Blauang er a Klengar El Mlei El Mla ra Babeluades

Sel sils ruriul er a Jesus ra le ketmeklii a meang el tekoi el mekelterir a re 5,000 el chad ra Galilee lolab a di “kleim el blauang ma eru el ngikel,” eng liluut el mo mengedecheduch er tirkel chad el ngara Kapernaum. A Osobel a miltebengar el kmo te betok er tir a dimlak el sal sorir osisecheklel er a bai luut lomeka er tir. Meng mlo uaisei, Ngii a millasem el mengitikaik er tir er sel klou a belkul el “tech el melmolm, el mora diak a ulebengelel klengar, el Ngelekel a chad a mo meskemiu.” ma Jesus a milekoi:

“Ngak e a blauang er a klengar.

“A re demmiu a milngang a blauang er a loleuaoch, e mla mad.

“Tiang sel blauang el mlei el mla ra babeluades, el nguu a chad, eng diak el mad.

“Ngak e a ngar el blauang el mlei el ngara babeluades: alsekum a ngidil chad a kolii tial blauang, e ngii a di ngar el mo cherechar: e sel blauang el bok nguu el msang a bedengek, el ngak a otilii el kirel a klengar er a beluulechad.”

A belkul a tekingel a Osobel a dimlak lomtab a rulerrengs er Ngii le te kuk di ulerenges a tekoi el lolekoi. Ng dektir le tomdasu, e rau a rengrir, “Ng mekerang ngikal chad a lomeskid a bedengel me dongang?” Ma Jesus a liluut el melmolm er a cheldecheduch:

“Ng klemerang, ng klemerang, Mak kmur er kemiu, a lak ke mnguu a bedengel a Ngelekel a chad ma rsechel, eng diak a klengar er kemiu.

“Ngikel nguu a bedengek, ma rsechek, a nguu a diak a ulebengelel klengar; e Ngak a mo okisii er sel lulebongel el sils.

“Le bedengek a meral tech, e a rsechek a meral ilumel.”

E Ngii a dulii sel meral dmolech el belkul sel tekingel:

“Ngkel nguu a bedengek, ma rsechek, a kie el ngar ngak, me Ngak a kie el ngar ngii.

“Ma di ngar el Chedam a uldureklak, e Ngak a ngar ra Demad: me ngkel nguu tial bedengek, a dirrek el ngar lokiu ngak.”

Ng dirrek el tirkal rirengesii a dimlak el nguu a belkul a tekingel a Jesus, e “te betok … , ra le rengesii tiang, a dilu el kmo, Tia kmal meringel el tekoi; ng techa metebengii? … [Isei] el taem e te betok er a re mesiungel a ulebult e dimlak el luut el lobengkel.”

Sel dolai er a bedengel ma rsechel a ngodech el rolel a dolecholt me bode mui e loba Osobel el mera klengar er kid—el me ra chaidirengud—me bode tang. E mekerang el uaisei tiang?

Kot, kede medengei el kmo sera lolenget er a bedengel ma rsechel, e a Jesus a tilengetengii el kirel a kengtid e mlo mesisiich er a kodall, el bedengel ma reng. Meng bleketakl, kede melai er a bedengel ma rsechel sel de nguu sel klisichel ma klengetengat er sel Tngakireng.

A osisecheklel a Kristo a olecholt ra kmo ngera kired el meruul me de nguu a krasia er a tngakireng. Kede mo oumerang e ngarngii a klaumerang er kid er a Kristo, mo ouchul e metecholb, nguu a Chedaol Reng, e seikid e a Rubak omekngeltengat er kid el melubet a kengtid lokiu a ngau ma Chedaol Reng.” Tia e a rael, ng techelled el morsel krasia ra tngakireng ra Osobel el morsel melmalt e ibutek el rael el bedul a rengedel.

“Alsekum me kede outekangel el bedul luchei, el mesuub er a tekingel a Kristo, e outekangel el mora ulebongel, e kede nguu a diak a ulebengelel klengar.

