Tumunufichi eu Kapung mi Tupwon

Non ewe October, Preseten Russell M. Nelson a pesei kich ach sipwe ekieki ifa usun manauach epwe sokono ika “angei ach tufichin sinenap seni ewe Puken Mormon epwe mwitir ne suseni kich.”¹ Ua fokkun ekipwichi usun an ei kapas eis, ua ekieki pwe chommong me neimi oupwe pwan ani. Eu ekiek ua kan chok ekekieki—me nukun ewe Puken Mormon me ekkewe annuk mi ennet usun Kraist me An we fangono manau, ikeweie ua sapengeni ren kinamwe?

Ekkewe annuk mi pin an Kraist—ewe a isoni ekkewe nongonong me annuk ren nuku non Kraist, aier, paptais, angei ewe nifangen ewe Ngun mi Fel, me nikitu tori soponon —a ait ngeni kich fan chommong non meinisin ekkewe pukefel ren ewe Niwinsefanito nge ren ewe Puken Mormon.² Ewe annuk a poputa ren nuku non Kraist, me meinisin kokotun eu me eu anongonong won ach nuku non An we fangono manau.

Usun met Preseten Nelson a aiti ngeni kich, “Ewe Puken Mormon a wor ren ewe ennet me unusen ewe wewe ren ewe Achasefan an Jises Kraist sia kuna ekis meinisin.”³ Ach wewefichi usun ewe niffang an ewe Chon Amanau, sipwe pwan fokkun sinei ochu, non ekiekich, me non netipach,⁴ auchean met Preseten Nelson a ekieki pwe “ewe ennetin ewe Puken Mormon a wor ewe manamanen echikar, ourur, niwinsefan, aninis, apochokun, aiti, me pesei ngunuch.”⁵

Eu tufich me kinamwen niffang seni ewe Puken Mormon ngeni ach weweiti usun an ewe Chon Amanau Achasefan a ait ngeni kich pwe an Kraist we umoumochun fangono manau a ounusochuono ekkewe mochenin pungoch meinisin. Usun Alma a awewei, “Kot pwisin a achasefan fan iten tipisin fonufan, pwe epwe efisi ewe kokkotun umoumoch, pwe epwe amenemenochu ekkewe mochenin pungoch, pwe Kot epwe tongeni emon mi unusoch, emon Kot mi pung, me emon Kot mi pwan uren umoumoch.”⁶ An ewe Sam kokotun umoumoch⁷—met ekkewe pukefel ra pwan eita ngeni ewe kokotun pwapwa⁸ ika ewe kokotun manau ese much⁹—ese tongeni epwe fiis me nukun chok ika meinisin ekkewe mochenin pungoch epwe apwonueta.

Nge met wesewesen ekkewe “mochenin pungoch”? Ekieki usun met mi fisingeni Alma. Chechemeni pwe nupwen i emon anuon, Alma a kutta an epwe “atai ewe mwichefen.”¹⁰ Ennetin, Alma a ereni noun we at Ilaman pwe epwe “riaffou ren ekkewe metekin hell” pokiten i a fen “nii manauen chommong me nein noun [Kot] semirit” seni an emwenir “eno ngeni kiteter.”¹¹

Alma a awewei ngeni Ilaman pwe kinamwe epwe feito ngeni i nupwen “ekiekin epwe ekieki” an saman we kewe asukun “anongonong won ewe feiton … Jises Kraist … ne mano faniten tipisin ewe fonufan.”¹² Alma a tingor ren ewe umoumochun Kraist¹³ me mefi pwapwa me ngaseno nupwen epwe mefi pwe Kraist a mano faniten an tipis me moni meinisin ekkewe pungoch mi wor. Niwinsefaniti, met ekkewe pungoch a wor ren Alma? Usun met Alma a pusin aiti kich mwirin, “Ese wor mettoch mi nimengaw epwe tongeni tonong non ewe muun Kot.”¹⁴ Nge, afen iei masowen an Alma we ngasono me nukun chok ewe umoumoch, pungoch epwe eppeti i an epwe niwinsefan ne nom ren Samach won Nang.¹⁵

