Kapwurupwurdohn Rahn Koaros

Mie madamadau ehu me kin kopwkopwurupwurieng mwekid en kalapw-wiewiawi me dene aramas me kin salongalah kan kin alialu pidepidekselihte wasahte kis. Ansou kis samwalahro Sohte werei, scientists semen kan en ni Max Planck Institute ong Biological Cybernetics ahpw desih song skeng ih mwekid de madamadau wet Irail wahla aramas ekei nan mwutumwuten tuhke kei o oh padahkiong irail iren kaweid kosondi mengei kei: “Alu nan lain me inen.” Sohte mehn kaweid en nan sahpw. Aramas pwukat pahn anahne kehliki pein arail mehn pepehm kan en kaweid irail.

Dahme ke medewe me irail wia?

Scientist ko kasalehda ni imwilau me, “Aramas kin [udahn] alu pidepidekselihte wasahkis ansou me irail sohte ahneki mehn kaweid ong wasa kan me re kokohlang ie.” Mwuhr re ahpw peidek rehrail, ekei irail aramas sapengki ni koapwoaroapwoar me irail pein kehlailki arail inda me re sohte pil ekis salongala, Mendahte wen laud en koapwoaroapwoar me irail ahniki, GPS o kasalehda me irail pidepidekselihkihte daiamihder en miter 20.

Dahme kitail ahneki ki kahpwal laud en aluwei nan ahl me ineno? Ekei soun roporop kan diaradahr me mehkot tikitik, kin wia kisin kemwekid tikitik ehu me kin kak tehtehlapeseng oh wekidala mehkot. Ekei kin kosoia ni mehlel me kitail koaros ahneki ehu neh me kin ekis inenen kehlail sang mehtei o. “Mweihnte Pil duwehte,” ahpw, kitail kin ahneki kahpwal en alu inen kohwei mwowe “[pwehki] laudlahn peikasal duwen iawasa me ahl ineno mih ioa.”

Sohte lipilipil ia kahrepe, met wia kisehn momour en aramas: ma sohte mehn kaweid en sahpw akan, kitail kin salongala.

E sou kapwuriamwei ia woahn tikitik, mehkot me inenen tikitik kak wiahda lapalahn wekila ehu nan atail mour kan?

I ese met sang ni ai koahiok en wia pilot. Ansou koaros me ih tepida pahn peidieng nan wasahn peidi en sompihr, ih ese me luhwen ai dodohk pahn audaudki duwen kapwungala mehkot tikitik kesempwal kan pwe en kak peidi ni keneinei kahluwa la sompihr o ong wasa me e pahn peidi ie.

Mwein kumwail pil lelohng songen mwekid wet ansou me kumwail kin dirapih sidohsa. Kisinieng, ahl sakanakan akan, sakanakan en mehn diraip ih sidohsau, soukautih—pil iangahki mwekid en soun diraip teikan—koaros kak siken uhkasang pohn ahmw ahl me pwungo. Ma kumwail sohte tehk mwahu mehn kaweid pwukat ah kumwail pahn lelohng nan lapalahn kahpwal

Met e pil doadoahk ong kitail ni paliwar.

E pil doadoahk ongete palingenitail.

Pali tohto en wekideklahn palingehn nan atail mour kan—koaros me mwahu oh me suwed koaros—kin wiawi ekis ekis kohwei ni wawai, kahk ehu nan ahnsou nan ansou kan. Duwehte irail ako me patehng onopiki Max Planck, kitail kak sohte wewehki me kitail salongasangehr wasao. Kitail pil kak kehlailki me kitail alialu nan ahl me inen. Ahpw ni mehlel o ma sohte mehn sawas en men kaweid nan sahpw akan, , kitail udahn pahn salongasang atail ahlo oh imwila wasa me kitail sohte medewe me kitail pahn mihe de lel ioa.

Met me mehlel ong emen emen aramas. E pil mehlel ong nan kousapw akan oh sahpw laud akan, pwihn ehu oh pil wasa kan. Iren pwuhk sarawi kan audaukihda karasaras tohto.