“… Mesang, tia e a osisecheklel a Kristo, e di imong e klemerang el losisecheklel a Demad, ma Ngelekel, ma Chedaol Reng, el di imol Dios, el diak a ulebengelel.”

Sel lokesiul a sakrament el kirel sel Belsilel a Rubak a klebokel el domtab er ngii. A blauang ma ralm a belkul a tech ma rsechel el Ngii a Blauang er a Klengar e Ralm er a Klengar, el mesisiich el lomeklatk er kid el Ngii a mlo melenget e lolsobel er kid. Mesel lomached er a blauang, e kede melatk er a bedengel Osobel el cheuarm. A Elder Dallin H. Oaks a ulemtab er sel “losoud malechub eng ngobadech, e a dertelkib er a blauang er a sakrament a mengodech a belkul mesel dongang. Kede rokui el kakerous a kngtid el douchel a rengud er ngii. Kede rokui al kakerous a usbechelled lokiu a Tngakireng er a Rubak el Jesus Kristo, el ngii a dolbedebek er ngii er tial chedaol ruoll.” Mesel dolim er a ralm, e kede omdasu er a rsechel el tilobed er a Gethsemane ma le ngara kerus mesel klisichel el mengikiid. Sel dodengei el diak a mekikiongel el soiseb er a rengedel, e kede oterkeklid el mo bebil er tirkel el mla mukbeches lokiu a rsechel Osobel, leng klaumerang er kid, ma kleuchul el reng ra kengtid, e ou merang el mo ra ulebongel.”

Ak mla melekoi el kirel a dolai er sel krasia er a tngakireng ra Osobel el melubet a kengtid ma ultil a ikal klengit er ngar kid. Meng belkul a tekoi el sel melai er a bedengel ma rsechel a lmuut el dmolech a belkul ma berredel, le sel belkul a suebech a ikel klungiolel ma blekerdelel a Kristo, e kid a mo mcherei a di klechad er a chad e mo Santo “lokiu a tngakireng er a Kristo el Rubak.” Mesel dolai er a blauang ma ralm ra sakrament er a bek el sandei, e ngungil a domes el kmo kede mo mui el keltmokl e kired el melai er sel blekerdelel ma okesiul Ngii el diak a kngtil el mera klengar ma klechad er kid. A Jesus a dimlak a kngtil meng mle sebechel melubet a kengterir a rechad. Meng diak el motaut er a llach, Ngii a sebechel lodersii el kired el sumecheklii a llach e odersii a klechubechub. Mesel dolatk er ngii e kulii sel tenget er a tngakireng er Ngii, eng dirrek el kired el lomtab er sel klikiid el klengar er Ngii.

Tia belkul a kmo ng kired louedikel el meringel el kutmokl a ngercheled. Ng diak ke de delecholech el uaisei e bai kired el merael el blechoel bedul ruchei el kirel “sel lolkael ra mui el blekerdelel a Kristo.” El ua demal a King Lamoni er a chelsel a Babier er a Mormon, ng kired el kongei el mo imikr a rokui el kengtid e omes ra kmo ngera soal a Rubak er kid, el derta el chad me a kid el dmak.

A tara taem, e a sechelik a uluchais er a blekeradel el mlo rengii ra losiou el mision president. Ng mlora botk e mlo olenguul el telal sandei el melisiich er ngii. Meng ngara ulenguul, eng chiloit a klou el temel el mesuub e omdasu a chedaol lechukl. A tara sueleb ra lomdasu a tekingel Osobel el ngara luiich ma euid el bliongel ra Ongedei el Nephi, eng ngulengellokl el limiit a medal. Eng mocha ouchais:

“Ak mlo merrous e milsang a ungil, e loberberek el siasing ra klengar er ngak. Ng mlocholt a kngtik, mak mekngit el melilt, ma taem … el kumtebechel er a rechad el kekerei a renguk, luldimukl aikel kulbes el kutmokl el ungil tekoi. … [Sel] cherrengelel [olchotel a] klengar er ngak a mlocholt el me rengak er a di kesai el bung, engdi ng kora mle kemangel. Mak milkiis, e suebek a renguk e … ilitak el mo outubaruach ra bita ra dukkellek e mocha meluluuch, e lolengit a klausubes, loltobed a ikel ngara renguk el direkak a ta el kuaisei.

