Savali o le Faigalotu a le Autalavou Matutua

Se faatupufiafia na’ua le toefoi mai i le BYU-Idaho, o se nofoaga ua ma iloa lelei ma alolofa tele i ai. A o avea Elder Bednar ma peresitene o le BYU-Idaho, sa talavou matutua la ma fanau. O le po nei, o lea ua matou i ai iinei ma nisi o a maua fanau a fanau o ni talavou matutua! Ou te tatalo ia mafuta mai le Agaga Paia mo i tatou uma a o o’u faasoa atua ni nai mafaufauga ma lagona ua oo mai i lo’u mafaufau ma le loto.

I nai tausaga talu ai, sa ma auai ma Elder Bednar i se faigalotu o fesili-ma-tali ma se vaega toatele o talavou matutua. Talu ai nei, sa ou faaaogaina ai le faitau selau o fesili sa auina mai ma sa lofituina au i le tele o fesili e faatatau i le fefe, leai o se talitonuga mautinoa ma le faatuatuaga, ma si masalosalo o le tagata lava ia. Sa tonu ia te au e taulai a’u tala i le po nei, i nisi o nei fesili ma faasoa atu ni malamalamaga faatusitusiga paia ma aafiaga patino, ua ou faamoemoe e aoga i lau malaga o le olaga—i le taimi nei ma le lumanai.

Atonu e mafai ona e fesootai i ai a o e faalogo i nei fesili:

1. E mafai faapefea ona tatou suia le fefe i le alofa faaKeriso ma le faatuatua?

2. E mafai faapefea ona ou tumau malosi pe a ou lagonaina le vaivai tele?

3. E faapefea ona ou aoao e faalagolago i le Atua?

Ou te talitonu sa i ai nei fesili ia i tatou.

O le mau ou te fia faaaogaina e fai ma faavae o o’u manatu i le po nei, o loo maua lea i le Isaia 41:10:

“Aua e te fefe, aua ou te ia te oe: aua le fetepatepai; aua o au o lou Atua: Ou te faamalosia oe; e moni, ou te fesoasoani ia te oe; e moni, ou te taofia oe i lo’u lima taumatau e i ai le amiotonu.”

E faamoemoe, a o tatou suesueina faatasi lenei mau mo ni nai minute, o le a e maua uunaiga o le a fesoasoani ia te oe e suia ai lou fefe i le alofa faaKeriso ma le faatuatua, faatumauina se talitonuga maumaututu loloto e mafai ai ona e tumau malosi pe a e lagonaina le vaivai tele, ma maua ai le mautinoa ia te oe lava a o e aoao e faalagolago i le Atua.

Ina ia amata, tatou mafaufau i le vaega muamua o le Isaia 41:10:

“Aua e te fefe; aua ou te faatasi ma oe: aua le fetepatepai.”

Manatua le tala faatusipaia i le Luka 24, i le aso o le Toetu o Iesu, e toalua Ona soo o loo savavali mai Ierusalema i le nuu o Emau.

I luga o le ala, sa faatasi atu se tagataese ia i la’ua ma fesili pe aisea ua faanoanoa ai. Sa ofo i la’ua ona e le iloa e lenei tagata se mea e uiga i le mea na tupu i Ierusalema, ma faamatala atu ia te ia mea na tutupu i aso e tolu ua tuanai. Sa la faamatala le ala na tu’ua’ia sese ai Iesu ma faasala ai i le oti, sa faasatauroina, ona toetu faavavega ai lea. E lei iloa e nei tagata seia vagana ua mae’a le la malaga e fitu-maila o lea sa latou savavali ma le Alii toetu lava Ia.

Aisea e taua ai lenei tala? Ona ou te talitonu o loo savali Iesu faatasi ma oe ma a’u i la tatou malaga i le olaga e sili atu nai lo se mea tatou te iloa. O loo faatasi o Ia ma i tatou. E mafai faapefea ona tatou suia le fefe i le alofa faaKeriso ma le faatuatua? Manatua le fasifuaitau lenei mai ia Isaia:

“Aua e te fefe; aua ou te faatasi ma oe: aua le fetepatepai.”

