Molaetsa wa Go Nonofo ya Banana wa Kgwedi le Kgwedi, Tlhakole 2025
Thuso go tswa mo Motsweding o o Itekanetseng
Go sa kgathalesege gore o lebane le dikgaratlho dife, Jeso Keresete o tla go thusa fa o retologela kwa go Ene.
The Pattern [Sekao], ka Jeanette Bourup
Ka nako nngwe rotlhe re tlhoka thusonyana. Ka dinako tse dingwe re tlhoka e ntsi thuso. Boammaaruri ke gore, gantsi botshelo bo tsamaya botoka thata fa o sa leke go bo tsamaya o le esi.
Jeso Keresete ke motswedi wa gago o o itekanetseng wa thuso, tsholofelo le nonofo. Gape O ka go thusa go go fetola gore o nne botoka—gongwe le ka ditsela tse o ne o sa akanye gore di ka kgonega.
Phetogo ya Pelo
A o kile wa rapela gore Modimo a nolofatse dipelo tsa baba ba gago? Fa go le jalo, o mo setlhopheng se se siameng (bona 3 Nefi 12:44; Moroni 7:48). Le fa o sena baba ka yone tlhaloganyo eo ya Buka ya ga Momone (o a itse, baba ba ba tlhometseng ka dibetsa mme ba ipaakanyeditse go tlhasela), gongwe o kile wa rapela gore Modimo o nolofatse pelo ya mongwe yo o neng a sa go tshware sentle.
Mme a o kile wa akanya go rapela le go kopa Modimo gore a nolofatse ya gago pelo? Gongwe o na le bothata jwa go itshwarela mongwe. Kgotsa o nna o galefa, le fa o sa batle. Kgotsa o batla go ikutlwa o le bopelonomi thata mo baneng ba batsadi ba gago le fa ba go tena ka dinako tse dingwe.
“[Jeso Keresete] o tlaa fetola pelo ya gago le botshelo jwa gago. Ka bonya ka bonya, o tlaa gola mme o tshwane le Ene thata. Kgolagano ya gago ya kgolagano le Ene e tla go tlisetsa phitlhelelo e kgolo ya maatla a Gagwe” (For the Strength of Youth: A Guide for Making Choices [2022], 8, kgatelelo e tsentswe).
A seo ga se tsholofetso e kgolo? Go sa re sepe gore o sokola ka eng, le pelo ya gago, Jeso Keresete a ka go thusa. O ka sokologela jang kwa go Ene gompieno?
© 2025 by Intellectual Reserve, Inc. All rights reserved. E gatisitswe kwa USA. Tetla ya Sekgoa: 6/19. Tetla ya tlhanolo: 6/19. Thanolo ya Monthly For the Strength of Youth Message , Febrauary 2025. Tswana. 19621 763