Ewe Nongonong mi ennet an Kraist

Ewe Achasefanin Kraist a awora ekkewe napanap minne sipwe tongeni anongonong won “ekkewe nimenimochun foffor, me umoumoch, me chenin ewe Messiah mi Fel,” “unusochuno non [Kraist],” angei mettoch mi och, me angei manau esemuch.

Nge ewe nongonong mi ennet an Kraist ina ewe an—ewe chok an—ren minne sipwe angei ekkewe feioch meinisin mi kawor ngenikich seni an Jises we Achasefan. Ewe nongonong mi ennet an Kraist ina met a mut ngenikich manamanen ngun pwe epwe seikakicheta seni nonnomuch non pekin ngun iei ngeni ew napanap ach sipwe unusochuno usun ewe Chon Amanau. Usun ei tettenin upusefan, Elter D. Todd Christofferson a aitikich: “Ach upusefan, ese usun ach uputiw non pekin inis, pwe a usun ew tetten nap seni ew mettoch mi fis. Me ach nikitu non ena tetten ina auchean popun manauach iei.”

Sipwe porous usun ew me ew kinikinin ewe nongonong mi ennet an Kraist.

Aewin, nuku non Jises Kraist me An Achasefan. Ekkewe soufos ra fen aitikich pwe nuku a pop seni ausening ngeni ewe kapasen Kraist. Ewe kapasen Kraist a pwarata usun an achasefanin ngaseno me urenikich ifa usun sia tongeni angei omusomusen tipis, feioch, me manau fefeita.

Mwirin ach rongorong ewe kapasen Kraist, sia aea nuku ren ach finata ne tapweno mwirin an ewe Chon Amanau afanafan me nenien appiru. Ach sipwe fori ei, Nifai a aitikich pwe sipwe: “unusen anukunuk won ekkewe nimenimochun fofforun [Kraist] ewe mi manaman ne amanaua kich.” Pokiten Jises I emon Kot me non ewe manau akkom,a manaueni ew manau ese tipis, me fansoun ewe Achasefan a amenemenochu ekkewe mochenin pungoch fan itom me fan itei, A wor ren ewe manaman me kii ne atufichi ewe manausefanitan aramas, me a atufichi an umoumoch epwe nemenano pungoch fansoun aier. Nupwen sia weweiti pwe sia tongeni angei umoumoch seni an Kraist nimenimoch, a tongeni wor ach nuku ngeni aier.” Ina minne, ach sipwe anongonong won an Kraist nimenimoch iwe sipwe nuku pwe A fori met mi auchea ne amanaua kich iwe mwirin sipwe foffor won ach nuku.

Nuku a pwan fori ach sipwe kouno ne aureki usun met ekkoch ra ekieki usuch me poputa ne ekieikochu usun met Kot a ekieki usuch.

Oruwan, aier. Samuel ewe Chon Leiman a aiti, “Ika oupwe nuku non itan [Kraist] we oupwe aier seni ami kewe tipis meinisin.”Aier ew niffang mi auchea seni Samach won Nang ewe a tufich seni ewe fangeno an Noun we Anamon. Ina ewe tetten ewe Sam a ngenikich ren ach siwin, are akunnu, ach ekiek, foffor, me ennetin inisich pwe sipwe napeno ne winiti usun ewe Chon Amanau. Esap chok ren wachemuken tipis nge a ew fofforun ach sipwe murinono iteiten ran pwe epwe anisikich ne akkufu ach tipis, ach sise unusoch, ach apwangapwang, me ach nipwakingaw. Aier a fori ach sipwe winiti “chon ennetin tapweno mwirin” Kraist, minne epwe aurano kich ren tongme asueno ach nuokus. Aier esap pwan ew kokkot ika pwe ach kokkoten manau unusoch ese fisioch. Soposopono ne aier ina ewe chok an a tongeni awora ngenikich pwapwa esemuch me atufichi kich ne niwin ne nonnom ren Samach won Nang.

