Sipwe Kinamwe Chon Tapweno Mwirin Kraist

Sia manau non ew fansoun nupwen “ekkewe mi kinamwe chon tapweno mwirin Kraist”¹ ra weri weires mi sokkono. Ekkewe ra nuku non, fen ngeni non tekison, me pwarata usun Jises Kraist ra weri sossot fansoun meinisin, riaffou, me osukosuk.² Punuwei we, Mary, me ngang am ouse sokkono. Non ekkewe ier, aua fen kuna chommong chiechiem chon high school, chienem kewe misineri, ekkoch me nein punuwer kewe mi achengicheng, me chienem akkom non am nenien angang ra mano, usun Preseten Russell M. Nelson a fen apasa, ra sochungio ngeni ewe epek ewe ponupon. Aua fen kuna ekkoch ir mi marita non nuku me achifou ra ipweno seni ewe aanen pwon.

Netipengawan, a mano senikem emon noun noum at 23 ier ewe a mano non ew efeiengawen aksetenin taraku. Ekkoch nein chienem, chon am famini, me chon am angang ra kuna osukosuken inis mi watte.

Inetuchok sossot a fis, sia netipeta me achocho ne mwarei fengeni osach mi chou.³ Sia nonineniti mettoch ese tongeni epwe pwonuta me kon sise tongeni sipwe konu.⁴ Mettoch mi ngau ra fis ngeni aramas mi och non ei manau fonufan. Ewe enichipungun ekkei won Maui non Hawaii, eorun Chile, me otiwen Canada ir ekkoch awewen efeiengawen mettoch mi fis fan ekkoch aramas mi och ra kuna.

Sia anneani non ewe Pearl of Great Price pwe we Samon a pwar ngeni Abraham usun nonnomun ngun esemuch. Abraham a kaeo usun manau me mwen fonufan, sikita me mwan, ewe Forata, ewe kefinitan emon Chon Angasano, me ei manau fonufan, ina ewe oruwen kinikinin manau an aramas.⁵ Ewe Chon Angasano a affata:

“Pwe repwe fori ew fonufan ikewe ekkei repwe nonnom;

“Me repwe pwarireno non ei, pwe repwe kuna ika repwe fori mettoch meinisin met ewe Samon ar Kot epwe annuku ngeniir.”⁶

Iei kich meinisin sia nom ikei non ewe oruwen kinikinin ach sai ne fefeita ngeni ew muun ning ussun ew kinikinin an Kot watten kokkotun manau ese much me manau tekia. Sia feioch ren pungun finata me sia nom fan sossotun manauen fonufan. Iei ewe fansoun a kawor fan itach ach sipwe monneta ne churi Kot.⁷ Sia feioch ach sinei usun Jises Kraist me Wisan non ewe kokkot. A wor rech ewe tufich ne winiti chon An Ewe Mwichefen mi niwinsefan—Ewe Mwichefenin Jises Kraist ren Aramas mi Pin non Fansoun Soponon. Kich ekkewe mi kinamwe chon tapweno mwirin Kraist, sia achocho ne manaueni An kewe annuk. Esamo memecheres ngeni Noun kewe chon kuno. Ese pwan mecheres ngeni ewe Chon Amanau an epwe nikitu ne apwonueta An misin won fonufan.

Ekkewe pukefel mi fatoch: chommong repwe tur ngeni ew ekiek “mwongo, un, me pwapwa, pun nesor sipwene mano.⁸ Ekkoch esap ir chon nuku ra eimureno pwisin ngeni chiechier ekkewe ra pesei ewe “minafon ekiek”⁹ me sinenapen aramas.¹⁰ Rese sinei ian repwe kuna me ia ewe ennet.¹¹

Ekkewe mi kinamwe chon tapweno mwirin Kraist rese fiti ew me nein ekkena aan. Kich sia chiechioch chochon ewe neni kich mi nonnom ie. Sia tong, aea fengen, me etiwa meinisin noun Kot semirit ar repwe tapweno mwirin an Kraist afanafan.¹² Sia tapweno mwirin ewe ourour an nouch soufos achengicheng, Preseten Nelson: sia finata ewe wisen “emon chon fori kinamwe, iei me fansoun meinisin.”¹³ Ei aewin eipweipweno mwach a sopweno ne amwasanga ir me ruu ekkewe pukefel me emwenin soufos.

Non 1829 ewe Mwichefen mi niwinsefan esamo foruta, me ewe Puken Mormon esamo katou. Ew kukkun mwichen aramas mi riaffou, ra mokut me ren ewe Ngunun Kot, iwe ra tapweno mwirin ewe Soufos Joseph Smith. Ewe Samon a pwar ngeni Joseph ourour fan iten fansoun weires: “Ousap nuokus, kukkun machang; fori mi pung; mut ngeni fonufan me hell repwe chufengen ne ungonuk, pun ika ka kauuta won ai achaw, resap tongeni win.”¹⁴ I a pwan peser:

Nenengeniei non ekiek meinisin; ousap tipemwaramwar, ousap nuokus.

