Ahotseweefo no hɔn Enyigye no
Enyigye fi irisie mbrasɛm no, iridzi ɔhaw do konyim na erosom dɛ mbrɛ Jesus somee no mu ba.
Mormon Nwoma nkɔnhyɛnyi Enos, Lehi ne nanaba no, kyerɛɛw faa sũahu soronko bi ho a nna oesi n’abrabɔ mu dadaw no. Ber a ɔreyɛ ha wɔ haban no mu no, Enos hyɛɛ ase dwendwenee faa n’egya Jacob ne nkyerɛkyerɛ ho. Ɔkãa dɛ, “Nna nsɛm a daa metse dɛ m’egya rekã a ɔfa onnyiewiei nkwa ho, na ahotseweefo hɔn ndaamba dɛw a wobedzi ho adwen hyɛɛ m’akoma mã.” Sunsum mu ɔkɔm dzee ne kra no, Enos buu ntwɛr wɔ mpaabɔ mu, mpaabɔ nwanwa a ɔbɔɔ no da no nyina mu, dze kesii anafua, mpaabɔ a ɔdze nyikyerɛ, awerɛhyɛmu na anohoba a ohia ara yie brɛɛ no.
Dodow ara na yebosua efi Enos no sũahu mu, mbom ndɛ dza ɔda m’adwen do nye Enos ɔkaa n’egya a ɔtaa kasa fa “ahotseweefo dɛw a wobedzi” ho.
Ehyiadzi yi mfe ebiasa a abasen kɔ no, President Russel M. Nelson kasaa faa enyigye ho. Nsɛm binom so no, ɔkãa dɛ:
“Mo nuambanyin na nkyerɛbaa adɔfo, hɛn abrabɔ mu enyigye a yɛtse no, mmfa gyinabew a yɛwɔ mu, mbom ɔfa adzebiara a hɛn abrabɔ tsim do.
“Sɛ yɛdze hɛn abrabɔ tsim Nyankopɔn ne nkwagye ho nhyehyɛɛ … na Jesus Christ N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho. Ɔno mu na osian Ɔno ntsi na enyigye ba. … Nda a Odzi Ekyir Ahotseweefo dze, Jesus Christ na Ɔma enyigye!
Ahotseweefo nye hɔn a woedua enuma do ahɛn asɛmpa ahyɛmudzi no mu na wɔreper akã Christ do dɛ N’esuafo. Dɛm ntsi “ahotseweefo no hɔn enyigye” kyerɛ erebɛyɛ tse dɛ Christ.
Mepɛ dɛ mekasa fa enyigye a ofi irisie Ne mbrasɛm, enyigye no a ɔba ber a edua No mu edzi konyim wɔ awerɛhow na mbrɛwyɛ do, na enyigye a ɔwɔ erosom dɛ mbrɛ Ɔsomee no ho.
Irisie Christ Ne Mbrasɛm mu Enyigye no
Yɛtse honam akɔdɔdze mber mu a dodow gye Ewuradze ne mbrasɛm ho kyim anaa wɔdan hɔn enyi fi do koraa. Ɔtaa dɛ, nkorɔfo a wobu ɔsor ahyɛdze do, tse dɛ ahosie ho mbra no, nokwardzi gyinapɛn, na Ahomgyeda no krɔnkrɔnyɛ no, ɔyɛ dɛ, mber binom mu no, wɔyɛ yie na wonya abrabɔ mu ndzepa, kyɛn hɔn a wɔreper ayɛ setsie mpo. Binom hyɛ ase dwendwen ho dɛ sɛ hɔn mbɔdzembɔ na afɔrbɔ no, mfaso bi wɔ ho a. Tsetse Israelfo hwinhwinii ber bi:
“Nyame som yɛ kwa, na ebɛn mfaso na ɔyɛ dɛ yeedzi n’ahyɛdze do, na yɛanantsew awerɛhodzi mu wɔ dɔm Ewuradze enyim?
“Na afei yɛfrɛ ɔhopɔwnyi ɔhomkanyi; nyew, hɔn a wɔyɛ emumuyɛ no esi hɔn yie; nyew, hɔn a wɔsɔ Nyankopɔn hwɛ no, na wofi mu fir mpo.”
Ewuradze see dɛ, Hom ntweɔn nkesi “da a mebɛyɛ yi no mu … akoradze soronko.“ … Nkyii na hom … bohu nsonsonee a ɔda tseneneenyi na mumuyɛnyi ntamu, nyia ɔsom Nyame na nyia ɔnnsom no no ntamu.” Emumuyɛfo “wɔ enyigye wɔ hɔn ndwuma mu mber tsiabaa mu,” mbom daa ɔnnkyɛr. Ahotseweefo hɔn enyigye no, otsim.
