Pipi i te pipi

E piti ’o tō’u na hoa nō te ’ēkālēsia, ’o Arick ’e ’o Mike, tei ha’api’i mai iā’u i te faufa’a ’ia riro ’ei pipi nā Iesu Mesia. Nā tō rāua hi’ora’a i tauturu iā’u ’ia hina’aro maita’i e tāvini i roto i te hō’ē misiōni. I teienei, tē ’oa’oa nei au i te fa’a’ite atu nō ni’a ia Iesu Mesia i te feiā e hia’ai nei.

E hi’ora’a maita’i ato’a tō’u mau hoa nō ni’a i te Mesia nā roto i tā rātou huru paraparau. ’Ua fa’a’ite mai rātou e rave rahi itera’a iā’u nō ni’a i te pe’era’a ia Iesu Mesia, tei fa’aitoito iā’u ia ha’afātata atu ā iāna. ’Ei hi’ora’a, ’ua ha’api’i mai tō’u hoa ē, mai te mea e uira’a tā tātou, e nehenehe tātou e ui i te Atua. ’E nāhea tātou e ’ite ai i te taime e pāhono mai ai oia ? E ’ite tātou i roto i tō tātou ’ā’au. Nā te Vārua e parau mai ē tē paraparau ra te Atua ia tātou ’e tē mā’iti ra tātou i te ’ē’a ti’a. 

’Ua riro tō’u hoa ’o Ewa (ha’apotora’a nō Ewaoluwa) ’ei hi’ora’a pipi nā te Mesia nō’u nei. ’Ua fa’ainoino mai ’oia iā’u i te hō’ē taime ’e ’ua riri au iāna. I muri iho, ’ua ani mai ’oia ’ia fa’a’ore au i tāna hapa. Nā roto i taua ravera’a ra, ’ua ha’api’i mai au i te ha’eha’a ’e i te fa’a’orera’a i te hara nā roto mai iāna. Nō tōna ha’eha’a ’ia tātarahapa, ’ua fa’a’ore au i tāna hapa.

Nō’u nei, te rirora’a ’ei pipi nā Iesu Mesia, o te ha’apa’ora’a ïa i te mau fa’auera’a a te Metua i te ao ra, te herera’a i te Atua ’e i tāna Tamaiti, ia Iesu Mesia ’e te aupurura’a ia vetahi ’ē.

’Ua mātau vau i te hō’ē tamāroa i te fare purera’a, e tamaiti nō te ino, i te hō’ē rā mahana ’ua taui tā’ue noa ’oia. ’Ua fa’aoti a’era vau e ui ia’na : « E aha ’oe i taui ai ? » Parau mai ra ’oia iā’u ē, ’ua pure ’oia, ’ua tai’o i te mau pāpa’ira’a mo’a, ’ua mau i te fa’aro’o ’e ’ua tāmau itoito i te taui i tōna huru. ’Ua tauturu te reira iā’u nō te mea i teienei, ’ia hina’aro ana’e au e rave i te hō’ē fa’aotira’a, i te pae ha’api’ira’a ’e ’aore rā i te pae vārua, e pure au i te Atua ’ia arata’i mai iā’u.

’Aita paha i nae’ahia i tō’u hoa te fāito maita’i roa ra, ’ua ha’aputapū rā tōna huru i tō’u ’ā’au. I teienei, ’ua mātau vau i te tai’o i te mau pāpa’ira’a mo’a hou ’a nu’u ai i roto i tō’u orara’a. Nā te hi’ora’a ’o tō’u hoa i ha’afātata iā’u i te Mesia nō te mea, i te mau taime ato’a e hara ai au, e nehenehe au e ho’i fa’ahou i te Fatu ra nā roto i te pure ’e te tātarahapa. Nā te haerera’a i te Fatu ra i tauturu iā’u ’ia tu’u i tā’u mau hōpoi’a i te hiti.