ຂ່າວສານປະຈຳເດືອນ For the Strength of Youth, ເດືອນກໍລະກົດ 2025
ຫລັງຈາກ ຊີວິດ ນີ້
ຄຳຕອບຕໍ່ບາງຄຳຖາມ
ແຜນຂອງພຣະບິດາເທິງສະຫວັນສາມາດໃຫ້ມຸມມອງ ແລະ ຄວາມສະຫງົບກ່ຽວກັບຊີວິດຫລັງຈາກຄວາມຕາຍ.
ພາບປະກອບ ໂດຍ ທອມມັສ ອາໂນດ
ຈະເກີດຫຍັງຂຶ້ນຫລັງຈາກເຮົາຕາຍໄປ?
ບາງທີນີ້ອາດເປັນຄຳຖາມ ຫລັກ ໃນສາດສະໜາທັງໝົດ. ຄຳຕອບທີ່ເຮົາມີຜ່ານທາງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງນັ້ນຊົງພະລັງ. ຊີວິດນີ້ບໍ່ແມ່ນຈຸດຈົບ. ເນື່ອງຈາກພຣະເຢຊູຄຣິດໄດ້ຟື້ນຄືນພຣະຊົນ, ວິນຍານຂອງເຮົາຈຶ່ງຈະລວມຕົວເຂົ້າກັບຮ່າງກາຍຂອງເຮົາ, ແລະ ເຮົາຈະຟື້ນຄືນຊີວິດໃນມື້ໃດມື້ໜຶ່ງ.
ແນ່ນອນ, ມີລາຍລະອຽດກ່ຽວກັບຊີວິດຫລັງຈາກຄວາມຕາຍທີ່ໄດ້ມາເຖິງເຮົາຜ່ານທາງການເປີດເຜີຍສະໄໝໃໝ່ ທີ່ສາມາດຕອບຄຳຖາມອື່ນໆທີ່ເຮົາອາດມີ. ຕໍ່ໄປນີ້ແມ່ນຄຳຖາມບາງຈຳນວນ, ພ້ອມກັບຄຳຕອບສັ້ນໆ.
ຮ່າງກາຍທີ່ເປັນວິນຍານເປັນແບບໃດ?
ວິນຍານເປັນສານຊະນິດໜຶ່ງ, ພຽງແຕ່ “ລະອຽດ ຫລື ບໍລິສຸດຫລາຍກວ່າ” (ຄຳສອນ ແລະ ພັນທະສັນຍາ 131:7). ຮ່າງກາຍທີ່ເປັນວິນຍານມີລັກສະນະເໝືອນຮ່າງກາຍຂອງມະນຸດຜູ້ໃຫຍ່.
ໂລກວິນຍານຢູ່ໃສ?
ເກີດຫຍັງຂຶ້ນໃນໂລກວິນຍານ?
ໃນບັນດາສິ່ງອື່ນໆ, ວິນຍານທີ່ຍອມຮັບເອົາພຣະກິດຕິຄຸນຈະຖືກຈັດລະບຽບເພື່ອສັ່ງສອນພຣະກິດຕິຄຸນໃຫ້ກັບວິນຍານທີ່ຍັງບໍ່ໄດ້ຮັບເອົາພຣະກິດຕິຄຸນ. ວິນຍານເຫລົ່ານັ້ນສາມາດເລືອກທີ່ຈະຮັບ ຫລື ບໍ່ຮັບ.
ຮ່າງກາຍທີ່ຟື້ນຄືນຊີວິດແລ້ວເປັນແບບໃດ?
ຮ່າງກາຍທີ່ຟື້ນຄືນຊີວິດແລ້ວບໍ່ສາມາດຕາຍອີກ, ເປັນເນື້ອໜັງ ແລະ ກະດູກ, ແລະ ສົມບູນແບບ. ພວກເຂົາມີຄວາມສະຫງ່າລາສີ ແລະ ງົດງາມ. “ບໍ່ມີສິ່ງໃດທີ່ງົດງາມໄປກວ່າຊາຍ ຫລື ຍິງທີ່ໄດ້ຟື້ນຄືນຊີວິດແລ້ວ.”
ມີຫຍັງເກີດຂຶ້ນໃນອານາຈັກຊັ້ນສູງ?
ຜູ້ທີ່ຢູ່ໃນລະດັບສູງສຸດຂອງອານາຈັກຊັ້ນສູງຈະກາຍເປັນເໝືອນພຣະບິດາເທິງສະຫວັນ ແລະ ປະສົບກັບຄວາມຊື່ນຊົມທີ່ເຕັມປ່ຽມ. ພວກເຂົາໄດ້ຮັບທຸກສິ່ງທີ່ພຣະບິດາມີ. ພວກເຂົາມີສ່ວນຮ່ວມໃນວຽກງານ ແລະ ລັດສະໝີພາບຂອງພຣະອົງ. ພວກເຂົາໄດ້ຖືກຜະນຶກໃນການແຕ່ງງານຊົ່ວນິລັນດອນ ແລະ ຕອນນີ້ມີຊີວິດຢູ່ໃນຄອບຄົວນິລັນດອນ, ມີລູກທາງວິນຍານນິລັນດອນຂອງຕົນເອງ.
ແລ້ວຄົນທີ່ບໍ່ເຄີຍແຕ່ງງານໃນຊີວິດນີ້ຈະເປັນແນວໃດ?