Nyame hu ndzɛmba dɛ mbrɛ wɔtse ampara, na Odua Ne mbrasɛm mu kyɛ dɛm nhumu no, a ɔma hɛn akwankyerɛ yie ma yeduadua abrabɔ mu mfir bɔn na abɔnkabɔnka nkyɛn dze kɔ onnyiewiei enyigye mu. Nkɔnhyɛnyi Joseph Smith kyerɛkyerɛɛ mu dɛ: “Sɛ Ne mbrasɛm kyerɛkyerɛ hɛn adze nna ɔfa mfesantsen ho, osiandɛ Nyankopɔn hwɛ hɛn dɛ mbrɛ yɛwɔ mfesantsen mu. Nyame tse mfesantsen mu na Ɔnnhwɛ adze dɛ mbrɛ yɛhwɛ no.”
Minnhyiaa obiara a ɔgyee asɛmpa wɔ ne mpanyinyɛ ber mu a, ne yamu annkyɛ oennhu no ntsɛm. Wɔkã dɛ, “O, nsanmuyi bɔn na mfomdo pii a nkyɛ mubotum ekwetsir.” Ewuradze ne mbrasɛm nye hɛn kwankyerɛ wɔ nsanmuyi pa ho na no nsunsuando a ɔyɛ ahomkã ara yie. Ɔakyerɛ hɛn kwan a oye kyɛn biribiara ntsi ɔsɛ dɛ yedzi ehurusi na yɛda No ase.
Ɔyɛ abasirba no, Akyerɛbaa Kalombo Rosette Kamwanya a ofi D. R. Congo a, sesei ɔrosom wɔ Côte d’Ivoire Abidjan Anee Asɛmpakã no, kyeen kɔm na ɔbɔɔ mpaa nda ebiasa dze hwehwɛɛ kwan a Nyame pɛ dɛ ɔfa do. Anafua enyido-adzehu nwanwa bi mu no, wɔkyerɛɛ no asɔrdan ebien bi na dza sesei oehu dɛ ɔyɛ temple no. Ɔhyɛɛ ase dɛ ɔrohwehwɛ na annkyɛr na ohun n’adaaso mu asɔrdan no. Nna dzin no yɛ, “Jesus Christ N’Asɔr a ɔwɔ hɔ ma Nda a Odzi Ekyir Ahotseweefo.” Wonumaa Akyerɛbaa Kamwanya na ekyir no ne maame na no nuambanyin beesia. Akyerɛbaa Kamwanya kãa dɛ, “Ber a megyee asɛmpa no, menyaa atsenkã dɛ anoma a wɔakyer no na woegyaa no. Dɛwdzi hyɛɛ m’akoma mu mã. … Menyaa awerɛhyɛmu dɛ Nyame dɔ me.”
Yerisie Ewuradze ne mbrasɛm no ma hɛn kwan ma yɛtse No dɔ no emudzi mu na ntsɛmara mu. Kwan tseaba a ɔyɛ heaheaba no gya hɛn tɔɔtsen kɔ nkwadua no ho. na dua no na n’aba no, dza ɔyɛ dɛw papapanara na “ a ɔsom bo kyɛn adze nyinara,” no kyerɛ Nyame no dɔ na ɔdze “enyigye kɛse bi” hyɛ ɔkra mã. Agyenkwa no kãa dɛ:
“Sɛ hom sie me mbransɛm a, hom bɛtsena mo dɔ mu, dɛ mbrɛ mo so mesie m’Egya ne mbransɛm na metsena no dɔ mu.”
“Maka yinom aakyerɛ hom ama dɛw aatsena hom mu, na hom dɛw aahyɛ mã.”
Yerudua Christ mu Edzi Konyim no mu Dɛwdzi
Yeesie mbrasɛm no nokwar mu mpo no, nsɔhwɛ na esian wɔ hɔ a obotum etwa hɛn dɛwdzi do. Naaso ber a yɛbɔ mbɔdzen yɛdze Agyenkwa no mboa dzi ɔhaw yinom do konyim no, ɔkora dɛw no yɛtse no sesei na dɛw a enyi da kwan no do. Christ hyɛ N’esuafo no nkuran dɛ, “Wiadze mu dze, hom wɔ ahohia: naaso hom nhyɛ dzen; medzi wiadze do konyim” Yɛredan akɔ No hɔ no, yɛretsie No, yɛrekyerkyer hɛnho afam No no, na nsɔhwɛ na awerɛhow dan dɛwdzi. Mema mfatoho kor.
