Mga Leksiyon gikan sa Kinabuhi sa Young Adult

Elder Carlos A. Godoy: Salamat nga anaa kamo uban namo karon niining matahom ug makasaysayanong dapit. Nalipay ko nga makauban ninyo karon. Salamat sa pag-apil namo gikan sa upat ka suok sa kalibotan. Ganahan mi nga makauban ang mga young adult. Kamo dunay importanteng tahas sa Simbahan, ug nagpuyo kamo sa mahinungdanong panahon sa inyong kinabuhi. Ang inyong mga desisyon karon dako og epekto sa inyong umaabot. Busa karong gabhiona nanghinaot mi nga makadugang og butang nga makatabang sa daghang mensahe nga nadawat na sa ubang debosyonal.

Nalipay ko nga makauban sila si Brother Chad Webb ug ang iyang asawa, si Kristi, ug si Elder Clark Gilbert ug ang iyang asawa, si Christine. Salamat sa pag-apil namo karon.

Nalipay usab ko nga anaa si Mônica uban nako niining debosyonal. Gamiton namo ang pamaagi nga pagtudlo uban sa grupo, ug hinaot nga ganahan mo.

Isip kabahin sa among mensahe, mopakigbahin mi og mubo nga animated video nga gihimo sa Simbahan bahin sa mga batan-on pa kami. Si Mônica ug ako parehas ninyo og edad.

Pinaagi niini nga bidyo, hinaot nga makatudlo mi ninyo og mga baroganan nga magamit sa inyong kinabuhi karon. Lima ka minuto kini nga bidyo diin makita ninyo ang lainlaing panahon sa among kinabuhi. Palihog paminaw og maayo ug sulayi sa pag-ila ang mga baroganan nga may kalabotan ninyo. Mobalik ta unya aron hisgotan ang pipila niini. OK?

[video]

Wala gyod ko mangita sa ebanghelyo o simbahan. 16 anyos ko, ug ang higala sa akong maguwang nga lalaki miadto sa among balay aron dapiton ang among manghod nga mga babaye sa kalihokan sa simbahan kay nagtuo siya nga ang akong igsoong lalaki ug ako dili ganahan sa simbahan. Ug pag-abot namo sa simbahan, nagdula sila og yano ra nga kalihokan, ug lingaw kaayo sila sa pagdula ug nangatawa. Ug naghunahuna ko, “Nganong malipayon man kaayo sila?”

Duha ka adlaw ang milabay, natudloan ko sa mga leksiyon sa misyonaryo didto sa chapel kay dili gyod interesado niana ang akong pamilya. Nalipay ko sa ebanghelyo. Nasayod ko nga tinuod kini, andam magpabunyag bisan wala ang akong mga ginikanan. Apan lisod ang pagpakig-uban.

Wala koy mga higala, ug anaa ko sa luyo sa chapel kadali—magtan-aw, maminaw, ug mopauli. Mahimo ni ninyo kadali, apan kon kamo walay mga higala, bisan kon nasayod mo nga tinuod ni, lisod, ilabi na kon ang inyong mga higala sa gawas nanawag nga mobalik ka.

Misimba ko usa ka Dominggo, mura og pang-kataposan na lang, ug nagsulat sila og mga aplikasyon. Ug nangutana ko, “Unsa ni?”

“Komperensiya sa kabatan-onan,” miingon sila. “Kinahanglan moadto ka.”

Miingon ko, “OK, ganahan kong mosulay niini.” Sa kaulahian sa komperensiya, tanang kabatan-onan nagdula, nanganta, ug nanayaw, ug dayon usa ka tingog sa speaker nag-ingon, “Atong ihatag ang pangbukas nga pag-ampo.”

Kadtong tanang saba nga mga tawo, kalit lang nahilom. Ug alang nako, “Unsa? Unsay nahitabo dinhi?” Sa unsang paagi nga kining grupo sa kabatan-onan nga saba kaayo sa pipila ka segundo nahilom tungod sa pag-ampo? Wow, lahi sila. Gusto ko nga mahisama nila. Para nako, ang Ginoo nagpadala na usab nako og menshae: “Carlos, ayaw og hunong. Mao kini ang imong dapit.”

