Peb paub dab tsi txog cov neeg yug yaj uas nyob thaum thawj hmo Christmas?

Cov Neeg Yug Yaj, los ntawm Brian Call

Peb paub me ntsis txog cov neeg yug yaj nyob thaum thawj hmo Christmas.

Lawv nyob ze lub zos Npelehees. Cov neeg yug yaj nyob hauv “thaj tsam” uas yog qhov chaw uas Khetos tau yug (Lukas 2:8). Thiab lawv tau mus ko taw mus txog Npelehees thaum Nws tseem nyob ntawd (saib Lukas 2:15–16).

Lawv ua raws li lawv tej dej num. Cov neeg yug yaj no “tseem tab tom zov lawv cov yaj tom tej tiaj nrag thaum hmo ntuj” (Lukas 2:8). Lawv yog cov neeg yug yaj zoo thiab muaj kev ntseeg, zoo li tus Cawm Seej—tus Tswv Yug Yaj Zoo (saib Yauhas 10:11, 14).

Lawv paub tej lus qhia txog tej uas yuav muaj los yav tom ntej uas hais txog tus Mexiyas. Lawv twb paub tus tim tswv hais txog dab tsi thaum nws tshaj tawm tias “tus Tswv Khetos” tau los yug lawm (Lukas 2:11), tus Mexiyas uas cov yaj saub tau qhia txog thaum ub.

Lawv txoj kev ntseeg muaj zog heev. Thaum tus tim tswv qhia lawv txog “me nyuam mos … [uas] pw hauv ib lub dab zaub” (Lukas 2:12), lawv “ceev nrooj mus” xyuas Nws (Lukas 2:16).

Lawv qhia txog txoj moo zoo. Cov neeg yug yaj tau tshaj tawm tej uas lawv tau hnov thiab pom txog zaj uas tus tim tswv tau hais txog Khetos txoj kev yug los (Lukas 2:17).

Lawv qhuas thiab ua Vajtswv tsaug. Tom qab tag nrho tej no, lawv “rov qab mus, lawv hu nkauj qhuas Vajtswv, rau qhov lawv hnov thiab pom raws li tus tim tswv tau qhia rau lawv lawm” (Lukas 2:20).