Zaj Lus hauv For the Strength of Youth Txhua Hli, Peb Hlis Ntuj 2026
Khiav Dim 12
Peb txoj Kev Cai Hla Dhau—lub Cim Nco Txog
Hais txog Kev Cai Hla Dhau puag thaum ub thiab lub cim nco txog txhua lub lim tiam muaj ib yam uas zoo sib thooj.
Cov duab los ntawm Alyssa Tallent
Ua ntej cov Neeg Ixayees puag thaum ub yuav khiav dim lawv txoj kev ua qhev nyob hauv Iyiv, tus Tswv hais kom lawv ua raws li Nws tej lus qhia kom tus tim tswv ua kev puas tsuaj yuav tseg lawv, los sis hla dhau (saib Khiav Dim 12). Tom qab lawv tawm Iyiv mus, txhua xyoo cov Neeg Ixayees tau ua ib rooj mov txhua xyoo, hu ua Kev Cai Hla Dhau, kom nco txog tus Tswv txoj kev txhiv Nws cov neeg khi lus dim.
Nyob hauv lub lim tiam kawg ntawm Nws lub neej, Yexus Khetos tau ua rooj mov rau Kev Cai Hla Dhau. Tam sim no peb hu pluas mov ntawd hu ua Rooj Mov Kawg. Tus Cawm Seej tau siv lub sij hawm ntawd kom qhia txog txoj kab ke ntawm lub cim nco txog, uas tam sim no peb koom txhua lub lim tiam. (Saib Mathais 26:26–28; Lukas 22:19–20; Lus Qhuab Qhia thiab Kev Khi Lus 20:77, 79.)
Nov yog tej yam uas sib thooj ntawm thawj txoj Kev Cai Hla Dhau, tus Tswv Rooj Mov Kawg, thiab lub cim nco txog uas ua niaj hnub no kom pab peb nco txog qhov uas tus Cawm Seej txhiv peb dim.
Cov Mov Mog
Kev Cai Hla Dhau: Rau xya hnub, cov Neeg Ixayees tau noj cov mov mog uas tsis xyaw keeb (uas ua tau sai dua thiab tsis lwj yooj yim).
Rooj Mov Kawg: Yexus Khetos foom koob hmoov thiab ntais cov mov mog uas tsis xyaw keeb rau Kev Cai Hla Dhau, thiab Nws muab rau cov thwj tim. Nws tau hais kom lawv noj nco txog Nws lub cev, uas Nws paub hais tias tsis ntev yuav raug puas thiab yuav tuag tiam sis yuav sawv rov los.
Lub Cim Nco Txog: Peb noj cov mov mog kom nco txog Yexus Khetos lub cev.
Yexus Khetos yog cov Mov uas Cawm Neeg Txoj Sia. Dhau los ntawm Nws txoj Kev Sawv Rov Los, peb txhua tus thaum peb sawv rov los yuav muaj lub cev uas zoo tag nrho, tsis txawj lwj, thiab tsis txawj tuag. Nws txhiv peb dim kev tuag.
Tus Me Nyuam Yaj cov Ntshav
Kev Cai Hla Dhau: Tus me nyuam yaj ntawm txoj Kev Cai Hla Dhau yog ib tug me nyuam yaj uas muaj ib xyoos thiab tsis muaj qhov phem. Lawv muab tua tuag, thiab nchuav cov ntshav hauv ib lub tais. Twb muab hixauv (ib co txuj lom) raus rau hauv lub phiab thiab pleev cov ntshav rau lub tsev ob tug ncej qhov rooj. Nog yov lub cim uas qhia hais tias yuav hla dhau tus Tswv cov neeg khi lus kom tus tim tswv uas ua kev puas tsuaj yuav hla lawv thiaj li yuav dim kev ua qhev hauv teb chaws Iyiv.
Rooj Mov Kawg: Yexus Khetos siv cov cawv txiv hmab kom piv txog Nws cov ntshav. Nws tau qhia Nws cov thwj tim haus kom nco txog Nws cov ntshav, vim Nws yuav los ntshav kom zam tau txim rau lawv tej kev txhaum thiab vim lawv yuav khi lus tshiab.
Lub Cim Nco Txog: Peb haus dej kom nco txog Yexus Khetos cov ntshav.
Yexus Khetos yog Vajtswv tus Me Nyuam Yaj. Nws los ntshav thaum Nws raug txom nyem rau peb tej kev txhaum thiab tej kev mob. Nws cov ntshav—Nws txoj kev txi—ntxuav peb kom huv. Nws txhiv peb dim kev txhaum.
© 2026 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, March 2026. Hmong. 19936 295