Pagkasunod adlaw, naglakaw ko sa palibot ug usa ka babaye anaa didto nga nagtugtog og flute nga nag-inusara. Sa pagkakita nako sa babaye, nakaingon ko, “Wow!” Ug ang akong kasingkasing paspas nga mipitik. Ug gusto kong makig-istorya niya. Ug natural ra kaayo siya ug mahigalaon. Ug nakig-istorya siya nako nga normal ra ko nga tawo. Ug siya nahimo nakong higala, akong bugtong higala. Ug pinaagi niya, nakahimamat ko og laing mga higala.

Human niining komperensiya sa kabatan-onan, nakahukom ko nga mopadayon. Ang akong pamilya mibalhin sa laing bahin sa siyudad. Miadto ko sa chapel duol sa akong balay, ug tag-ana kinsay anaa didto—si Mônica! Iya kadto nga ward. Ug human sa miting, usa ka sister miduol nako, “Miyembro ka ba sa Simbahan?”

Naanad na ko niana nga pangutana. Miingon ko, “Oo, basin; siyempre miyembro ko.”

Miingon siya, “Aw, kinahanglan ka nga motambong sa seminary.”

Ug naghunahuna ko, sa akong gigikanan, ang seminary alang sa magpari, usa ka padre.

Busa miingon ko, “Dili, dili, gusto kong maminyo ug dunay mga anak.”

Ug miingon siya, “Dili, ang seminary para sa kabatan-onan, aron magkat-on sa ebanghelyo. Dili kaayo daghan ang kabatan-onan sa among ward. Tulo lang gyod: si Adriana Weber, Carlos Arthur Lencini, ug si Mônica Brandão.

Ug naghunahuna ko, “Wow. Wala ko kahibalo kon unsa kini, apan ganahan ko moadto.”

Ug matag buntag nadawat nako kanang maayong pulong sa Dios. Ug kana nakahatag nako og panabot kon kinsa ko, sa kalig-on sa pagpakigbisog ug pagpadayon sa proseso sa akong pagkakabig.

Ug dayon gisangonan ko isip kompanyon sa presidente sa Young Men sa home teaching. Ug bisan og ako wala pay nahibaloan sa ebanghelyo, kanunay ko niyang sangonan sa pagtudlo. Misalig siya nako, labaw pa kaysa akong pagsalig sa akong kaugalingon niadtong panahona.

Ug duna pay makapainteresado usab— siya ang amahan ni Mônica. Ug tuod diay, kanang babayeng anghel nga si Mônica nga akong giingon nga mitabang nako—siya sa kaulahian nahimo nakong asawa. Human sa among pagmisyon, naminyo mi sa templo, ug karon inahan siya sa upat ka anak ug apohan sa pito ka apo. Siya gihapon ang anghel sa akong kinabuhi.

Kon motan-aw mo sa palibot, segurado kong makita ninyo kadtong nagkinahanglan og tabang sa mga anghel. Ang Ginoo nagkinahanglan ninyo. Busa kon manamin mo, ayaw kalimot: sa inyong sulod dunay matahom nga espiritu nga anak sa Langitnong Amahan nga duna sa tanang kinaiya ug potensiyal sa sulod ninyo.

[end video]

Elder Godoy: Gimingaw ko niana nga buhok. OK. Karon atong hisgotan ang pipila niana nga mga hilisgotan. Ug ang pag-inusara ang unahon.

Sister Mônica Godoy: Dinhi, nagtuo ko, mao ang nindot nga panahon nga mohunong ug hisgotan unsay nahitabo. Si Carlos, batan-on nga bersiyon, nag-inusara ug nawad-an og kadasig.

Tingali ang uban ninyo mibati usab nga nag-inusara ug nakalimtan, sama sa nahitabo dinhi. Dili sayon nga mobati nga gibaliwala o walay bili. Alang niadtong naa sa susama nga sitwasyon, ayaw tugoti kining pagbati nga makapabug-at ninyo. Wala kamo mag-inusara. Tingali ang uban wala makighinabi ninyo o wala mohangop ninyo sama sa inyong gusto. Makaguol kini nga sitwasyon. Apan hinumdomi, wala kamo mag-inusara, kay ang Manluluwas anaa kanunay alang ninyo. Nakaila Siya ninyo, kahibalo Siya kon unsa ang nahitabo sa inyong kinabuhi, Siya nahigugma ninyo, ug Siya naa ra kon magkinahanglan mo. Palihog, ayaw og hunong sa pagsulay nga mahisakop. Mopadala Siya og mga anghel nga motabang ninyo.

