“Sondelani Kum”

Bazalwane noodade bam abathandekayo, kuluvuyo kum ukuba nani kule nkomfa yajikelele yeBandla likaYesu Krestu labaNgcwele beMihla yokuGqibela. Eli liBandla laKhe. Sihlanganisene kwizakhiwo nasemakhaya kwihlabathi liphela egameni laKhe.

Sithabathela kuthi igama laKhe xa singena ebukumkanini baKhe ngomnqophiso. UnguNyana kaThixo ovusiweyo nozukisiweyo. Singabantu emzimbeni onokufa, siphantsi kwesono nokufa. Ukanti, kuthando lwaKhe kumntu ngamnye wethu, uMsindisi uyasimema ukuba sisondele kuYe.

Nasi isimemo saKhe kuthi: “Sondelani kum kwaye ndiya kusondela kuni; ndifuneni ngenkuthalo kwaye niya kundifumana; celani, kwaye niya kuphiwa; nkqonkqozani, kwaye niya kuvulewa.”

Kukho amaxesha esiziva sisondele kuMsindisi uYesu Krestu. Kwaye ukanti, ngamanye amaxesha ngexesha lezilingo zethu zasemhlabeni, siva umgama othile ukusuka kuYe kwaye sinqwenela isiqinisekiso sokuba uyazazi izinto ezisentliziyweni zethu kwaye uyasithanda njengabantu ngabanye.

Isimemo soMsindisi siquka indlela yokusiva eso siqinisekiso. Sondela kuYe ngokusoloko umkhumbula. Mfune ngenkuthalo ngokufunda izibhalo. Cela ngomthandazo osuka entliziyweni kuBawo waseZulwini ukuba uzive usondele kuNyana waKhe oyiNtanda.

Kukho indlela elula yokucinga ngayo. Yinto obuya kuyenza ukuba ubunokwahlukaniswa ixeshana nabahlobo bakho obathandayo. Ubuya kufumana indlela yokunxibelelana nabo, ubuya kuwuxabisa nawuphi na umyalezo owufumene kubo, yaye ubuya kwenza konke okusemandleni akho ukubanceda.

Okukhona oko kwenzeka, kokukhona ihlala ixesha elide, kokukhona umanyano lunzulu luthando beliya komelezwa, yaye ubuya kuziva usondela ngakumbi. Ukuba ixesha elininzi lidlulile ngaphandle konxibelelwano oluxabisekileyo, nethuba lokuncedana, umanyano luya kuba buthathaka.

UYesu Krestu uthanda ngamnye wethu. Usinika ithuba lokuba sisondele kuYe. Njengomhlobo onothando, uya kuyenza ngendlela efanayo, ngokunxibelelana ngomthandazo kuBawo waseZulwini egameni likaYesu Krestu, ukumamela inkokhelo exabisekileyo evela kuMoya oyiNgcwele, kwaye ke sikhonze abanye sisenzela uMsindisi ngovuyo. Kungekudala uyakuva loo ntsikelelo yokusondela kuYe.

Ebutsheni bam, Ndaba novuyo lokusondela ngakumbi kuMsindisi—nokusondela kwaKhe kum—ngezenzo ezilula zokuthobela imiyalelo. Xa ndandiselula, umthendeleko wawunikelwa ngexesha lentlanganiso yangokuhlwa. Ndisakhumbula obunye ubusuku obukhethekileyo, kwiminyaka engaphezu kwama-75 eyadlulayo, xa kwakumnyama yaye kubanda phandle. Ndikhumbula imvakalelo yokukhanya nokufudumala njengoko ndandiqaphela ukuba ndandiwugcinile umyalelo wokuhlanganisana nabaNgcwele ukuba ndithabathe umthendeleko, sinqophisana noBawo wethu waseZulwini ukuba sihlale sikhumbula uNyana waKhe kwaye sigcine imiyalelo yaKhe.

Ekupheleni kwentlanganiso ngobo busuku, sacula iculo “Abide with Me; ’Tis Eventide,” ngelizwi elikhumbulekayo “O Savior, stay this night with me.”

