Mboa fi Jesus Christ hɔ: Ne Siantsir na Mbrɛ Osi Ba

Ber a ɔsɔɔw No werdam afɔrbɔ no, Agyenkwa no yɛɛ ndzɛmba ebiasa a ohia:

1. Odzii owu do konyim, maa hɛn wusoɛr ho kwan.

2. Otuaa bɔn nyina ho kaw, ma yeetum enu hɛn ho, yeenyin, na yɛasan akɔ Nyankopɔn hɔ. Ɔno so boa hɛn ma yɛdze binom hɔn bɔn kyɛ hɔn sɛ wɔyɛ bɔn a, osiandɛ Christ faa hɔn bɔn too Noho do.

3. Onyaa yaw, atseetsee, nsɔhwɛ, yarba, na mberɛwyɛ horow nyina ho sũahu.(hwɛ Alma 7:11–13). Ɔno kyerɛ dɛ Onyim pɔkyee mbrɛ Obesi bɔboa na Ɔasa wo yar na Obotum Ahyɛ wo dzen ma asɔw akotorka na aper abɛyɛ papa ara yie.

Fa ɔhaw biara, na ibotum dze ho nyiano asan abata dɛm nokwar ebiasa yinom mu kor na no mboree ho.

Ohia? Osiandɛ Jesus Christ nyaa ndzɛmba nyina ho sũahu ntsi, Onyim mbrɛ osi tse pɛpɛɛpɛr. Onnyi akwansiwdze no mmfi hɔ aber biara, mbom Obotum ahyɛ nkorɔfo a wɔsoa dɛm adzesoa no dzen (hwɛ Mosiah 24:15).

Ɔkõgu? Osiandɛ Christ dzii bɔn do konyim ntsi, hɛn nkõgu nnhia dɛ ɔbɛyɛ afebɔɔ. Mpontu na yɛrebɛyɛ nyia Onyim dɛ yebotum ayɛ no yie no kã nnuho ho.

Yarba? Osiandɛ Odzii owu do konyim ntsi, yɛdze honandua a odzi mu mapã a yarba na yaw biara nnkã ho bɔsoɛr efi owu mu. Christ “[faa] … nyarba nyarba” (Alma 7:11) so, too no ho do a ɔma Ɔyɛ nyia odzi mu dɛ ɔbɛma mboa na awerɛkyekyer.

Na mpo sɛ yehu siantsir a Agyenkwa no yɛ nyiano no a (osian nyia Ɔyɛ na dza Ɔayɛ ama hɛn no ntsi a), yɛda ho hia dɛ yebohu mbrɛ yesi nya mboa na ahom fi No hɔ. Akwanhorow kakra ara nye yi:

Mpaabɔ. Ber a yɛbɔ mpaa wɔ Jesus Christ ne dzin mu no, nkorɔfo a wonndzi mu tse dɛ hɛn no tum nye Nyame a odzi mu kasa. Yebotum abɔ mpaa aserɛ ahoɔdzen a yehia wɔ gyinabew biara mu, na Nyankopɔn beyi ano—nnyɛ wɔ kwan a yɛpɛ anaa enyi da kwan aber biara, mbom wɔ kwan a obehyira hɛn mu. Agyenkwa ne nsato no yɛ nokwar: “Hom mbisa, na hom nsa bɛkã” (John 16:24; 3 Nephi 27:29; Nkyerɛkyerɛ na Ahyɛmudzi 4:7)

Sunsum Krɔnkrɔn no n’Akyɛdze. Ɔsor Egya, Jesus Christ, na Sunsum Krɔnkrɔn no wɔ botae kor. Wɔyɛ edwuma bɔ mu! Ber biara a inya akwankyerɛ anaa awerɛkyekyer ho atsenka fi Sunsum Krɔnkrɔn no hɔ no, ibotum atse ɔno ase dɛ Christ roboa wo so.

Irisie Ahyɛmudzi horow. Elder Dale G. Renlund akyerɛkyerɛ dɛ: “Dzin ahyɛmu ananmɔn kwan no kyerɛ ahyɛmu horow a yedua do ba Christ hɔ na yɛnye No nya nkitahodzi. Ɔnam ahyɛmu nkyekyeree yi do no, yenya No onnyiewiei tum no ho kwan.” (Ebɔbira 2023 wiadze mfɛndzanan ehyiadzi [Liahona, Esusow Aketseaba 2023, 36]).

Adom. Sɛ yenya gyedzi wɔ Jesus Christ mu na yenu hɛnho a, yebotum enya mboa na ahom ntowdo (a wɔsan so frɛ no adom) dze ayɛ ndzɛmba a hɛnara yennkotum ayɛ. (hwɛ Kyerɛwsɛm no Kwankyerɛ, “Adom”). Dɛm ahom, anaa adom yi, botum aba wɔ akwan horow pii mu: fi Sunsum Krɔnkrɔn no hɔ, nyɛnko hɔ, hɔho hɔ, atsenka bi mu. Fapem no nye dɛ, adze papa biara fi Christ hɔ ba (hwɛ Moroni 7:22). Sɛ inya abotar kakra ara, ahom ntowdo kakra, ahoɔdzen ntowdo kakra a edze bɔsɔw a, hu no dɛm dɛ Christ na Ɔroboa wo.

Ntsi ber fofor a ihia nyiano ama asɛmbisa anaa ɔhaw bi no, hwɛ Christ. Kae dɛ ɔnam No konyimdzi wɔ bɔn, owu, na ɔnnkyebo nkõdzen horow do no, biribiara bɛyɛ yie. Hwehwɛ mbrɛ Obotum botum ehyira wo, na ibohu Ne nhyɛdo wɔ w’abrabɔ mu. Ɔdɔ wo kɔ bun mu!