Bulanan nga Mensahe sa Para sa Kusog sang mga Lamharon, Pebrero 2025
Bulig Halin sa Perpekto nga Tuburan
Bisan ano pa man ang mga kabudlayan nga imo ginaatubang, buligan ka ni Jesucristo kon magdangop ka sa Iya.
The Pattern [Ang Sulundan], ni Jeanette Bourup
Tanan kita nagakinahanglan sang diutay nga bulig sa pila ka tion sa aton kabuhi. Kon kis-a madamo nga bulig. Ang kamatuoran amo nga, masami mas maayo ang lakat sang kabuhi kon indi mo lang ini pagsolohon.
Si Jesucristo ang imo perpekto nga tuburan sang bulig, paglaum, kag kusog. Mabuligan ka man Niya nga magbag-o para sa kaayohan—siguro bisan sa mga paagi nga wala ka nagahunahuna nga posible.
Isa ka Pagbag-o sang Tagipusuon
Nakaagi ka na bala pangamuyo nga pahumokon sang Dios ang mga tagipusuon sang imo mga kaaway? Kon amo, wala ka nagaisahanon (tan-awa sa 3 Nefi 12:44; Moroni 7:48). Bisan wala ka sang mga kaaway nga pareho sinang sa Libro ni Mormon (mga kaaway nga may mga armas kag handa mag-atake), nakapangamuyo ka siguro nga pahumokon sang Dios ang tagipusuon sang isa ka tawo nga indi maayo ang pagtrato sa imo.
Pero nakahunahuna ka bala nga magpangamuyo kag pangabayon ang Dios nga pahumukon ang imo tagipusuon? Siguro ginabudlayan ka nga magpatawad sa isa ka tawo. Ukon sigesige ka nga nagakadulaan sang pasensia, bisan indi mo gusto. Ukon gusto mo makabatyag sing dugang nga kaayo sa imo mga utod bisan nga kon kis-a kaulugtasan sa ila.
“Bag-ohon [ni Jesucristo] ang imo tagipusuon kag ang imo kabuhi. Amat-amat, magatubo ka kag mangin mas pareho sa Iya. Ang imo koneksyon sa kasugtanan upod sa Iya magadala sa imo sang mas dako nga kahigayunan sa paglab-ot sa Iya gahum” (Para sa Kusog sang mga Lamharon: Giya sa Paghimo sang mga Pagpili [2022], 8, emphasis gindugang).
Indi bala kadaku sina kaayo nga promisa? Bisan ano man ang imo ginapakigbatuan, bisan ang imo mismo tagipusuon, makabulig si Jesucristo. Paano ka magliso sa Iya subong?
© 2025 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, February 2025. Hiligaynon. 19621 861