Etke ewōr juon an Irooj Kabun̄?

Jibadbad eo an Kabun̄ eo an Kraist ej “kōmaron̄ an kajjojo armej im baam̧le ko jipan̄ Anij ilo kakūrm̧ool jerbal in lo̧mo̧o̧r eo an An im mour ijo eutiej tata.” Kabun̄ eo an Jisōs Kraist im Armej ro Rekwojarjar ilo Raan Ko Āliktata ej jipan̄ “n̄an kakōrbab ajri ro nejin [Anij] n̄an aiboojoj eo ilo ijo eutiejtata, eo ej ijo ilōn̄tata ak mour indeeo.”

“Rilo̧mo̧o̧r eo … ekar jitōn̄e [Kabun̄ eo] bwe en kōttōprak jibadbad ko An—kwaļo̧k gospel eo An, leļo̧k kain̄i im bujen ko An, im kōm̧m̧an bwe en wōr iaļan kajoor eo An n̄an kajutak im kōkwojarjar kōj.”

Membōr ro an Kabun̄ in kar bōk kajoor eo an Jisōs Kraist im kōjeraam̧m̧an ko kōn mālim eo an priesthood im ki ko, bujen ko im kain̄i ko, tōl in kanaan eo, jeje ko rekwojarjar, im juon jukjuk in pād an Armej ro Rekwojarjar.

Kabun̄ in ekar barāinwōt kakien: “Jerkak im erromaakļo̧k, bwe meram eo ami en juon jon̄ok n̄an laļ ko” (Katak im Bujen Ko 115:5).

Membōr ro an Kabun̄ in rej kajjion̄ in “erromaakļo̧k” kōn mour kōn gospel eo, karuwaineneik aolep n̄an bōk gospel eo, kobaik baam̧le ko n̄an indeeo, im kean̄ kōn rijeram̧ōl im riaikuj. En̄in ej jerbal in lo̧mo̧o̧r im mour ijo eutiej tata an Anij.