Elder Godoy: Karon, usa ka mensahe natong tanan nga naa sa duol niadtong mibati nga nag-inusara o nakalimtan. Kita mao unta kadtong mga anghel. Palihog tan-aw sa palibot ug tan-aw lapas pa sa normal nga sirkulo sa inyong kahigalaan. Naa ra sila diha, hagbay ra sila diha, ug tingali wala kamo makabantay nila. Nabisi mo sa inyong kinabuhi, kuyog sa maayong mga higala ug mga kauban, nga wala mo kakita sa mga naglaom nga mobati nga gihigugma ug gidawat. Apan naa sila dinha nga nangita og mga higala, naglaom nga mahisakop. Tingali naa ra sila sa luyo sa chapel o sa mga suok sa mga klasehanan. Lagmit, wala sila magsul-ob og puti nga polo ug kurbata o nindot nga pang-Dominggo nga sinina. Apan naningkamot sila sa pagpakig-uban. Palihog hatagi sila og higayon. Nagkinahanglan sila sa inyong pahiyom, inyong lamano, ug inyong pakighigala. Ania ang kinutlo gikan ni Presidente Spencer W. Kimball mahitungod niini:

“Ang Dios makakita kanato, ug Iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan.”

OK. Pakig-date. Mahigugma.

Sister Godoy: OK, ania ang laing maayong punto nga hisgotan: ang higayon nga nahigugma ka nako.

Elder Godoy: Kahibalo ko nga apilon na nimo.

Sister Godoy: Siyempre! Nindot kadto nga panahon, ug dunay leksiyon dinhi nga angayng ipakigbahin. Ang uban ninyo mahigugma ug dali nga makaila sa tawo nga gusto ninyong minyoan. Gugma kini sa unang pagtan-aw.

Elder Godoy: Mura og ingon niana ang akong sitwasyon. Tan-awa ang akong nawong.

Sister Godoy: Apan para nako lahi kadto.

Elder Godoy: Kahibalo ko.

Sister Godoy: Dili kita magdahom nga makaplagan ang atong mahangtoron nga kapikas sa paagi nga sama sa uban. Para sa uban, klaro kini ug lig-on. Para sa uban, magkinahanglan kini og mas daghang oras, paningkamot, ug pailob. Mas makita kini kon magpadayon kamo sa pagpalambo sa relasyon. Ayaw dayon og hunong tungod kay walay lig-ong pagbati sa sinugdanan. Ang kasinatian nagtudlo nato nga ang nindot nga kaminyoon nagsugod sa gamayng paagi, sa hinay hinay, anam-anam.

Elder Godoy: Sakto si Mônica. Para namo, ingon niana nga paagi. Mipitik ang akong kasingkasing sa dihang nakita nako siya. Para nako, mura og nakakita ko og dako nga gilis sa kahayag. Siya, sa laing bahin, walay gibati nga espesyal sa sinugdanan. Miabot kini og pipila ka bulan nakong paningkamot hangtod nga iyang naamgohan nga maayo ko nga opsiyon. Nahimo una mi nga managhigala, ug human sa daghang pakigdeyt, naamgohan niya nga nahigugma siya nianang “gwapo” nga lalaki. Murag ingon niana.

Kini nga kasinatian nagtudlo namo og laing baroganan: ang paagi sa among pagdawat sa pagpadayag. Ang proseso sa pagpangita sa tawo nga minyoan susama ra sa proseso sa pagdawat og pagpadayag.

Ganahan ko sa pagtulun-an ni Elder Bednar bahin sa pagpadayag. Migamit siya og ehemplo sa duha ka kasinatian nga nasinati nato bahin sa suga aron sa pagtudlo niini.

Naghisgot siya sa kasinatian nga sa dihang “misulod kita sa usa ka ngitngit nga kwarto ug gipasiga ang suga. … Ang sanag nga kahayag misanap sa kwarto ug miwagtang sa kangitngit. … Ang pagpasiga sa suga sa ngitngit nga kwarto susama sa dinalian nga pagdawat og mensahe gikan sa Dios sa hingpit … ug sa hinanali.” Ingon niana ang sitwasyon sa akong gibati ni Mônica.