Seni aier sia winiti mi tipemecheres me aneasochis ngeni an Kot mochen. Ei ese chok fis won pwisin an. Ew esinnen an Kot umoumoch me ach namotongaw, fiti ach ennetin achocho ne awena nonnomuch ngeni mochenin Kot, a wato chen non manauach. Chen “a ew aninis ika pochokun seni nang, a kawor seni ewe watten umoumoch me tong an Jises Kraist … aninisin fori mettoch mi och minne [kich] sise tongeni fori ika sia anongonong won ach pwisin pochokun.” Pokiten aier a wewen usun ach sipwe winiti usun ewe Chon Amanau, minne ese tufich ngenikich pwisin, a fokkun auchea ngenikich ewe Chen an ewe Chon Amanau ach sipwe siwini nonnomun manauach.

Nupwen sia aier, sia siwini, napanapach ese wenechar, ach apwangapwang, ach sise unusoch, me nuokus ren minafon napanap me nuku ewe a amarakich ngeni ewe Chon Amanau me anisikich ne winiti usun I.

Aunungatin, papatais me ewe sacrament. Ewe soufos Mormon a aitikich pwe “ewe aewin uwan aier pwe papatais.” An epwe unusoch, aier epwe chu ngeni ewe annukun papatais. Ren chon ewe Mwichefen, ekkewe pwon mi pin a fis atun papatais me ekkoch fansoun ra minafo sefan nupwen sia angei ewe sakrament.

Non ekkewe annukun papatais me ewe sakrament, sia pwon mi pin ne aneasochisi ekkewe annuk an ewe Sam me ewe Nau, chechemeni Kraist fansoun meinisin, me mochen mwarei iten Kraist fansoun meinisn (are An angang me napanapan) woch. Ewe Chon Amanau, epwe pwon mi pin ne amusano, are tonano, ach tipis me wau Ngunun we fan chommong [woch] ].”. Kraist a pwan pwon ne amwonnakicheta ngeni manau esemuch ren an anisikich ne winiti usun I.

Douglas D. Holmes, Aewin Chon Aninis non ewe Presetensin Ekkewe Anuon Unus, a makkei: “Ekkewe annukun papatais me ewe sakrament ra esissina pungunon me tettenin upusefan. Non papatais, sia peiasenano nonnomuch minen nom non aion me feito sefan ngeni ew manau mi fo. Non ewe sakrament, sia kaeo pwe ei siwin mi fis ren tettenin eipweipw, [ikewe] ekis me ekis, wik me wik, sia siwin nupwen sia aier, pwon mi pin, me ren napenon feiochun ewe Ngun sia [winiti usun Kraist].”

Annuk mi pin me pwon mi pin ir mi auchea me non ewe nongonong mi ennet an Kraist. Ewe manamanen Kot a pwano non manauach seni ach angei ekkewe annukun ewe pristut me aneasochisi ekkewe pwon mi pin non nimenimoch. Elter D. Todd Christofferson a awewei pwe “ei ‘manamanen Kot’ a feito non ewe aramas me seni aurouren ewe Ngun mi Fel.”

Aruwanun, ewe niffangen ewe Ngun mi Fel. Mwirin papatais sia angei ewe niffangen ewe Ngun mi Fel seni epinano ngeni ewe Ngun mi Fel. Ei niffang, ika sia angei, epwe mut ngenikich ewe chiechien emon Kot me soposoponon mumuta ngeni ewe chen mi auchea a fiti fengen me An aurour.

Non wisan ren chiechiach, ewe Ngun mi Fel a pwan ngenikich ekkoch manaman are pochokun pwe sipwe aneasochisi ach pwon mi pin. A pwan enimenimochu kicheno, wewen pwe a fori an “esap wor” ach tipis, nimenimoch, me pin me non achasefanin Jises Kraist.” Ei fofforun nimenimoch ese chok nimetikich, nge a pwan ngenikich niffangen ngun are ekkewe napanapen ewe Chon Amanau siwini nonnomuch,pwe esap “chiwen wor am mochenin fori mi ngaw.” Iteiten fansoun sia angei ewe Ngun mi Fel non manauach seni nuku, aier, annuk mi pin, angangen Kraist, me ekkoch mettoch sia mochen fori mi tupwon, sia siwin tori ekis me ekis sia winiti usun Kraist.

