’in lix k’uub’anb’il na’leb’ li qaYuwa’ choq’ qe, ut sa’ xyi a’an wan li Kolonel ut lix mayej aj tojol-ix. Li Qaawa’ tooxtzol chi junjunqil li raqal rik’ineb’ li eetalil reheb’ li k’ojob’anb’il k’anjel ut sumwank wi taqate qach’ool ut rik’in tijok taqasik’ xtawb’aleb’ chik ru.

Naq naqak’ul li loq’laj tiqib’aak sa’ li santil ochoch, nak’eeman qaliceens chixk’amb’al li loq’laj t’ikr re li santil tijonelil. A’an jun santil teneb’ank jo’ ajwi’ jun santil osob’tesink.

Sa’ naab’aleb’ li paab’aal, wan aq’ej li oksinb’il jo’ reetalil lix paab’aal ut lix yalb’al xq’e jun kristiaan chiru li Dios, ut li xchaq’al ru t’ikr oksinb’il chi kok’ aj xsa’ xb’aaneb’ li neke’xb’eresiheb’ li k’anjel re loq’onink. Li loq’laj aq’ej a’an nim xwankil choq’ reheb’ li neke’oksin re. Naqil sa’ li loq’laj hu naq sa’ najter kutan, ki’oksiman li loq’laj aq’ej li naxk’am rib’ rik’ineb’ li k’anjel re li santil ochoch.

Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, laa’o li xqasik’ ru ok sa’ sumwank rik’in li Dios sa’ li rochoch li Qaawa’ naqoksi santil aq’ej naq nokoloq’onin sa’ li santil ochoch, li nareetali li aq’ej li ki’oksiman najter sa’eb’ li k’anjel re li santil ochoch Naqatiqib’ ajwi’ qib’ sa’ li loq’laj t’ikr re li santil tijonelil, li naqoksi sa’ li santil ochoch ut sa’ li qayu’am wulaj wulaj.

Li loq’laj t’ikr re li santil tijonelil a’an nareetali ut naxjayali li Kolonel. Naq laj Adan ut li xEva ke’xyal ru li che’ ut ke’isiik sa’ li Awimq Eden, kik’ehe’ reheb’ li aqʼej tzʼuum okenaq choq’ re xtz’apb’aleb’. Ak re naq maare kimayejaak jun xul re xyiib’ankileb’ li aq’ej a’an re tz’uum—jun reetalil lix mayej li Kolonel choq’ qe. Sa’ Hebreo, li aatin Kaphar naraj naxye xtojb’al rix li maak, ut jun chik xyaalalil a’an “tz’apok.” Li loq’laj t’ikr re li santil ochoch naxjultika qe naq li Kolonel ut eb’ li rosob’tesihom lix tojb’al rix li maak neke’xkol qix chiru chixjunil li qayu’am. Naq naqatiqib’ qib’ sa’ li loq’laj t’ikr re li santil tijonelil wulaj wulaj, a’an jun xchaqal ru eetalil li nawulak jo’ xcha’al li qawanjik.

Sa’ li hu Romanos sa’ li Ak’ Chaq’rab’, naqil: “Li q’oqyin ak yoo chi nume’k ut li kutan we’ chaq. Qatz’eqaq b’i’ xk’anjel li aak’ab’ ut qatiqib’aq qib’ rik’ineb’ xk’anjeleb’aal li kutan saqenk. … Tiqib’omaq eerib’ rik’in li Qaawa’ Jesukristo.”

Ninb’antioxi naq ninru chixk’eeb’al chiwix li loq’laj t’ikr re li santil tijonelil re xjultikankil we naq li Kolonel ut eb’ li rosob’tesihom lix junelikil mayej aj tojol-ix junelik neke’xkol wix chiru lin b’eenik sa’ li ruchich’och’. Naxjultika ajwi’ we naq sa’ xpaab’ankileb’ li sumwank kin’ok wi’ rik’in li Dios sa’ li rochoch li Qaawa’, jo’ jun eetalil, nintiqib’ wib’ rik’in li Kristo, ut a’an jun kolbʼa-ibʼ aqʼej re saqen. A’an tixkol wix chiru li maa’us, tixk’e inwankil ut xkomon chik inseeb’al, ut tinixkutanob’resi ut tinixb’eresi chiru xq’ojyinal ut xch’a’ajkilal li ruchich’och’ a’in.