“… Oupwe nikitu, aneasochisi ai annuk, me oupwe muuni ewe muun nang.”¹⁵

Mi fat pwe, fetanin manauach seni nang ese siwin nupwen sia weri riaffou. Non Hebrew a wor kapasen ourour pwe sipwe “pwaracho ne feinno ngeni ewe nenien mottun king, ikewe mi wor chen ie, pwe sipwe angei umoumoch o kuna chen pwe repwe anisi kich non fansoun osupwang.”¹⁶ Jises Kraist i “ewe popun manau esemuch.”¹⁷

Ua sani ekkewe kapas an Mormon, noun we Moronai a makkei, a mwareiti “ekkewe mi kinamwe chon tapweno mwirin Kraist pokiten ar fetan kinamwe fiti ekkewe noun aramas.”¹⁸

Ren kich ekkewe non ewe Mwichefen sia achocho ach sipwe winiti ekkewe mi kinamwe chon tapweno mwirin Kraist ew ran saramaram mi awiti kich nupwen sia afota ach ekiek won ach Samon me Chon Amanau, Jises Kraist. Sossot ir pekin ei manau me ra fis non manauen meinisin aramas non ewe fonufan. Ei mi pachenong watten osukosuk nefinen fonu me aramas.

Souemwenin Mwichefen ra soun rong ei kapaseis, “Pwata emon Kot mi pung a mutata mettoch mi ngau epwe fis, akkaewin ngeni aramas murino?” me “Pwata ekkewe ir mi tupwen me ra nom non angangen ewe Samon rese ngas seni sokkun osukosuk?”

Ause sinei ponuwan meinisin; nge, am mi sinei ekkewe nongonong mi auchea minne repwe mut ngeni kich ach sipwe weri sossot, riaffou, me osukosuk fiti nuku me epinukunuk non ew fansoun mwach mi saramaram mi ewitiwiti emon me emon kich. Ese wor minen awewe a nom non pukefel mi wewe ngeni ach tou seni riaffou nap seni ewe kapas an ewe Samon ngeni Joseph Smith, ewe Soufos, nupwen a emon chon kanapus non Liberty Jail.

Ewe Samon a ekis affata:

“Ika wesewesen ngachin hell epwe sukmongeno awan mwirum, kopwe sinei, nei, pwe ekkei mettoch meinisin repwe fis pwe om mirit, me repwe fis pwe om murino.

Ewe Noun Aramas a fen mefi metekin mettoch meinisin. Ka nap seni I?

“… Ousap nuokusiti met aramas ra tongeni fori, pun Kot epwe nonnom remi fein feino chok.”¹⁹

Mi fat pwe mi wor emon Sam non Nang ewe mi sinei me tongei kich me unusen weweiti ach riaffou. Noun we, Jises Kraist, i ach Chon Amanau me Chon Angasano.

Preseten Russell M. Nelson me Preseten M. Russell Ballard ra apochokuna auchean ewe minafon oruwen tettenin puk Preach My Gospel.²⁰ Ua fittir ren ar pwapwa. Ei minafon tettenin puk, a apochokunano pukefel mi pin, a pochokun ne affata:

“Non An asoren achasefan, Jises Kraist a wata won Inisin ach metek, riaffou, me apwangapwang. Pokiten ei, I mi sinei ‘anongonong won pekin aion ifa usun an epwe anisi noun kewe aramas anongonong won ar apwangapwang.’ (Alma 7:12; nengeni pwan uwokisin 11). A tingor, ‘Feito rei,’ me nupwen sia fori, A ngeni kich asoso, epinukunuk, pochokun, weweoch, me chikar (Matthew 11:28; nengeni pwan uwokisin 29–30).

“Nupwen sia anongonong won Jises Kraist me An Achasefan, I a tongeni anisi kich ach sipwe nikitu ngeni ach kewe sosot, semwen, me metek. Sia tongeni ureno ren pwapwa, kinamwe me ouruur. Mettoch meinisin ese pungupungoch usun manau a tongeni pungoch ren ewe Achasefan an Jises Kraist.”²¹

Sia tongeni pwapwa ach sipwe chon tapweno mwirin Kraist mi kinamwe.

An Samach won nang kokkotun pwapwa fan iten Noun semirit ese pachenong chok manau me mwach me iei nge pwan ew tufichin manau esemuch, mi pachenong ew ochufengen mi amwarar ngeni ekkewe ra fan mano senikich. Meinisin mi muan repwe pung, me sipwe kuna ren fatafatoch me weweoch me mirit.

