Kirel a Omesubed me a Ulekeruled er a Chedaol Tekoi

Se er ak kekerei el buik, ea rechad er a blik a ngiluu a uldars el ngak me a ochellek er a David a meral mlo mechas a rengmam er ngii. Tial uldars a mle kekerei el kata er se el kolt el hong el Profet Joseph Smith a ngilai er a anghel Moroni. Se el kulbedebek, ng mlar ngii a betok er a tacher el llel el ruul er a deel el llechukl a tekoi er ngii. E ng di, a ika el llel a dimlak el ngii a mle somam lomes.

Aki mle mukeroul lorrenges a cheldecheduch el kirel a Oluut. A ki mle medengelii e milengitakl el kirel a ikal kolt el hong er a Primary el mle delkull e berrotel er a bukl el anghel Moroni a ngilai el mesang a Joseph Smith. Se er a kim sa el kmal mla mo melemlim, e ng kmal di mle imol tekoi a mle somam lomes er ngii: ngera mle llechukl er se el hong el kmal lungil delangeb e llechet er a teblo el mekekerei el deel?

Tial hong a mle medechel er a tebel el sesel klebesei ruchei er a ki msal mla mo melemlim er ngii. Meng ua ki ble modengei el kmo tia diak el meral se el hong el Moroni ulebang, e ng ding mle somam lomes er se el tebedechel el mle rrengodel. A bebil er a taem, e ngak me a chochellek a millasem lousbech a mekekerei loles, mechut loliich, me a ngii dil ngerang el sebechemam lousbech el mengimer er a lechetel tial hong el di mo mekengii el telkib mel sebecham el mes el kmo ngera a ngar ngii—e ng di ngdiak kim sisichemam mel meloched a lechetel. A ki dirrek el meduch meng dimlak bolecholt a ki mulruul er ngii. Ng meral mlo checherd e mekngit a rengmam se el bek el ki molasem el “mengimer er a hong” leng meral dimlak el sebechemam el chimerii.

Ng dirrek el dirkak bo kudengei—alsekum—e ng mla er ngii a kmong ngerang er a chelselel mle berrotel er se el tedebechel el llechotel. Se el de merur er ngii er tial cheldecheduch a tia kid, ng me lmuut er chelechal sils, e ng dirkak bo kudengelii a mle llechukl er se el kuk tedebechel tial hong el ruul el kirel mechuiu. Ak ko er a di omdasu el kmo a ikel llel a locha uluchais er a Oluut me a klaumerang er a Joseph Smith me a tirke el Tedei ma Teiai el Sioning, el milsa se el meral hong el luleba a Moroni el mei.

Ngomuchel er se er a Lomeob er tial beluulechad, e a Demad er a Babeluades a mla omeskid a ulekrael, roungerachel, me a osisechakl el mo er a rengelekel lokiu a re profet. A tekingel a uldelid lokiu a reprofet el kldmokl el chedaol llechukl el kirel a omesubed me a ulekeruled. A Nephi a silodii el ua tia kid a teletelel:

“Le tekingel a Dios a deureng el mei er a delbengek, me a renguk chomdasu el kirel, me ak meluches el mo sublir me a klungiolir a rengelkek.

“Kamosang, a klou el deureng a me er a delbengek el kirel a tekingel a Rubak; me a renguk a blechoel lomdasu el kirel a tekingel a Rubak el blak ues me a blak renges.”

A lmuut el bebil, ea ikal merko el taem me a chelechal el taem el rokui el tekoi a mo mutaut, e a remekedung el chedal a Ikelesia er a Rubak a mla mukngeltengat el oba Chedaol Reng er a bek el taem, el ngii a olngeseu er kid er a ulekeruled me a omesubed er a chedaol tekoi.

Le ak medengei el kmo a ochellek a blak a rengul, ak kumdasu el kmo ng chiluiu a ikel tekoi el mle llechukl er se el di ual kata er se el meral hong el mla er a blil a delak me a demak. E ng di ngak, a bai, dimlak kumtab a ikal beot e mekreos el klemerang e bai mle blak a renguk losiik a ikel tekoi el ngii a dirkak el kirel mocholt.

