Jab Reito-Reitak, Reilōn̄ļo̧k!

Jibadbad eo aō ej n̄an “karuwaineneik ro jet n̄an itok n̄an Kraist.” En̄in ej bar jibadbad eo am̧ barāinwōt. Jej maron̄ kakūrm̧ool jibadbad in ilo ad reilōn̄ļo̧k n̄an Jisōs Kraist.

Iaar peptaij ippān ro jinō im jema ke eaar 16 aō iiō. Ļaddik eo jatū, Kyung-Hwan, eo eaar 14 an iiō, eaar bar kobatok ilo Kabun̄ in jān eo ulepa, Young Jik Lee, im kar karuwaineneik kōm̧ ļo̧k n̄an kabun̄ eo an. Kajjojo ro 10 uwaan baam̧le eo raar pād ilo kabun̄ ko reoktak, kōn menin kōm̧ ar m̧ōņōņō in pukot m̧ool eo im kar kōņaan kwaļo̧k m̧ōņōņō eo kōm̧ ar loe ilo gospel eo an Jisōs Kraist ālkin am̧ kar peptaij.

Jema eo eaar make wōt ikdeelel iibwilijim n̄an katak im kwaļo̧k m̧ool eo. Ekkā an ruj in jimarok im riiti jeje ko rekwojarjar elōn̄ ļo̧k jen ruo awa kajjojo raan. Ālkin jerbal ej etal ippān mijinede ro im loļo̧k baam̧le eo am, im ro ipeļaakūm̧ enan̄in aolep raan. Jiljilimjuon allōn̄ ko ālkin am̧ kar peptaij, 23 iaan baam̧le eo am im ro nukum raar erom membōr in Kabun̄ in. Menin eaar kabwilōn̄lōn̄ n̄an lo 130 armej ro raar peptaij ilo iiō eo kōn wōt jerbal in mijinede eo an jema.

Menmenbwij an baam̧le eaar barāinwōt aorōk n̄an e, im eaar kadedeļo̧k ralitōk epepen in rūtto ro am. Jān tōre eo, leen ko an oktak eo an baam̧le eo am, eaar ijjino jen ļaddik eo jatū 14 an iiō, eaar ļapļo̧k ilo wāween ko ejjeļo̧k jem̧ļo̧kier ejjab wōt ippān ro remour ak barāinwōt ilubwilijin ro remej. Jerbale jerbal eo an jema im ro jet, okraņ baam̧le eo eaar lōn̄ļo̧k n̄an 32 epepen ko, im kiiō em̧ōj am̧ kadedeļo̧k jerbal in tam̧peļ n̄an elōn̄ bwij ko. Rainin ij ļo̧kjānaō im en̄jake eļap m̧ōņōņō kōn ro jibum̧ im jim̧m̧am̧ im ro bwijim̧.

Būreejtōn Gordon B.Hinckley eaar kwaļo̧k ejja en̄jake in ilo Columbus Ohio Temple:

“Kejōkļo̧kjeņ kōn mour ko an ro [jim̧m̧aō jim̧m̧aō, jim̧m̧aō, im jema] ke iaar jijet ilo tam̧peļ eo, iaar reilo̧k n̄an leddik eo nejū, … im n̄an leddik eo nejin, im n̄an ro nejin, im ro jibū im bar jibū. Iaar kile bwe ij jutak io̧lepen epepen kein jiljilimjuon—jilu im̧aō im jilu ālkū.

“Ilo m̧weo ekwojarjar im aorōk eaar itok n̄an ļōmņak eo aō juon kōļmenļo̧kjeņ kōn eddo eo eļap bwe eaar aō n̄an leļo̧k aolepān ko iaar būki āinwōt rijolet jān rūtto ro aō me em̧ōj aer kiiō itok ālkū. ”

Jej aolep m̧ōttan juon baam̧le indeeo. Jerbal eo ad emaron̄ kōm̧m̧ane juon oktak eo eļap ewaļo̧k ilo em̧m̧an ak nana.Būreejtōn Hinckley eaar ba, “Jab kōm̧m̧an bwe kwōn m̧ōjņo̧ ilo korak in epepen in ami.” Ami tiljek ilo gospel in enaaj kōkajoorļo̧k baam̧le eo ami. Elmen ad jeļā jenaaj lukkuun kajoor ilo baam̧le eo ad indeeo?

