Ngwet nuh sin Kraist

Yac singucul itkohsr-matwac Kailey el tuh asr ke u in kahluhkluhk se neke pacl se ongaiyac se oraclah muhsahllah yohk ke brain lal ah. Mas lal ah tulokihnilyac liki lutlut ac, el muhtwacwacack in puhla srwenglah ac muhkuh. El tiacna puhlakihn wo ac tiac etuh lah elac sukok kahsruh oyac. Kawuck se siyuck tuh elan lohng sin misineri ac. Eltahl lotwel ke Iwaclah luhn Jisus Kraist. Ahkyohkye lutlut kacl Kraist sang nuh sel finsrak, ac el puhla muh oacna God sifacna srihke in kahsrwel.

Kailey el fahk nuh sin ninac kiacl ah, “Nga tiacna puhla met muh God el luhngse nga. Tuhsruhk ingena nga etuh El luhngse nga.“

Ninac kiacl ah, Michelle, tuh lut kuhtuhsrihk. El ac mukul tuhmwacl ah, Brock, tuh som liki Alu luhn Jisus Kraist luhn Mwet Luhlahlfongi ke Lwen-Sahflah ke Kailey el yac itkohsr ke srihpen kuhtuh kihsen siyuck, ahlohloh, ac nuhnak. Eltahl nuhnkuh muh tuhlihk muhtwacn se nahtuhltahl inge ac engan yohk ke wacngihn miting puhkantwen ac masap. Eltahl tiacna motko muh sulaclah laltahl ah kuh in kosrwaclah kuhpahsr fototo lal Kailey nuh sin God. Ke Michelle ac Brock tuni eklac lal Kailey, eltahl lohacng tuh nuh pacl na loeloes se ke eltahl tuh puhla fototo nuh sin God ah, ac eltahl luhngse sulpac puhla ohiac sac.

Eltahl ohsun nuh sin pisap laltahl ah, tiac paht sucu sac, wi tamuhlwel la Kailey, Braeden, fohlohkuh nuhke alu ac. Puhla fototo nuh sin God ac kuhpwahsryang nuh Yohrohl—yohkna ke pruhe—fohlohkohnma luhlahlfongi lalos. Fohlohkuh nuhke alu uh tiac ahkwoyelah nohfohn kihsen siyuck kuh ma eltahl nuhnkuh, tuhsruhk eltahl liacack lah kuhpwahsr fokoko se luhn sie mwet yurin God yohk srihpac liki suhluhlahlfongi lalos.

Ma inge nuhkwewa muhtwacwacack ke sie kawuck—sie mwet fuhsr oacna kom—solwacl Kailey elan ngwet nuh sin Kraist. Ac el oraclah!

Jisus Kraist el fahk, “Ngwet nuh Sihk ke nuhnak nuhkwewa; tiac ahlohloh, tiac sahngweng (liye Olweacng ac Wuhlweacnmg 6:36). Pa inge kolyuck tuhkuh ke 2025 Youth Theme. Lwelah nuh sesr in akacsruhi lah kom ac oruh fuhkah kom in sulaclah luhlahlfongi fin ahlohloh ac luhlahlfongi fin sahngweng ke kom ngwet nuh sin Kraist uh:

Tamara W. Runia

Ke nga tikuclkucl, kahsrweyuc pacl nuhkwewa in petsacellah Jisus Kraist ahsrwoelah pahol. Ke nga ngwet nuh Sel, nga esam kahs ke on soko ah, “Nga Fah Fahsr wi Jisus“: “El fah tiac som likiyuc, nga finne tahfonglac.“

Emily Belle Freeman

Ke nga riti sifac ke ma suhmuhslah se inge, Nga esamuhlwack Pitihr ke Mweoh luhn Galilee. Ngwetlah liye pahkah sac ahkyohkyelah sahngweng ac ahlohloh lal, pwacnwacng el tili nuhke nwoa luhn pahkah. Tuhsruhk ngwet nuh sin Mwet Lahngo sang kuh Lal in ahkfahsryelah sie ma el sonna oruh met: el fahsr fin kof uh! Arulacna usrnguck, ma na pwacye. Meac kom kuh in ahkfahsrye ke kom ngwet nuh Sel?

Andrea Muñoz Spannaus

Ke nga muhtwacwacack in puhla sahngweng, finne acn nga oasr we kuh ohiac fuhkah nga oasr kac, nga etuh na pwacye in nuhnkuh ke kuhpwahsr luhk yurin Pahpah Lucng ac Jisus Kraist. Nga fahk in nuhnak luhk pacl puhs: NGA TUHLIHK MUHTWACN SE NUHTIN GOD. Nga kalweni in oruh ma se inge neke nga muhtwacwacack in puhla wo. El kwacna orekma!

Bradley R. Wilcox

Siyuck sum sifacna lah suc oaru ac luhngse kom emet uh. Yac pahpah ninac kiom kuh mwet kol ke Alu uh? Yac mwet ke social media ma sahp oruh muh kom ekihn na nacmpuh se? Ngwet nuh sin Pahpah Lucng ac Kraist. Eltahl arulacna oaru!

Steven J. Lund

Esamwack ma kom ahkasmakihnyeyuck kac ke kom kalweni theme luhn Aaronic Priesthood Quorum ac Young Women: Kom wen kuloh se kuh muhtwacn nuhtin God. Luhlahlfongi lah oasr plwacn luhn Pahpah tuhmwacsr nuh sum. Ngwet nuh sin Kraist kalmac pa in liye lah Iwaclah Lal oan infulwen plwacn sac.

Michael T. Nelson

Riti ma suhmuhslah pa ngwet nuh sin Kraist! Ahlohloh ac sahngweng ac sifacna wacngihnlac ke kuht esamwack ke mwenmwen ac luti luhn Jisus. Kuht tarilac na pwacye lah oasr lwelah nuhke kahs Lal. Eltahl orekmakihnyuck nuhke ohiac nuhkwewa kuht puhlakihn in moul lasr uh.