Ng mekngit a rengud, e le a ulekeruled me a omesubed a sebechel bebil er a taem e ng mo meod malechub e ng meterob leng rengud el soad el mo “mengimer er a hong.” A ikal blekeradel a rullid el mo osiik a ikel tekoi el ngii a diak el kired el mo medengei er a chelechal taem, se el de uaisei e kede chemoit a ikel klebokel el klemerang el ngii a mla metutk el merkid me sel teletael seluk er a chelsel—a ikal klemerang a Nephi a silodii el kmo ng milluches el kirel a omesubed me a klungioled.

A ochellel a Nephi el Jacob a ulsisechakl el kmo: “A urerel a Rubak a meklou a belkul e meang. A delechel a bertelel a meringel el dosiik, e meringel er a ngii di el chad el momedengei a rokui el teletelel.”

A tekingel a Jacob a osisecheklid el kmo ng diak el sebeched el mo “mengimer er a hong” malechub e ke de orimel lotobed a bertelel a Dios me domes. A ikang, a bai, mo mocholt el merkid lokiu a urungulel a Dios me a klisichel a Chedaol Reng.

A Jacob a millemolem:

“E diak a chad el medengei a teletelel dil merko locholt el mo er ngii; maluaisei, ng diak el kirel el loltuub a lolecholt a Dios.

“A chad a mlei er a beluulechad lokiu a klisichel a tekingel a Dios. … Maleuaisei, e ngerang me a Dios a diak lak el sebechel el melekoi er a beluulechad, malechub a ikel lulemeob lolab a chimal el ngar bebul a beluulechad, lokiu a urungulel me se el soal?

“Maleuaisei, e lak dolisechakl er a Rubak, e bai dolai a osisechakl er ngii.”

Se el rullid el mo sebeched el mo medengei a bertelel a Dios, malechub a tekoi el ngii a kired el mo medengei lokiu a ocholt, e ng kired el mo oltirakl a loruul a Nephi, el dilu el kmo, “Ng mle kekerei e ng di mle mekouar el chad, e dirrek el mle semeriar el mo medengei a bertelel a Dios. Maleuaisei, e ng lilangel el mo er a Rubak, me a Rubak a mlo duum er ngii, e domedemekii a rengul le ngii el mle oumerang a ikel rokui el demal a millekoi.” Ngii el Rubak a liluut el smodii el kmo a Nephi a milruul lokiu a klaumerng, e blak a rengul losiik loba klengariou el reng, e ulab a llechul.

Se el teletelel a Nephi el losiik el mo medengei a tekoi a uldimulk (1) a meral soal mo medengi, (2) klengariou el reng, (3) nglunguuch, (4) oumerang er a re profet, e meruul a tekoi lokiu a (5) klaumerang, (6) blak a rengul, e (7) olengesenges. Tial teletael losiik a kmal kakerous ngii me se er a “kungimer er a hong,” malechub e korrimel el mo medengi a tekoi el ngii a di kirel mo mocholt lokiu a temel a Rubak me a klisichel a Chedaol Reng.

Chelechal taem el betok a beches el klekedall, e ke de mla mo mengerchir el rokui el tekoi a sebeched e kirel el ngmai er a di mereched el team; a tekoi el diak el sebeched el mo medengei malechub e ng meringel a dolai, a blechoel dechoit malechub e ng diak doumerang. E le uchul e ng mla morngii a betok e bek bedengel a tekoi, e ng mla rulterir a rebebil el dikea lolechesuar e mocha ultuil er a tekoi el ngar ngii el diak lodengelii a mle uchelel e bai diak lultuil er se el teletael el blal beskid a Rubak se el dolai a chocholt el me er kid. A Jacob kele lulsaod chelechal taem er se er a ledu el kmo: ”Tirkal chad a di nglerd a iklir; e dimlak el sorir a beot el tekoi … e osiik a tekoi el meringel er tir a mo medengei. Maleuaisei, e te meuikeu, te meuikeu e le tomes el mla imiu er a tengetangel, me te robetang, e le a Dios a mla nguu se el betengel oridii er tir, e mesterir a betok el tekoi el ngii a diak el sebechir el mo medengei, e le ika ikid a sorir.”

Tiang a kakerous ngii mesel osisecheklel a President Dieter F. Uchtdorf. Ng milengedecheduch er a re missionari, e ng di a tekingel a sebechel mo er a rokui el tir osiik a chedaol klemerang. “A … re missionary se el ngar ngii a klaumerang er tir er a Jesus Kristo,” ng millekoi, “e te mo oumerang er a Rubak el rulleterir meng mo sebecherir el oltirakl a llechul—ngii me se el lak lodengelii a moktek er a ikal llach. A klaumerang er tir a mo mocholt lokiu a blakerreng me a urerir.”

