Mga Pakigsulti ug mga Panaghisgotan: Elder ug Sister Kearon ug mga Young Adult
Tibuok Kalibotan nga Debosyonal alang sa mga Young Adult
Dominggo, Perbrero 1, 2026
Elder Patrick Kearon: Nindot kaayo nga makauban ninyong tanan karong gabhiona aron sa pagsaulog sa 100 ka tuig sa institute ug sa paghunahuna sa tanang kinabuhi nga nabag-o sa seminary ug institute latas niadtong mga dekada. Nalipay kaayo ko nga nakita kamo nga miabot karong gabhiona. Ug moingon unta ko nga kini medyo komportable sa labing dako ug hilabihan ka lapad nga paagi. Nanghinaot ko nga nakabantay kamo nga naa tay mga suga sa bistro para mas mogaan ang kaharuhay dinhi sa ubos.
Nindot kaayo nga makauban kamo namo, ug among gipaabot kining higayona uban kaninyo ug salamat sa inyong pag-anhi. Nasabtan namo nga ang uban kaninyo nakasugat og trapik, ug maayo na lang kay ania gihapon mo.
Sister Jennifer C. Kearon: Oo, mapasalamaton kaayo mi sa kahinam nga among gibati dinhi karong gabhiona, ug ganahan mi nga makita ang inyong mga nawong nga personal nga nag-apil namo karong gabhiona. Apan naningkamot usab kami sa paghanduraw niadtong kaninyo nga nagtigom sa mga chapel o sa mga balay o sa usa ka pribadong lugar aron motan-aw karong gabhiona usab—samtang nangita kamo og mas suod nga bugkos uban sa inyong Manluluwas. Gihigugma namo kamong tanan, ug mapasalamaton kaayo kami nga makauban kamo.
Pipila ka semana ang milabay, kami nakabaton og maanidot nga kahigayonan aron mahimamat ang duha ka lain-laing grupo sa inyong mga kaedad—ug sa pagkatinuod, ang uban kanila ania dinhi karong gabhiona—ug nanglingkod lang mi ug nakig-istorya kanila. Nag-istoryahanay mi sulod sa mga usa ka oras uban niining duha ka managlahing grupo. Mianhi sila nga may dala nga pipila ka mga pangutana, ug gihatagan namo sila og pipila ka mga tubag. Nagrepresentar sila sa lima ka lainlaing mga nasod: mga young adult gikan sa Estados Unidos, gikan sa Mexico, gikan sa Norway, gikan sa isla sa Curacao sa Caribbean, ug gikan sa Republika sa Congo.
Elder Kearon: Mao nga ang atong buhaton karon mao ang pagrebyo sa lima sa mga pangutana nga gipangutana sa bidyo. Ug dayon lagmit mohatag kami og usa o duha ka komento tali sa matag usa. Mao nga atong sugdan ang unang bidyo.
Ilha ug Buntoga ang mga Babag
Batan-on nga Hamtong: Unsa ang pipila sa labing dakong mga babag nga inyong nakita nga tingali gibutang namo mismo mga YSA sa among agianan nga nakababag kanamo gikan sa gugma sa Dios o tingali nahimong usa ka butang nga gusto sa Dios nga kami mamahimo?
Elder Kearon: Kon maghunahuna ko sa mga babag nga giatubang sa mga young adult, mahunahuna nako ang ideya nga kini giandam aron mahimong usa ka pagsulay sa paagi nga inyong nasinati sa inyong pagtuon—usa ka klase sa pagsulay nga walay kasulbaran. Wala ko kahibalo. Apan sa akong hunahuna kana nga matang sa panghunahuna ang mahimong babag sa atong pag-isip sa atong panahon sa mortalidad ug sa kinabuhing dayon.
Ihatag ko ninyo ang usa ka paborito nga kinutlo gikan ni Presidente Henry B. Eyring: “Ang Ginoo dili mobutang kanato niini nga pagsulay … aron hatagan kita og grado; gibuhat Niya kini tungod kay ang proseso makausab kanato.”
Wala kita gisulayan sama sa inyong mga pagtuon—gihatagan kita og mga oportunidad nga molambo ug makakat-on. Dili tungod kay adunay nagtipig og talagsaon nga eternal score card, apan tungod kay kinahanglan kitang motubo ug molambo ug makasabot ug makaabot sa pagsabot kon kinsa kita. Mao nga dili kini bahin sa mga babag sa dalan. Mahitungod kini sa dalan nga giandam alang kanato, usahay uban sa mga talagsaong kasinatian nga matahom, ug usahay uban sa mga kasinatian nga lisod kaayo ug mahagiton.