Ang laing kasinatian mao nga sa dihang “kita nagbantay sa kagabhion nga mahimong kabuntagon. … Sukwahi sa pagpasiga sa suga sa usa ka ngitngit nga kwarto, ang kahayag nga naggikan sa nagsaka nga adlaw dili diha-diha dayon mobutho. [Kondili], sa hinay-hinay ug sa inanay nga kakusgon motubo ang kahayag, ug … sa kadugayan, ang adlaw mobanag-banag ibabaw sa kapanganoran. …

“Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios ‘pagtulon-an human sa usa ka pagtulun-an, lagda human sa usa ka lagda’ (2 Nephi 28:30).” Ingon niana ang sitwasyon ni Mônica sa pagdiskobre nga ako ang tukma nga tawo para niya. Miabot og dugay-dugay pa.

Si Elder Bednar mitapos, “Kasagaran, ang pagpadayag motubo sa hinay-hinay sa pagdagan sa panahon ug ihatag sumala sa atong tinguha, katakos, ug pagpangandam.”

Sister Godoy: Ingon niana usab ang pagdawat og espirituwal nga pagkompirmar mahitungod sa atong mahangtorong mga kapikas. Kasagaran, moabot kini sa ginagmay nga pagtubo samtang makighimamat kita sa mga tawo ug mogahin og panahon nga manag-uban.

Elder Godoy: Ako ang mohisgot niana. Sama sa inyong nakita sa bidyo, ang pagtambong sa seminary importante nga desisyon para nako. Bisan kon ang orihinal nga rason sa pagtambong mao ang gwapa nga babaye ug dili ang mga leksiyon sa ebanghelyo, dako og epekto kini sa akong pagkakabig ug espirituwal nga panaw.

Tungod sa inadlaw nga ginagmay nga mga pagtulon-an sa ebanghelyo, nalig-on ang akong pagpamatuod ug nabuntog ang mga tentasyon sa akong panahon. Nakatabang kini nako nga makasabot nga anak ko sa Dios ug Siya dunay plano para nako niini nga kinabuhi.

Sister Godoy: Ang sama nga baroganan magamit sa institute. Kabahin usab kini sa among mga panahon sa pakigdeyt. Hinaot nga nagpahimulos kamo niining nindot nga kapanguhaan. Diha, inyong makaplagan dili lang ang kamatuoran sa ebanghelyo apan ang tinuod usab nga mga higala. Tan-awa unsay gisulti ni Presidente Nelson bahin sa institute:

Video: “Minahal kong mga kaigsoonan, gipangga ko kamo. Ako naghunahuna kaninyo ug nag-ampo alang kaninyo kanunay. Nagpuyo kamo sa usa ka panahon nga dili sama sa uban. Kamo anaa sa panahon diin kamo maghimo og importante nga mga desisyon—mga desisyon nga makaapketo sa nahibiling bahin sa inyong mortal ug kinabuhing dayon. Ang paghimo niini nga mga desisyon ingon og lisod ug gani makahadlok usahay. Apan kulbahinam usab kini tungod kay kita nagpuyo sa talagsaong panahon.

“Mahimo ba nga dapiton ko kamo sa pagbuhat og butang nga makatabang ninyo sa paagi nga talagsaon? Tambong sa Institute! Nakita nako karon ang akong mga anak, mga apo, ug daghang apo sa tuhod nga nagtambong sa institute. Ang pagtambong sa institute adunay makapausab sa kinabuhi nga epekto kanila.

“Ang institute nakatabang kanila, ug motabang kaninyo sa pagpalig-on sa inyong pagkakabig ngadto ni Jesukristo. Ang pagtambong sa institute motabang kaninyo nga mas mobati sa dakong gugma sa Langitnong Amahan alang kaninyo. Ang institute motanyag kaninyo og makapadasig nga mga magtutudlo, matinud-anong mga higala, ug mobati nga nahisakop. Motabang kini kaninyo nga makakita ngano nga ang pagsunod sa ebanghelyo mosangpot ngadto sa walay kataposan nga kalipay. Ang pagtambong sa institute motabang kaninyo sa pagsunod sa ebanghelyo ug mobati og mas dakong kamaya—karon dayon.

• Kon gusto kamo nga makahibalo sa kamatuoran kon kinsa gayod kamo, tambong sa institute.