Ninqeb’ xwankil ut xchaq’aleb’ ru li eetalil re li loq’laj t’ikr re li tijonelil ut chan ru naq nareetali li Kristo. Nink’oxla naq li wajom re xtiqib’ankil wib’ sa’ li loq’laj t’ikr a’an jun eetalil nink’ut laa’in re a’an. A’in jun eetalil nink’ut laa’in re li Dios, moko re ta yalaq ani chik.

Jwal ninb’antioxin chirix lin Kolonel, li Jesukristo. Lix mayej re xtojb’al qix a’an li eetalil q’axal nim re lix junelikil rahom a’an ut li qaChoxahil Yuwa’ choq’ qe, rik’ineb’ li tz’aqal eetalil re rahok ut mayejak—eb’ li eetalil sa’eb’ li ruq’, li roq, ut xkʼatq lix saʼ li Kolonel—li toj ke’kana chiru xtib’el naq kiwakli chi yo’yo.

Naq ninpaab’eb’ lin sumwank ut li teneb’anb’il sa’ inb’een rik’in li Dios, jo’ xtiqib’ankil wib’ sa’ li loq’laj t’ikr re li santil tijonelil, lin yu’am naru nawan jo’ reetalil lin rahom ut lin b’antioxihom choq’ re lin Kolonel, Jesukristo, ut li wajom naq taawanq a’an wik’in junelik.

Wi maji’ nakab’aanu, nakatinb’oq chi ok’ sa’ sumwanjik rik’in li Dios rik’in li ok sa’ sumwank rik’in a’an sa’ li rochoch li Qaawa’. Tz’ileb’ rix li raatin li qaprofeet (jo’eb’ ajwi’ li chaab’il k’utum neke’tawman sa’eb’ li raqalil li neke’tawman sa’ lix k’ihaleb’ li aatin re li jolomil ch’utb’aj-ib’). A’an na’aatinak chi kok’ aj xsa’ chirixeb’ li sumwank chalen chaq rokik jo’ Awa’b’ej re li Iglees. Taw aana’leb’ sa’ li raatin chirixeb’ li osob’tesink ut li wankilal ut seeb’al li naru taak’ul rik’in xk’ulb’aleb’ ut xpaab’ankileb’ li sumwank rik’in li Dios.

Li Jolomil K’anjenel Hu naxye naq jun kristiaan ink’a’ tento taaroyb’eni toj reetal naq b’oqb’ilaq chi xik sa’ mision malaj naq ok re chi sumlaak re naq taaruuq taa’ok sa’ sumwank sa’ li santil ochoch. Tento naq wan 18 chihab’ re, naq ink’a’ chik naxik sa’ li secundaria, ut naq komon a’an sa’ li Iglees chiru numenaq jun chihab’. Tento ajwi’ naq saq ru sa’ xyu’am. Wi nakawaj xkawob’resinkil laa sumwanjik rik’in laa Yuwa’ sa’ Choxa ut li Jesukristo rik’in ok sa’ sumwank sa’ li rochoch li Qaawa’, nakatinb’oq chi aatinak rik’in laa obiisp malaj awa’b’ej re oqech, ut ye laa wajom re. A’an tatxtenq’a chixnawb’al chan ru taakawresi aawib’ re xk’ulb’aleb’ ut roxloq’inkileb’ li sumwank a’an.

Rik’in jun sumwanjik rik’in li Dios, li qayu’am naru nawulak jo’ jun yo’yookil reetalil li qajom ut li qarahom choq’ re li qaYuwa’ sa’ Choxa, li hesed naqeek’a chirix a’an, ut li qajom chi k’iik ut chi wulak jo’ li Kolonel, kawresinb’ilaq re sutq’iik rik’ineb’ a’an. Ninch’olob’ xyaalal naq nim xloq’aleb’ lix ninqi osob’tesihom li ok sa’ sumwank. Sa’ xk’ab’a’ li Jesukristo, amen.