Fitiei ne Fetan

Mi mwo wor emon akan tingoreok kopwe fori och mettoch ka ekieki pwe kose tongeni? Enip kopwe mefi nge kose pwak ika weweochuti, ika nuokus an ekkoch takiruk me esitok. Ika pwe en mi kan memefi ei sokkun, iwe kose anaemon.

Ngorou ier ano, mi wor emon mwan itan Enoch. Kot a tingorei Enoch epwe afanafana aier ngeni ekkewe aramas—Ekkewe aramas won fonufan ir mi wesen aramasangaw.

Enoch a ekieki nge esap pwak ngeni. A apasa ngeni Kot pwe mi chok kukun, ese wor emon a sanii, me i afen “mang non kapas” (nengeni Moses 6:31).

Nge Kot a ngeni Enoch eu pwon. A apasa ngeni ewe mwan mi nuokus, “Feino me fori met ua annuku ngonuk” me “ekkewe chuk repwe tekisonetiw mwom, me ekkewe chonupupu repwe kun sefan seni ar angang; me repwe nonom non ngang, me Ngang non en; iwe nengeni fitiei ne fetan” (Moses 6:32, 34).

“Fitiei ne fetan.” Met ren ei sokkun, ningochun etiwetiw.

Kot a pwon ngeni Enoch pwe ika a pochokun ne poputa, iwe Kot epwe nonom ren non met a fori. Kot epwe feri Enoch epwe napanap me apochokuna i epwe fori chommong me anisi i epwe winiti met mi nap seni met a ekieki.

Eu me nein iten ewe Chon Amanau kewe amen chommong iei Emmanuel, ika “Kot a nonom rech” (Matthew 1:23). Mi nom non iten ewe Samon me tufichin fitikich ne fetan. Ewe finata a nonom rech—sipwe pwan fiti ne, fetan?

Non ekkei fansoun, sia nengeni Enoch usun emon mwan mi uren nuku me soufos murino me souemwen. Nge me mwen Enoch ewe soufos, mi wor ewe kukun Enoch ewe a ese nukunuk non pusin i nge mi chok finata epwe fiti Kot ne fetan.

Nupwen manau a weires, nupwen ka mefi nge kose naf, chechemeni an ewe Samon we pwon ngeni Enoch, me ngonuk. I epwe fituk ne fetan. I esap tongeni nikitukono, esap mwo nge fan eu.

Emmanuel. Kot mi nonom rech. Kot mi nonom reom!

Usun ami anuon, ewe Samon a tingorei Enoch epwe aponueta auchean wisen pristut. Wisan epwe afanafana aier ngeni ekkewe aramasangaw ika tipis. Enoch a pwarano an noninen. “[Ngang] chok emon kukun,” a apasa. “Meinisin ekkewe aramas ra oput ngang … Ua mang ne kapas; nge ewer ngang noum chon angang?” (Moses 6:31).

Ewe Samon a ponueni non manaman me nukunuk. “Feino me fori met ua annuku ngonuk. … Suki awom, me epwe ureno … . Nguni epwe nonom wom … ; ekkewe chuk repwe tekisonetiw me mwom … ; iwe nengeni kopwe fitiei ne fetan” (Moses 6:32, 34).

Enoch a kaeo pwe nupwen ewe Samon epwe ngeni kich wisach, sise kan chok anaemon ne fori. Nupwen sia fori me aponueta ach pwon ngeni Kraist, sia fiti I ne fetan me aea An manaman—sia winiti Noun chon angang.

Usun Enoch, mi wor wisom amen auchea: iamwir, angang non ewe tempel, efeiochu ewe sakrament, kaeo kewe pukefel, manaueni annukun ewe kapas allim, amoneta ngeni misin, me pwan ekkoch. Epwe nikinikin weires. Enip kopwe mefi om ukungaw ngeni. Mi chok Och. Esap ita nge kopwe anaemon ne fori. Iei usun finata ikenai—ei ran me iteiten ran—kopwe fiti Kot ne fetan.

Ren An aninis, ka tongeni fori mettoch meinisin. I epwe apochokuna, omusano, me otufichuk nap seni ukukun om tongeni. A tongei kemi! Usun ewe Presetensin Anuon Unus, aua men tongei kemi me mochen aupwe fituk ne kaeo ewe pesepesen 2026 itenap: “Fitiei ne Fetan”