Se er a le ngar ngii ongdibel er tial mlo merek el April, ea Elder Dallin H. Oaks a milsaod el kmo: “A Ikelesia a melasem loureor el mo diak a berretelel er a rekord el lolab, e ng di a uriul er a ikel mla motobed, e a rechedad se el bebil e ng mor ngii a kerrir el diak el sebechel monger lokiu a omesuub. … Le bebil er a tekoi a kmal di desuub lokiu a klaumerang e merkong.”

A re profet er a chuodel taem a ulsisechakl er tial osisiu el suobel, ngochotii el merkid el kmo omerollel a taem e a teletelir a rechad a dirkak el mengodech me tial teletael er a omesuub el mla er a Rubak a diosisiu er a rokui el taem. Ka momdasu er se el suobel el nga er a Chuodel Renged el kmo: “Moumeral ulsirs er a Rubak el oba rengum el rokir; Lak mulsirs er a di llemesel a renugm.”

A Isaia a silodii, el mesaod er a Rubak, “Ng ua eanged el ngar bab er a bebul a chutem, meng uaisei ea rolek me a uldesuek a kuk ngar bab er a roliu ma uldesiu.”

A Nephi a mle dochelir a sioning er ngii er se er a ledu el kmo, “Ngoumerang er a Rubak, e oumerang er ngii el mo cherechar.”

A klaumerang e oumerang er a Rubak a ulsbechall el me er kid el mo kongei el kmo a Llemesel a ngarbab er kid. Ke de dirrek el kongei el kmo se el Uldesuel a meskid se el kot el ngarbab el bedengel chedaol ulekeroul me a omesuub.

Ng dirkak a tang mel kired el mo obang a “cherrungel el klemedengei er a tekoi” er chelechal klengar. Ke de bai, kired el “oureng el kirel a tekoi el diak le moes, e ng di ng klemerang.”

Me a Nephi el dirrek el mle mesisiich a klaumerang er ngii, a chouchais el kmo ngii meng dirrek el dimlak lodengei a rokui er se er a longer er a keril a anghel el kmo, “Ng medengelii se er a bel betengel el meriou a Dios?” A Nephi a dilu el kmo, “Ng medengei el kmo a Dios a betik a rengul er a rengelekel; e ng di ngii, a dimlak lodengei a belkul a rokui el tekoi.”

Ngosisiu, el Alma a dilu er a ngelekel er a Helaman el kmo, “A bertelel a Dios a dirkak locholt el mo er ngii; maleuaisei e ng diak bo losaod.”

Ak sioning el kmo a Demad er a Babeluades a betik a rengul er a Rengelekel, me ak, di uai a Nephi me a Alma, el diak kudengei a belkul a rokui el tekoi. Malechub el kirek el momedengei a rokui el tekoi; e dirrek el klou a renguk el mengiil er se el temel a Rubak, e medengei el kmo “A rokui a ngar ngii a sioning el kmo a ikal tekoi a klemerang; me kau meke dirrek el olab a rokui el tekoi el sioning el me er kau el kmo ng klemerang. …

“… A chedaol llechukl a ngar medam, me a rokui el tekoi a olecholt el kmong ngar ngii a Dios; a beluulechad me a rokui el ngii a ngar bebul, me se el loliuekl, me a rokui el planet el ngii a miliuekl er se el kirel ngar ngii a sioning el kmong ngar ngii a Ngarbab el Ulemeob.”

Se el de kengei el kmo ke de ulebeob er a mellomes e blak a rengul el Chedam er a Babeluades, “E ng,” diak bai de becherei me longetikaik er kid er a chedaol ulekeruled me a omesubed “loltirakl er a urungulel me se el soal” e lak dultuil er kid?

Ngii a ngar, a Jesus Kristo a Dita el Ngelekel e Osebelir a rokui el chad. E le uchul se el diak a ulebengelel Tngakireng er a Kristo, e Ngii a oba llomes e kemangel el lomesengel el omekrael er kid er chelechal uriul klebesei. A Joseph Smith a profet er Ngii, el mlengilt el mo olluut er tial rokir el rengedel a Dios er a beluulechad. A Thomas S. Monson a ngar er profet er Ngii e mengedecheduch el kirel er chelechal sils. Tia kid a sioning er ngak el nga er a ngklel a Jesus Kristo, amen.