Nge an Alma ekiek a chok fokkun ekieki pusin i—won an emonungaw seni tipis me an epwe tongeni niwin sefanino ren ewe Sam? Sia sinei pwe Alma apwan riaffou faniten ekkewe aramas minne a atowawareno seni ewe ennet.¹⁶ Nge Alma pwisin ese tongeni eniwinisefani meinisin ekkewe a atowawareno. I won inisin ese tongeni an epwe uweirenong ar repwe angei eu fansoun ar repwe kaeo ekkewe annuk an Kraist me feioch ren ar manaueni ekkewe nongonongen pwapwa. Ese tongeni an epwe eniwini sefani ekkewe ra mano non ar mesechun ngeni an kewe afanafan mi mwan.

Usun an Preseten Boyd K. Packer a afanafana fan eu: “Ewe ekiek a angasano Alma … iei: Eniwinsefani met kose tongeni eniwini, echikara ekkewe kinas kose tongeni echikara, fori met ke atai me kose tongeni fori sefan ina ewe chok popun me auchean ewe achasefan an Kraist.”¹⁷ Ewe pwapwa ennet mnine Alma a ekieki “komochuno” esap i chok won inisin mine epwe tongeni nimeti epwe nimoch pwe pwan ekkewe mine i a eriafour repwe pwan chikar me unusoch.

Ekkewe ier me mwen an Alma a ngaseno seni ei forsefanin annuk, King Bejamin a aiti kich usun ewe pinewan echikar a feito seni ewe fangono manau an ewe Chon Amanau. King Benjamin a apasa pwe “ekkewe kapas allim usun pwapwa wachemuk” ra kawor“seni emon chon nang seni Kot.”¹⁸ Ekkewe pwapwa wachemuk mi ennet pwe Kraist epwe riaffou me mano faniten ach tipis me ach nipwakingaw epwe ponuta ren “eukapung mi ennetepwe feito ngeni ekkewe noun aramas.”¹⁹

Met a wesewesen fori “kapung mi tupwon” mi namot? Non ewe uwekisin mwirin, King Benjamin a awewei pwe epwe tumunufichi eu kapung mi tupwon, chan ewe Chon Amanau a fangono “faniten tipisin ekkewe ra turutiw pokiten ewe atai annuk an Adam” pwan ekkewe “ra mano nge rese sinei ewe mochenin Kot usur, are ekkewe ra tipis non ar rese weweiti.”²⁰ Eu kapung mi tupwon a pwan murino, a aiti kich, pwe “chan an Kraist we fangono a achasefani” tipisin ekkewe kukun semirit.²¹

Ekkei pukefel ra aiti kich ekkewe murinon annuk: an ewe Chon Amanau asoren achasefan a echikar, ewe niffang ese kamo, ekkewe mi tipis ren ar rese weweiti ewe ennet, ekkewe ir mi, usun Jacob a apasa, “ese wor annuk ngenir.”²² Niwinin ach tipis a anongonong won ewe saram sia fen angei me nounoun ach tongeni ren ach sotuni ach pungun finata.²³ Sia sinei ei echikar me ourur a fokkun ennet pokiten chok ewe Puken Mormon me ekkoch pukfel seni ewe Niwinsefanito.²⁴

Ewer mi pung, ian ewe a wor ian annuk, ikewe ie sise tongeni sinengaw ngeni an Kot we angang, sia angang ngeni. Usun met King Benjamin a pwarata “Riaffou epwe ngeni i ewe a sinei pwe a ungeni Kot! Pun manau ese much esap feito ngeni ekkena sokun tiwenon chok epwe seni aier me nuku non ewe Samon Jises Kraist”²⁵

Iei ewe pwapwa wachemuk ren ewe annuk an Kraist. Ewe Chon Amanau ese chok echikara me eniwini ekkewe ir mi nomw non tipis nge pwan, ekkewe ra tipis ren ar rese etiwa ewe saram, ewe tingor an ewe Chon Amanau an epwe echikara ekkewe ir mi aier me nuku non I.²⁶