Juon raan, jet allōn̄ ālkin peptaij eo aō, iaar ron̄ an jet membōr kōnanaik doon ilo kabun̄ in. Iaar lukkuun inepata. Iaar ro̧o̧l n̄an m̧weo im̧ō im ba n̄an jema bwe ijjab bar aikuj etal n̄an jar. Ebwe an pen n̄an lo membōr ro rej kōnanaik ro jet. Ālkin ron̄jake, jema ar ba bwe gospel in em̧ōj an jepļaaktok im eweepān ak membōr ro rejjab, men̄e e make ak n̄a. Eaar kapene im ba, “Jab jerwane tōmak eo am̧ kōn wōt armej ro ipeļaakūm̧, ak jerbale juon jem̧jerā eo ekajoor ippān Jisōs Kraist. Jab Reito-Reitak, reilōn̄ļo̧k!”

Reilōn̄ļo̧k n̄an Jisōs Kraist—naan in kapilōk eo em̧m̧an an jema, eaar kōkajoorļo̧k tōmak eo aō men̄e ij ioon apan̄ ko an mour. Eaar katakin eō wāween mour kake katak ko an Kraist, ilo ad riiti naan ko An: “Reitok n̄an Eō ilo ļōmņak otemjej; jab pere, jab mijak.”

Ke iaar tōl mijen eo ilo Washington Seattle Mission, eaar wōt aolepān iiō eo. Aaet, mijenede ro ad kar jiron̄ er n̄an ilo̧k im kwaļo̧k ilo wōt. Ekkā aō ba n̄an er, “Diwōjļo̧k ilo an wōt, reilōn̄ļo̧k n̄an lan̄, kōpeļļo̧k lo̧n̄ūm̧, im idaak! N̄e kwōj reilōn̄ļo̧k, kwonaaj kajoorļo̧k n̄an kōpeļļo̧k lo̧n̄ūm̧ n̄an aolep kōn ejjeļo̧k mijak.” Eaar juon kōkaļļe in ekkatak n̄an er n̄an reilōn̄ļo̧k n̄e rej ioon apan̄ ko ālkin mijen eo aer. Jouj im jab kajieon̄n̄e menin ilo jikin ko renana.

Ke ij jerbal wōt ilo Seattle mijen, iaar bōk juon taļboon jān ļaddik eo nejū erūtto, Sunbeam, eo ej juon riokwōn. Eaar ba bwe enaaj kōm̧m̧ane juon kōjan̄jan̄ ilo Carnegie Hall ilo New York kōnke eaar wini juon international competition. Kōm̧ ar lukkuun m̧ōņōņō im lukkuun iruj kōn e. Ijoke, ilo joteen eo, ke kōm̧ij jar kōn kam̧m̧oolol, kōrā eo ippa eaar kile bwe kōm̧ij jab maron̄ etal ippān n̄an kōjan̄jan̄ eo an im kar ba n̄an Jemedwōj Ilan̄ men kein āinwōt: “Jememwōj Ilan̄, Ij kam̧m̧oolol kōn kōjeraam̧m̧an eo Kwar leļo̧k n̄an Sunbeam. Ijoke, ij jolo̧k aō bōd bwe ijjab maron̄ etal n̄an ijo. Imaron̄ etal eļan̄n̄e Kwoj kōjeraam̧m̧an in men̄e kiiō ak ālkin mijen in. Ijjab elotaan, ak ewōr jidik aō būrom̧ōj.”

Ke ej m̧ōj an jar, eaar ron̄ juon ainikien ealikar. “Kōnke kwojjab maron̄ etal, kar leļo̧k n̄an ļaddik eo nejūm̧ kōjeraam̧m̧an in. Kwomaron̄ ke jānijji?

Kōrā eo pāleeō eaar bwilōn̄. Eaar jeļā bwe ajri ro renaaj jeraam̧m̧an kōn tiljek in jerbal eo an ro jineer im jemāer ilo aelōn̄ in kiin̄ eo an Irooj, ak ej kab baj meļeļe eddo eo an kōn alikar. Eaar m̧ōkaj an bar jar n̄an Jemedwōj Ilan̄. “Ejjab, ejjab, ej EMMAN wōt n̄e ijjab etal. Men bwe en bōk jeraam̧m̧an in.”

Ro jeiū im jatū, ejjab pidodo n̄an ad kile iakwe eo an Jemedwōj Ilan̄ n̄e jej reito-reitak kōn mej ko mejeed kōnke jej lo jerata, būrom̧ōj, ak ajimakeke. N̄an keidi, jej maron̄ lo kōjeram̧m̧an ko rellōn̄ n̄e jej reilōn̄ļo̧k. Irooj eaar kwaļo̧k, “N̄e jej bōk jabdewōt kōjeraam̧m̧an jān Anij, e ej pokake kien eo me ioon e ej pedped.” N̄an aolep ro rej pād ilo jabdewōt jerbal an Anij, kwōn jeļā bwe kwōj juon kein kōttōrak in kōjeraam̧m̧an eo ekajoor n̄an ro m̧okta ļo̧k im n̄an epepen ne ej itok.

