Mormon Nwoma ne Dzibew wɔ Nsakyeree mu

Preach My Gospel, mu no, yɛkenkan dɛ: “Hom nkaa dɛ hɛn ntseasee wɔ Ɔsor Egya na Ne enyigye ho nhyehyɛɛ no fi ndɛ nkɔnhyɛfo hɔ—Joseph Smith na n’ekyirdzifo—a wonyaa nyikyerɛ tɔɔtsenn fi Nyankopɔn hɔ. Dɛm ntsi, asɛmbisa a ɔwɔ dɛ obi bisa nye dɛ sɛ nna Joseph Smith yɛ nkɔnhyɛnyi a, na ɔnoara botum eyi asɛmbisa yi ano ber a ɔkenkan Mormon Nwoma no na ɔbɔ ho mpaa.

Me dasegye wɔ Nkɔnhyɛnyi Joseph Smith no ɔfrɛ krɔnkrɔn no ho ayɛ dzen ber a mpaabɔ mu ara murusua Mormon Nwoma no: Jesus Christ N’ahyɛmu Kor So. Medze Moroni ne nsato no edzi dwuma dɛ mimbisa ”Nyankopɔn, Onnyiewiei Egya, no wɔ Christ ne dzin mu,’’ sɛ Mormon Nwoma no yɛ nokwar a. Megye dase dɛ minyim dɛ ɔyɛ nokwar. Dɛm nyimdzee no aba mohɔ, dɛ mbrɛ obotum aba wo hɔ a, “ɔnam Sunsum Krɔnkrɔn no tum do.’’

Mormon Nwoma no mbueienyi kã dɛ: “Hɔn a wonya dɛm dasegye krɔnkrɔn [wɔ Mormon Nwoma no ho] a ofi Sunsum Krɔnkrɔn no hɔ yi nam dɛm tum no ara so do bohu dɛ Jesus Christ nye wiadze Agyenkwa no, na Joseph Smith yɛ N’oyikyerɛfo na nkɔnhyɛnyi wɔ dɛm nda a odzi ekyir yinom mu, na dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo yɛ Ewuradze n’ahenman a wɔdze aba asaase do bio dze robɔbɔ kwan ato hɔ ama Messiah Ne Mbae a Otsĩa Ebien no.’’

Ber a nna meyɛ asɛmpasomafo aberantsɛba a morokɔ Chile no, musũaa abrabɔ- nsakyeree kɛse adzesuadze bi wɔ Mormon Nwoma ne nsakyeree tum ho. Mr. Gonzalez—somm wɔ enyidzi gyinabew mu mfe pii wɔ n’asɔr mu. Nna ɔwɔ nyamesom ho ntsetsee a ɔkɔ ekyir, a abɔdzin wɔ nyamesɛm ho nyimdzee kã ho. Nna otuuw noho wɔ bible a ɔawea wɔ ho no. Nna ɔda edzi ma hɛn dɛ ɔyɛ nyamesɛm mu ɔbemfo.

Onyim Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɛmpasomafo no ara yie ber a wɔkɔ aprɔw kɛyɛ hɔn edwuma wɔ ne fie kuropɔn Lima, Peru mu. Nna daa ɔpɛ dɛ ɔnye hɔn hyia ama oeetum aakyerɛkyerɛ hɔn Bible mu nsɛm

Da kor bi, ɔdween dɛ gyama ɔyɛ akyɛdze a ofi sor no, asɛmpasomafo beenu gyinaa no wɔ stiitsi mu na wobisaa no sɛ wobotum aba ne fie na wɔnye no abɛkyɛ kyerɛwsɛm no a. Nna daa dza ɔrohwehwɛ nye no! Oenya ne mpaabɔ ho nyiano. Afei, obotum ɔakyerɛkyerɛɛ mberantsɛmba a wɔayew yinom no. Ɔkãa kyerɛɛ hɔn dɛ n’enyi bɛgye ho dɛ wɔbɛba ne fie na wɔapɛnsapɛnsa kyerɛwsɛm no mu.

