Iang ie Alu

Mie pak me ke alehdi pwukoah en wia mehkot me ke medewe me ke sohte kak wia? Mwein ke kehn ke sohte kehlail de lolokong, de periki me mehteikan pahn kouruhr kin uhk oh kaulimeiuhk. Ma ke alehdi songen pepehm pwukat, ke sohte kelekelehpw.

Sounpar kid kei samwalahro, mie ohl emen adaneki Enoch. Koht mahsaniong Enoch en padahngki duwen koluhla ong aramas akan— aramas akan me keieu sakanakan nan sampah.

Enoch medewe me e sohte kak wia. E padahkiong Koht me e nohn pwulopwul, sohte me kin pereniki ih, oh e pil “koasoi wawai“ (kilang Moses 6:31).

Ahpw Koht ketikihong Enoch inou ehu, E padahkiong ohl me masepwehk o, “Wonla mwowe oh wia dahme ih padahkiong uhk ehr“ oh “nahna kan pahn tangasang mwohmw, oh pihlap akan pahn wekidala mwomwen arail pwilipwil weil; oh ke pahn ieiang ie, oh ih pahn mihmi rehmw; eri iang ie alu“ (Moses 6:32, 34).

“Iang ie alu.“ Ia uwen mengei en luhk kaselel wet.

Koht inoukiong Enoch me ma e pahn ahneki kehlail oh tepida, eri Koht pahn iangih nan kahk koaros me e pahn wia. Koht aphw pahn sewese Enoch en ahneki kehlail oh kakehlailih ih en wia sohng tohto oh e pahn sewese ih en wiala laudsang ah kak kasik.

Ehu mwaren Sounkomour o iei Emmanuel, de “Koht mihmi rehtail“ (Madiu 1:23). E mih nan mwaren Kauno oh sapwellime koasoandi me Ih en ieiang kitail alu. Mehn pilipilo mihmi rehtail—kitail pil pahn iang Ih alu?

Rahn pwukat, kitail kin kilang Enoch mwomwen ohl pwoson men oh soukohp mwahu oh kaun mwahu. Ahpw mwohn Enoch ah wiahla soukohp emen, e wia Enoch pwulopwul men me peikasalki pein ih ahpw e pilada en ieiang Koht alu.

Ansou me mour kin apwal, ansou me ke kin ahneki pepehm me ke sohte itar, tamataman ahn Koht inou ong Enoch, oh pil ong kowe. E pahn ieiang uhk alu. E sohte pahn mweidohng uhk en kelehpw, ahsou koaros.

Emmanuel. Koht ketiket rehtail. Koht ketiket rehmw!

Duwehte kumwail pwutak pwulopwul kan, Kauno peki rehn Enoch en kapwaida pwukoah kan en Prihstuhd. Ah doadoahk iei en padahkiwei koluhla ong aramas sakanakan kan. Enoch kasalehda ah peikasal kan. “[Ngehi] wia pwutak emen,“ e kosoia. “Aramas koaros kin kailongkin ie … ih kin koasoai wawai; eri ngehi emen noumw ladu?” (Moses 6:31).

Kauno sapeng ni manaman oh ni koapwoaroapwoar. “Wonla mwowe oh wia dahme ih padahkiong uhker. … Kihpeseng ewemwen, oh e pahn audaudehda … . Ngehniet pahn ieiang uhk … ; nahna kan pahn tangasang mwohmw … ; eri iang ie alu” (Moses 6:32, 34).

Enoch esehla me ansou me Kauno kihong kitail doadoahk ehu, kitail sohte kin kelehpwiki. Ansou me kitail kin wiahda oh kolokol inou kan ong Krais, kitail kin iang Ih oh ale Sapwelime manamano—kitail kin wiahla dipwisou en doadoahk kei nan Lime kan.

Duwehte Enoch, ke ahneki pwukoah kesempwal ehu: sawas, papah nan tehnpas sarawi, ale kamadipw sarawi, onopiki pwuhk sarawi kan, momouriki rongamwahu o, koluhla, kounopada ong misin kan. oh sohng tohto. E pahn kak kahreiong uhk omw ahneki pepehm en pwunod. Ke kak ahneki pepehm en peikasal. E mwahute. E sohte doke duwen ahmw wiwia met ni kelepw. E doke duwen omw pahn pilada rahnwet—rahn wet oh rahn koaros— en iangih Koht alu.

Sang ni Sapwelime sawas, ke kak wia sohng koaros. E pahn kakehlailih, mahkong, oh kahreiong uhk en wia sohng kan koaros me ke sohte kasik me ke kak wiala. E ketin poakohng uhk! Ni aht wia Presidesih Lap en manakapw kan, se poakohng uhk oh kasik en patehng uhk ong rapahki dahme oaralap en 2026 pahn wiaiong uhk: “Iang ie alu.“