Sister Kearon: Kumusta man ang babag sa pagduhaduha sa kaugalingon ug kahadlok? Kumusta man kanang tingog sa inyong hunahuna? Kana mahimo gyod nga babag sa dalan. Mga tingog sa pagkawalay paglaom. Mga tingog nga nagsulti kaninyo nga kamo napakyas. Mga tingog nga nagsulti ninyo nga kamo wala nakakab-ot sa gidahom nga mga sumbanan. Ug daghan ang mga rason niana: Basin wala kamo makadawat sa trabaho. Basin wala kamo nakapasar sa test. Basin kamo adunay pangandoy nga magminyo ug wala pa gihapon kamo naminyo. Basin diborsyado kamo. Basin naglisod kamo sa samang pakigbisog, sa samang sala, sa samang problema, nga dugay na ninyong giantos. Ug busa kining mga tingog moingon kaninyo, “Dili lang gyod ko igo ka maayo, dili gyod ko mahimong igo ka maayo, dili gyod ko makaabot sa gidahom nga mga sumbanan, ug dili gyod ko mamahimo sa unsay gusto sa Dios nga akong mahimo.” Sa akong hunahuna kana usa ka babag. Ug usahay madungog ko mismo kadto nga mga tingog.
Unsa man sama ang tingog sa Manluluwas diha sa inyong hunahuna? Lahi kaayo kining paminawon sa akong gihulagway, sa mga tingog sa pagkadili-matuohon ug pagsaway ug kaulaw, mga tingog sa kawalay paglaom. Paminawa ang gisulti sa Manluluwas kanato sa Juan kapitulo 10. Ganahan ko niini.
“Sa pagkatinuod, sa pagkatinuod, magaingon ako kaninyo, nga ang mosulod sa toril sa mga karnero nga dili moagi sa pultahan, kondili mokatkat sa laing kaagian, kana siya kawatan ug tulisan.
“Ang mosulod agi sa pultahan mao ang magbalantay sa karnero.
“… Ang mga karnero magapatalinghug sa iyang tingog: ug ang iyang kaugalingong mga karnero pagatawgon niya sa ngalan ug pagamandoan niya sila paingon sa gawas.
“… siya molakaw nga magauna kanila, ug kaniya magasunod ang mga karnero, kay sila makasabot man sa iyang tingog.
“Apan sa lain nga magbalantay sila dili mosunod, hinonoa mokalagiw sila gikan kaniya, kay sila dili man makasabot sa tingog sa lain nga mga magbalantay.”
Usahay madungog ninyo ang tingog sa usa ka estranghero sa inyong hunahuna, tingog sa kawatan ug tulisan, ug ako usab. Ako usab. Ang tingog sa usa nga wala makaila kaninyo, nga wala magpakabana ninyo, ug sa tinuod, kinsa determinado nga molaglag kaninyo. Dili gayod kita maminaw niadto nga mga tingog, ang mga tingog sa mga estranghero, mga kawatan, ug mga tulisan, apan hinuon maminaw sa tingog sa atong Maayong Magbalantay, kinsa kanunay nga nagdasig, kanunay nga mahigugmaon, kanunay nga malaomon. Oo, gitawag Niya kita nga mahimong mas maayo. Oo, gitawag Niya kita sa paghinulsol kon gikinahanglan. Apan ang Iyang tingog kanunay nga tingog sa usa ka persona—sa usa ka Manluluwas nga nahigugma kanato, kinsa mibayad sa kataposang presyo alang kanato, ug sa tinuod, kinsa nabugkos pinaagi sa pakigsaad sa matag usa kanato. Busa pagbusog sa mga pulong ni Kristo, dili sa mga pulong sa usa ka estranghero.
Okey, atong tan-awon ang sunod nga bidyo.
Tabangi Kadtong Mobiya
Batan-on nga Hamtong: Adunay lainlaing mga yugto sa kinabuhi diin ako motuman sa mga sugo sumala sa akong gibati nga gilaoman sa Dios nga akong tumanon kini, apan unsaon nimo pagtabang ang usa ka higala nga imong nakita nga hinay-hinay nga mibiya sa mga kalihokan sa Simbahan o gikan sa pagbati sa Espiritu matag adlaw? Unsaon ninyo sila pagtabang ug dili sila sultihan, sa laktod nga pagkasulti, nga nasayop sila sa usa ka paagi?
