Vajtswv Zoo Li Cas

Nws yog peb Leej Txiv, uas zoo dua li ib leej txiv zoo kawg hauv lub ntiaj teb no. Txawm tias peb tsis nco qab peb lub neej nrog Nws nyob ua ntej peb yug los hauv ntiaj teb no los, Nws paub peb zoo tag nrho. Nws muaj ib lub cev uas muaj nqaij thiab pob txha uas zoo tag nrho, thiab twb tau tsim peb kom muaj yam ntxwv zoo li Nws.

Yog nyuaj rau koj to taub tias Vajtswv zoo li cas, yeej muaj ib tug yam ntxwv uas zoo tag nrho: Nws tus Tub, Yexus Khetos. Khetos hais tias, “Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau. Nim no nej twb paub kuv lawm, nej yeej yuav paub kuv Txiv thiab” (Yauhas 14:6–7). Los yog hais tias, yog peb xav paub tias Leej Txiv Saum Ntuj Ceeb Tsheej zoo li cas, peb yuav tsum kawm tias Yexus Khetos zoo li cas! Nkawd koom siab koom ntsws muaj tib lub hom phiaj.

Muaj tseeb tiag, Nws txoj hauj lwm thiab lub yeeb koob yog kom pab koj tau txoj sia nyob mus ib txhis. Nws yeej tsom ntsoov rau koj! Nws tsis zoo ib yam li peb cov uas muaj tej lub sij hawm peb tsis khoom. Thov Nws thaum twg los tau. Ces mloog rau txhua txoj kev uas Nws teb peb.

Txwj Laug Dale G. Renlund Ntawm Pawg Kaum Ob tug Thwj Tim tau qhia tias “Peb Leej Txiv Saum Ntuj Ceeb Tsheej lub hom phiaj tsis yog kom Nws cov me nyuam ua qhov yog; Nws lub hom phiaj yog kom Nws cov me nyuam xaiv tej yam uas yog thiab thaum kawg hloov los ua neeg zoo li Nws.” Nws yuav caw koj, ntuas koj, thiab qhia qhov tseeb rau koj, tiam sis Nws yuav tsis tshem koj txoj kev xaiv mus, thiab yuav tsis yuam koj coj raws li Nws.

Tiam sis, ib yam li Txwj Laug Patrick Kearon ntawm Pawg Kaum Ob tug Thwj Tim tau hais, “Vajtswv yeej yog tus uas raws nej tsis tu tsis tseg,” txhais hais tias Nws yeej yuav tsis tso koj tseg thaum Nws pab koj rov qab los cuag Nws. Nws paub tias peb sawv daws yuav raug tej yam uas nyuaj thaum peb ua yuam kev. Vim li ntawd Nws tau npaj ib txoj kev rau peb los ua neeg huv thiab txais dag zog los ntawm Nws Leej Tub txoj Kev Theej Txhoj.

Nws txoj hlub rau koj tsis paub kawg. Nws hlub koj tam sim no, txawm koj tsis zoo tag nrho los xij! Thawj Tswj Hwm Jeffrey R. Holland, tus Thawj Tswj Hwm Sawv Cev ntawm Pawg Kaum Ob tug Thwj Tim, tau qhia kom paub zoo txog qhov tseeb no tias: “Ib Leej Txiv uas hlub peb heev hais rau peb txhua tus hais tias, ‘Txawm nej zoo li cas los cia li los cuag kuv,’ tiam sis Nws kuj hais tias, ‘Tsis txhob xav tias nej yuav ua neeg zoo li qub.’ Peb luag nyav thiab nco ntsoov tias Vajtswv yeej xav ua kom peb ua neeg zoo dua li peb xav tias peb ua tau.” Vim Nws hlub zoo tag nrho thiab txhawb nqa koj, Leej Txiv Saum Ntuj Ceeb Tsheej sim pab koj ua neeg zoo li Nws thiab txais txhua yam Nws muaj, ib ruam dhau mus ib ruam.

Txoj kev zoo tshaj plaws kom paub koj Leej Txiv Saum Ntuj Ceeb Tsheej zoo li cas yog kev ua tej yam kom paub Nws. Ua li cas ua tau li no? Kawm txog Nws thiab Nws tus Tub los ntawm tej phau vaj lug kub thiab tej lus ntawm cov yaj saub uas tseem muaj sia nyob. Thov Nws. Ua raws li Nws cov lus txib. Siv sij hawm ntsiag to, teev tiam Nws thaum nyob hauv lub tsev koom txoos, nyob hauv lub tuam tsev, thiab lwm qhov chaw dawb huv. Khi lus nrog Nws thiab ua raws li tej kev khi lus ntawd. Nws yuav pab qhia koj paub tias Nws yog leej twg thiab Nws xav li cas txog koj.