• Kon gusto kamo nga makahibalo sa katuyoan sa kinabuhi, tambong sa institute.

• Kon gusto kamo nga magpabilin sa dalan sa pakigsaad, tambong sa institute.

• Kon gusto kamo nga makakat-on unsaon nga mopatigbabaw ang Dios sa inyong kinabuhi, tambong sa institute.

• Kon gusto kamo nga mahimong tigpasiugda og kalinaw, tambong sa institute.

“Ako mosaad kaniyo niini nga mga panalangin ug mopadayag sa akong gugma alang kaninyo, pinaagi sa sagrado nga ngalan ni Jesukristo, amen.”

Elder Godoy: Samtang naa pa kita niini nga kapitulo sa espirituwal nga kalig-on, hisgotan nako ang kasinatian bahin sa home teaching.

Sama sa inyong nakita sa animated video, gisangonan ko nga moserbisyo bisan kon ako wala pay igong matanyag. Ang pagserbisyo mipabati nako nga bililhon. Miandam kini nako sa pagtabang sa uban ug, isip resulta, nakapalig-on sa akong kaugalingong pagpamatuod. Usa sa labing maayong paagi sa pagpalambo sa pagmamatuod mao ang pagpakigbahin niini. Hinaot nga kamo aktibong miapil sa mga oportunidad sa pagserbisyo. Diha man sa pagpangalagad, sa family history, sa pagserbisyo sa templo, o sa uban pang katungdanan sa Simbahan diin inyong kalimtan ang inyong kaugalingon ug motabang sa uban. Kini mopanalangin, molig-on, ug mopanalipod ninyo.

Ganahan ko sa kasulatan diha sa Doktrina ug mga Pakigsaad nga naghatag og gibug-aton niini nga baroganan:

“Sa pagkatinuod Ako moingon, ang mga tawo kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa ilang kaugalingon nga gawasnon nga kabubut-on, ug magpahinabo sa daghan nga pagkamatarong.”

Ug tuod diay, sama sa akong giingon sa bidyo, ganahan kaayo ko sa akong kompanyon sa home teaching nga akong giminyoan ang iyang anak. Siya nahimo nakong ugangan. Amahan siya ni Mônica. Aktibo kaayo ko sa mga buluhaton sa home teaching. Matag bulan anaa ko sa iyang panimalay naghimo sa home teaching.

Sister Godoy: Usa ka panalangin nga naa sa karon nga henerasyon nga wala namo, mao ang duol ra nga mga templo. Nag-inusara sa Brazil sa mga batan-on pa mi ang São Paulo, layo kaayo namo. Nianang panahona, ang mga young adult makaadto sa templo kon magmisyon o magminyo. Swerte lang, si Presidente Nelson karon mihatag og gibug-aton sa kaimportante sa pagdawat og pagtuga bisan dili magmisyon o magminyo. Mas gibasehan niini ang pagpangandam kaysa bisan unsa pang butang. Hinaot nga ikonsiderar ninyo kini.

Ang kanunay nga pagtambong sa balay sa Ginoo magdala usab og mga panalangin. Sa templo, makadawat kita og mga leksiyon aron matabangan kita sa pagbuntog sa kalibotan. Ganahan ko sa gisulti ni Presidente Nelson mahitungod sa templo sa miaging komperensiya:

Bidyo: “Walay laing mas makatabang kaninyo sa paggunit sa gunitanan nga puthaw kaysa pagsimba sa templo kanunay kon gitugot sa inyong mga sirkumstansiya. Walay laing mas makapanalipod kaninyo samtang inyong masugatan ang mga gabon sa kangitngit sa kalibotan. Walay laing makapalig-on sa inyong pagpamatuod alang ni Ginoong Jesukristo ug sa Iyang Pag-ula o makatabang kaninyo nga mas dugang makasabot sa talagsaong plano. Walay laing labaw pa ka makahupay sa inyong espiritu atol sa mga panahon sa kasakit. Walay laing labaw pa nga makaabli sa kalangitan. Wala!”

Elder Godoy: Salamat, Presidente Nelson, sa imong mga pagtulun-an. Pinangga kaayo ka namo. OK, ang sunod nga hilisgotan: pagserbisyo og misyon.

Sister Godoy: OK, panahon na nga maghisgot og mga misyon. Unom ka bulan human sa paglarga ni Carlos sa iyang misyon, milarga ko sa akong misyon.