Sister Kearon: Lisod kay dili kamo gusto nga ingon og gihukman ninyo ang usa ka tawo. Dili ninyo gusto nga makita nga, bitaw, nga nag-ingon, “O, kuan, ang paagi nga akong gisunod ang ebanghelyo mas maayo kaayo nga paagi o mao ni ang hustong paagi.” Kanunay gyod nga nagdepende kini sa gugma ug panahon, sa akong hunahuna. Ang inyong mga higala kinahanglan mobati sa inyong gugma ug kinahanglan nga makahibalo nga kamo andam mohatag nila sa panahon nga ilang gikinahanglan.
Ug tingali ang inyong mga higala naa sa punto nga kinahanglan nilang hisgotan ang pipila sa mga butang nga nahitabo sa ilang kaugalingong mga hunahuna ug kasingkasing. Ug mahimo ninyo silang hatagan sa mensahe—ang klaro nga mensahe—nga kamo anaa sa usa ka luwas nga lugar, kamo usa ka tawo nga mohigugma ug motahod kanila ug moamuma kanila ug motabang kanila bisan unsa pa ang ilang giagian. Mahimong dili kamo mouyon nila, mahimong dili kamo mopili sa unsay ilang gipili, apan makahimo gyod og kalainan alang sa naglisod nga mga higala nga sila adunay luwas nga kadangpan ug naay tawo nga ilang masaligan nga nagpakabana kanila.
Makatabang kini, sa akong hunahuna, ang paghisgot bahin sa mga panahon nga, tingali, mas kusog nilang gibati ang Espiritu kaysa karon o mga panahon nga mas matinud-anon nilang gisunod ang ebanghelyo kaysa karon. Ug pakigsulti kanila mahitungod sa ilang kinabuhi kaniadto ug sa mga kalainan nga ilang namatikdan.
Ug busa ang matinuoron kaayo, kasingkasing-sa-kasingkasing, espiritu-sa-espiritu nga mga panagsultihanay diin dili nimo sila hatagan sa mensahe nga, “Ah, hinuon, wala ka nagsulti sa akong gilaoman nga imong isulti o wala ka naghatag nako sa tubag nga gusto nakong madungog ug busa undangon na nato kining panagsultihanay.” Sa akong hunahuna importante gyod na.
Ug kini usa ka prinsipyo nga magamit sa tanan natong mga relasyon. Usa kini ka prinsipyo nga magamit sa pagkaginikanan. Kini usa ka prinsipyo nga magamit samtang, kahibalo mo, makigsulti kita sa atong mga minahal sa bisan unsang sitwasyon.
Elder Kearon: Oo. Ug sa akong hunahuna depende na kon hain sila—si Carl naghisgot bahin sa mga higala nga tingali nagkalayo sa ebanghelyo—depende kon hain sila, kinahanglan natong paningkamotan nga tabangan sila nga magpabilin nga aktibo—maghisgot ta bahin sa pagkaaktibo sa Simbahan. Maghisgot ta bahin sa pagkaaktibo sa Simbahan. Kana makapainteres kaayo nga hugpong sa mga pulong para sa usa ka kinabig nga makadungog niana nga pulong. Apan sa akong hunahuna gusto natong buhaton ang tanan aron magpadayon silang naapil, aron magpadayon silang aktibo, aron matabangan sila nga motabang sa uban. Kon sila adunay calling, sa pagtubag niana nga tawag ug pag-apil niini. Sa pagtudlo, sa pagpangalagad, ug sa pag-atiman sa uban nga tingali naglisod. Sa akong hunahuna angay kaayo nga ang Basahon ni Mormon nagsugod ni Lehi ug sa iyang pamilya—uban ni Nephi nga miadto ug mibuhat—ug kita usa ka katawhan nga moadto ug mobuhat. Ug sa akong hunahuna adunay dakong gahom niana. Kini nagpabiling buhi sa atong hugot nga pagtuo. Ug kon ang atong hugot nga pagtuo medyo nahuyang, kini makapabalik kanato. Ganahan ko sa gisulti ni Presidente Monson mahitungod sa Manluluwas. Miingon siya nga ang Manluluwas kanunayng aktibo nga nagtabang ug nagserbisyo. Sa akong hunahuna atong masunod pag-ayo kana nga ehemplo.
Atong tan-awon ang sunod nga bidyo.
Batia ang Kalinaw Bisan pa sa Kabalaka
Batan-on nga Hamtong: Ako lang—isip usa ka tawo nga nabalaka, usahay lisod para nako nga magmalipayon kon kanunay ko nga nabalaka. Ug naghunahuna ko kon kamo aduna bay mga panabot kon unsaon sa pagbati og dugang nga kalinaw diha sa Manluluwas aron mas kanunay nga makasinati og kalipay?
Elder Kearon: Maayo kaayo nga pangutana kay kitang tanan adunay kahadlok ug kabalaka usahay. Ang uban kanato mas nabug-atan niini kaysa sa uban. Ang uban kanato nanginahanglan og tabang sa pag-atubang sa atong kahadlok ug kabalaka. Para sa uban kanato, nalambigit na kini sa medikal nga aspeto, ug maayo na lang, nagkaanam na kita ka maayo sa pagtabang sa usag usa o sa pagpatambal sa medikal nga paagi batok sa kahadlok ug kabalaka.
Kon inyong tan-awon ang kasulatan, sa akong nahibaloan, ang indibidwal sa kasulatan nga labaw sa tanan naghisgot bahin sa kabalaka ug sa akong "dakong kabalaka" labaw ni bisan kinsa mao si Jacob. Ug kini makapainteres, kay ang iyang kabalaka lahi ra kaayo sa akoa, sa daghang aspeto. Ang iyang kabalaka nakatutok sa uban. Ang iyang kabalaka alang sa iyang katawhan ug sa ilang kaayohan. Ang akong kabalaka kasagaran bahin sa akong kaugalingon ug sa akong kahimtang ug kon nakahimo ba kog sayop. Usa ka butang nga akong balik-balik nga nakat-onan—kinahanglan nga padayon nga magkat-on ug magkat-on pag-usab—mao nga kon maghunahuna ko sa laing tawo, mawala ang akong kabalaka. Kinahanglan lang nako hunahunaon ang kaayohan sa uban, ug magsugod nga mawala ang akong kabalaka. Sa tinuod lang, nawala na. Kasagaran, molabay lang kini. Ug kon mobuhat kog maayo para sa uban, dako kaayog epekto kana. Mao nga gusto nakong mahisama ni Jacob ug ang akong kabalaka mas naka-focus sa ubang tawo. Ug sa akong hunahuna dako kaayo—nahibal-an ko nga dako kaayo ang pagkaayo.
Sister Kearon: Sa akong hunahuna kita—niining modernong panahon, naanad na kita nga mobati og kahasol o kasakit ug gusto nato nga mawala kini dayon. Naanad na lang gyod ta sa diha-diha nga katagbawan. Hunahunaa nga nagtindog kamo sa shower ug ang tubig medyo bugnaw kaayo, nan lisoon lang nako gamay ang knob padulong sa wala, kahibalo mo, ug mas init na. O bisan unsa pa. Ug naanad na gyod ta nga komportable. Gusto nayo nga makomportable. Gusto sa mga tawo nga makomportable—dili nato gusto nga mobati og kahasol.
Kon kita mabalaka bahin sa umaabot tungod kay kini walay kasegurohan ug wala mahibaloi, natural lang gyod kana. Ug sa akong hunahuna kinahanglan natong dawaton kana nga bahin sa pagkahimong tawo, bahin sa pagpuyo niining kalibotana, mao ang pagdawat sa mga gutlo sa kahasol ug pagdawat tingali bisan sa mga panahon sa kahasol ug ang pag-uyon sa kawalay kasegurohan. Mahimong magdahom kamo nga adunay pipila ka adlaw o pipila ka semana o bisan pipila ka bulan nga kamo medyo dili mahimutang o medyo, halos, maguol. Kinahanglan nato ang kalipay ug kaguol. Kinahanglan nato ang hingpit nga kalipay ug kasubo. Ug kadto nga mga kasinatian, kadto nga mga emosyon, mao ang nakapahimo sa kinabuhi nga kulbahinam ug matahom.
Elder Kearon: Gusto kong modugang og usa ka piho nga ehemplo gikan ni Jacob. naghisgot ko bahin ni Jacob diha, ug sa Jacob 4 sa mga bersikulo 2 hangtod 4, atong mabasa:
"Apan makasulat kami og pipila ka pulong diha sa mga palid, nga maghatag sa among mga anak, ug usab sa minahal namong kaigsoonan, og gamay nga kahibalo mahitungod kanamo, o mahitungod sa ilang mga amahan—
“Karon nalipay kami niining butanga; ug makugihon kaming naghago aron makulit kini nga mga pulong diha sa mga palid, nanghinaot nga ang minahal namong kaigsoonan ug ang among mga anak modawat niini uban sa mapasalamatong mga kasingkasing, ug mainampingong mobasa niini aron sila makakat-on uban sa kamaya ug dili sa kasubo. …
“Tungod kay, alang niini nga katuyoan gisulat namo kining mga butanga, aron sila masayod nga kami nakaila kang Kristo, ug aduna kami paglaom kami sa iyang himaya daghang gatosan ka tuig sa wala pa siya moanhi.”
Ang akong ganahan niini kay, usab, si Jacob kanunay nga naghunahuna sa ubang mga tawo. Karon, kanunay niyang gihunahuna ang mga tawo sa iyang palibot, ug ania siya naghunahuna usab sa mga tawo sa mosunod nga mga henerasyon. Gidala niya kini hangtod niana nga punto. Unsa may nahimo niana alang kaniya? Nan, nakatabang ni niya nga dili na kaayo hunahunaon ang iyang kaugalingong kabalaka, nakahatag kini kaniya og dakong kalipay, ug kini nakahatag sa mga henerasyon—hangtod karon—og dakong kalipay nga mabasa ang bahin kaniya.
Sister Kearon: Siguro usa sa mga dakong tinubdan sa kabalaka sa kadaghanan kanato mao kon motan-aw kita sa kalibotan ug makakita kita og kagubot, makita nato kon unsa ang nahitabo sa balita sa tibuok kalibotan, ug kini ang hinungdan sa kabalaka. Ug sa kasubo, ang uban kanato nagpuyo ug nag-agi niadtong mga panahon sa kagubot ug inhustisya, kawalay-kaangayan. Ug nganong kini makahatag kanato og kabalaka? Kay ang atong mga espiritu dili gituyo alang sa panagbingkil. Klaro kaayo nga gitudlo ni Jesus nga “siya nga may espiritu sa panagbingkil dili gikan [Kaniya].” Ang atong mga espiritu gituyo alang sa kalumo ug kaaghop ug gugma ug pagpasaylo ug kalinaw. Ug busa kon makita nato ang atong isigkatawo nga nakasinati og kagubot ug mga inhustisya sa kinabuhi nga naglibot kanato, kini malisod kaayo alang sa atong mga espiritu. Dili nato gusto nga makita kana.
Karon, unsa may isulti sa Manluluwas agig tubag? Kita nasayod nga Siya miingon, oo, "Paantoson kamo sa kalibotan." Magkaanaay kagubot ug inhustisya. Magahitabo ang gubat, ug magakahitabo ang katalagman. Apan bisan pa niana, si Jesus miingon, “Ayaw kahadlok.” Ngano man? Kay “Nabuntog ko na ang kalibotan.” Kinahanglan natong sigurohon nga dili kita mogamit sa atong mga social media news feed aron makakonektar sa atong Manluluwas ug makakuha sa Iyang kalinaw nga moabot tungod kay Iyang nabuntog ang kalibotan ug gibayran na ang bili sa tanang kawalay-katarongan ug tanang inhustisya nga atong nakita sa atong palibot. Kuhaa ang kabug-at ug ang kabalaka gikan sa inyong dughan ug itugyan kini Kaniya. Kusgan siya nga makasagubang niini.
Atong tan-awon ang sunod nga bidyo.
Pangitaa ang Kalipay sa Kawalay Kasegurohan
Young Adult: Unsaon nimo pagpangita og kalipay isip usa ka young adult kon wala ka mahibalo unsay anaa sa imong kaugmaon?
Sister Kearon: Ang tubag niana nakabase sa—sama sa uban pang butang sama sa—hugot nga pagtuo ug pagsalig ni Jesukristo ug sa Iyang madagayaon ug mahigugmaong kasingkasing. Siya adunay labing matahom nga kaugmaon alang kaninyo—alang sa matag usa kanato. Kon mas makasalig kita niana, mas makatugot kita sa atong kaugalingon nga mosalig Kaniya ug sa Iyang giya ug magkinabuhi sumala sa Iyang kabubut-on ug mas makasalig kita sa maayong mga butang nga moabot. Sa akong hunahuna kana makatabang gayod nato nga makakaplag og kalipay. Kini naghatag kanato og pagbati sa kalig-on ug kalinaw sa atong mga kasingkasing—pagsalig sa atubangan sa Ginoo. Dili nato mapugngan ang pagmalipayon kon molambo ang atong hugot nga pagtuo ug pagsalig kang Kristo ug sa Iyang plano alang kanato. Mao kana ang akong kasinatian. Ug kon moabot ang lisod nga mga butang, nga kanunay gayod mahitabo, dili kita kinahanglan nga matingala niana, dili kita kinahanglan nga mahisalaag sa dalan. Mahimo lang natong ibalik ang atong mga kasingkasing ngadto Kaniya ug mangutana Kaniya, “Sige, niining sitwasyona, unsa may gusto Nimong akong makat-onan gikan niini? Unsa may akong buhaton karon?” uban ang hingpit nga pagsalig nga Siya mogiya kaninyo.
Elder Kearon: Ganahan pud ko ana. Usahay samtang nabalaka kita bahin sa umaabot, makatabang ang paghinumdom sa nangagi. Ug ang inyong kinabuhi lagmit usa ka kombinasyon sa maayong mga panahon ug mahagitong mga panahon sa lainlaing mga proporsiyon. Nakadungog ko og mga tawo nga nag-ingon, “Wala kita mahibalo kon unsa na kataas ang atong nasaka hangtod nga molingi kita sa ubos sa bukid.” Nindot kaayo na nga imahe para nako. Ug siyempre, ang bukid nga kinahanglan natong katkaton kanunayng morag makahadlok, apan kon kita molingi ug moingon, “Wow, layo na kaayo ang akong naabtan,” kana makahatag kanato og pagsalig alang sa umaabot.
Sister Kearon: Kini makatabang gayod sa paghinumdom nga "ang Espiritu nga gihatag sa Dios kanato wala maghimo kanatong talawan kondili naghatag kanatog gahom ug gugma ug pagpugong sa kaugalingon.” Anaa kamo sa panahon sa kinabuhi diin daghan kaayong mga desisyon ang inyong atubangon—daghan kaayong posibleng mga dalan nga kapilian—ug kini walay kasegurohan. Dili kini sigurado, apan makatabang ang paghinumdom nga kamo, matag usa kaninyo, gi-orden nang daan. Sa wala pa kamo moanhi niining yutaa, sa dihang nagpuyo pa kamo uban sa inyong langitnong pamilya, gi-orden na kamo daan alang sa piho nga mga katuyoan ug sa piho nga mga misyon, ug gi-orden na kamo daan nga molampos, gi-orden na kamo daan alang sa kahalangdon, aron sa pagtabang sa Ginoo sa Iyang dakong buhat. Sa dihang nakigsulti si Jehova ni Moises, Siya miingon ni Moises, “Ako adunay buhat alang kanimo, … akong anak.” Ug ang sama tinuod alang sa matag usa gayod kanato. Siya adunay buhat para kaninyo ug para kanako, ug kita gi-orden nang daan alang sa kahalangdon.
Elder Kearon: Talagsaon kaayo na nga hunahuna. Ug sa akong hunahuna usa sa atong mga imbitasyon karong gabhiona mao nga atong hunahunaon pag-ayo ang ingon nga butang. Kay tingali alang sa uban nga gipadako nga aduna niini nga kahibalo, ang ideya sa pagka-orden nang daan alang sa kabantogan usa ka butang nga anaa na. Apan nawad-an na ba kini og bili tungod kay kini kanunay na natong gidawat o nasabtan sa atong kinabuhi? Pero tinuod gayod kana.
Sa yanong pagkasulti, sa dihang kaslonon na mi, usa ka maalamon nga tawo sa among kinabuhi—ingon nga kini kabahin karon sa pagpangita og kalipay sa usa ka walay kasegurohan nga umaabot—miingon kanamo, “Ang kalipay moabot sa ginagmay nga kasinatian.” Sa pagkatinuod, siya miingon, “sa mas mubo pa gayod nga mga kasinatian.” Ug kana usa ka matahom nga imahe nga nagpabilin kanamo. Ang iyang gipasabot, kahibalo mo, ang kalipay usa ka matahom nga buntag. Ang kalipay usa lang ka gamay nga pagtilaw sa usa ka butang. Ang kalipay usa ka higayon uban sa usa ka higala. O bisan unsa pa man kini. Apan ang kalipay moabot sa ginagmay. Usa kana.
Ug ang usa pa nga gusto nakong pamalandongan mao nga ang pagpangita og kalipay nagkinahanglan og praktis. Kining tanan nagkinahanglan og praktis, nagkinahanglan og gamayng trabaho ug paningkamot. Ug dapiton ko kamo—dapiton namo kamo nga himoong tinuod nga sentro sa pagpangita og kalipay ang usa ka oras kada semana: kanang oras sa sakramento sa Dominggo. Himoon nato kana nga labing malipayong gutlo sa semana nga atong masinati. Ug unya makalaom kita nga ang maong kalipay mokatap gikan diha. Apan handurawa kon wala nato himoa kanang orasa nga labing malipayon sa semana. Pagkadakong kapildihan kana! Ug busa ang usa ka imbitasyon kaninyo mao ang paghimo sa inyong oras sa sakramento nga talagsaon, katingalahang malipayon. Ug oo, adunay mga luha samtang maghunahuna kamo bahin sa dakong makaula nga gasa sa Manluluwas, apan kinahanglan adunay kalipay samtang kamo maghunahuna Niya nga migawas gikan sa lubnganan ug sa tanang butang nga kana nagrepresentar ug sa tanang palas-anon nga Iyang gitangtang gikan kaninyo.
Sige, usa pa ka bidyo, tingali.
Sabta ug Gamita ang Pag-ula ni Jesukristo
Batan-on nga Hamtong: Unsaon nato nga mas masabtan ang Pag-ula? Unsaon nato paggamit ang Pag-ula sa atong kinabuhi?
Elder Kearon: Mipasakop ko sa dihang 26 anyos ko. Mobalik ko niana ug kon unsa ka lisod para nako ang pagsabot sa Pag-ula niadtong panahona. Natingala ko ug dili makatuo. Ug busa, samtang naghunahuna ko niana karon, naghunahuna ko kabahin sa plano: Ang Langitnong Amahan, usa ka mahigugmaong Langitnong Amahan, kinsa nahigugma kanato, Iyang mga anak. Ug ang katuyoan sa atong pag-anhi dinhi—aron makakat-on, motubo, makig-uban, mohigugma, molihok uban ang pagtuo. Ug ang Pag-ula.
Nahibalo Siya nga masayop kita, busa gipadala Niya ang Iyang bililhong Anak aron sa bisan unsang paagi—nahibalo kamo, moingon kamo, “Motan-aw ka ug mohilak; maghunahuna ka ug mohilak”—aron sa bisan unsang paagi pas-anon ang atong mga sala diha Kaniya. Giunsa man? Nan, Iyang ipasabot ra kini usa ka adlaw, apan nasayod kita nga gibuhat Niya kini. Ug busa kon maghunahuna ko bahin sa Pag-ula nga ingon niana, maghunahuna ko bahin sa katuyoan sa plano sa kalipay sa Langitnong Amahan alang kanimo ug alang kanako. Ug unya uban niana nga konteksto, makasugod na ko sa pagsabot. Apan sa akong hunahuna walay bisan kinsa kanato ang adunay duol sa hingpit nga pagsabot sa Pag-ula dinhi.
Apan kon atong masabtan nga ang plano ug ang Pag-ula makatabang kanato sa bisan unsang pagsulay, bisan unsang hagit, makapasabot sa kalinaw, makapasabot sa gugma ug kalipay, ingon man sa mga kalapasan ug mga sala sa uban, nan, maayo na ang akong dagan. Ug human sa akong mga luha, moabot ang hingpit nga kalipay. Ang hingpit nga pagpasalamat nga Iyang gidala sa Iyang Kaugalingon ang mga sala ug kasaypanan. Ug mao kana ang pinakamaanyag nga pagkaamgo human sa bisan unsang mga luha, human sa bisan unsang kasubo, human sa bisan unsang kasakit—ang pagmaya. Kini lang, pag-usab, lapas na sa akong pagsabot. Apan anaa kini, ug kini tinuod, ug kini matahom kaayo. Ug gibati ko kini karon.