La mazwi azisa isivo eyoyisayo yoMoya kum, nanjengenkwenkwe encinci.La mazwi azisa imvakalelo emangalisayo yoMoya kum, nanjengenkwenkwe encinci. Ndaluva uthando loMsindisi nokusondela kwakhe ngobo busuku ngentuthuzelo yoMoya oyiNgcwele.

Kwiminyaka kamva ndandifuna ukuvuselela imvakalelo efanayo yothando loMsindisi kwaye nokusondelana endakuvayo eNkosini ngexesha laloo ntlanganiso yomthendeleko ebutsheni bam. Ngoko ke ndagcina omnye umyalelo olula: Ndaphengulula izibhalo.

Kwincwadi kaLuka, ndifunde ngomhla wesithathu emva kokuBethelelwa nokungcwatywa kwaKhe, xa abakhonzi abathembekileyo beza, ngenxa yokuthanda uMsindisi, ukuza kuthambisa umzimba waKhe. Bakufika, balifumana ilitye liqengqiwe, lisuka engcwabeni, nomzimba waKhe ungekho phaya.

Iingelosi ezimbini zema ecaleni zaza zabuza ukuba kutheni besoyika:

“Yini na ukuba ophilileyo nimfune phakathi kwabafileyo?

“Akakho apha, uvukile: khumbulani ukuthetha kwakhe kuni, oko ebesekwelaseGalili,

“Esithi, uNyana womntu kufuneka akhululwe ezandleni zamadoda anesono, kwaye abethelelwe, ze ngomhla wesithathu avuke kwakhona.”

Ngoko kuhlwa ngorhatya, abafundi ababini bahamba besuka eYerusalem besiya e-Emawusi, yaye iNkosi evusiweyo yabonakala kubo yaza yahamba nabo.

Incwadi kaLuka isivumela ukuba sihambe nabo ngobo busuku:

“Kwathi, ekuxoxeni kwabo, nasekubuzaneni kwabo, uYesu ngokwakhe wasondela wahamba nabo.

“Kuloko amehlo abo ayebanjiwe, ukuba bangamazi.

“Wathi ke kubo, Ziindawo zini na ezi nincokola ngazo, nihamba nibe nithe matshamatsha?

“Uphendule ke omnye, lo ugama linguKleyopa, wathi kuye, Umhambi eYerusalem apha nguwe wedwa na, ukuba ungazazi nje izinto ezihle khona ngazo ezi mini?”

Bamxelela Yena ngokukhathazeka kwabo kuba uYesu wayeswelekile ngoku babemthembile ukuba uYa kuba nguMkhululi kaSirayeli.

Kumele ukuba kwakukho uthando kwilizwi leNkosi evukileyo njengoko yayithetha kwaba bafundi babini balusizi nabazilileyo.

Ndathi ndiqhubeka ndifunda, kwafika la mazwi ayifudumeza intliziyo yam, kanye njengokuba ndandiziva ndiseyinkwenkwana:

“Basondela kuloo mzana babesiya kuwo; wanga yena uyegqitha.

“Kodwa bambamba, besithi, Hlala nathi: ngokuba sekuzakutshona ilanga, nemini seyiphelile. Ze yena wahamba eyokulinda kunye nabo.”

UMsindisi wasamkela ngobo busuku isimemo sokungena endlwini yabafundi baKhe. Wahlala ekutyeni kwenyama nabo. Wasithabatha isonka, wasisikelela sona, wasiqhekeza, kwaye wabanika bona. Avuleka amehlo abo, kwaye bamazi Yena. Ze wanyamalala phambi kwamehlo abo.

ULuka wasibhalela thina iimvakalelo zabo abasikelelweyo abalandeli: “Kwaye bathi omnye komnye, Intliziyo yethu ibingavuthi na ngaphakathi kwethu, ngoku ebethetha nathi endleleni, kwaye nangoku ebesivulela izibhalo ezingcwele?”

Abafundi ababini bakhawuleza babuyela eYerusalem ukuya kuxelela Abapostile abalishumi elinanye okwenzekileyo. Njengokuba babesabelana ngamava abo, uMsindisi wavela kwakhona.

Wema phakathi kwabo waza “wathi kubo, Uxolo malube nani.” Emva koko Yena wajongisisa iziprofeto zobufundisi baKhe zokufela izono zabo bonke abantwana bakaBawo waKhe nokuqhawula amakhamandela okufa.

