“Ke Poakohngie Laudsang Mehpwukat?”

Nan Nohpempe 2019, ngehi oh kempoakepahi men mwemweitlahng nan Sahpw Sarawio. Ni ansou me se mihmi mwo, se pileu kilang oh sukuhlki iren pwuhk sarawi kan duwen mour en Sises Krais. Ehu nimensengo, se keskesihnen ni oaroahr en sehd en Kalili wasahiou me dene ih wasa me Sises pwarehng Sapwellime werengko mwurin Sapwellime Iasadahu.

Mwurin Sises ah ketin Iasadahu, ni atail kin wadek nan pwuk en Sohn Irelaud 21, Piter oh werek teiko lalaid pwohngo pwon ahpw sohte seikerail.¹ Nimensengo, re kilang ohl emen keskesihnen ni oaroahro me patohwanehng irail en kesehla uhko paliteio. Mehd kopwuriamwei ong irail, uhko direkihla mwahmw.²

Re ahpw mwadangete kasawiada me ohlo iei Kauno, oh irail eri karuwaru kohla kasamwoh Ih.

Ni arail waikala uhko ni oaroahro, me direkihla mwahmw, Sises mahsanih, “Kohdo oh mwenge.“³ Sohn koasoia me “ni ansou me re mwengemwenge, Sises mahsaniong Saimon Piter, Saimon, nein Jonas pwutak, ke poakohngie laud sang mepwukat?“⁴

Ni ahi wie keskesihnen ni oaroarohte, I diarada me sapwellimen Sounkomwouro keinemweo wia ehu keinemwe me keiou kesempwal pwe ehu rahn E pahn ketin keinemwe rehi. I kin kerenieng rongada Kepitie ni ah kekeinemwe, “Russell, ke poakehngie laud sang mepwukat?“

Ke kin medewe dahme Sises songosong en mahsani ni ah ketin keinemwe rehn Piter, “Ke poakohngie laud sang mepwukat?”

Pwe kitail en kidohng kitail peidek wet nan atail mour, Kauno mwein wie kekeinemwe rehtail ia uwen atail kediroapw oh diren mehkot mwahu oh sakanakan me wie kedkedirepwi kitail oh atail ansou. Ele E ketin kekeinemwe rehn emen emen kitail ma kitail poakohng ih laud sang dipwisou en sampa wet. Met mwein e wia peidek iou me pid dahme kitail keioun kesempwalki nan mwouret, ihs me kitail pahn idawehn, oh ia mwomwen atail kin kilang atail wiewia ong atail peneinei kan oh mehn impatail kan. De mwein E kin kekeinemwe dahme kiheng kitail popohl oh peren.

Dipwisou en sampah kin kiheng kitail popohl, peren, oh meleilei me Sounkomouro ketkieng sapwellime werenko ohpil ong kitail? Ihte kelehpw me kak ketkiheng kitail popohl, peren, oh meleilei sang ni atail kin poakohng Ih oh idawehn Sapwellime padahk kan.

Ia mwomwen atail pahn sapeng peidek wet “Ke poakohngie laud sang mepwukat?”

Ni ansou me kitail diarada wewehn peidek wet ni unsek, kitail ahpw pahn kak wiahla tohn peneinei, mehn impe, tohn wehi, tohn Mwomwohdiso, oh serien Koht mwahu kei.

Nan ahi sounpar et, I iangehr kapokon en mehla dir kei. I ese me diren kumwail me kilangehr dahme I pil kilangehr. Ni atail kin pokonki mehlahn emen kisehn peneinei de kempoakepahtail, sounkapahrek kan sohte kin kalap koasoia uwen laud en nimwen aramaso, de tohtohn were sidohsa, de ia uwen nah mwohni nan bank. Re sohte kin kalap koasoia dahme kin pwarada nan inderned kan. Ni pali laud en mehla kan me I iangehr, re kin pohnesehte en me melahr kan arail ehuiong aramas, sewese mehteikan, mwomwen mour oh irair kan, oh arail limpoak ong Sises Krais.

Kumwail dehr sawehwehkinie. I sohte koaskosoia me imwaniki ihmw kaselel, de waraniki sdohsa kaselel sohte mwahu de doadoahngki inderned facebook sakanakan. Dahme I koaskosoia me ni imwin rahno, ape pwuko sohte katepe sang poakohng atail Sounkomouro.

Ni atail kin poakohng oh idawehn Ih, kitail kin pwoson Ih. Kitail koluhla. Kitail kin idawehn Sapwellime karasaras oh pepdaisla oh alehda Ngehn Sarawi. Kitail kin dadauhr lel ni imwi oh mihmihte nan elen inouo. Kitail kin mahkehng atail peneinei kan oh mehn mpatail kan ni atail kin pwilikihdi atail katoutou kan. Kitail kin ansou koaros nantiheng kolokol sapwellimen Koht kosonned akan. Kitail kin nantiheng peik. Kitail kin wiahda oh kolokol inou sarawi kan. Kitail kin wauneki atail pahpa oh nohno kan. Kitail kin kasohrala mwekid suwed en sampah kan. Kitail kin kaunopada kitail ong Sapwellime Ketdo Keriauo.

Nan “Krais Ketin Ieias: Iei kadehde en Wahnpoaron kan,“ kitail wadek: “[Sises] pahn ehu rahn pwurehng sapahldo pohn sampah. … E pahn kaunda ni eh wia Nanmwarki en Nanmwarki kan oh Kaun en Kaun kan, oh aramas koaros pahn kelepwikdi sang oh koaros pahn pwongih Ih. Emen emen kitail pahn uh mwowe oh ale tenekpen atail doadoahk oh ineng en atail mohngiong kan.”⁵

Ni ei wia emen wahnparonko me sain doarepwe en “Krais Ketin Ieias” I kak koasoia me I ese me Sises iei “marain, mour, oh koapworopworpen sampah”⁶ kahrehda I inengieng laud en poakohng Ih nan rahn koaros.

