Binulan a Mensahe ti Para iti Pigsa dagiti Agtutubo , Marso 2026
Exodo 12
Fiesta ti Paskuatayo—ti Sakramento
Adda gagangay a pagnaigan iti nagbaetan ti nagkauna a Fiesta ti Paskua ken ti linawas a sakramentotayo.
Dagiti panangiladawan ni Alyssa Tallent
Sakbay a panawan dagiti nagkauna nga Israelita ti pannakaadipenda idiay Egipto, naidawat kadakuada nga agtulnog kadagiti masinunuo a panangiturong manipud iti Apo tapno ispalen ida ti manangdadael nga anghel, wenno lumabas kadakuada (kitaen iti Exodo 12). Kalpasan a pimmanawda iti Egipto, tinawen a nangrambak dagiti Israelita iti maysa a fiesta, a maawagan iti Fiesta ti Paskua, tapno malagipda no kasano nga inispal ti Apo dagiti natulagan a taona.
Bayat ti maudi a lawas ti mortal a biagna, adda ni Jesucristo iti pannangan iti Fiesta ti Paskua. Awagantayo itan dayta a pannangan iti Maudi a Pangrabii. Inusar ti Mangisalakan dayta nga okasion a mangyam-ammo iti ordinansa ti sakramento, a pakipasetantayo ita iti tunggal lawas. (Kitaen iti Mateo 26:26–28; Lucas 22:19–20; Doktrina ken Katulagan 20:77, 79.)
Adtoy ti dua a gagangay a pagnaigan iti nagbaetan ti umuna a Fiesta ti Paskua, ti Maudi a Pangrabii ti Apo, ken ti sakramento ita a makatulong kadatayo a manglagip iti pannakaispaltayo babaen ti Mangisalakan.
Ti Tinapay
Fiesta ti Paskua: Iti uneg ti pito nga aldaw, nangan dagiti Israelita iti tinapay nga awan lebadurana (nga agpada a naparpartak ti pannakaaramidna ken saan unay a nalaka nga agamag ken agrupsa).
Maudi a Pangrabii: Binendisionan ken pinirsapirsay ni Jesucristo ti awan lebadurana a tinapay ti Fiesta ti Paskua, ket intedna daytoy kadagiti disipulo. Imbagana kadakuada a kanenda daytoy kas panglaglagip iti bagina, nga ammona nga asidegen a mapirsay ken matay ngem agungarto manen.
Sakramento: Mangantayo iti tinapay kas panglaglagip iti bagi ni Jesucristo.
Ni Jesucristo ti Tinapay ti Biag. Babaen iti Panagungarna, agungartayonto amin nga addaan kadagiti naan-anay, saan nga agrupsa, ken saan a matay a bagi. Ispalennatayo manipud iti ipapatay.
Ti Dara ti Kordero
Fiesta ti Paskua: Ti kordero ti Fiesta ti Paskua ket maysa nga awan pakapilawanna, agtawen iti maysa a lalaki a kordero. Napapatay daytoy, ket naurnong ti darana iti malukong. Naisawsaw ti hyssop (maysa a ruot) iti malukong ken nausar a mangiwaras iti dara iti aglawlaw ti makinruar a ridaw ti balay. Daytoy ti makinruar a pagilasinan a mangilasin kadagiti natulagan a tao ti Apo a labsan ti mangdadael nga anghel tapno maisalakanda manipud iti pannakaadipen idiay Egipto.
Maudi a Pangrabii: Inusar ni Jesucristo ti arak a mangibagi iti darana. Imbagana kadagiti disipulona nga inumenda daytoy kas panglaglagip iti darana, a maibukbok para kadakuada para iti pannakapakawan dagiti basol ken kas paset ti baro a katulagan.
Sakramento: Inumentayo ti danum kas panglaglagip iti bagi ni Jesucristo.
Ni Jesucristo isu ti Kordero ti Dios. Naibukbok ti darana bayat ti panagsagabana gapu kadagiti basol ken kinakapuytayo. Ti darana—ti sakripisiona—ti mangdalus kadatayo. Ispalennatayo manipud iti basol.
© 2026 ti Intellectual Reserve, Inc. All rights reserved. Naimaldit iti Pilipinas. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, March 2026. Ilokano. 19936 864