Maglakat upod sa Akon

May nagpangabay na bala sa imo nga maghimo sing isa ka butang nga sa pinsar mo indi mo kaya himuon? Siguro pamatyagan mo indi ka tuman ka baskog ukon maalam, ukon nagkabalaka ka nga kadlawan ka kag hikayan sang iban. Kon nakabatyag ka sing amo sini, indi ka nagaisahanon.

Linibo na ka tuig ang nagligad, may isa ka lalaki nga ang iya ngalan si Enoc. Ginsugo sang Dios si Enoc nga magwali sang paghinulsol sa katawhan—ang pila sing pinakamalain nga nagkabuhi sa kalibutan.

Sa pinsar ni Enoc indi niya kaya himuon ini. Ginhambalan niya ang Dios nga bata pa sia kaayo, nga naugot ang mga tawo sa iya, kag “indi [sia] maayo maghambal” (tan-awa sa Moises 6:31).

Pero ang Dios naghatag kay Enoc sang promisa. Ginhambalan Niya ang nahadlok nga si Enoc, “Maglakat kag himoa ang ginsugo ko sa imo,” kag “ang mga bukid madula sa imo atubang, kag ang mga suba magaliso sa ila alagyan; kag magapabilin ka sa akon, kag ako sa imo; gani maglakat upod sa akon” (Moises 6:32, 34).

“Maglakat upod sa akon.” Daw ano ka simple kag matahum nga imbitasyon.

Ang Dios nagpromisa kay Enoc nga kon isogan niya nga magsugod, gani ang Dios makaupod niya sa tanan nga tion. Himuon si Enoc sang Dios nga gamhanan kag pabaskugon sia nga maghimo sing dugang pa kag buligan sia nga mangin labaw pa sangsa iya nahunahuna.

Isa sang madamo nga ngalan sang Manluluwas amo ang Emanuel, ukon “Ang Dios kaupod naton” (Mateo 1:23). Ara sa ngalan kag kinaugali sang Ginuo nga mag-upod sa aton. Ang desisyon ara sa aton—magalakat man bala kita upod sa Iya?

Sa karon, nagatulok kita kay Enoc bilang isa ka tawo nga may pagtuo kag isa ka dakong propeta kag lider. Pero antes kay Enoc nga propeta, may isa ka mas lamharon nga Enoc nga nagduhaduha sa iya kaugalingon pero ginpili sa gihapon nga maglakat upod sa Dios.

Kon ang kabuhi mabudlay, kon sa pamatyagan mo may mga kakulangan ka, dumduma ang promisa sang Ginuo kay Enoc, kag sa imo. Magaupod Sia sa imo. Indi ka Niya pagbayaan, bisan sa isa ka tion.

Emanuel. Ang Dios kaupod naton. Ang Dios kaupod ninyo!

Pareho sa inyo mga young men, ginpangabay sang Ginuo si Enoc nga tumanon ang importante nga mga responsibilidad sang priesthood. Ang iya hilikuton amo ang magwali sang paghinulsol sa malain nga katawhan. Ginpabutyag ni Enoc ang iya mga pagduhaduha. “Bata lang [ako],” siling niya. “Ang tanan nga tawo naugot sa akon … ako indi maayo maghambal; gani, ngaa ako ang imo alagad?” (Moises 6:31).

Ang Ginuo nagsabat nga may gahum kag pagpasalig. “Maglakat kag himoa ang ginsugo ko sa imo. … Buksi ang imo baba, kag mapuno ini … . Ang akon Espiritu yara sa imo … ; ang mga bukid madula sa imo atubang … ; gani maglakat upod sa akon” (Moises 6:32, 34).

Nahibaloan ni Enoc nga kon ang Ginuo maghatag sa aton sang hilikuton, wala naton ginahimo ini sing isahanon. Kon maghimo kita kag magtuman sang mga kasugtanan kay Cristo, nagalakat kita upod sa Iya kag nagaambit sang Iya gahum—nagahimo kita nga mga instrumento sa Iya mga kamot.

Pareho kay Enoc, may importante kamo nga papel: pag-minister, pag-alagad sa templo, paghikot sang sakramento, pagtuon sang balaan nga mga kasulatan, pag-aplikar sang mga talaksan sang ebanghelyo, paghinulsol, paghanda para sa misyon, kag madamo pa. Mahimo nga mahalawhaw kamo. Ayhan mabatyagan ninyo nga indi kamo makasarang. OK lang ina. Indi ini parte sa paghimo sini nga isahanon. Parte ini sa pagpili sang karon nga adlaw—ini nga adlaw kag adlaw-adlaw—nga maglakat upod sa Dios.

Paagi sa Iya bulig, mahimo mo ang tanan. Pabakuron ka Niya, patawaron, kag buligan ka nga mangin sobra pa sa imo kinaandan nga ikasarang. Palangga Niya kamo! Bilang Kabilogan nga Pangulohan sang Young Men, palangga namon kamo kag ginapaabot ang mag-upod sa inyo agud nga maeksperiyensyahan ang makainspirar nga 2026 nga tema: “Maglakat upod sa Akon.”