Afe 1989 mu no, nna Jack Rushton rosom dɛ Irvine California Stake a ɔwɔ United States no ne president. Ebusua akwanma ber a wɔkɔr California mpoano no, nna Jack redzi asorɛkye a ɔnndze taaboo biara, na asorɛkye bi bui dze no kɔhwee nsuadze boba bi do ma no kɔn mu bui ma ɔkãa n’ekyir ntsin. Jack kãa no ekyir no dɛ, “Mokɔhwee do noara no, nna minyim dɛ m’egura.” Nna onntum nkasa anaa nankasa mpo nntum nngye ahom.
Ebusua, anyɛnkofo, na stake asɔrmba no twee bɛɛn Onuabanyin Rushton na ne yer, Jo Anne, na, dza wɔyɛɛ no bi nye dɛ, wɔyɛɛ hɔn fie hɔ ma Jack no wheelchair tum nenam hɔ. Mfe 23 [eduonu biasa] ekyir no, nna Jo Anne na ɔhwɛ Jack kɛse. Ɔrekã fa Mormon Nwoma mu nsɛm mbrɛ Ewuradze seraa No nkorɔfo wɔ hɔn amandzehu mu na Ɔmaa hɔn adzesoadze yɛɛ har no, Jo Anne kãa dɛ, “Nna ɔtaa yɛ me nwanwa dɛ akoma mu enyigye minyae dɛ morohwɛ mo kun no.”
Wɔyɛɛ no operahian ma Jack tumii kasaa bio, na, afe no mu no, wɔfrɛɛ Jack dɛ Kwesida Skuul kyerɛkyerɛnyi na stake patriarch Sɛ ɔrema patriarch nhyira a, nyimpa kor so a okitsa asɔfodzi no dze Onuabanyin Ruston ne nsa to nyimpa kor no a ɔregye nhyira no ne tsir do, na ɔgye ne nsa na n’abasa abamba, nhyira ber no mu no. Mfe 22 [eduonu ebien ] etuhoakyɛ som ekyir no, Jack twaa mu kɔree Borɔnya da no wɔ afe 2012 mu.
Ber bi wɔ kokoamu mpɛnsapɛnsamu mu no, Jack hyɛɛ no nsew dɛ: “Ɔhaw bɛba hɛn nyina hɛn abrabɔ mu; ɔkã yɛwɔ asaase yi do ho. Na binom dwen dɛ nyamesom anaa ewɔ gyedzi wɔ Nyame mu no bɔbɔ hɛnho ban efi ndzɛmba a omuo nyina mu. Menngye nndzi dɛ ɔno nye asɛm no. Modwen ho dɛ sɛ hɛn gyedzi yɛ dzen a, sɛ ndzɛmba bɔn ba a, a wɔbɛba no, yebotum ehu ano. … Me gyedzi enhihim da, naaso ɔno nnkyerɛ dɛ mannyɛ mbɔbɔr, mbɔbɔr. M’abrabɔ mu ber a odzi kan a wopiaa me ara kodur ma mubotum asɔw n’ano, na nna minnyi bea biara kɔ, ntsi medanee kɔr Ewuradze hɔ, na besi ndɛ da yi, metse dɛw a onnyi kabea mu.
Iyi yɛ da a ɔtɔfabi a, wɔ social media do na enyim na enyim no, nkorɔfo a wɔhwehwɛ esie Ewuradze atarhyɛ, enyikadze, na ahosan ahotsew ho gyinapɛn no, nkorɔfo yɛ hɔn ayakayadze. Ɔtaa yɛ mbabun na Ahotseweefo mu mbarɛntsɛ na nkataasia no, na mbaa na enãnom, na wɔsɔw atwetwesi na atseetsee mbeamudua yi. Ɔnnyɛ mberɛw dɛ ibɔsoɛr egyina enyimtsia a ɔtse dɛm, naaso hom nkaa Peter ne nsɛm: “ Na sɛ wɔyaw hom wɔ Christ dzin ntsi a, ahomka aka hom, osiandɛ enyimnyam Sunsum na Nyame Sunsum tse hom do, hɔn afã dze wɔkã bɔn fa noho, mbom hom afã dze wɔahyɛ no enyimnyam.”
Eden Ture mu no, nna Adam na Eve wɔwɔ “tsenabew a wonnyim hwee, … wonnyi enyigye, osiandɛ wonnyim awerɛhow.” Sesei, yɛyɛ abɔdze a yɛwɔ nkontaabu no, yenya enyigye ber a yedze awerɛhow biara do konyim, sɛ ɔyɛ bɔn, nsɔhwɛ, mberɛwyɛ, anaa enyigye ho akwansidze biara no. Iyi nye enyigye no, dɛ yɛtse mpontu wɔ osuanyiyɛ anamɔn kwan do no; enyigye dɛ “[y]enya bɔnfakyɛ nye adwenmutsewee“ enyigye dɛ ɔkra no ruhuhur na orudua Christ n’adom mu renyin.