Souemwenin Mwichefen ra fen anonofengeni ei weweoch ngeni emon a fetanong nukanapen ew sipai non aunungatin kinikinin.²² Ekkewe rese sinei usun an ewe Sam kokkot rese weweiti met a fis non ewe aewin kinikinin sipai ika non ewe fansoun mwen ei manau me ekkewe popun ra fen foruta me ikewe; rese pwan weweiti ewe fatochun me pungunon a fis non ewe aunungatin kinikinin sipai, ina ewe amwararen pwonutan an ewe Sam kokkot.

Chommong rese etiwa pwe fan An tong me unusochun kokkot, ekkewe usun ita rese feioch, esap seni tipisir, nesoponon resap osukosuk.²³

Ekkewe pukefel mi fatoch: mi kinamwe chon tapweno mwirin Kraist ekkewe mi tupwen, ekkewe mi tapweno mwirin ewe Chon Amanau, me aneasochisi An annuk repwe feioch. Ew me nein ekkewe uwokisin mi auchea fan iten ekkewe mi tupwen, ese nifinifin nonnomur non manau, ina kinikinin an King Benjamin afanafan ngeni noun aramas. A pwon pwe ekkewe mi tupwen ne aneasochi ekkewe annuk ra feioch non mettoch meinisin non ei manau me “mumuta ne tonong non nang…[me ] nonnom ren Kot non ew nikinikin pwapwa ese tongeni much.”²⁴

Sia esinna pwe napengeni kich meinisin sia fen weri wonuwonun inis me ngun non manauach, ekkoch mi enichipung. Emon Sam won Nang mi tong me Noun we, Jises Kraist, i ewe mokurenapen An Mwichefen mi niwinsefan, ra fen awora ngeni kich pukefel me soufos ar repwe amonna kich, fonou kich seni feiengaw, me ngeni kich emwen ne amonna me eppeti kich. Ekkoch emwen mi namot epwe mwitir fofforun, me ekkoch ra awora eppet ngeni chommong ier me mwach. An ewe Samon kapas faniten ewe Doctrine and Covenant, kinikin 1, a pesei kich ach sipwe “aneasochis ngeni an ekkewe soufos kapas.”²⁵

Kinikin 1 a pwan fonou kich, “Oupwe monneta, oupwe monneta ngeni met epwe feito.”²⁶ Ewe Samon a awora ngeni Noun aramas ew tufich ar repwe monneta ngeni ekkewe weires repwe weri.

Ewe Samon a ngeni Preseten Brigham Young ew amwararen pwarata non January 14, 1847, non Winter Quarters.²⁷ Ei pwarata ina ew awewen an ewe Samon amonnata aramas ngeni met met epwe feito. Ekkewe Souneng mi tupwen ra fen poputani ar sai ngeni chukun nenien eppet non ewe Salt Lake Valley. Ra fen wesino ne forata ewe Nauvoo Tempel me angei angangepinen amanau. Ra fen katou seni Missouri, me ekkewe chon ninir ra asureu seni Nauvoo non ew fansoun patekich. Ewe pwarata ngeni Brigham a awora ourouren usun ar repwe monneta ngeni ewe sai. Ewe Samon a akkaewin pesei ar repwe tumunu ekkewe mi woungaw, ekkewe mi mano punuwer, ekkewe ese wor semer, me ekkewe faminien ekkewe ra angang non ewe Mormon Battalion nupwen unusen ekkewe Souneng ra soposopono won ar aweiresin sai.

Kapacheta ngeni kaworen pwan ekkoch ourour ar repwe manauoch, ewe Samon a pesei ru nongonong minne mi soposopono aean ikenai.

Aewin, A peser repwe mwareiti ewe Samon ren ar konu, ren kon, ren pworuk, me ren ew iotekin mwareiti me kinisou.”²⁸

Oruwan, ewe Samon a ouroura pwe ika ra uren netipeta, repwe kokkori ewe Samon ar Kot non iotek, pwe ngunuch repwe pwapwa.”²⁹

Ekkei ru fén ir ourour mi murino ngeni pwisin ach fansoun. Manau mi uren mwareiti, kon, me kinisou ir mi unsen feioch. Ach pwapwa me anongonong won aninisin nang non iotek ina ew aan mi manaman ach sipwe winiti ekkewe mi kinamwe chon tapweno mwirin Kraist. Akkachocho ne pwapwa epwe aninis ne ponnukano tipemwaramwar.

Ewe nesoponon mak non echo kon a atoura ewe amuchunon ponuwan non ew napanap mi ning: “Ese wor osukosuken fonufan minne nang ese tongeni echikara.”³⁰

Ren wisei Aposel noun ewe Samon Jises Kraist, ua pwarata pwe “ekkewe mi kinamwe chon tapweno mwirin Kraist repwe kuna pwisin kinamwe non ei manau me eu amwararen chusefan non nang. Ua ennetin pwarata usun pinin ewe Chon Amanau me usun ennetin An Achasefan. I ach Chon Amanau me Chon Angaseno. Non iten Jises Kraist, amen.