క్రీస్తు వంటి స్థిరత్వం

క్రీస్తు వంటి స్థిరత్వంలోని అంశాలను పరిశీలిద్దాం. ముందుగా, మనం ఎవరో తెలుసుకోవడం మరియు మన దైవిక గుర్తింపుకు కట్టుబడి ఉండడం సంయమనాన్ని తెస్తుంది. మనల్ని మనం ఇతరులతో పోల్చుకోవడం లేదా మనం కానటువంటి వ్యక్తిలా నటించడం మానుకోవడం క్రీస్తు వంటి స్థిరత్వానికి అవసరం.⁸ “దేవుని స్వభావాన్ని మనుషులు గ్రహించలేనట్లయితే, వారు తమనుతాము గ్రహించలేరు,” అని జోసెఫ్ స్మిత్ బోధించారు.⁹ మనం ప్రేమగల పరలోక తండ్రి యొక్క దైవిక కుమారులు మరియు కుమార్తెలమని తెలియకుండా దైవిక స్థిరత్వాన్ని కలిగి ఉండడం సాధ్యం కాదు.

“నిత్యత్వము కొరకు ఎంపికలు” అనే తన ప్రసంగంలో, అధ్యక్షులు నెల్సన్ మనము ఎవరమనే దాని గురించి ఈ నిత్య సత్యాలను బోధించారు: మనము దేవుని పిల్లలం, మనము నిబంధన సంతానం మరియు మనము క్రీస్తు యొక్క శిష్యులం. తరువాత, “మీరు ఈ సత్యాలను హత్తుకున్నప్పుడు, ఆయన పరిశుద్ధ సన్నిధిలో శాశ్వతంగా జీవించాలనే మీ అంతిమ లక్ష్యాన్ని చేరుకోవడానికి మన పరలోక తండ్రి మీకు సహాయం చేస్తారు” అని ఆయన వాగ్దానం చేశారు.¹⁰ మనం నిజంగా మర్త్య అనుభవాన్ని కలిగి ఉన్న దైవిక ఆధ్యాత్మిక జీవులం. మనం ఎవరమో తెలుసుకోవడం మరియు ఆ దైవిక గుర్తింపుకు నిజాయితీగా ఉండడం క్రీస్తు వంటి స్థిరత్వం యొక్క అభివృద్ధికి పునాది.

తరువాత, ఒక గొప్ప ప్రణాళిక ఉందని గుర్తుంచుకోవడం సవాళ్ళతో కూడిన పరిస్థితులలో ధైర్యాన్ని, స్థిరత్వాన్ని ఇస్తుంది. ప్రేమగల పరలోక తండ్రి యొక్క నిత్య ప్రణాళికను నెరవేర్చడంలో అతడు ఆత్మచేత నడిపించబడతాడని తెలుసు కాబట్టి, తాను చేయవలసిన పనుల గురించి “ముందుగా తెలియకపోయినను,”¹² ప్రభువు ఆజ్ఞాపించినట్లు నీఫై “వెళ్ళి, చేయగలిగాడు.”¹¹. మనం విషయాలను నిత్య దృక్పథంతో చూసినప్పుడు స్థిరత్వం వస్తుంది. ప్రభువు తన శిష్యులకు “మీ కన్నులను పైకెత్తుడి”¹³ మరియు “నిత్యత్వపు పవిత్ర సత్యములను గూర్చి మీ మనస్సులలో ఆలోచన చేయుడి”¹⁴ అని సలహా ఇచ్చారు. సవాళ్ళు గల సమయాలను ఒక నిత్య ప్రణాళికలో రూపొందించడం ద్వారా, ఒత్తిడి అనేది ప్రేమించి, సేవ చేసి, బోధించి, ఆశీర్వదించడానికి ఒక విశేషాధికారంగా మారుతుంది. నిత్య దృష్టి క్రీస్తు వంటి స్థిరత్వాన్ని సాధ్యం చేస్తుంది.

చివరకు, ఆయన ప్రాయశ్చిత్త త్యాగం ద్వారా సాధ్యం చేయబడిన క్రీస్తు యొక్క సాధ్యపరచు శక్తి, మనకు సహించడానికి మరియు ప్రబలమవ్వడానికి శక్తిని ఇస్తుంది. యేసు క్రీస్తు ద్వారా మనం దేవునితో నిబంధన చేసుకోగలం మరియు ఆ నిబంధనను పాటించడంలో బలపరచబడగలం. మన భౌతిక పరిస్థితులతో సంబంధం లేకుండా మనం ఆనందంతో మరియు ప్రశాంతతతో రక్షకునికి కట్టుబడి ఉండగలము.¹⁵ ఆల్మా 7వ అధ్యాయము క్రీస్తు యొక్క సాధ్యపరచు శక్తి గురించి అందంగా బోధిస్తుంది. పాపం నుండి మనల్ని విమోచించడంతో పాటు, ఈ జీవితంలో మన బలహీనతలు, భయాలు మరియు సవాళ్ళలో రక్షకుడు మనల్ని బలపరచగలరు.