“Nguchei er tial berrous, eng dimlak kudengei el kmo ngak a kmal lousbech ouchelreng. A kngtik ma chelitechetuk a kiul mlo bleketakl el me rengak mesel deliobech ra klechad er ngak mesel chedaol ma klungiolel a Dios a kora ua blo le million a tengel. Chelsel tial nglunguchek er sel teleal sils, e ak ulchotii a dmolech lomereng el saul el mora Demad ra Babeluades ma Osobel e loba mui el reng el kirel a tekoi el blal ruul el kirek ma ikel delongelam ngak ma bechik ma rengelekek. Ma ktubaruach e dirrek el mlo melchesuar ra Dios loba mesisiich el beltik el reng ma klubechub el kirek, ngii me ngak a diak kumelchesiu el klikiid. …

“Ng sebechek el kmul kmo ak milngodech er sel sils. … Ngulebult a renguk. … A dilubech er a uriul er sel blekeradel e ak milngai el lmuut el mo chubechub el mora rechad, el mlo mesisiich el lou beltik el reng, lobengkel sel reng e loleached e lomerek er a ebangkelio. … A kungil medengelii a klumech er a klaumerang, ongiil, mesel sengk er a ouchul el reng el ngara Babier ra Mormon el diak el ua uchelel.”

Ng klou a ultutelel el bo dodengelii tial beiusech locholt el kirel a kengtil ma chelitechetul ngikal lungil chad el dimlak el terebengii malechub el itechetur. Uaisei, ng mlo melkedukem e chetil. Ng milchesuar e lorechudel kirel mo ouchel. Ng milngai a rengul el meriou, engdi ng milechesuar ra saul, budech, mesel lurungulel—e leng—Jesus Kristo, “el blauang er a klengar el mle metengel ra babeluades.”

A sechelik a millekoi er a deliobech el lulsang er a berrusel el delongelel a klengar er ngii mesel chedolel a Dios. Chedaol a klebechel el tekoi. A dolai er a bedengel ma rsechel a Kristo a belkul a mo cheledaol. A Dios a mellach, “Bom chedaol; le ngak a chedaol.”

A Enoch a milelach er kid el kmo, “Molsisechakl er tiang el mo ra rengelekiu, a rokui el chad, el meliuekl, a kirir louchul, le lak eng diak el siseb er a rengedel a Dios, leng diak a mekikiongel el kie lobengkel; el ua, ikel tekingel a Adam, ng Chad el Cheledaol a Ngklel, e a ngklel a Di Imo el Ngelekel a Chad, el Jesus Kristo.” Sera ak kekerei el buik, e ak mle rrau a renguk ra kmo ngerang mesel ngara Beches el Renged e a Jesus a blechoel losaod er Ngii el Ngelekel a Chad e a klemerang e Ngii a meral Ngelekel a Dios, engdi a tekingel a Enoch a lmuut el sumechokl a ikal teletael e lochotii el kmo Ngii a chedaol e cheledaol—Ngii e a Ngelekel a Chad el Chedaol, el Dios el Chedam.

Alsekum e kede kiei el ngara Kristo me Ngii el kie el ngar kid, eng cheledaol a dosiik er ngii, ra bedenged ma reng. Kede osiik er ngii ra templo el chelduib er a chelsel kmo “Cheledaol el mor a Rubak.” Kede osiik er ngii ra chelbechiled, telungalk, ma re keblid. Kede osiik er ngii ra bek el sandei sel doldeu a rengud ra chedaol sils ra Rubak. Kede osiik er ngii ra klechad er kid: ra tekinged, a doubail, ma domdasu. El uai ikel dilung a President Thomas S. Monson, “Kid a redechel a bekl el tekoi el donguiu, domes, rokui el dorrenges ma rokui el domdasu.” Ke dosiik el mo cheledaol sel de chellungel er a kerus er kid ra bekl el sils.