Nna ne yamu a nnkyɛ mber aso. Nna ɔayɛ krado dɛ ɔdze Bible no bɛgye hɔn gyedzi ho kyim. Nna oenya akokodur dɛ Bible no bɛpaa mu akã hɔn mfomdo wɔ hɔn nkyerɛkyerɛ no mu pefee. Mber a wɔhyɛɛ no sõe, na asɛmpasomafo no bɔɔ abow no mu. Nna noho hihim. Afei ne mber no aba.

Obueii n’abow na ɔserɛɛ asɛmpasomafo no dɛ wɔmbra ne fie. Asɛmpasomafo no kor maa no buukuu a n’enyi yɛ bruw na ɔgyee dase fi n’akoma mu dɛ onyim dɛ Nyankopɔn n’asɛm na ɔwɔ buukuu no mu no yɛ nokwar. Asɛmpasomafo a otsĩa ebien no dze ne dasegye a ɔyɛ ndam wɔ buukuu no ho kãa ho, a ɔgyee dase dɛ ndɛ mber yi Nyankopɔn no nkɔnhyɛnyi, a wɔfrɛ no Joseph Smith, na ɔkyerɛɛ ase, na ɔkyerɛkyerɛɛ Christ ho nsɛm. Asɛmpasomafo no serɛɛ kwan na wofii ne fie kɔree.

Mr. Gonzalez n’abaw guaree. Naaso obueii buukuu no mu na ɔhyɛɛ ase bueibueii ne nkrataafa no mu. Ɔkenkaan krataafa a odzi kan no. Ɔkɔɔr do kenkanee a oenngyaa kɛpem adzekyee n’ewimbir no. Ɔkenkaan buukuu no nyina wiei na ohun dɛ ɔyɛ nokwar. Nna onyim dza ɔwɔ dɛ ɔyɛ. Ɔfrɛɛ asɛmpasomafo no, gyee adzesũa na ogyaa ɔbra a nna ɔrobɔ dadaw no mu dze bɛyɛɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba.

Nna dɛm nyimpa papa no yɛ me MTC kyerɛkyerɛnyi wɔ Provo, Utah. Nuabanyin Gonzalez ne nsakyeree asɛm na Mormon Nwoma no tum no tɔɔ mo do ara yie.

Mukodur Chile no, me mission president, President Royden J. Glade, serɛɛ hɛn dɛ yɛnkenkan Nkɔnhyɛnyi Joseph Smith ne dasegye no a ɔakyerɛw no wɔ Joseph Smith—Abakɔsɛm mu no dapɛn biara. Ɔkyerɛkyerɛɛ hɛn dɛ Enyido-adzehu a Odzi Kan no benya nhyɛdo tsenn wɔ hɛnara hɛn dasegye wɔ asɛmpa no ho na hɛn dasegye wɔ Mormon Nwoma no ho.

Megyee ɔfrɛ yi to mu enyiber do. Makenkan Enyido-adzehu a Odzi Kan nsɛm no: makenkan Mormon Nwoma no. Mabɔ mpaa dɛ mbrɛ Moroni kyerɛɛ no na mebisa “Nyankopɔn, Onnyiewiei Egya no, wɔ Christ ne dzin mu ‘’ dɛ sɛ Mormon Nwoma no yɛ nokwar a. Ndɛ megye dase a minyim dɛ Mormon Nwoma no, dɛ mbrɛ Nkɔnhyɛnyi Joseph Smith kãe dɛ ɔyɛ no, “odzi mu kyɛn nwoma biara a ɔwɔ asaase do, na ɔyɛ hɛn asɔr yi no botan-tsim, na obiara a obedzi no mu nsɛm do no ɔbɛbɛn Nyankopɔn kyɛn dɛ obedzi nwoma biara no mu nsɛm do.’’ Nkɔnhyɛnyi Joseph san so paa mu kãa dɛ: “Yi Mormon Nwoma na nyikyerɛ no fi hɔ, nna hɛn nyamesom wɔ hɛn? Yennyi bi.”