“Kwaye wathi kubo, Kubhaliwe ngokunjalo, umelwe ngokunjalo uKrestu kukuthi eve ubunzima, abuye avuke kwabafileyo ngomhla wesithathu:

“Nokuba kuvakaliswe egameni lakhe inguquko noxolelo lwezono kuzo zonke iintlanga, kuqalelwa eYerusalem.

“Nina ke ningamangqina ezi zinto.”

Kanye njengabafundi baKhe abathandekayo, wonke umntwana kaBawo waseZulwini okhethe ukungena ngesango lobhaptizo uphantsi komnqophiso wokuba lingqina loMsindisi nokukhathalela abo basweleyo kubo bonke ubomi bethu basemhlabeni. Oku kuzibophelela kwenziwa kwacaca kuthi ngomprofeti omkhulu weNcwadi kaMormoni u-Alma kwiinkulungwane ezadlulayo kuManzi kaMormoni:

“Kwaye ngoku, njengoko ninqwenela ukuza kuwo umhlambi kaThixo, ukuze nibizwe njengabantu bakhe, nize nikulungele ukuthwalisana imithwalo yenu, ukuze ibe lula;

“Ewe, kwaye nikulungele ukulila nabo balilayo; ewe, nize nibathuthuzele abo baswele ukuthuthuzelwa, nibe nokuma njengamangqina kaThixo ngamaxesha onke nakuzo zonke izinto, nakuzo zonke iindawo … , ewe ngokokude kube sekufeni, ukuze nibe nokukhululwa nguThixo, … ukuze nibe nokuba nobomi obungunaphakade.”

Njengokuba unyanisekile kwezi zithembiso, uyakufumanisa ukuba iNkosi iyasigcina isithembiso saYo sokuba kunye nawe ekukhonzeni kwakho, isenza imithwalo yakho ibelula. Uya kumazi uMsindisi, yaye ekuhambeni kwexesha uya kufana naYe kwaye “ugqibelele kuye.” Ngokunceda abanye ngenxa yoMsindisi, uyakufumanisa ukuba uyasondela kuYe.

Abaninzi benu banabantu ababathandayo abalahlekileyo endleleni eya kubomi banaphakade. Niyazibuza ukuba ngeyiphi enye into engaphaya eninokuyenza ukubabuyisela. Ningaxhomekeka eNkosini ukuba izisondeze kubo njengokuba uyikhonza Yona ngokholo.

Uyakhumbula isithembiso seNkosi kuJoseph Smith no Sidney Rigdon ngoku babekude neentsapho zabo beyokwenza imisebenzi yaKhe: “Bahlobo bam Sidney noJoseph, iintsapho zenu ziphilile; zisezandleni zam, kwaye Ndiya kwenza kuzo njengoko kubonakala kulungile kum; kuba kum kukho onke amandla.”

Njengoko ubopha amanxeba abo basweleyo, amandla eNkosi aya kukuxhasa. Iingalo zaKhe ziya kolulwa nezakho ukunceda kwaye basikelele abantwana bakaBawo wethu waseZulwini.

Sonke isicaka somnqophiso sikaYesu Krestu siyakufumana inkokhelo yaKhe kuMoya njengoko besikelela kwaye besebenzela Yena abanye. Emva koko baya kuva uthando loMsindisi kwaye bafumane uvuyo ngokusondela kuYe.

Ndilingqina loVuko lweNkosi ngokuqinisekileyo ngokungathi ndandilapho nabafundi ababini endlwini kwindlela yase-Emawusi. Ndiyazi ukuba uThixo uyaphila.

Eli liBandla laKhe lokwenyani—iBandla likaYesu Krestu. Thina, ngoMhla woMgwebo, siyakuma phambi koMsindisi, ubuso ngobuso. Iya kuba lixesha lovuyo olukhulu kwabo, kobu bomi, abaye basondela kuYe ekukhonzeni kwaKhe kwaye banokulindela ngomdla ukuva amazwi aKhe: “Hee ke, mkhonzi ulungileyo, uthembekileyo.”

Ndiyangqina njengengqina loMsindisi oVukileyo noMkhululi wethu, egameni likaYesu Krestu, amen.