Enimuwan, nikitu tori nesoponon. Ewe soufos Nifai a aitikich pwe mwirin ach angei ewe niffangen ewe Ngun mi Fel sipwe “nikitu tori nesoponon, ne tapweno mwirin ewe nenien appiru an Noun ewe Kot mi manau,” Elter Dale G. Renlund a awewei ewe fofforun nikitu tori nesoponon usun ei: “Sipwe unusochuno ren ach soun … aea nuku non [Kraist], aier, angei ewe sakrament ne asofosefani ewe pwon mi pin me feiochun papatais, me angei ewe Ngun mi Fel pwe chiechiach mi napanap. Ika sia fori, sipwe winiti usun Kraist me sia tongeni nikitu tori nesoponon, fiti mettoch mi murino.”

Non ekkoch kapas, ewe niffangen ewe Ngun mi Fel me ewe siwin ena niffang a efisi non kich a awatteno ach nuku. Napenon nuku a emwen ngeni pwan aier. Nupwen sia fangeno netipach me ach tipis won ewe rongen sakrament, sia angei ewe Ngun mi Fel non watten napanap. Ach angei ewe Ngun mi Fel non watten napanap me angei ekkewe annuk mi pin me pwonen ewe kapas allim mi pin, sia angei “chen me ennet” tori ach angei ew unusoch.

Pwii me fefinei, nupwen sia aea ewe nongonong mi ennet an Kraist non manauach, sia feioch non pekin inis me pekin ngun, pwan mwo non ach weri sossot. Nesoponon sia tongeni “kamwochuno mettoch mi och meinisin.” Uwa pwarata pwe ei foffor a fen fis me soposopono ne fis non pwisin manauei, ekis me ekis.

Nge mi kon auchea, pwe sipwe aea ewe nongonong mi ennet an Kraist non manauach pokiten a awora ewe chok aan sefan ngeni Samach won Nang. Ina chok ewe aanen ach sipwe angei ewe Chon Amanau me winiti Noun anuon me fopun. Ennetin, ewe chok aanen ach sipwe ngaseno seni tipis me fefeita non pekin ngun ina sipwe aea ewe nongonong mi ennet an Kraist non manauach. Pwan ew aan, ewe Aposel John a atitikich pwe “ika emon … ese fiti an Kraist afanafan, Kot ese nom ren.” Iwe Jises pwisin a ureni ekkewe Engon me Ruemon chon Nifai pwe ika sisap aea nuku non Kraist, aier, me papatais, me nikitu tori nesoponon, “i ewe chok epwe pwan pokupokutiw me katurunong non ewe ekkei, seni minne neni [sise] tongeni niwin sefan.”

Iwe ifa usun sia tongeni unusen aea ewe nongonong mi ennet an Kraist non manauach? Non ew napanap sia tongeni achocho iteiten wik ne mwoneta ngeni ewe sakrament ren ach awora fansoun iotek ne sinei me ian sipwe murinono. Mwirin sia tongeni wato ew mettochun fangeno minne a eppeti kich seni ach sipwe usun Jises Kraist ngeni ewe rongen sakrament, sio non nuku ren aninis, tingor niffang seni ewe ngunupin mi auchea, me pwon mi pin ne murinono non ewe wik epwe feito. Nupwen sia fori, ewe Ngun mi Fel epwe napeno ne feito non manauach, iwe epwe wor rech pwan ekkoch pochokun ne akkufu ach nipwakingaw.

Ua pwarata pwe Jises Kraist I ewe Chon Amanauen ewe fonufan me Itan we chok ina ewe it sia tongeni manau seni. Mettoch meinisin mi och ra feito seni I. Nge ren ach sipwe ennetin “kamwochuno mettoch mi och meinisin,” fiti manau esemuch, mi auchea sipwe soposopono ne aea ewe nongonong mi ennet an Kraist non manauach. Non ewe it mi pin Jises Kraist, amen.