Ber a yɛtse dɛ hɛn nyimpa ban na Mormon Nwoma no no botae ase yie no, hɛn nsakyeree no yɛ dzen na osi pi ara yie. Yɛhyɛ dzen wɔ hɛn ngye ntomu mu dɛ yebesie ahyɛmu horow a yɛnye Nyankopɔn edzi no.

Mormon Nwoma no no botae tsitsir nye dɛ ɔbɔboaboa Israel a ɔapetse no ano. Mboano yi ma Nyankopɔn ne mba nyina kwan ma wɔdze kɛhɛn ahyɛmu anamɔn kwan no mu na, ber a woridzi ahyɛmu horow no nyi no, wɔasan akɔ Egya no hɔ. Ber a yɛkyerɛkyerɛ nnuho na yenuma nsakyereefo no, yɛboaboa Israel a wɔabɔ hɔn apetse no ano.

Mormon Nwoma no wɔ Israel fifo ho ntõtõho 108. Mormon Nwoma n’ahyɛse no, Nephi kyerɛkyerɛɛ dɛ, “Mo botae, kɛse ara nye dɛ mebɛkekã adasa aba Abraham ne Nyankopɔn, na Isaac ne Nyankopɔn, na Jacob, ne Nyankopɔn hɔ ma wɔagye hɔn nkwa.” Abraham, Isaac, na Jacob hɔn Nyankopɔn no nye Jesus Christ, Ahyɛmu Dadaw ne Nyankopɔn no. Wɔgye hɛn nkwa ber a yɛnam N’asɛmpa a yɛdze robɔ bra do ba Christ hɔ.

Ekyir no, Nephi kyerɛɛw dɛ:

“Nyew, m’egya kãa nsɛm pii mpo a ɔfa Amanamamfo ho, na dza ɔfa Israel fifo so ho, dɛ wɔdze hɔn bɔto ngodua ho, dɛ n’abaw bɛpan na wɔapetse asaase nyinara enyi. …

“Na Israel fifo no apetse ekyir no, wɔbɛsan aboaboa hɔn ano bio; anaa no korakora, dɛ Amanamamfo nsa akã Asɛmpa n’amahyɛ ekyir no, ngodua n’abaw no, anaa dɛ Israel fifo hɔn ahyɛ mu nkaasefo no wɔbɛgye hɔn ahyɛ mu, anaaso wobohu nokwar Messiah, hɔn Ewuradze na hɔn Pomfo no.’’

Dɛmara, wɔ Mormon Nwoma n’ewiei no, nkɔnhyɛnyi Moroni bɔ hɛn hɛn ahyɛmudzi horow ho nkaa, a ɔrekã dɛ, “Amma w’enyim enngu ase bio, ama Onnyiewiei Egya no n’ahyɛmu a ɔnye wo dzii no aahyɛ mã, O Israel fifo.’’

“Onnyiewiei Egya N’ahyɛmu horow no’’ a Moroni kãa ho asɛm no nye dza ɔwɔ hen? Yɛkenkan wɔ Abraham nwoma no mu dɛ:

“Me dzin dze Jehovah, na minyim ewiei fi ahyɛse; dɛm ntsi me nsa bɛkata wo do.

“Na mebɛyɛ wo ɔman kɛse, na mibehyira wo mbordo, na mama wo dzin ayɛ kɛse wɔ aman nyinara mu, na ebɛyɛ nhyira dze ama w’asefo a wobedzi w’ekyir no, ama hɔn nsamu no woesuo ɔsomdwuma yi nye Asɔfodzi no mu dze akɔ aman nyinara.’’

President Russell M. Nelson kyerɛkyerɛɛ wɔ wiadze nyina dawurbɔ a ɔnnkyɛree mu dɛ “nokwar nda a odzi ekyir yinom nye yi, na Ewuradze reyɛ N’edwuma ntsɛntsɛm dɛ ɔboa Israel ano. Dɛm mboano no nye adze a ohia dodow a ɔrokɔdo wɔ asaase do ndɛ. Adzebiara nnso nnkyɛn ne kɛseyɛ, adzebiara nnhia nnkyɛn no, adzebiara so nnkyɛn n’enyimnyam. Na sɛ yɛsanmu yi a, sɛ ipɛ ao, ibotum ayɛ ne kyɛfa mu kɛse bi. Ibotum ayɛ adze bi a ɔsõ, adze kunyin bi, adze enyimnyam bi ne kyɛfa mu kɛse bi!

