Nafu, Inħobbu, u Nikbru

Fl-2016 il-Kor tat-Tabernaklu fil-Pjazza tat-Tempju ġie jżur l-Olanda u l-Belġju. U peress li kont involut f’dak l-avveniment mill-aktar eċċitanti, jiena kelli l-opportunità li ngawdi darbtejn il-programm tagħhom.

Waqt il-kunċert tagħhom jiena bdejt naħseb dwar kemm kienet biċċa xogħol tremenda li kor ta’ dak id-daqs imur minn post għall-ieħor. Moħħi mar fuq il-gong il-kbira li min jaf kemm kien diffiċli u kemm kien jiswa flus biex iġġorrha jekk tqabbilha mal-vjolin, mat-trumbetta, jew ma’ xi strument ieħor li faċilment tista’ ġġorru taħt driegħek. Iżda meta bdejt inħares lejn l-involviment attwali ta’ din il-gong, jiena rrealizzajt li hija kienet ġiet użata biss ftit drabi, filwaqt li strumenti oħra iżgħar minnha kienu involuti kważi l-kunċert kollu. Jien bdejt nirrifletti li mingħajr il-ħoss tal-gong, il-kunċert ma kienx se jkun l-istess u għalhekk kien hemm bżonn ta’ daqsxejn sforz biex din il-gong kbira taqsam l-oċean.

Xi kultant nafu nħossuna li aħna, bħall-gong, tajbin biss biex niġu wżati biss f’parti żgħira mill-eżekuzzjoni. Iżda ppermettuli ngħidilkom li l-ħoss tagħkom qiegħed jagħmel id-differenza kollha.

Aħna neħtieġu l-istrumenti kollha. Xi wħud minna nitgħallmu malajr u mmorru tajjeb fl-iskola, filwaqt li oħrajn għandhom talenti artistiċi. Xi wħud jiddisinjaw u jibnu l-affarijiet jew inkella jieħdu ħsieb, jipproteġu, jew jgħallmu lil ħaddieħor. Aħna llkoll meħtieġa biex nagħtu kulur u tifsira lil din id-dinja.

Il-messaġġ tiegħi nixtieq nindirizzah lil dawk fostkom li tħossu li m’għandkom xejn x’tikkontribwixxu jew temmnu li m’intomx importanti jew li m’intom sinifikanti għal ħadd, u lil oħrajn fostkom li tħossu li l-ħajja tagħkom ma tistax tkun aħjar, u lilkom kollha li tinsabu x’imkien bejniethom.

Tinsabu fejn tinsabu fit-triq tal-ħajja, xi wħud minnkom tafu tħossukom tant mgħobbijin li lanqas biss tikkunsidraw li intom tistgħu timxu f’dik it-triq. Nixtieq nistedinkom biex toħorġu ’l barra mid-dlam u tgħaddu għad-dawl. Id-dawl tal-evanġelju jipprovdilkom iż-żelu u l-fejqan jgħinkom tifhmu min intom verament u x’inhu l-għan tagħkom fil-ħajja.

Xi wħud minna ilna ħafna niġru f’toroq ipprojbiti, nippruvaw insibu l-ferħ.

Missierna tas-Smewwiet kollu mħabba qed jistedinna biex nimxu fit-triq li jimxu fiha d-dixxipli u biex nerġgħu lura għandu. Huwa jħobbna b’imħabba perfetta.¹

X’ inhi t-triq? It-triq hi li ngħinu lil xulxin nifhmu min verament aħna billi nimministraw lil xulxin.

Għalija, li nimministraw ifisser li neżerċitaw imħabba divina.² B’dak il-mod noħolqu ambjent li fih kemm dak li jagħti kif ukoll dak li jirċievi jikseb ix-xewqa li jindem. Fi kliem ieħor, aħna nibdlu d-direzzjoni u nersqu aktar viċin tas-Salvatur tagħna, Ġesù Kristu, u nsiru aktar nixbhuh.

Per eżempju, m’hemmx bżonn li kontinwament noqogħdu ngħidu lill-konjuġi tagħna jew lil uliedna kif jeħtieġ li jinbidlu; huma diġà jafu dan. Li jeħtieġ nagħmlu hu li noħolqu ambjent ta’ mħabba ħalli huma jimtlew bil-qawwa li jagħmlu t-tibdil neċessarju f’ħajjithom u jsiru nies aħjar.

F’dan il-mod l-indiema ssir proċess ta’ kuljum li jgħinna nirraffinaw ruħna, li jaf jinkludi wkoll il-ħtieġa li aħna niskużaw ruħna għal xi mġieba mhux xierqa. Jien niftakar u għadni nesperjenza ċerti sitwazzjonijiet fejn jiena qbadt u ġġudikajt malajr jew domt biex nisma’. U fi tmiem il-jum waqt it-talb personali tiegħi jien ħassjet kunsill kollu mħabba mis-smewwiet biex nindem u nsir aħjar milli jien. L-ambjent kollu mħabba li ġie maħluq l-ewwel mill-ġenituri tiegħi, u minn ħuti, u aktar tard minn marti, wliedi, u sħabi għenni nsir persuna aħjar.

Aħna lkoll nafu fejn nistgħu nitjiebu. M’hemmx għalfejn li noqogħdu ripetutament infakkru lil xulxin, iżda hemm bżonn li nħobbu u nimministraw lil xulxin u hekk kif nagħmlu dan nipprovdu klima li tagħti lok li dak li jkun jinbidel.

F’dan l-istess ambjent aħna qed nitgħallmu min verament aħna u x’se jkun l-irwol tagħna f’dan l-aħħar kapitlu tal-istorja tad-dinja qabel it-Tieni Miġja tas-Salvatur.