Ih kadehde me Sahm Nanleng oh Sises Krais ketin ieias. Ih kadehde me Ira poakohng kitail. Pwuhk sarawi padahngki “Uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”⁷ Pwuhk sarawi pil padahngki me Sises “uwen ah poakohng sampah me e ketin pwoukihla pein ih, pwe uwen tohto me pahn kamehlele en wiahla [serien] Koht.”⁸

Uwen Sahm Nanleng ah ketin poakohng kitail me E ketin kaunopada Sapwellime koasondi en mour oh Sounkomouro me wia tapwin mehkoaros. Oh Sises uwen Ah poakohng kitail nan Tiepene Lap me wiawi Nanleng, ni ansou me Sahm Nanleng mahsanih, “Ihs me I pahn kadarla?“ Sises, iei me wia meseni en ngehn koaros en Sahmo, sapeng, “Iet ngehi; komw ketin poaroneiehla.”⁹ E patohwan ong Sahmo, Semei, kupwuromwi en kin pweida, oh lingan en kin wia sapwellimemwi kohkohlahte.¹⁰ Sises pein pilada en wia atail Sounkomour oh Soundoar pwe kitail en kak duwehla Ira oh pwurala Rehra.

Iren pwuhk sarawi riau wet padahngki me nin duwen atail pahn pwurala Rehra kitail anahnekamehlele. Kitail anahne kamehlele Sises oh sapwelimen Koht plahn en popohlo. Pwehn kamehlele iei en poakohng oh idawehn atail Sounkomwouro oh kapwaiada sapwellime kosonned akan, mendahte ma kitail mihmi nan kahpwal oh nsensuwed.

Nan sampah rahn pwukat me liseliping. Mie kapahtou, uhpene, lokolok, oh kedirepw.

Presiden Dallin H. Oaks, padahngki nan 2017, kasalehda mepwukat: : “Rahnpwukat wia ansou apwal kei, me direkihla kahpwal tohto, mahwin oh koasoiepen mahwin, mie songosongen soumwahu lusulus oh doar, epwelen pihl, lapake, oh keper en nan wehwe.”¹¹

Kitail sohte kak soikala atail limpoak oh koapworopworiki Sises, mendahte ma kitail kin lelohng nan kahpwal laud kan. Sahm Nanleng oh Sises pahn sohte kak likimehlie kitaila. Ira ketin poakohng kitail.

Nan Oakotohpe samwalahro, Presiden Russell M. Nelson padahkieng kitail kesempwalpen mwohniki Sahm Nanleng oh Sises Krais mwohn mehkoaros nan atail mour kan. Presiden Nelson padahkieng kitail me ehu wehwehpen lepin lokaia Israel iei en “Mweidehng Koht en kakaun.”¹²

E idek rehn emen emen kitail peidek pwukat: “Komw men mweidehng Koht en kaunda omwi mour? Kumwail inengiengehr en mweidehng Koht en wia soun kaweid keieu kesempwal nan amwail mour? Kumwail pahn mweidehng Sapwellime mahsen kan, Sapwellime kosonned akan, oh Sapwellime inou sarawi kan en wia pahsoan en dahme kumwail kin wia nan ehu ehu rahn akan? Kumwail pahn mweidehng Kepitie en wia ngihl me pahn keieu kesempwal sang mehkoaros? Kumwail inengieng mweidehng sohte lipilipil mehkot me E kupwurki kumwail en wia pwehn alehda dahme keieu kesempwal sang soahng teikan me koadoahkpe anahne wiawi pwehn kak pweida? Kumwail inengieng mweidehng amwail wiewiahkan en mih pahn Sapwellime koasoandi?”¹³

Kitail udahn anahne ansou koaros tamataman me atail peren mehlel kin kohsang ni mwomwen atail kin ehuieng Koht, iangahki Sises Krais, oh emen emen kitail.

Ehu wiepen atail kak kasalehda mwomwen atail limpoak iei ehuieng peneinei, kempoakepahtail kan, oh mehn impatail kan ni atail pahn kin wia mehkot tikitik pwehn papah emen emen, Wia mehkot me pahn mwahu ong sampah wet.

Soahng dahkan me ke kak wia nan ahmw mour pwehn kasalehda me ke poakohng Kauno mwohn mehkoaros?

Ni ansou me kitail pahn kin poadidiong atail poakohng mehn impatail kan duwehte Ah kin ketin poakohng irail, kitail kin tapiada ni mehlel poakohng mehteikan.¹⁴

I pilehu peidengki, ia mwomwen ahmw pahn sapengki keinemweo sang Sounkomouro “Ke poakohngie laud sang mepwukat?”

Ni amw pahn medewe peidek wet duwehte me I wiahier, I kapakapki me ke pahn sapengki soahngohte me Piter sapengkiher mahso, “Ei, Kaun; komw ketin mwahngih me I poakohng komwi,”¹⁵ oh kasalehda sang ni limpoak oh papah Koht oh mehn impomw kan.

I kadehde me kitail udahn kapaida sang ni atail alehda rongamwahu en Sises Krais me kahluwai kitail nan mour wet oh sawaspene nan pwungatail. Pwehki Ih, kitail diarada me serien Koht koaros kin kesempwal Reh.

I kadehde me Sises Krais iei atail Sounkomour kesempwal. Ihte kelehpw me wia Iehros en Koht kesempwalo. Oh I wia kadehde wet ni karakarahk ni mwaren Sises Krais, amen.