ເປັນ​ຫຍັງ​ພຣະ​ຜູ້​ເປັນ​ເຈົ້າ​ຈຶ່ງ​ມີ​ສາດ​ສະ​ໜາ​ຈັກ?

ຈຸດປະສົງຂອງສາດສະໜາຈັກຂອງພຣະຄຣິດຄື “ເພື່ອໃຫ້ບຸກຄົນ ແລະ ຄອບຄົວສາມາດຊ່ວຍພຣະເຈົ້າໃນການບັນລຸວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະອົງ.” ສາດສະໜາຈັກຂອງພຣະເຢຊູຄຣິແຫ່ງໄພ່ພົນຍຸກສຸດທ້າຍຊ່ວຍ “ລູກໆຂອງ [ພຣະເຈົ້າ] ໃຫ້ມີຄຸນສົມບັດເໝາະສົມສຳລັບລັດສະໝີພາບລະດັບສູງສຸດ, ນັ້ນກໍຄືຄວາມສູງສົ່ງ ຫລື ຊີວິດນິລັນດອນ.”

“ພຣະຜູ້ຊ່ວຍໃຫ້ລອດ … ໄດ້ມອບໝາຍ [ສາດສະໜາຈັກ] ໃຫ້ບັນລຸຈຸດປະສົງຂອງພຣະອົງ—ສັ່ງສອນພຣະກິດຕິຄຸນຂອງພຣະອົງ, ສະເໜີມອບພິທີການ ແລະ ພັນທະສັນຍາຂອງພຣະອົງ, ແລະ ຈຶ່ງເຮັດໃຫ້ເປັນໄປໄດ້ສຳລັບອຳນາດຂອງພຣະອົງທີ່ຈະຮັບຮອງ ແລະ ຊຳລະເຮົາໃຫ້ບໍລິສຸດ.”

ສະມາຊິກຂອງສາດສະໜາຈັກຈະເຂົ້າເຖິງອຳນາດ ແລະ ພອນຂອງພຣະເຢຊູຄຣິດຜ່ານ​ທາງສິດອຳນາດ ແລະ ຂໍກະແຈຂອງຖານະປະໂລຫິດ, ພັນທະສັນຍາ ແລະ ພິທີການຕ່າງໆ, ການຊີ້ນຳຂອງສາດສະດາ, ພຣະຄຳພີ, ແລະ ຊຸມຊົນຂອງໄພ່ພົນ.

ສາດສະໜາຈັກຍັງຖືກບັນຊາໃຫ້: “ລຸກຂຶ້ນ ແລະ ສ່ອງແສງອອກໄປ, ເພື່ອວ່າຄວາມສະຫວ່າງຂອງພວກເຈົ້າຈະເປັນທຸງສັນຍານໃຫ້ປະຊາຊາດ" (ຄຳສອນ ແລະ ພັນທະສັນຍາ 115:5).

ສະມາຊິກຂອງສາດສະໜາຈັກພະຍາຍາມທີ່ຈະ “ສ່ອງແສງອອກໄປ” ໂດຍການດຳລົງຊີວິດຕາມພຣະກິດຕິຄຸນ, ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ, ການເຕົ້າໂຮມຄອບຄົວເຂົ້າກັນຊົ່ວນິລັນດອນ, ແລະ ການເບິ່ງແຍງຄົນຍາກຈົນ ແລະ ຄົນຂັດສົນ. ນີ້ແມ່ນວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ.