Juon Ennaan jān Būreejtōnji eo Kein Kajuon

Likao im jiron̄ ro reddik am jitōnbōro,

Kōmij utiej n̄an kwaļo̧k kadkadin n̄an kom̧ māākjin in ekāāl n̄an jodikdik ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata: N̄an Kōkajoorļo̧k Jodikdik ro. Kōmij kam̧m̧oolol kōn em̧m̧an eo im kajoor eo ami āinwōt jodikdik ro an Kabun̄ in rainin. Ilo m̧ool kom̧ij kōjatdikdik eo an Israel. Ej ikdeelel eo am em̧ool in bwe bok in ekāāl enaaj jipan̄ kom̧ pād ilo kajoor im epaake Jemāmi Ilan̄ im ad Rilo̧mo̧o̧r, Jisōs Kraist.

Ewōr juon an Irooj jerbal n̄an kom̧ im epepen eo ami. N̄an jipan̄ kom̧, māākjin in enaaj lewaj katak ko an rikanaan ro im rijilōk ro raan kein rejetjet, ro rej iakwe kom̧. Ilo ami ekkatak jeje ko rekwojarjar kōjerbal kein jipan̄ ko an Itok Ļoor Eō an Kabun̄ in n̄an mour im ekkatak gospel eo an Jisōs Kraist, kom̧ maron̄ barāinwōt lale māākjin in kōn eļapļo̧k jeļāļo̧kjeņ, kōļmenļo̧kjeņ ko, im im̧weo.

N̄an iien in, bok in ejenolo̧k n̄an baj jodikdik ro wōt ewōr ilo elōn̄ laļ ko im kajin ko rokoktaktak. Kōmij kōjatdikdik menin enaaj bōktok juon jetōb in uwaan im bōro kuk aolepān laļ in im bwe kom̧ naaj bōk kōkajoorļo̧k eo jān naan in kam̧ool ko im en̄jak eko kar kwaļo̧ki jān jodikdik ro jet jān aolepān laļ in.

Āt eo etan māākjin in ej kwaļo̧k lōke eo am ilo kajoor eo ami āinwōt jodikdik ro an Kabun̄ in. Kōmij kam̧ool bwe lan̄lōn̄ eo em̧ool ej itok jān ad tōmak ilo Jisōs Krasit, gospel eo An, im Kabun̄ eo An kar kōjepļaaktok.