Ngehi Seri en Koht Men?

Moses esehda duwen ah sohso sarawi koasokoasoieng Kauno ni sansal mehlel. Mwurin mwo, “Sehdan kohdo kasongosonge,” ni mwomwen sohte sansal, ahpw pil mwomw lemei pwehn kapingada ihs Moses, “kosoia: Moses, sapwellimen kauno pwongih ie. Oh … Moses kilenglahng Sehdan oh nda: Ihs kowe? Kilang, ngehi sapwellimen Koht.”⁶

Mahwin lap en mwohmw sarawi wet popouslahte nan pingiping, pwehki wiepen Sehdan kan ah nannanti en kawehla dahme kitail kamehlele oh dehdehki ihs kitail rehn Koht. Kalahnganki, atail ahniki kapahi en wewehki ihs kitail sangete ni tapio: “Oh Koht mahsanih, Kitail wiahda aramas rasehng kitail,”⁷ oh Sapwellime soukohp ieias kan kin padahngki, “Emenemen aramas wia Sapwellimen Sahm oh Ihn nanleng pwutak oh serepein ngehn, me re kin ketin loaloale, oh, pwehki met, emenemen kitail sohsohkiher mwomwen Koht oh kak duwehla ih.”⁸

Wehwehpen mehlel pwukat uhdahn pahn⁹ sewese kitail en powehdi kasongosong kan, kahpwal akan, oh soangen kawiawi kan.¹⁰ Emen Wahnparon en Kauno mahsanih, “Padahkiheng irail ihs irail oh dahme re kohkihdo sampah.”¹¹

Mehlel pwukat wekidala mour en kempoakepahi Jen,¹² E lelohng nan aksiden ni ah pwulopwul. Mendahte paliwere ah lokolok laud, e kehn medek pwehki diraiper teio mehla. Dene, “Mie me ah nohno mehla, oh ngehi me kahrehda. Jen, me apwtehn rahn kei mwowe kesihnenda oh wadek, “Kitail sapwellimen Sahm Nanleng, me kin poakoahng kitail,”¹³ peidekieu met , “Ia mwomwen E pahn kak poakoahngie?”

E nda, “Lokolok en paliwar nekier, ahpw I sohte medewe me I pahn mwahula sang nsensuwed oh ohlahn pali ngeheni.”

Pwehn kak wenlahte mwowe, Jen ekihla ah pepehm kan loale, tepda dohla oh sempoakala. Mwurin sounpar ehu, ni ansou me e kakehr kosoia aksideno, sounsawas mwahu men pekihda en ntingihda lepin kosoio “Ngehi seri en Koht” oh nda pak 10 rahn koaros.

“Ntingiada lepin lokaiahko me mengei,” e tamanda, “ahpw I sohte kak nda. … Mwo inenen apwal, oh I sohte nohn kamehlele me Koht kupwurki ien wia Sapwellime seri. I pahn kospene oh sengiseng.”

Mwurin sounpwong kei, Jen kakehr ndahla pwon rahn koaros. Dene, “I kasalehda ahi madamadau oh pepehm kan, peki rehn Koht. … Eri ngehi tepida kamehlele lepin lokaiahko.” Kamehlel wet kahreiong Sounkomouro ah tepida kamwahuiala ohla kan. Pwuhk en Mormon kahrehiong ah nsenamwahu oh koapworopwor pwehki Sapwellime Tomw.¹⁴

Jen kaimwisengkihla nda, “Krais mwahngih ahi medek kan, ahi pahtou kan, ahi pepehm.” “I pehm sapwellimen Koht limpoak oh sohte kin kehn mehkot me laud duwehte! Ni ahi esehda me ngehi seri en Koht iei dehde me keiou laud me I ahneki!”

Riei ohl oh lih akan, ia mwomwen emenemen kitail pahn kehn manaman en wehwehkihla atail mwohmw sarawi? E tepida sang atail pahn rapahki en esehla Koht, Samatail.¹⁵ Presiden Russell M. Nelson kadehdehki, “Mehkot kapwuriamwei kin wiawi ni ansou me Sapwellimen Koht seri men rapahki en esehla duwen Ih oh Sapwellime Iehros.”¹⁶

Esehla oh idawehn Sounkomouro sewesei kitail en kohdo esehla Sahmo. “Me … e duwehte [Semehu],” ¹⁷ Sises padahngki, “Iehroso sohte kak pein wia mehkot, ahpw dahme e kilang Semehu wia.”¹⁸ Sapwellimen Krais mahsen koaros oh wiewiakasalehda ihs Koht oh ihs kitail ong Ih.¹⁹ Elder Jeffrey R. Holland padahngki, “Pwehki inta ah pwarada nan pwoahr koaros oh tentenihrki Ah lokolok, Krais rapahki ihs Ih me E kalapw rapahki—Sapwellime Sahm. ‘Abba,’ E tentenihr mahsanih, ‘Pahpa.’”²⁰

Duwehte Sises ah ketin rapahki Semehu nan Gethsemane, Joseph Smith ni ah pwulepwulo, 1820, rapahki Koht ni kapakap nan Sacred Grove. Mwurin wadawad, “Ma emen rehmwail anahne erpit, ah en peki rehn Koht,”²¹ Joseph kohla pwehn kapakap.