మనం క్రీస్తుపై దృష్టి కేంద్రీకరించినప్పుడు, ఆల్మా యొక్క జనులు హీలమ్‌లో చేసినట్లుగా మన భయాలను మనం నివృత్తి చేసుకోగలము.¹⁶ బెదిరించే సైన్యాలు గుమికూడుతుండగా, ఆ విశ్వాసులైన క్రీస్తు శిష్యులు సంయమనాన్ని ప్రదర్శించారు. ఎల్డర్ డేవిడ్ ఎ. బెడ్నార్ ఇలా బోధించారు: “ప్రభువును గుర్తుంచుకోవాలని మరియు ఆయన మాత్రమే ప్రసాదించగల విమోచనను గుర్తుంచుకోవాలని ఆల్మా విశ్వాసులకు ఉపదేశించాడు.(2 నీఫై 2:8 చూడండి). మరియు రక్షకుని సంరక్షణ గురించిన జ్ఞానము జనులు తమ స్వంత భయాలను నివృత్తి చేసుకునేలా చేసింది.”¹⁷ ఇది స్థిరత్వాన్ని ఉదహరిస్తుంది.

తుఫానులో సహనం గురించి నోవహు మనకు చాలా బోధించాడు, కానీ తుఫానును ఎలా తట్టుకోవాలో బోధించింది మన గొప్ప రక్షకుడు. ఆయన తుఫానులో గొప్ప వ్యక్తి. తన అపొస్తలులతో సుధీర్ఘమైన బోధనా దినము తర్వాత, రక్షకునికి కొంత విశ్రాంతి అవసరమైయుండి, వారు పడవలో గలిలయ సముద్రానికి అవతలి వైపు వెళ్ళాలని ఆయన సూచించారు. రక్షకుడు విశ్రాంతి తీసుకుంటుండగా, తీవ్రమైన తుఫాను చెలరేగింది. గాలి మరియు కెరటాలు పడవను ముంచుతాయని బెదిరిపోయి, అపొస్తలులు తమ ప్రాణాల గురించి భయపడడం ప్రారంభించారు. గుర్తుంచుకోండి, ఆ అపొస్తలులలో చాలామంది ఆ సముద్రంలో తుఫానుల గురించి బాగా తెలిసిన మత్స్యకారులు! అయినప్పటికీ, ఆందోళన చెంది,¹⁸ వారు ప్రభువును మేల్కొలిపి, “[ప్రభూ], మేము నశించిపోవుచున్నాము; నీకు చింతలేదా?” అని అడిగారు. అప్పుడు, స్థిరత్వాన్ని ప్రదర్శిస్తూ, రక్షకుడు “లేచి గాలిని గద్దించి–నిశ్శబ్దమై ఊరకుండుమని సముద్రముతో చెప్పగా, “గాలి అణగి, మిక్కిలి నిమ్మళమాయెను.”¹⁹

ఆపై అది ఆయన అపొస్తలుల కోసం స్థిరత్వం గురించిన ఒక గొప్ప పాఠం. “అప్పుడాయన–మీరెందుకు భయపడుచున్నారు? మీరింకను నమ్మికలేకయున్నారా?” అని వారితో అన్నారు.²⁰ ఆయన లోక రక్షకుడని మరియు దేవుని బిడ్డలకు అమర్త్యత్వాన్ని, నిత్య జీవితాన్ని తీసుకురావడానికి తండ్రి చేత పంపబడ్డారని ఆయన వారికి గుర్తు చేస్తున్నారు. నిశ్చయంగా దేవుని కుమారుడు పడవలో నశించడు. ఆయనకు తన దైవత్వం గురించి తెలుసు, రక్షణ ప్రణాళిక మరియు ఉన్నతస్థితి ఉందని, ఆ ప్రణాళిక యొక్క నిత్య విజయానికి ఆయన ప్రాయశ్చిత్తం అవసరమని ఆయనకు తెలుసు కాబట్టి, ఆయన దైవిక స్థిరత్వాన్ని ఉదహరించారు.

క్రీస్తు మరియు ఆయన ప్రాయశ్చిత్తం ద్వారా అన్ని మంచి విషయాలు మన జీవితాల్లోకి వస్తాయి. మనము ఎవరమో గుర్తుంచుకొని, దయ యొక్క దైవిక ప్రణాళిక ఉందని తెలుసుకొని, ప్రభువు యొక్క శక్తిలో ధైర్యాన్ని పొందినప్పుడు, మనం అన్ని పనులను చేయగలము. మనము ప్రశాంతతను పొందుతాము. ఏ తుఫానులోనైనా మనం మంచి స్త్రీ పురుషులుగా ఉంటాము.

కష్ట సమయాల్లో మనకు సహాయం చేయడమే కాకుండా, ఇతరులను ఆశీర్వదించడానికి మరియు వారి జీవితాల్లోని తుఫానుల గుండా వారికి సహాయం చేయడానికి క్రీస్తువంటి స్థిరత్వం యొక్క ఆశీర్వాదాలను మనం కోరుకుందాం. ఈ మట్టల ఆదివారం సందర్భంగా, నేను యేసు క్రీస్తును గురించి ఆనందంగా సాక్ష్యమిస్తున్నాను. ఆయన లేచియున్నాడు! మన జీవితాలకు ఆయన మాత్రమే తీసుకువచ్చే శాంతి, ప్రశాంతత మరియు పరలోకపు స్థిరత్వం గురించి యేసు క్రీస్తు పరిశుద్ధ నామంలో నేను సాక్ష్యమిస్తున్నాను, ఆమేన్.