Rainin, ij m̧ōņōņō in lo elōn̄ uwaan ro ilo baam̧le eo am̧ rej tiljek ilo bujen ko aer im ij būrom̧ōj bwe elōn̄ iaan baam̧le ko ad rejako ippād rainin. Elder M. Russell Ballard eaar ba: “Eļan̄n̄e kom̧ij kālet n̄an erom jāniknik ak n̄an ilo̧k jān Kabun̄ eo kōjepļaaktok an Jisōs Kraist im Armej ro Rekwojarjar ilo Raan-ko Āliktata, ia kwonaaj ilo̧k n̄an e? Ta eo kwonaaj kōm̧m̧ane? Jokālet eo n̄an ‘jab bar etetal’ ippān ro uwaan Kabun̄ im ritōl ro kar kālet an Irooj naaj wōr juon kilaan aitok kitien me eban maron̄ iien otemjej jejjet meļeļe kake kiiō.” Būreejtōn Thomas S. Monson eaar rōjan̄ kōj, “Jen kālet kālet eo rejim̧we, ijjelo̧kin kālet eo ebōd.”

Ejamin rum̧wij n̄an reilo̧k n̄an Jisōs Kraist. Pā ko pein rej aolep iien peļļo̧k n̄an kom̧. Ewōr epepen ko m̧okta ļo̧k im im̧aad rej pedped wōt ilo kōj n̄an ļoor Kraist bwe jen maron̄ juon baam̧le indeeo an Anij.

Ke kar kōtļo̧k eō jen kūr eo aō āinwōt juon kar stake būreejtōn, ļaddik ro nejū raar lukkuun m̧ōņōņō bwe remaron̄ joļo̧k eļap iien ippa. Jilu wiik tokālik iaar kūr āinwōt juon Jiljilimjuonn̄oul. Ilo jinoin iaar ļōmņak remaron̄ kar inepata, ak ļaddik eo nejū edik eaar ba ilo an ettā, “Baba, jab inepata.Jej juon baam̧le indeeo.” Ekar juon ennaan eo em̧m̧an im ealikar! Iaar inepata jidik kōnke iaar reito-reitak ilo mour in wōt, ak ļaddik eo nejū eaar m̧ōņōņō kōnke eaar jab reito-reitak ak reilōn̄ļo̧k kōn mej ko an indeeo im jibadbad eo an Irooj.

Ejjab aolep iien pidodo n̄an reilo̧k n̄e ro jinōm̧ im jemōm̧ rej jum̧ae gospel in, n̄e kwoj juon membōr in juon iunit eo edik, n̄e eo pāleem ejjab juon membōr, n̄e kwojjan̄in pālele ak kwoj kōm̧m̧ane ijo em̧m̧antata n̄an m̧are, n̄e juon ajri ejako, n̄e kwoj juon m̧am̧a ak baba eo emake iaan, n̄e kwoj ioon apan̄ ko ilo ānbwiin, ak n̄e kwar jorrāān ilo juon m̧akūtkūt in laļ, im ko jet. Dāpij wōt tōmak eo am̧ ilo iien ko reppen. Reilōn̄ļo̧k n̄an Kraist kōn kajoor, dim, im kōmour. Kōn kajoor in Pinmuur eo an Jisōs Kraist, “aolep men ko otemjeļo̧k renaaj jerbal ippān doon n̄an em̧m̧an eo [am̧].”

Ij kam̧ool kōn Jisōs Kraist, bwe E ej ad Rilo̧mo̧o̧r im Ripinmuur. N̄e jej ļoor rikanaan eo ad emour, Būreejtōn Thomas S. Monson, jej reilo̧k n̄an Jisōs Kraist. Ilo ad jar im ekkatak jeje ko rekwojarjar aolep raan, im bōk m̧ōttan kwojkwoj eo aolep wiik, jej bōk kajoor n̄an aolep iien reilōn̄lo̧k n̄an E. Ij m̧ōnōņō bwe ij juon membōr in Kabun̄ in im m̧ōttan juon baam̧le indeeo. Ij kōņaan kwaļo̧k gospel in n̄an ro jet. Karuwaineneik ro jet n̄an itok n̄an Kraist en jibadbad eo ad, im jej maron̄ kakūrm̧ool jibarbar in ilo ad reilōn̄ļo̧k n̄an Jisōs Kraist. Ij kam̧ool kōn men kein ilo etan Jisōs Kraist, amen.