Sister Kearon: Sa bisan unang higayona nga hatagan ako og kusog nga mahimong mas mapailobon kay sa akong mahimo o mas mapugnganon lang gamay kay sa akong mahimo o sa paghimo og mas maayong pagpili—matag higayon nga hatagan ako og kusog o giya o gamay nga pag-aghat dinhi o didto nga mahimong mas maayo—para kanako kana mao ang gahom ug kusog ni Jesukristo nga nagagikan sa Iyang maulaong sakripisyo. Nga Siya aduna, nahibalo mo, ang mga katungod sa kaluoy. Gihatagan Siya sa mga katungod sa kaluoy ug sa gahom gikan sa Amahan aron makahatag kanato sa Iyang kusog ug gahom pinaagi sa kamatuoran nga Siya nag-antos alang kaninyo ug alang kanako diha niana nga tanaman ug diha niana nga krus. Ug tungod kay andam Siya nga mobuhat niana ug tungod kay gisunod Niya hangtod sa kataposan, Siya adunay katungod ug Siya adunay gahom sa paghatag kaninyo sa Iyang kusog ug sa paghatag kaninyo sa Iyang gugma ug sa paghatag kaninyo sa Iyang paglaom.
Sister Kearon: Sa Moises, atong mabasa nga ang mga binuhat sa Dios dili maihap. Wala gyoy paagi nga maihap nato kini. Apan Siya miingon sa Moises 1 , “Dili kini maihap sa tawo ; apan inihap kini ngari kanako, kay kini akoa .” Karong gabhiona kamo talagsaon kaayo, apan sa pagkatinuod sa kalibotan, kamo usa sa walo ka bilyon, apan ikaw giihap sa Dios. Siya nakaila kaninyo. Nailhan ug gihigugma kamo, ug nasayod Siya sa matag detalye sa inyong kinabuhi. Nakaila Siya nimo sa ngalan, ug Siya “Iyang biyaan ang [nobentay nuybe]” aron mangita sa usa. Kon kana nga usa ikaw, kon kana nga usa imong gihigugma, ang 99 porsiyento dili igo alang sa Manluluwas. Gusto Niya ang matag usa, ug ang Iyang buhat dili matapos hangtod nga ang tanan luwas nga mapundok.
Elder Kearon: Ug kon atong masabtan ang usa pa ka importante nga butang kalabot sa Pag-ula sa Manluluwas, kini mahimong gikan sa 2 Nephi kapitulo 9: “Mao nga, gikinahanglan nga mahimo kining walay kinutuban nga pag-ula—gawas kon mahimo kining walay kinutoban nga pag-ula kini nga pagkadunot dili masul-oban sa pagkadili madunot.” Mapasalamaton kaayo ko sa walay kinutoban nga Pag-ula ni Jesukristo ug nga kitang tanan magkatigom karong gabhiona uban sa hugot nga pagtuo, gahom, ug panabot nga nagagikan niini.
Karon naa tay mensahe—kamo adunay mensahe gikan ni Presidente Dallin H. Oaks. Ug mubo ra kaayo. Mga usa ka minuto ug tunga ra. Apan samtang maminaw kamo niini, palihog paminawa ang saad nga iyang gihatag kaninyo.
Presidente Dallin H. Oaks: Minahal kong mga higala, usa sa labing dakong oportunidad sa pagkat-on, pagtigom, ug pagbayaw sa uban makita sa institute.
Nagpuyo kita sa panahon diin ang kasaba ug kagubot komon. Sa kasukwahi, sa institute makakat-on kamo sa pag-ila sa kamatuoran gikan sa sayop, pagtukod sa inyong relasyon uban sa Langitnong Amahan ug sa Iyang Anak, si Jesukristo, pagpangita og direksyon ug pagdiskobre sa mga tubag sa labing importante nga mga pangutana sa kinabuhi, pagpakigkita sa uban aron matabangan kamo sa dalan sa pakigsaad, pagpakigkita sa mga tawo nga inyong pilion nga i-date ug pakaslan, ug pagpangandam sa paghigugma ug pagpangulo sama sa Manluluwas.
Minahal kong mga young adult, gidapit ko kamo nga kanunay nga motambong sa institute. Giawhag ko usab kamo sa pagdapit sa inyong mga higala sa pag-ambit niining samang mga panalangin. Mosaad ko nga ang inyong panahon sa institute magdala sa kalinaw, kalipay, ug balaan nga gugma sa Manluluwas. Sa ngalan ni Jesukristo, amen.