Kilenglahng Krais

Kailey me sounpar eisek isuh (17) kin wia emen cheerleader lau ehu wiewia suwed wiawihong ih me kahrehda e kawehla ah mwahlielo. Ah kamwkamwahula kahrehda e sohte kak iang sukuhl, oh e tapiada pepehm me e kelekelepw oh sohte me mihmi reh. E apwaliki ah pepehm nsensuwed kan oh e sohte ese iawasa e kak ale sawas ie. Emen ienge kangoange en rong padahk en misineri ko. Re padahkihong ih duwen Tomwpen Sises Krais. Ni e esehla duwen Krais e kihong ih koapwoaroapwoar, oh e pehmada mwomwen pein Koht ahketin kapkapahla lime kan.

Kailey ndaihong ah Nohno, “Sohte pak ehu I pehm me Koht ketin poakpoakeie. Ahpw met I ese me E ketin poakpoakeie.“

Ah nohno, Michelle, pwuriamweiki. Ih oh ah pwoud, Brock, samwalasangehr Mwomwohdiso en Sises Krais en Souleng en Imwin-rahn akan ni ansou Kailey sounpar isuh pwehki soangsoangen peidek kan, peikasal kan, oh pwunod kan. Re medewe neira serepein pahn peren laud ma re sohte ahneki mihting pwuko oh kosonned akan. Re sohte medewe me ara pilipil pahn katohre Kailey sang Koht. Ni Michelle oh Brock ahr kilikilang Kailey eh wekila, re kasawihada me re wereisang kehn kereniong Koht, oh re inengieng kapwurehdo pepehmo.

Re tuhong ara pisop, oh peneineio mwadangete, iangahki rien Kailey pwutak Braeden, pwuralahng mwomwohdiso. Pepehm me re kereniong Koht oh koaskoasoaiong Ih—ni mehlel sang ni kapakap—kapwurehda ahr pwoson. Pwurpwuralahng mwomwohdisohu sohte kapwungala ahr peidek kan de pwunod kan, ahpw re kasawih me kerenparail rehn Koht kesempwalsang ahr peikasal.

Mepwukat koaros tepda ni ansou me ienge men—emen me pwulopwul duwehte kumwail—luke Kailey en kilenglahng Krais. Oh e wia!

Sises Krais ketin mahsanih, “Kilengdohngie ni madmadau koaros; dehr peikasal, dehr masak” (Doctrine and Covenants 6:36). Met iei marain mwurin Oaralap en 2025 en me Pwulopwul kan. Mweidehng kiht en ehukihda mwomwen ahmw kak pilada likilik laudsang peikasal oh pwoson powe laudsang ahmw masak kilenglahng Krais.

Tamara W. Runia

Ni ansou me mie ahi kahpwal kan, ansou koaros e kin sewese ie en medewe duwen Sises Krais ni E ketin kapahwei lime kan. Ni ahi kilenglahng Ih, I tamataman mahsen akan en kohl, “I Pahn Iangih Sises“: “E sohte pahn kohkohlahsangie, mehlel ansou me I kin pwupwidi.“

Emily Belle Freeman

Ni ahi kin wadek ire tikitik en oaralap wet, e katamanikinie duwen Piter nan Sehd en Kaleli. Medmedewe melimelo kalaudehla ah masak oh peikasal, me kahrehda ah duhla nansedo. Ahpw medewe Sounkomouro kamangaiada Ih en kapwaiada mehkot e saikinte wia: e alu pohn sehd! E kopwuriamwei mehlel. Dahme komw kin kapwaiada ni ahmw kilenglahng Ih?

Andrea Muñoz Spannaus

Ni ahi tepda kehn masepwehk, sohte lipilipil wasa I mihmi ie de irair me I mih loale, I pilada en medewe duwen nanpwungen ngehi oh Sahm Nanleng oh Sises Krais. I kapwkapwure nan ahi madamadau pak kei: NGEHI SAPWELLIMEN KOHT SEREPEIN. I wiwia met lau I kin tepda nsenamwahula. E doadoahk ansou koaros!

Bradley R. Wilcox

Idek rehmw isime keieu kesempwaliki oh poakohng uhk. Ahmw Nohno Pahpa oh Kaun en Mwomwohdiso kan? Aramas nan noumw interned me sohte katapankinuhk? Kilenglahng Sahm Nanleng oh Krais. Ira ketin kesempwalikinuhk!

Steven J. Lund

Tamataman dahme ke konehng taman ni ahmw kin inda Oaralap en Prihsduhd en Aron oh Oaralap en Peinakapw kan: Ke wia Sapwellimen Koht pwutak de serepein kempoake. Pwoson me Samatail sapwellimaniki pilahn ehu ong uhk. Kilenglahng Krais wehwehki komwi en kasawih me Sapwellime Tomw poahsoan en pilahno.

Michael T. Nelson

Wadwadek pwuhk sarawi kan iei kilenglahng Krais! Peikasal oh masak pahn kin sohrala ni atail kin taman mehkot kopwuriamwei kan oh padahk kan en Sises. Kitail kapaida mehlel en tungoaleniki Sapwellime mahsen kan. Re konehng irair koaros me kitail mih loale nan atail mour kan.