యేసు క్రీస్తు మంచి రోజుల కోసం కూడా

పరిస్థితులు బాగా నడుస్తున్నప్పుడు, మీ ఆశీర్వాదాలు మరియు విజయాలను సంబరాలుగా జరుపుకోవడం మంచిదే. కానీ మీరు ఉన్న చోటుకి చేరుకోవడానికి ఎవరు సాధ్య పరిచారో మర్చిపోకండి. రాజైన బెంజమిన్ తన మోర్మన్ గ్రంథము యొక్క ప్రసంగంలో ఈ విధంగా చెప్పాడు:

“ఇదిగో, మనమందరము బిచ్చగాళ్ళము కాదా? మనము కలిగియున్న సమస్తము కొరకు, ఆహార వస్త్రముల కొరకు, వెండి బంగారముల కొరకు, మనము కలిగియున్న సకల విధములైన సంపదల కొరకు ఆ దేవునిపై మనమందరము ఆధారపడిలేమా?” (మోషైయ 4:19).

పరలోక తండ్రి మరియు యేసు క్రీస్తు మీ కోసం చేసిన వాటిని గుర్తుంచుకోవడం ద్వారా మీ విజయాల్లో వినయంగా ఉండటం అనేది మీ మంచి సమయాలలో వారిని చేర్చుకోవడానికి ఒక గొప్ప మార్గం.

కృతజ్ఞత అనేది అహంకారం మరియు మతిమరుపుకు ఉత్తమ విరుగుడులలో ఒకటి. దేవునికి కృతజ్ఞతలు చెప్పడం వలన మీరు ఆయనను, మరియు ఆయన మరియు ఆయన కుమారుడు మీ జీవితంలో చేస్తున్న మంచిని గుర్తుంచుకోవడానికి సహాయపడుతుంది. ఇది మంచి సమయాల్లో ఎంత ప్రభావవంతంగా ఉంటుందో, కష్ట సమయాల్లో కూడా అంతే ప్రభావవంతంగా ఉంటుంది.

సాతానుకు ఇష్టమైన దాడులలో ఒకటి “శాంతపరచి, శరీర సంబంధమైన భద్రతాభావమునివ్వడం” (2 నీఫై 28:21). మరో మాటలో చెప్పాలంటే, మీరు మీ మంచి సమయాల్లో చాలా సంతృప్తిగా మరియు సురక్షితంగా ఉన్నట్లు భావించి, అత్యంత ముఖ్యమైన విషయాన్ని మీరు మరచిపోతే అతను దానిని చాలా ఇష్టపడతాడు. కాబట్టి, దేవున్ని మర్చిపోవద్దు! మీరు శత్రువు యొక్క సూక్ష్మ ఉపాయాలను తెలుసుకుని, మీ మంచి సమయాలలో కూడా వాటిని ప్రతిఘటించినప్పుడు, మీరు పరలోక తండ్రికి మరియు యేసు క్రీస్తుకు దగ్గరగా ఉండగలరు.

అధ్యక్షులు రస్సెల్ ఎమ్. నెల్సన్ ఇలా బోధించారు, “మన జీవితాల యొక్క దృష్టి దేవుని యొక్క రక్షణ ప్రణాళిక … యేసు క్రీస్తు మరియు ఆయన సువార్త పై ఉన్నప్పుడు, మన జీవితాలలో—జరుగుచున్న దానిని లేదా జరగని దానిని లక్ష్యపెట్టకుండా మనం ఆనందాన్ని అనుభవించవచ్చును.” సంతోషము ఆయన వలన మరియు ఆయన నుండి వచ్చును. ఆయన సమస్త సంతోషము యొక్క మూలము.”

జీవితం బాగా సాగుతున్నప్పుడు ఆనందం గురించిన ఈ సత్యాన్ని మీరు ఎంత తరచుగా ఆలోచిస్తారు? ఇది పరిస్థితులు క్లిష్టంగా ఉన్నప్పుడు ఇచ్చే ఓదార్పుకరమైన సలహా మాత్రమే కాదు. మీ మంచి రోజులతో సహా, ఇది ఎల్లప్పుడూ నిజం. కాబట్టి, మంచి వచ్చినా చెడు వచ్చినా, క్రీస్తుపై దృష్టి పెట్టడానికి మీరు చేయగలిగినదంతా చేయండి.