Pwuhk en Sounkopwung kan kasalehda intingihda me mwurin Joshua ah mehla, “mie ehu dih me pil kohdo … me sohte ese Kauno, pil doadoahk kan koaros me e wiaiong mehn Isrehl.”

Mendahte songen kapwuriamwei kan sang nanleng, pwaredo kan, kapitala kan, oh songen powehdi kapwuriamwei kan me seri en Isrehl kan kilahnger nan mwein Moses oh Sosua, aramas en dih en mwuhr kan sohpeisang Ahlo oh tapida alialu ni pein insenerail kan. Oh, ahpw mehlel, e sohte werei ah arail alehdi pweinen arail wiewia kan.

Ekei pak pwopwila wet kin kak lel la dih en mwuhr akan. Ekei pak e kin wiawi mwurin sounpar kei de pil sounpwong kei. Ahpw kitail koaros pahn ale koalokepe. Sohte katepen ia woahn atail kehlail ni pali ngehn ansou kei samwalahro, ni atail wie aramas kitail udahn pahn kin salongala. Met e kin wiewiawi sangete nan mwein Adam leledo ansou wet.

Ahpw koaros sohte salongala. Met sohte duwehte oaralapw apwal kan, mie mehn kaweid, sansalpen sahpw akan me kitail kak doadoahngki pwe kitail en diar wasa kitail kohkohla ie.

Oh iahngeh kan iren sawas kan?

Udahn met iangahki kapakap rahn koaros oh medemedewe iren pwuhk sarawi kan oh dodohngki dipwisou kan me rasohng Come, Follow Me. Nan ehu ehu rahn. kitail kak inenwong sehr en Koht ni karakarahk oh mehlel. Kitail kak kin medewe atail mwekid kan oh pwurehng tehk mwomwen atail ansou nan rahno—medemedewehki atail mwekid oh ineng nan Sapwelime marain. Ma kitail pahn salongala, kitail kin peki rehn Koht en kapwurehdo kitail, oh kitail inoukihdi me kitail pahn nantiong en mwahula.

Ansou en medemedewe kiong kitail ansou mwahu en kamwahuila. E wia mwetuwel en iroir ehu, wasa me kitail kak iang Kauno alu oh alehdi kaweid kan, kamwauhiala oh kalaudehla, oh mwakelekel sang ni inting oh kasansalada sang-ngehno mahsen en Samatail Nanleng. E wia ansou ehu me sarawi ansou me kitail kin tamanda atail inou kan en idahwen Krais, ansou me kitail kin alehdi wahn atail dodohk oh kainenehla kitail ki mehn sawasen ngehn o me Koht ketikiong kitail Sapwelime seri kan.

Medewehiong met ong ni pein kumwail, kapwurupwurdohn ehu ehu rahn akan. Nan atail seilok pohn ahl en klohri, kitail ese ia woahn mengei en salongala. Ahpw kisin mehkot tikitik kak kihsang kitail nan Ahl en Sounkomouro, ahpw pil mie mehkot tikitik oh mengei nan wiewia me pil kak kapwure kitail do. Ansou me rotorot kin waidohng nan atail mour kan, me e kin wiawi kerenieng ansou koaros ekei pak, atail pwurodohng pohn ahl pwungo kin ritingada atail mongiong kan ong marain en nanleng, me kin wekidala ngenitail kan, kausalahsang rotorot, masepwehk,. oh peikasal kan.

Ma kitail rapahki, mehlel “Koht pahn ketikihdong [kitail] lolokong sang sapwelime Ngehn Sarawi, ei, sang ni kisakis en Ngehn Sarawi.” Ansou me kitail kin peki, E pahn padahkiong kitail Ahlo oh sewese kitail en idahwen.

Met, ni mehlel, kitail anahne ahniki loaloapwoat ong atail pali. Kitail sohte kak en itarikihlahte dahme kitail eselahr sang rahnteio. Kitail anahne kohkohlahte mwowe pahpahrekwei.

Kitail sohte kak kehliki an meteikan arail kadehde kan kokolahte. Kitail anahne pein alehdi pein atail.