Tatou iloiloina la’ia o le vaega lona lua o lenei mau:

“Aua o A’u o lou Atua: Ou te faamalosia oe; e moni, Ou te fesoasoani ia te oe.”

A o matou nonofo ai iinei i Rexburg i tausaga ua mavae, sa ou tietie atu i la’u taavale i Sate Leki e faatasi ma lo’u tausoga i le aso talu ona uma le taotoga o le fatu o lona toalua. Sa o se taimi o le le mautonu, ma i le mavae ai ona ou vaai i lona toalua, sa ou iloa ai le mafuaaga o lona popole. Sa le’i lelei lona toe malosi mai, ma sa tonu ai i ona fomai e manaomia ona tui ni ona toto.

Ou te lei vaai muamua i le tuiga o se toto ma sa ou ofo i le sinasina faamatāua ifo o le toto, sa faifaimalie agai ifo i se faaga’au vaiti i ona uaua. A o o’u matauina, sa ou mafaufau i lo tatou Faaola ma tomanatu pe fia ni matāua o le toto sa Ia faamaligiina mo au. I le mavae ai o ni itula, sa ou molimauina le ola fou, malosi, ma le malosiaga na tuuina i ai e le toto sa tui.

Ae peitai, ou te le’i malamalama atoatoa pe iloa, o le taulaga togiola a Iesu Keriso ua aumaia ia i tatou le malosi ma le fesoasoani e fai ai mea faigata. Ua faamanuiaina i tatou e fai mea tatou te le manatu tatou te mafaia. E mafai faapefea ona tatou tumau malolosi pe a tatou lagonaina le vaivai tele? Manatua le fasifuaitau lenei mai ia Isaia:

“Aua o A’u o lou Atua: Ou te faamalosia oe; e moni, Ou te fesoasoani ia te oe.”

Se’i ou faasoa atua ni nai mafaufauga e uiga i le fasifuaitau faaiu o le Isaia 41:10:

“Ou te taofia oe i lo’u lima taumatau e i ai le amiotonu.”

O le lima taumatau ua iloga o le lima o le feagaiga. Ona o lo tatou sootaga faalefeagaiga ma Keriso, e mafai ai ona tatou maua le mautinoa o lo tatou Faaola o le a taofia, lagolagoina, ma fesoasoani ia i tatou.

Ou te manatua ai i lenei mea le tala i le Mataio 14 lea na i ai soo o Iesu i se vaa i le ogatotonu o le vasa ua felafoaiina e matagi ma galu. Ua vaaia e Peteru ia Iesu o savali i luga o le sami ma talosaga atu ia Iesu e fai mai ia te ia e sau ia te Ia. Na faamamalu e Iesu le talosaga, ma amata ai e Peteru ona savali i luga o le vai agai atu ia te Ia. O loo lelei o ia pau lava ia tumau lona taulai atu ia Iesu. Ae ina ua vaaia e Peteru le matagi matamataita, na amata ona magoto ifo ma alaga atu ai ia Iesu e laveai o ia. “Ona aapa atu loa lea e Iesu o lona aao, ua tago ia te ia.” Ma ou te talitonu moni o le a Ia sapoina foi i tatou.

E mafai faapefea ona tatou aoao e faalagolago i le Atua? Manatua le fasifuaitau lenei mai ia Isaia:

“Ou te taofia oe i lo’u lima taumatau e i ai le amiotonu.”

Ou te molimau atu e silafia ma alofa le Tama Faalelagi ia i tatou. Ou te molimau atu o Iesu Keriso o lo tatou Faaola ma le Togiola. O loo savali o Ia ma i tatou; Na te faamalolosia i tatou; e fesoasoani o Ia ia i tatou. Ma e mafai foi ona tatou talitonu o le a Ia taofia i tatou, lagolago, ma fesoasoani ia i tatou pe a tatou manatua lo tatou sootaga faalefeagaiga ma Ia. Ua ou iloa o le Agaga Paia o se talifaaaliga ma e aumaia mafaufauga i o tatou mafaufau ma faalogona i o tatou loto. Ua ou iloa o Elder Bednar na valaauina e le Atua, “e ala i valoaga, ma le faaeeina atu o lima.” O ia o se Aposetolo a le Alii o Iesu Keriso.

I le suafa o Iesu Keriso, amene.