Jekk għadkom m’intomx ċerti x’inhu l-irwol tagħkom, nixtieq nistedinkom biex issibu post li fih tistgħu tkunu weħidkom u tistaqsu lill-Missier tas-Smewwiet biex jurikom xi rwol iridkom li jkollkom. It-tweġiba probabbilment tasal gradwalment u mbagħad b’aktar ċarezza meta aħna npoġġu saqajna b’aktar fermezza fit-triq tal-patt u l-ministeru.

Aħna qed nesperjenzaw xi wħud mill-istess diffikultajiet li Joseph Smith ħabbat wiċċu magħhom meta kien “f’nofs gwerra ta’ kliem u konflitt ta’ opinjonijiet.” Kif naqraw fir-rakkont tiegħu, huwa spiss kien jgħid bejnu u bejn ruħu: “X’għandi nagħmel? Min minnhom qed jgħid il-verità; jew inkella, huma kollha kemm huma ħżiena? Jekk hemm xi waħda minnhom vera, liema waħda hi, u kif nista’ nsir naf dan?”³

Bl-għarfien li huwa sab fl-ittra ta’ Ġakbu, li tiddikjara li “jekk xi ħadd minnkom jonqsu l-għerf, għandu jitlob lil Alla, li jagħti lil kulħadd b’id miftuħa u bla ma jċanfar lil ħadd, u jagħtihulu,”⁴ Joseph eventwalment ddeċieda li ‘jitlob lil Alla.’”⁵

Inkomplu naqraw li “din kienet l-ewwel darba f’ħajtu li hu pprova jagħmel dan, għaliex f’nofs l-anzjetà tiegħu kollha huwa kien għadu qatt ma pprova jitlob vokalment.”⁶

U fil-każ tagħna wkoll taf tkun l-ewwel darba li nindirizzaw lill-Ħallieq tagħna b’mod li qatt m’għamilna qabel.

Minħabba l-attentat tiegħu, lil Joseph dehrulu Missierna tas-Smewwiet u Ibnu, Ġesù Kristu, sejħulu b’ismu, u b’riżultat ta’ dan aħna għandna għarfien aktar ċar ta’ min aħna u li verament aħna importanti.

Aħna naqraw ukoll li meta huwa kien għadu daqsxejn ta’ żagħżugħ huwa “ġie ppersegwitat minn dawk li suppost kienu ħbieb tiegħu u li suppost mxew miegħu b’imħabba.”⁷ U għalhekk aħna nafu nistennew xi ftit oppożizzjoni hekk kif inkunu qed ngħixu ħajja ta’ dixxipli.

Jekk bħalissa intom tħossu li m’intomx kapaċi tkunu parti mill-orkestra u li t-triq tal-indiema taf tidher diffiċli għalikom, jekk jogħġobkom kunu afu li jekk aħna nibqgħu nippersistu, it-tagħbija tagħna tiħfif u jerġa’ jfeġġ id-dawl. Missierna tas-Smewwiet qatt mhu se jitlaqna meta aħna nfittxuh. Aħna nistgħu naqgħu u nerġgħu nqumu, u Huwa jgħinna nfarfru t-trab minn irkupptejna.

Xi wħud minna jinsabu midruba, iżda l-kit tal-ewwel għajnuna tal-Mulej għandu fih faxex kbar biżżejjed li jistgħu jinfaxxaw il-ġrieħi kollha tagħna.

Għalhekk hi sewwasew dik l-imħabba, dik l-imħabba perfetta li nsejħulha wkoll karità jew “l-imħabba safja ta’ Kristu,”⁸ li hi meħtieġa fi djarna fejn il-ġenituri jimministraw lil uliedhom u l-ulied lill-ġenituri. Permezz ta’ dik l-imħabba, il-qlub jinbidlu u x-xewqat jitwieldu biex nagħmlu r-rieda Tiegħu.

Hija sewwasew dik l-imħabba li hi meħtieġa fil-mod kif għandna nittrattaw lil xulxin bħala wlied Missierna tas-Smewwiet u bħala membri tal-Knisja Tiegħu, u liema mħabba twassalna biex ninkludu l-istrumenti mużikali kollha fl-orkestra tagħna ħalli meta s-Salvatur jerġa’ jiġi aħna nkunu kapaċi ndoqqu b’mod glorjuż flimkien mal-korijiet anġeliċi tas-smewwiet.

Hija sewwasew dik l-imħabba, dak id-dawl li jeħtieġ li jiddi u jdawwal il-madwar tagħna hekk kif aħna ngħixu l-ħajja tagħna ta’ kuljum. In-nies jinnotaw id-dawl u jersqu lejh. Din hi t-tip ta’ ħidma missjunarja li tressaq lil ħaddieħor lejn “ejja u ara, ejja u għin, u ejja u ibqa’.”⁹ Jekk jogħġobkom, meta nirċievu x-xhieda tagħna dwar din il-ħidma kbira u l-irwol tagħna fiha, ejjew nifirħu flimkien mal-maħbub profeta tagħna Joseph Smith meta qal, “Għaliex jien rajt viżjoni; jiena naf dan, u naf li Alla jaf dan, u ma nistax niċħadha.”¹⁰

Jiena nixhed magħkom li jien naf min jien u naf min intom. Aħna wlied Missier tas-Smewwiet li jħobbna. Hu ma bagħatniex hawn biex ma nirnexxux iżda biex nerġgħu lura għandu b’mod glorjuż. Li aħna lkoll nibdew nifhmu l-irwol tagħna f’din il-ħidma kbira tal-ministeru ħalli nkunu nistgħu nsiru aktar nixbhuh meta s-Salvatur jerġa’ jiġi hija t-talba tiegħi f’isem Ġesù Kristu, amen.