Kitail anahne en kokohwei te, mehn kakehlail en marain en nanleng.

Kitail anahne “ahnsou en kin pwurehngkatamanda en kaweliakapw.” Ansou en pein amw kaudiahl.

“Pihl me pwilipwilwei” sohte kak werei “mihmi te nan kiried.” Pwe atail madamadau oh wiewia en mwakelekel, kitail anahne mwekimwekid!

Mwurin mehkoaros, Koapwurupwurdohn rongamwahuo oh Mwomwodiso wet sohte wia mehkot ehu me wiawihte pak ehu te eri nekier. Met wia mehkot ehu me pahn wie mwekimwekid kohwei—nan ehu ehu rahn, nan ehu ehu mongiong.

Ni atail rahn akan ah kin kohwei, atail mour pil kin kohwei. Emen soun intingiada pwuhk ahpwkoasoaia nin duwe met: “Rahn ehu duwehte atail mour unsek. Ke tepida wiewia ehu mehkot, ahpw imwikihla wiewia ehu songen mehkot, pilahn en wiahda mehkot, ahpw sohte kak lel la wasao. … Oh ni imwilahn amwail mour, amwail mour pwon ahneki songen liselipingoh, te. Amwail mour unsek ahneki songen mwohmw euhte me duwehte rahn ehu.”

Kumwail men wekidala mwomwen amwail mour?

Wekidala mwomwen amwail rahn akan.

Kumwail men wekidala amwail rahn akan?

Wekila nan awa wet.

Wekidala mwomwen amwail kin medewe, pepehm, oh wia nan ansou wet.

Padil tikitik ehu mehn katanga sohp lapala ehu.

Pilok tikitik kan kak wiahda lapalahn kanihmw kei.

Kisin weren tuhke kan kak wiahla lapalahn tuhke kan.sokoia kei.

Minit oh awah kan me kitail kin dodohngkila iei block kei ong momour mwahu. Irail kak kihdo mehkot me mwahu, me pahn kamaiau kitaildahsang nan sohte itar akan,oh kahluwai kitaildalahng nan ahl en komour en mahk oh sarawi.

Ni ei patehng kumwail, I ahniki kaping laud nan ai mongiong ong ansou mwahu wet, mour kapw, kopworopwor kapw.

Kitail kin weriweriki atail kaping ong atail Koht lapalap oh mahk. Ahpwni mehlel, E wia Koht en mour kapw kan. Keimwseklahn Imwilahn Sapwelime doadoahk kan koaros iei en sewese kitail, Sapwelime seri kan, kitail en kak pweida nan seilok en mour en palio oh alehdi mour soutuk.

Kitail kak wiahla aramas kapw rehn Krais, pwe Koht inoukidahr, “Ansou me nei aramas akan pahn kin koluhla ih pahn kin mahkong irail akan me kin wiahda sapwung mwohi” oh “sohte kin pwuroahng tamanda.”

Rie kompokepahi mwanakapw oh peinakapw akan, kompokepahi kan, kitail kin salongala nan ansou kan.

Ahpw kitail kak pwurala nan ahlo. Kitail kak kaweid kitail nan rotorot oh kasongosong en mour wet oh diarada ahl en pwurala rehn Samatail Nanleng ma kitail rapahki oh alehda mehn sawas en pali ngehn kan me E ketikidahr, alehdi pein atail kaudiahl, oh nantihong idawen en kapwurupwurdohn nan ehu ehu rahn akan. Ih met mwomwen atail pahn wia sounpapahhla werek mehlel kei en atail Sounkomourndor, Sises Krais.

Ni atail pahn wia met, Koht pahn sireidohng kitail. “Kauno pahn ketin … kapaiada kumwail nan sahpw me Kauno Koht ketikiong kumwail. Kauno pahn ketin kasapwilada kumwail en wiahla aramas sarawi kei reh.”

Kitail en rapahki en pwuralahng pohn ahl pwungo ansou koaros kapwurupwurdo kan nan ehu ehu rahn oh weonlahte nantiong keidwei nan Ahl en Sises Krais ieiih me ih kapakapki. Ni mwaren Sises Krais, amen.