Alma afen “komochuno” won me ruu ekkei ennet. Alma mi fokkun ennetin mefi met a awewei usun “ningochun … pwapwa”²⁷ ika pwe mi ekieki pwe Kraist a tumunu nge a nikitano ekkewe a atowawareno seni ewe ennet? Ennetin apw. Ren an Alma epwe fokkun mefi kinamwe, ekkewe a eriaffour mi pwan auchea epwe wor ar fansoun ar repwe pwan tongeni ar repwe unusoch.

Nge ifa usun ar repwe—ika ekkewe sia eriafour—ar repwe pwan unusoch? Ina mwo ika sise kon ennetin weweiti ewe tufich mi pin seni ewe echikar me niwinsefan ren ewe fangono manau an ewe Chon Amanau, sia sinei pwe seni ach amonafichi eu ennetin kapung, ewe Chon Amanau epwe winisi ekkewe tipeforea ren ekkewe ese wor ar sinei ewe ennet me ekkewe netip mi tatakis ren metek seni ekkoch.²⁸ Seni ei I tumunufichi pwe meinisin noun Kot kewe semirit repwe tongeni angei ar tufich, ren mine rese weweiti, ar repwe fini ne tapweno Mwirin I me etiwa ewe wachemuken kokoten pwpawa.²⁹

Ikkei ekkei mi ennet mine a ngeni Alma an kinamwe. Ikkei ekkei mi ennet mine epwe pwan ngeni kich kinamwe. Kich meinisin mwan me fefin, sia turunong, ika tonong, non an emon me emon angang me sia feiengaw ren. Usun emon me emon sam me in repwe pwarata, ewe metek sia mefi ren ach mwanino esapw chok nuokusun met sipwe angei niwinin nge ewe nuokus ika sipwe aukatiw an nouch kewe pwapwa ika non ekkoch an ach sise ait ngenir usun ar repwe kuna me weweiti ewe ennet. Ewe amwararen pwonen an ewe Chon Amanau fangono pwe ren ach muan sam me in, I esap etipisi nouch kewe me a pwon pwe epwe echikarer.³⁰ Me ina mwo ika ra tipis ren ar ungeni ewe saram—usun kich meinisin sia fori—Poun we mi umoumoch mi keitieu,³¹ me I epwe angasereno ika repwe nge nengeni I me manau.³²

Inamo ewe Chon Amanau mi wor an manaman an epwe fori met mine sise tongeni fori, A anuku ngeni kich ach sipwe fori mettoch meinisin mine sia tongeni ekesiwini pwe pekin ach aier.³³ Ach tipis me nipwakingaw a tongeni wesino esapw chok ren nefinanch ngeni Kot pwe pwan nenfinach ngeni ekkoch. Fan ekkoch ach angangen echikara me eniwini epwe fokkun mecheres ren chok ach omusomus, nge fan ekkoch ren ekkesiwin mi tongeni epwe ier ach angangen tipetekison.³⁴ Ewer, ren chommong ach tipis me nipwakingaw, ese fokkun mecheres ach sipwe echikara ekkewe sia ochou netiper. Ewe umoumochun, kinamwe-a pwonengeni kich ren ewe Puken Mormon me ewe niwinsefaniton ewe kapas allim iei ewe Chon Amanau epwe fori meinisin met ekkewe sia fen atai.³⁵ Me I epwe pwan fori kich ika sia kun ngeni I non nuku me aier seni ekkewe feiengaw sia fori.³⁶ A awora ngeni kich ekkei ruu niffang pokiten An tongei kich ren unusen netipan³⁷ me pokiten A ennetin moneta ngeni an epwe tumunufichi eu kapung mi tupwon minne epwe asufonu pungoch me umoumoch. Ua pwarata pwe ekkei mi ennet non iten Jises Kraist, amen.