“Sɛ yɛrekã mboano ho asɛm a, nna yɛrekã no sin ara dɛ nokwar fapem yi: hɛn Ɔsor Egya ne mba mu kor biara, a ɔwɔ ntwamutam n’afã biara no, fata dɛ ɔtse Jesus Christ n’asɛmpa a wɔdze asan-ananmu no ho asɛm. Wɔbɔ adwenpɔw ma hɔnho sɛ wɔpɛ dɛ wohu bi kã ho a.’’

Dɛm no nye dza yɛreyɛ dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no asɔrmba: yɛrohwehwɛ ma wiadze atse ase—na wɔasakyer aba—Jesus Christ N’asɛmpa no ho. Hɛn nye “nda a odzi ekyir mboanofo’’ no. Hɛn edwuma da edzi pefee. Enuanom na nkyerɛbaa, wɔmma wonhu hɛn dɛ hɛn nye hɔn a Moroni n’anohoba no da hɛn akoma do, yɛabɔ mpaa na yeenya nyiano dze ehu dɛ Mormon Nwoma no yɛ nokwar, na afei yɛnye binom akyɛ dɛm nyimdzee no wɔ kãsa mu, nye ma ohia dodow no, wɔ nyɛe mu.

Jesus Christ N’asɛmpa ne mãhyɛ wɔ Mormon Nwoma no mu. Ogya hɛn kɔ Egya no n’ahyɛmudzi horow no ho, a sɛ yesie a ɔma hɛn N’akyɛdze kɛsenara—onnyiewiei nkwa ho awerɛhyɛmu. Mormon Nwoma no nye Ɔsor Egya ne mbabanyin na mbabaa nyina hɔn nsakyeree no botantsim.

Mereserɛ akã bio efi President Nelson hɔ: “Ber a hom … kenkan fi Mormon Nwoma no mu daadaa no, hom bosũa mboano ho nkyerɛkyerɛ ho nsɛm , Jesus Christ No Werdambɔ, na N’asɛmpa ne mãhyɛ a wonnhu no wɔ Bible mu no ho nokwar nsɛm. Mormon Nwoma no dzi akotsen wɔ Israel hɔn mboano ho. Nokwar, sɛ Mormon Nwoma no nnyi hɔ a, nnkyɛ Israel hɔn mboano anohoba no nnkesi.’’

Hom mma me mfa Agyenkwa no ne nsɛm nwie ber a Ɔkyerɛkyerɛɛ Nephifo no anohoba nhyira ho asɛm: “Hom nye nkɔnhyɛfo no hɔn mba; na hom nye Israel fifo no; na hom nye ahyɛmu no a Egya no nye hom egyanom dzii no; na ɔsee Abraham dɛ: W’asefo mu na wɔbehyira asaase ebusuafo nyinara.’’

Megye dase dɛ yɛyɛ Nyankopɔn ne mbabanyin na mbabaa, Abraham n’aba, Israel fifo no. Mber a odzi ewiei nye yi a yɛroboaboa IsraeI ano na yɛdze Mormon Nwoma no reyɛ—nwoma a, Ewuradze no Sunsum kã ho no, nye nsakyeree n’edwindadze a ɔyɛ ndam. Nyankopɔn no nkɔnhyɛnyi, President Russell M. Nelson, na odzi hɛn baano,, ɔno a ɔrekyerɛkyerɛ hɛn nda mu Israel mboano no kwan. Mormon Nwoma no yɛ nokwar. Ɔasesã m’abrabɔ. Mobɔ hom anohoba, dɛ mbrɛ Moroni na nkɔnhyɛfo dodow ayɛ no mber nyina no, dɛ obotum asesã wodze. Wɔ Jesus Christ ne dzin mu, amen.