“Naningkamot sa Pagsunod sa Ebanghelyo nga wala si Jesukristo?,” Alang sa Kalig-on sa mga Kabatan-onan, Peb. 2024.
Naningkamot sa Pagsunod sa Ebanghelyo nga wala si Jesukristo?
Mibati ko nga wala madasig sa simbahan hangtod nga akong naamgohan nga ang problema dili ang simbahan—kondili ang kamatuoran nga ako wala magtutok nganha sa Manluluwas.
Hand of Salvation [Kamot sa Kaluwasan], Ni Michael Malm
Sa hayskol pa ko, hapit sa kanunay mibati ko nga layo kaayo sa Dios ug ni Jesukristo. Tanan nga naglibot nako morag mas espirituwal kaayo ug anaa sa tanan niining nindot nga espirituwal nga mga kasinatian.
Wala ko kahibalo kon unsay sayop nga akong nahimo. Nagsimba ko, nagbasa sa mga kasulatan, nag-ampo, ug nag-adto sa templo kon ang akong ward nagplano og mga pagbiyahe sa templo. Apan mibati pa gihapon ko nga morag adunay kulang nako.
Hangtod nga nagmisyon ko diha nako naamgohan kon unsay kulang: si Jesukristo.
Nakatutok ko sa pagbuhat sa mga butang imbes magtutok nganha sa Manluluwas ug magmahimong maunongon nga sumusunod Kaniya.
Aron sa pagklaro, ang matarong nga mga binuhatan maayo. Ang pagsunod sa mga sugo makatabang nato nga mapaduol ngadto ni Jesukristo. Apan usahay ang atong pagtagad anaa na gayod sa “mga buluhaton sa simbahan” nga nawala na ang atong pagtutok sa Manluluwas diha mismo sa mga kalihokan nga ang katuyoan aron mapaduol kita ngadto Kaniya. Kini magbilin nato sa pagbati og kahaw-ang.
Anaa sa Simbahan, Wala uban kang Kristo
Bag-ohay lang pipila sa akong mga higala nga mibiya sa Simbahan misulti nako nga mas malipayon ug mas malinawon sila karon. Naglibog gyod ko! Kon kini mao ang Simbahan ni Kristo, nganong ingon man niana?
Samtang naminaw ko sa mga kasinatian ug mga kabalaka sa akong mga higala, akong naamgohan nga dili ang pagbiya sa Simbahan ang nakahatag nila og kalinaw; kondili ang pagbiya sa mga lista sa angayan nga buhaton nga sa ilang pamati kinahanglan nilang tumanon. Sa pagbiya nila sa Simbahan, gibiyaan usab nila ang ilang espirituwal nga mga lista sa angay nga buhaton.
Apan dili kana mao ang gihunahuna sa Manluluwas sa dihang Iyang gitukod ang Iyang Simbahan ug gihatag ang Iyang mga sugo.
Si Elder Donald L. Hallstrom sa Seventy kausa mitudlo: “Ang uban naghunahuna nga ang kaaktibo diha sa Simbahan ang labing importanting tumong. Anaa diha ang kakuyaw. Posible nga aktibo sa Simbahan apan dili kaayo aktibo sa ebanghelyo. Akong ipasabot: ang kaaktibo diha sa Simbahan nindot kaayo nga tumong; apan, dili kini paigo.”1
Posible kini nga magbuhat sa husto nga mga butang apan hingpit nga nataligam-an ang ngano nga nagpaluyo niini.
Ang Kapeligro sa Pagtan-aw lapas pa kang Kristo
Si Sister Tracy Y. Browning, Ikaduhang Magtatambag sa Kinatibuk-ang Kapangulohan sa Primary, adunay mahinungdanong hunahuna mahitungod sa mga Israelita sa Bag-ong Tugon: “Sama kanato karon, ang karaang katawhan sa Dios gidapit sa pagtan-aw sa ilang mga kinabuhi pinaagi Kaniya aron mas makakita pa Kaniya diha sa ilang mga kinabuhi. Apan sa panahon sa pagpangalagad sa Manluluwas, ang mga Israelita nakalimot ni Kristo diha sa ilang mga pagsaulog. …
“… Ang mga anak sa Israel, niini nga kondisyon, mituo nga ang mga buhat ug mga ritwal sa balaod mao ang dalan ngadto sa personal nga kaluwasan ug sa laing bahin mipakunhod sa balaod ni Moises ngadto sa usa ka hugpong sa mga protokol nga gipahigayon sa pagmando sa kinabuhing sibilyan. Kini nagkinahanglan sa Manluluwas nga ipahiuli ang pagtutok ug pagpatin-aw sa Iyang ebanghelyo.”2
Usahay si Satanas dili molinga sa mga miyembro sa gipahiuli nga Simbahan ni Kristo aron makahimo sila og grabe nga mga sala. Kondili kuhaon niya mismo ang mga butang nga sa atong hunahuna mga maayo ug mokombinsir nato sa pagtan-aw niini sa sayop nga paagi.
Sama sa gitudlo ni Presidente M. Russell Ballard, Akting nga Presidente sa Korum sa Napulog Duha ka Apostoles: “Usahay ang matinud-anong mga Santos sa Ulahing mga Adlaw … magsugod sa pag-focus sa ‘mga sumpay’ imbis sa mahinungdanong mga baroganan. Si Satanas nagtintal kanato nga malinga kita gikan sa yano ug klaro nga mensahe sa gipahiuli nga ebanghelyo.”3
Imbes maghatag nato og kalinaw, ang atong mga paningkamot sa pagsunod sa ebanghelyo usahay moresulta sa kakapoy ug kasagmuyo. Mao gayod kini ang gusto ni Satanas nga atong bation mahitungod sa ebanghelyo. Kon siya dili makadala nato sa pagpakasala, siya mokombinsir nato nga ang pagsunod sa ebanghelyo lisod kaayo, kapoy kaayo, ug maglisod kita nga makatuman.
Pagtutok sa Atong Pagpamatuod nganha kang Kristo
Balik niadtong hayskol, naghunahuna ko nga dili igo ang akong gibuhat. Kana nga kahadlok sa pagkadili angayan mao ang hinungdan kon nganong wala ko mobati og ingon ka espirituwal sama niadtong naglibot nako.
Binsa kon ang atong mga binuhatan mahimong mga timailhan sa atong pagkakabig, dili kita makatugot nga ang atong mga kalihokan maoy motino sa atong espirituwalidad sa kinatibuk-an. Kon kita mohimo niana, kita mosugod sa pagbutang sa gibug-aton sa atong kaluwasan diha sa atong kaugalingong mga abaga imbes mosalig kang Jesukristo.
Si Presidente Nelson miawhag nato nga kinahanglan nga ang atong gipunting “nakatutok sa Manluluwas ug sa Iyang ebanghelyo.” 4 Kini modala nato gikan sa espirituwal nga tsekanan nga mga lista ngadto sa malinawon ug malipayon nga pagkakabig diha sa Iyang Simbahan. “Walay samang paagi sa pagdapit sa Espiritu kay sa inyong makanunayong pagtutok kang Jesukristo.” 5