Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Plaub Hlis Ntuj 2025
Yexus Khetos Yeej Pab Tau Thaum Nyob Zoo Thiab
Thaum peb nyob zoo, peb yuav ua li cas kom tsom ntsoov rau tus Cawm Seej? Nov yog tej lub tswv yim rau koj.
Xav seb yuav zoo li cas yog ib tug phooj ywg siv sij hawm nrog koj thaum nws nyuaj siab xwb thiab tsis nrog koj nyob thaum nws zoo siab. Puas yog kev ua phooj ywg zoo? Tsis yog.
Peb puas ua li ntawd rau peb tus Cawm Seej—peb nrhiav Nws thaum nyuaj siab xwb tiam sis peb tsis nco qab txog Nws thaum peb nyob zoo?
Peb hais ntau txog qhov uas Yexus Khetos pab peb thaum peb raug tej yam nyuaj, tej zaum yog vim hais tias txhua leej txhua tus yeej muaj tej lub sij hawm thaum lawv raug xwm txheej nyuaj.
Tiam sis muaj tej hnub—tej lub lim tiam thiab tej xyoo uas, yog peb muaj hmoov zoo—peb lub neej yeej zoo heev. Tej lub sij hawm thaum zoo li ntawd peb tsis nco qab txog tus Cawm Seej. Cov neeg hauv Phau Ntawv Maumoos twb ua li no. Lawv tau vam meej vim Vajtswv foom koob hmoov rau lawv rau ib ntus tiam sis thaum kawg lawv tau muab hlob thaum lawv tsis nco qab txog Nws.
Qhov uas peb nyob zoo tsis txhais hais tias peb tsis tas muaj Yexus Khetos ntxiv. Lub caij uas peb vam meej yeej yog lub sij hawm zoo tshaj plaws nrog tus Cawm Seej xyiv fab thiab nco ntsoov txog Nws.
Yog li ntawd peb yuav ua li cas kom nrog Yexus Khetos thiab peb Leej Txiv Saum Ntuj Ceeb Tsheej sib raug zoo thaum tsis muaj kev sim siab uas ua rau peb xav tig mus rau Nkawd?
Txo Hwj Chim
Thaum yus nyob zoo, yus yeej zoo siab txog yus cov koob hmoov thiab tej yam zoo uas yus tau lawm. Tiam sis cia li nco ntsoov tias leej twg yog tus uas muab tej ntawd rau yus. Vaj Ntxwv Npeyamis tau hais li no nyob hauv nws zaj lus hauv Phau Ntawv Maumoos:
“Vim saib seb, tsis yog peb txhua tus puav leej yog neeg thov khawv los? Tsis yog peb txhua tus vam khom rau tib tug Neeg, uas yog Vajtswv, kom txais txhua yam khoom uas peb muaj, tag nrho tej zaub mov thiab tej ris tsho, thiab kub, thiab nyiaj, thiab txhua txhia yam kev nplua nuj uas peb muaj txhua nrho los?” (Mauxiyas 4:19).
Kev txo hwj chim thaum koj vam meej vim koj nco txog tej yam uas Leej Txiv Saum Ntuj Ceeb Tsheej thiab Yexus Khetos tau ua rau koj yeej pab koj nrog Nkawd koom siab thaum koj nyob zoo.
Ris Vajtswv Txiaj
Kev ris txiaj yog ib yam zoo kom pab tsis txhob muab hlob thiab kom pab koj nco ntsoov. Kev ua Vajtswv tsaug yuav pab koj nco txog Nws thiab txhua yam zoo uas Nws thiab Nws tus Tub ua hauv koj lub neej. Kev ua li no yeej zoo rau koj txawm koj nyob zoo los yog koj raug tej xwm txheej nyuaj los yog.
Nco Ntsoov
Dab Ntxwg Nyoog txoj kev tawm tsam uas nws nyiam siv yog kev “nplij lwm tus neeg lub siab, thiab ntxias lawv mus kom txaus siab rau sab cev nqaij daim tawv” (2 Nifais 28:21). Los yog hais tias, nws yuav nyiam yog koj txaus siab thiab xav tias koj tsis nco qab txog tej yam uas tseem ceeb tshaj plaws thaum koj nyob zoo. Yog li ntawd, nco ntsoov txog Vajtswv! Thaum koj nco txog qhov uas tus yeeb ncuab txawj ntxias neeg thiab koj tiv tau txawm yog ib lub sij hawm zoo los, ces koj yuav nyob ze Leej Txiv Saum Ntuj Ceeb Tsheej thiab Yexus Khetos.
Tus Tswv Yug Yaj Zoo, los ntawm Michael Malm
Tsom Ntsoov rau Khetos
Thawj Tswj Hwm Russell M. Nelson qhia hais tias, “Thaum peb tsom ntsoov rau Vajtswv txoj kev cawm seej … thiab Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej. Kev xyiv fab los vim yog Nws. Nws yog lub hauv paus ntawm tag nrho kev xyiv fab.”
Koj xav txog qhov tseeb txog kev xyiv fab no ntau npaum li cas thaum koj lub neej zoo? Nov tsis yog kev nplij siab thaum koj raug tej xwm txheej nyuaj xwb. Qhov no muaj tseeb tas mus li, tsis hais thaum koj nyob zoo thiab. Yog li ntawd, cia li tsom ntsoov rau Yexus Khetos, txawm koj raug kev phem los yog tau kev zoo los yog.
© 2025 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, September 2025. Hmong. 19626 295