A Sister Carol F. McConkie a ulemtab: “Kede mes a betok el bedengel a skeng, ongarm, ma uldikel el oridid ra rokui lungil e klikiid ra medal a Dios. Engdi a ikal blekerdeled er a klechad a meskid a techall el melilt er a cheledaol. Ngou mesind el sel dechoit a suled el mengeluoleu a telbiled eng kikidid e rullid el mo chedaol.” Me a“ikel dechoit a suled er ngii” E bok dechelir a omesiou el dorrul.

Kede medengei el kmo “sel [kid] a mesiou ra rebebil e [ke]de mesiou er a Dios.” E a Rubak a omeklatk er kid el aikal lomesiou a chaidirengul a klengar er Ngii ma blekerdelel: “Leng molmuut er a Ngelekel a Chad a dimlak el mei el dosiou er ngii, ng bai mesiou, lodersii a klengar er ngii el ngubeteterir a re betok.” President Marion G. Romney a ungil smodii: “A omesiou a diak el tekoi el dou tekangel er ngii er tial beluulechad me de cherrengelii a llemelted el mo kie er sel ngarbab el dauch. A omesiou sel luchetemel a klebkall el klengar el keltmokl er sel ngarbab el dauch.”

A Sekaria a ulemlaoch el kmo sel taem el Rubak a mengederedel el telael rak, eng molmuut ra ikel kambalang ra uos a chelduib er ngii a ikal tekoi, “Chedaol el mora Rubak.” Ngulkiu tial luldasu, e a re mle kot el Santo ra ikal beluu a tiletii seikid el luletklatk, “Cheledaol el mora Rubak,” el kirel a di beot malechub eng tekoi ra bek el sils molmuut er a ikel melutk el kirel a klaumerang ma doruul el tekingel a klechelid. Ng mle llechukl ra kob ma blatong ra sakrament e llechukl er a babier ra milchedaol el Rokeuid, ma banderang ra Relief Society. “Cheledaol el mora Rubak” a dirrek el mla rengii ra mado er a Zion’s Cooperative Mercantile Institution, sel klou el stouang ra ZCMI. Ng mla rengii ra martiliong ma taiko. “Cheledaol el mora Rubak a mle chelduib er a deel ra chesmerel a blil a President Brigham Young. A ika lolechotel a cheledaol ra ikel kora ngodech malechub eng diak de bdasou el basio a locha ngodech, engdi ngochotii a blechoel e mekdekudem el osenged el kirel a cheledaol el ngii a kirel uaisei.

A melai er a bedengel ma rsechel a Osobel a belkul a mo imikr a rokui el tekoi el diak losisii ra ikel blekerdelel a Kristo e mo merodel a teletelel el me rekid. Tia e a klou el belkul a ouchul el reng e diak ke di bode iikr a mle kengtid, ng dirrek el “domult er a rengud ma kliseched el mora Dios” e melmolm el mong. El uai sei el dilubech el mora sechelik ra berusel, a Dios a mo chotii er kid a ngesengesed ma chelitechetud, engdi Ngii a dirrek el ngosukid el mult a chelitechetud el mo klisiched. Alsekum meng ngara rengud lolengit, “Ngera dirk ngesengesek?” Ng diak el chitid mel di kid el melangch, e bai mokiu a beltik el reng e onger leng kirel a deuil a rengud. E ngii a momeskid a urunguled.

Ng meringel lureor, e mo ktekudel alsekum me kede melasem el mo cheledaol el dil kid. Sel klebekelel tial klemerang a diak el dil kid. Ke doba sel diak a ulebengelel el beltik el reng ra Dios, sel krasia ra Kristo, sel chelodel ma ulekereuil a Chedaol Reng, ma otngelir ma omelisiich er a re Santo lokiu a bedengel a Kristo. El diua sel bleketakl eng di dmolech el chelitakl el orrimel er kid:

A kudersii a klaumerang er ngak er a Jesus Kristo, “ngkel blauang er a klengar e mlei el mla ra babeluades,” me ngkel nguu a bedengel ma rsechel, a nguu a diak a ulebengelel klengar,” loba ngklel a Jesus Kristo, amen.