“Mwuri e ahpw ntingihdi, “I kelepwikihdi,” oh tepida wehkada ineng kan en loaleiet ong Koht.  …

“... I kilangada uhr en marain pohn moangeie. …

“... I kilangada Kahlap riau, me ara marain oh klohri sohte me duwehte, keskesihnen pohi nan wehwe. Emen ira lokaiahdo rehi, lukwerih edeie oh mahsanih, idihdih mehteio—[Joseph,] Iet Nei Pwutak Kempoake. Rong Ih!”²²

Ni atail pahn idawehn karasaras en Sounkomouro oh Soukohp Joseph me rapahki Koht ni mehlel, kitail pahn wehwehkihda ni wiepe iou, me duehte Jen, me Samatailo mwahngih adetail kan, pwe kitail Sapwellime seri.

Ong nohno pwulepwul kan, me kalapw ahniki katoutou oh pwunod nien nannantieng apwaliada “dih me sohte diperail,”²³ Dehr lamalam tikitikla nan amwail pwukoa kesempwal en sapwellimen Koht koasoandi. Nan ansou kapwunod akan—mwein ansou me kumwail pwakpwakih seri kan oh pwohn mehkot rongala nan imwen kuko kehsehkin kumwail me konomwail mwengehn soutiko wialahr meirong isihskumwail anahne ese me Koht kehnehr amwail rahn apwal akan.²⁴ “Kumwail dehr masak; pwe I ieiang kumwail,”²⁵ E kesehkin kumwail ni meleilei. Se waunekin kumwail ni amwail pahn kapwaiada koapworopwor en Sister Joy D. Jones, me kosoia, “Neitail serikan anahne wehwehki udahn ihs irail.”²⁶

I luke emenemen kitail en rapahki Koht oh Sapwellime Iehroso. Presiden Nelson mahsanih, “sohte wasa,” “likin pwuken Mormon me kin padahki padahk pwung mehlel sansal oh manaman ”²⁷ Pahkpeseng wadek oh esehla me Koht ketin wiahier “soahng koaros ong [sawaspetail] oh popohl”;²⁸ pwe E me “kalahngan oh limpoak, pwand en lingeringer, kanengamah oh direkihla mwahu”;²⁹ oh “koaros duepenehte [Reh].”³⁰ Ni ansou me kumwail medekila, salongala, masepwehkada, lingeringer, nsensued, duhpek, de kelehpw oh solahr ahneki koapwoaroapwoar nan amwail ansou apwal akan³¹ —pahkpeseng noumwail Pwuhk en Mormon kan, oh kumwail pahn wehwehkihda “[Koht] sohte pahn keseikitailla, sohte pak ehu E wia, oh E sohte pahn. E sohte kak wia. Kaidehn iduehn Ih en mwo en wia.”³²

Esehla Samatailo kin wekidala soahng koaros, mehlel atail mohngiong kan, ni Sapwellime Ngehno eh kin kamehlelehiong kitail udahn ihs kitail oh iahwen atail warohng uh Mwowe.³³ Koht ketin iang kitail alu nan ahl en inouo ni atail rapahki Ih nan kapakap kan, wadwadek pwuhk sarawi kan, oh peikiong dahme kitail nanantihong.

I poakoahng Koht en ahi pahpahko,³⁴ “ iei Kauno Koht Wasa Lapalap,”³⁵ me kin iang kitail sengiseng nan atail pahtou kan, kanengamahiong atail sued akan, oh peren ansou me kitail nantihong “koluhkihla [dihpatail] kan pwehn esehla [Ih].”³⁶ I pwongih Ih, me wia “pahpa ong me sohte arail pahpa kan,”³⁷oh iengen me sohte iengehkan. Ni kalahngan, I kadehde me I kohdohr oh esehla Koht, Semei, oh kadehdeh Sapwellime wihwia pwung kan, oh udahn [Mwomwe].”³⁸

Me koaros kitail pahn wehwehkihla ni mehlel oh poakoahng atail “pwung lapalap”³⁹ me emen seri en Koht ni ah pahn kohdo en esehla Ih, “ihte Koht mehlel, oh Sises Krais, me [E]ketin kadarodo”⁴⁰ ahi kapakap mehlel. Ni mwaren Sises Krais, ahmen.