ພຣະບິດາເທິງສະຫວັນມີຄວາມຍຸດຕິທຳ ແລະ ມີຄວາມເມດຕາຢ່າງສົມບູນ. “ພຣະຜູ້ເປັນເຈົ້າໄດ້ສັນຍາວ່າ ໃນຊົ່ວນິລັນດອນຈະບໍ່ມີພອນໃດທີ່ຖືກປະຕິເສດຈາກບຸດ ແລະ ທິດາຂອງພຣະອົງທີ່ຮັກສາພຣະບັນຍັດ, ຈິງໃຈຕໍ່ພັນທະສັນຍາຂອງພວກເຂົາ, ແລະ ປາດຖະໜາສິ່ງທີ່ຖືກຕ້ອງ.”
ພໍ່ແມ່ຂອງຂ້າພະເຈົ້າໄດ້ຖືກຜະນຶກໃນພຣະວິຫານ, ແຕ່ປະຈຸບັນພວກເພິ່ນໄດ້ຢ່າຮ້າງກັນ. ຂ້າພະເຈົ້າໄດ້ຜະນຶກເຂົ້າກັບໃຜ?
ເຈົ້າອາດໄດ້ “ເກີດໃນພັນທະສັນຍາ” (ນັ້ນຄື, ເກີດມາຫລັງຈາກທີ່ພໍ່ແມ່ຂອງເຈົ້າໄດ້ຜະນຶກເຂົ້າກັນໃນພຣະວິຫານ), ຫລື ເຈົ້າອາດໄດ້ຖືກຜະນຶກເຂົ້າກັບພໍ່ແມ່ຂອງເຈົ້າໃນພຣະວິຫານຫລັງຈາກພວກເພິ່ນໄດ້ຜະນຶກເຂົ້າກັນ. ໃນກໍລະນີໃດກໍຕາມ, ພອນຂອງເຈົ້າຍັງຄົງຢູ່ໃນຜົນບັງຄັບໃຊ້ ເຖິງແມ່ນວ່າພໍ່ແມ່ຂອງເຈົ້າເລືອກທີ່ຈະຢ່າຮ້າງ ແລະ ຍົກເລີກການຜະນຶກຂອງພວກເພິ່ນກໍຕາມ.
ການເລືອກຂອງພໍ່ແມ່ເຈົ້າບໍ່ໄດ້ມີຜົນກະທົບຕໍ່ພອນຂອງເຈົ້າ. ສິ່ງທີ່ສຳຄັນແມ່ນໃຫ້ເຈົ້າຍັງຄົງຊື່ສັດ ແລະ ສະແຫວງຫາພອນຂອງພຣະວິຫານດ້ວຍຕົວເອງ. ກ່ຽວກັບຄວາມສຳພັນໃນຄອບຄົວຂອງເຈົ້າ, ເຈົ້າຄວນ “ໄວ້ວາງໃຈໃນພຣະຜູ້ເປັນເຈົ້າ ແລະ ສະແຫວງຫາຄວາມປອບໂຍນຈາກພຣະອົງ,” ໂດຍທີ່ຮູ້ວ່າ “ພຣະບິດາເທິງສະຫວັນຈະຮັບຮອງວ່າແຕ່ລະຄົນຈະໄດ້ຮັບພອນທຸກປະການທີ່ຄວາມປາດຖະໜາ ແລະ ການເລືອກຂອງເຂົາອະນຸຍາດ.”
ຈະເກີດຫຍັງຂຶ້ນກັບຄົນທີ່ຂ້າຕົວຕາຍ?
ເຮົາບໍ່ຮູ້ວ່າຈະເກີດຫຍັງກັບຄົນທີ່ຂ້າຕົວຕາຍ, ແລະ ເຮົາບໍ່ສາມາດຕັດສິນພວກເຂົາ (ເຊັ່ນດຽວກັບທຸກຄົນ, ໃນທີ່ສຸດ). “ເຖິງແມ່ນຄົນທີ່ຮັກ, ຜູ້ນຳ, ແລະ ຜູ້ຊ່ຽວຊານຈະພະຍາຍາມຢ່າງເຕັມທີ່ແລ້ວກໍຕາມ, ການຂ້າຕົວຕາຍກໍບໍ່ສາມາດປ້ອງກັນໄດ້ສະເໝີ. …
“ມັນບໍ່ຖືກຕ້ອງສຳລັບຄົນທີ່ຈະຂ້າຕົວຕາຍ. ເຖິງຢ່າງໃດກໍຕາມ, ພຽງແຕ່ພຣະເຈົ້າເທົ່ານັ້ນທີ່ສາມາດຕັດສິນຄວາມຄິດ, ການກະທຳ, ແລະ ລະດັບຄວາມຮັບຜິດຊອບຂອງບຸກຄົນ (ເບິ່ງ 1 ຊາມູເອນ 16:7; ຄຳສອນ ແລະ ພັນທະສັນຍາ 137:9). …
“ຜູ້ທີ່ສູນເສຍຄົນທີ່ຮັກໄປຈາກການຂ້າຕົວຕາຍສາມາດພົບຄວາມຫວັງ ແລະ ການປິ່ນປົວໄດ້ໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ.”
© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, July 2025. Laotian. 19618 331