Erosom tse dɛ ma Christ Som no mu Enyigye no
Agyenkwa no nya enyigye dɛ ɔdze bɛkyebo na onnyiewiei nkwa abɔbɔ adze. Ɔrekasa fa Agyenkwa no No Werdambɔ ho no, President Russell M. Nelson kãa dɛ;
“Dɛ wɔ adze nyina mu no, Jesus Christ nye hɛn fasusu kɛsenara no, “a osian dɛw a wɔdze sii n’enyim ntsi ɔsɔɔw mbeamudua no.”[Hebrews 12:2]. Dwen ho! Ama Ɔasɔw yaw dzendzenndzen dodow a wɔnnsɔw no wɔ asaase do da no, hɛn Agyenkwa dze n’enyim tsiim dɛwdzi do!
“Na ebɛn dɛwdzi na wɔdze sii N’enyim? “Nokwar, dza ɔkã ho nye ahotsew, ayarsa, na ɔrehyɛ hɛn dzen ho enyigye; enyigye dɛ orutua hɔn a wobonu hɔnho nyina hɔn bɔn kaw, enyigye dɛ ɔreyɛ ma emi na ɔwo asan akɔ fie—a hɛnho atsew na yeedzi mu—dɛ yɛnye hɛn Ɔsor Awofo na ebusua ebusua bɛtsena.”
Dɛmara, enyigye no a “wɔdze esi hɛn enyim” yɛ yɛroboa Agyenkwa no wɔ No ɔpon edwumayɛ mu enyigye no. Dɛ yɛyɛ Abraham aba na mba no, yɛkã ho ma wohyira wiadze mu ebusua ebusua nyina, a ɔyɛ nkwagye nhyira horow, onnyiewiei nkwa mpo no.
Alma n’asɛm yi ba m’adwen mu:
“Na iyi nye m’enyimnyam, dɛ annhwɛ a mebɛyɛ wo edwindadze wɔ Nyankopɔn ne nsamu dze atwe akra aba nnuho mu, na iyi na ɔma m’enyigye.
“Na hwɛ, sɛ muhu m’enuanom pii a woenu hɔnho nokwar mu na wɔaba Ewuradze hɔn Nyankopɔn hɔ a, nna dɛw ahyɛ me kra mã;
“Na mbom menndzi dɛw wɔ mo nko mo konyimdzi ho, mbom me dɛw hyɛ mã osian m’enuanom no so a wɔkɔr Nephi asaase do no hɔn konyimdzi ntsi. …
“Afei, sɛ modwen m’enuanom yinom hɔn konyimdzi ho a nna me kra eguan araa ma ɔatsew noho koraa mpo efi me nyimpadua ho, na dɛ mbrɛ ɔyɛ no, dɛmara so na m’enyigye ne kɛse tse.”
Hɛn som a yɛdze som hɛnho nkorkor wɔ Asɔr no mu no n’aba kã enyigye a “wɔdze esi hɛn enyim” no ho. Abagura na atseetsee mber mpo mu no, yebotum asom abotar mu sɛ yetsim wɔ enyigye dɛ yɛrema Nyame N’enyi asɔ na yɛdze kan, mboa, na ahomkã abrɛ Ne mba, hɛn nuambanyin na nkyerɛbaa no.
Ber a nna ɔwɔ Haiti bosoom a abɛsen wɔ Port-au-Prince Temple tu hyɛ Nyame nsa som no, Elder David na Akyerɛbaa Susan Bednar nye akataasia bi a no kun ewu yayaayaw wɔ akwanhyia osii ndaansa no ara mu. Yɛnye no bɔɔ mu sũi. Naaso Kwesida no, nna ɔbaa dɔfo yi gyina n’ananmu dɛ akyerɛkwanfo no kor wɔ som n’ase a, ɔayɛrɛw n’ano fɛfɛɛfɛ rekyerɛɛ hɔn a wɔhɛɛn Temple no mu no.
Megye dzi dɛ “ahotseweefo dɛw a wobedzi” no ndaamba no fi woruhu dɛ Agyenkwa no totɔserɛ ma hɔn, “na obiara runntum nsusu dɛw a ɔhyɛɛ hɛn akoma mu dɛm aber no a yɛtsee dɛ ɔrobɔ mpaa serɛ Egya no dze ama hɛn no.” Menye President Russell M. Nelson no, megye dase dɛ enyigye yɛ akyɛdze ma Ahotseweefo nokwafo “a wɔasɔw wiadze yi mu mbeamudua no” na “wɔagye enyim robɔ mbɔdzen abɔ tsenenee bra,” dɛ mbrɛ Jesus Christ kyerɛkyerɛe no. Nkyɛ hom enyigye ahyɛ mã, mobɔ ho mpaa wɔ Jesus Christ Ne dzin krɔnkrɔn no mu, amen.