Kaimwiseklahn Kapahrek

Riei ohl oh lih kempoake kan, mwohn atail pahn kaimwisekala kapokon wadawad wet, kitail kapingkiheng Kauno pwehki Sapwellime kamarain oh silepatail Reh. Mahsen pwukat kiheng kitailehr kaweid oh kamarain.

Oaralap kan sohte kin kohieng pwihn en padahk kan. Irail koaros kin kapakapki pein arail kaudiahl pwehn kaukaunopieng arail padahk kan. Ohngie, e inenen kapwuriamwei uwen oaralap kan ahr kin ehupene ni soanamwahu. Sang ni amwail pahn onopki mepwukat, rapahki dahme Kauno songsong en padahkiheng kumwail sang rehn Sapwellime sounpapah kan.

Ngilen koul kan inenen kaselel. Se inenen kapingki mehlel soun koul oh keseng kan me kihpene arail koahiek kan pwehn wahdo Ngenen Kauno nan tiepene kan koaros. Oh E ketin kupwurmwahwih loulou kan oh tohn kapokon kan koaros. Ni mehlel, kapokon lap wet pilehu audehkin kitail ngehn sarawi laud.

Aht koapworopwor oh kapakap me iei nimwamwail kan en wiahla wasahn perehpen pwoson, wasa me Ngenen Kauno pahn kak ket ie. Mendahte uhpene kan me kin kapilkitailpene, nimwatail kan kakete rasehngala nanleng, wasahn onop, kapakap, oh pwoson kak miniminieng limpoak. Ni mehlel, kitail kak wiahla tohn padahk en Kauno kei, sang atail pahn uhkihda oh welwelian Ih wasa koaros me kitail mihie.

Kupwuren Koht anahne en pil wia kupwuratail. E ketin kupwurki Sapwellime seri kan en pilada ren pwurala Reh, kaunopehng, warohng, kamanamanla, katengtengpene, oh loalaopwoatehng inou kan me wiawihdahr nan tehnpas sarawi kan.

Met miehier tehnpas sarawi 162 me kasarawilahr. Me tepin koukouda kan wia mehn katamanpen pwoson oh koapworopwor en tepin tohn mwomwohdiso kan en mwehiet. Ehu ehu tehnpas sarawi me irail wiahda, e wiawihda sang arail tohnmetei oh doadoahk laud. Koaros me kokoudahr wia kasalepe lingan en pweidahn arail doadoahk.

E wia atail pwukoah sarawi en kanaiehng tehnpas pwukat. Pwehki met, ansou keren tehnpas sarawi en mahs pwukat pahn pilehu kamwahula oh ekei pahn onehda sapahl. Se pahn nantiheng doadoahngki soangen dipwisou me wiawihkidahr tehnpas pwukat mahso, pwehn kolokolete lingan oh mengin pehn mehn mahsoko.

Koasoandien tehnpas sarawi en St. George nan Utah sansalehr. Koasoandien kamwahulahn tehnpas sarawi en Salt Lake iangahki Temple Square oh sahpw kan limwah me karanihte Ohpis en Mwomwohdiso wet pahn pakairda Nialem, Epreil 19, 2019.

Tehnpas sarawi en Manti oh Logan pahn tep iang kamwahula nan pahr kohkohdo kan. Ansou me koasoandi pwukat pahn wiawihda, re pil pahn iang pakairda.

Tehnpas sarawi pwukat pahn ritdihsang weipokon erein ansou ieu pwehki doadoahk pwukat ah pahn wiawi. Tohn mwomwohdiso kan kak doulahte patehng oh perenki towehda kaudok kan en tehnpas sarawi teikan me kerendo. Ansou me ehu ehu doadoahk pwukat pahn imwisekla, tehnpas sarawi pwukat pahn pilehu kasarawihla.

Riei ohl oh lih akan, kitail pohnese me tehnpas sarawi kan wia wasa keieu sarawi nan Mwomwohdiso wet. Sang ni aht pahn pakairki kokoudahn tehnpas sarawi kapw, e kin wiahla kisehn poadoapoad sarawi en atail mwomwohdiso. Met, menlau rong mwahu ni meleilei. Ma I pahn pakairkihda ehu tehnpas sarawi wasa me komw kesempwalki, I men koangoangehkin kumwail en poardi ni meleilei oh kapakapki ahmw kaping sang nan ahmw mohngiong. Se sohte kupwurki ngihl laud kan me pahn kak kawehla uwen sarawi en tiepene wet oh tehnpas sarawi en Kauno kan.

Rahnwet se perenki aht pahn pakairkihda pil ekei kokoudahn tehnpas sarawi kapw kan, pwehn kokouda nan wasa pwukat:

Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.

Kalahngan, riei ohl oh lih kesempwal kan.

Ni atail koskosoia duwen atail tehnpas sarawi mering oh kapw kan, emenemen kitail en kin kasalehda sang atail wiewia kan me kitail wia tohnpadahk mehlel en Kaun Sises Krais. Kitail en kamwahuiala atail mour kan sang ni atail pwoson oh likih Ih. Kitail en doadoahngki manaman en Sapwellime Tomwo sang atail pahn kin koluhla rahn koaros. Oh kitail en kasarawiala oh kasarawiala sapahl atail mour kan pwehn papah Koht oh Sapwellime seri kan—koaros me momour oh me melahr akan.

I kiheng kumwail ahi limpoak oh kapai, kamelehieng kumwail me kaudiahl kin kohkohdohte nan Sapwellimen Kauno Mwomwohdiso. E pahn wihwiawihte lau “koasoandi lap en Koht pahn pweida, oh Kaun Siowa pahn ketin mahsanih doadoahk wet pweidahr.”¹

I kiheng kumwail kapahi oh kadehdehieng kumwail me Koht ieias! Sises iei ihme Krais! Mwomwohdiso wet me Sapwellime. Kitail wia Sapwellime aramas akan. Ni lengileng sarawi en Sises Krais, ahmen.