Elder Godoy: Pagkasulagma.

Sister Godoy: Dili kadto sulagma. Kitang duha gusto nga moserbisyo sa Ginoo, ug gusto kita nga manag-uban sa umaabot. Gitan-aw nato ang atong misyon nga makapahimuot sa Manluluwas ug sa samang higayon giandam ang atong kaugalingon alang sa kaminyoon. Kahibalo kita nga magdala usab kini og mga panalangin nga atong gikinahanglan sa umaabot nga bag-ong minyo.

Elder Godoy: Ang among misyon sa pagkatinuod nagdala og mga panalangin sa among kinabuhi. Tungod sa among misyon, ang among pagpamatuod sa Manluluwas nalig-on, ang among kahibalo sa ebanghelyo milambo, ug ang mga kahanas sa pakigsulti ug pagpangulo nga nakat-onan didto nakatabang sa among pagpanarbaho. Apan labaw sa tanan, nindot ang among gibati nga among natuman ang misyon nga gilaoman sa Ginoo namo.

Sister Godoy: Apan duna koy pangutana nimo. Unsaon man kadtong dili makamisyon o wala makahuman sa ilang misyon tungod sa lainlaing rason? Makalaom ba gihapon sila og hayag nga kaugmaon?

Elder Godoy: Siyempre! Ang mahigugmaong Langitnong Amahan naa kanunay alang nila. Dili kita mohukom niadtong adunay lahi nga mga kasinatian sa misyon o walay kasinatian sa pagmisyon. Human sa tanan, bisan kon ang pagmisyon usa ka mahinungdanong kasinatian sa pagkat-on sa atong kinabuhi ug usa ka responsibilidad sa pagkapari para sa mga batan-ong lalaki, dili kini ordinansa sa ebanghelyo, busa walay tawo nga masilotan sa ilang paglambo niini nga kinabuhi o mawala ang mga panalangin sa kahangtoran tungod niini.

Sister Godoy: Nalipay ko nga nakaserbisyo, ug morekomendar niini sa tanan. Apan sama sa atong nahibaloan, ang mga batan-ong babaye gidapit ug gikinahanglan kaayo, apan ang pagserbisyo opsiyonal.

Elder Godoy: Nalipay usab ko sa akong kasinatian sa misyon. Mituo ko nga mipauli ko gikan sa duha ka tuig nga mas andam sa kinabuhi. Ug adunay mas nindot nga tupi.

Sister Godoy: Naghisgot bahin sa pagpauli gikan sa misyon, unsa kaha kon maghisgot na kita og kaminyoon?

Elder Godoy: OK. Atong atubangon ang hilisgotan.

Sister Godoy: Ania na kami, duha ka nauli na nga mga misyonaryo nga puno sa gugma, daghan og plano, ug walay kwarta.

Elder Godoy: Oo! Nahinumdom ko.

Sister Godoy: Kon maghunahuna ko karon, akong naamgohan ang kanindot nga magsugod sa kinabuhi nga minyo sama namo kaniadto ug dungan nga gikab-ot ang among mga tumong sa edukasyon, propesyon, ug temporal. Dungan namo kining gihimo, ug kadto nga mga kasinatian ug mga hagit nakapasuod namo sa usag usa.

Elder Godoy: Nahinumdom ko ug mouyon ko. Kadtong mga tuig sa pag-ugmad sa among mga tumong nahimong bililhon nga mga handomanan alang namo. Wala ni magpasabot nga sayop ang pagsugod og kinabuhing minyo nga naestablisar sa pinansiyal. Gusto lang namong mopakigbahin og mensahe niadtong naghulat nga ipalambo ang inyong relasyon kon duna na kamo sa tanang gikinahanglan. Kinahanglan ninyo ang mga sukaranan, ang usag usa, ug ang Ginoo sa inyong kiliran—ang tanan makab-ot ra ninyo nga manag-uban, nga maoy mopalig-on sa inyong kaminyoon. Ug nangita ko sa pipila nga ania dinhi.

Sister Godoy: Usbon ang panglantaw apan dili usbon ang hisgotanan—laing komentaryo bahin sa kinabuhing minyo: kon kamo, mga young adult, makakita namo, sa naestablisar na nga mga magtiayon ug mga pamilya, tingali maghunahuna mo nga pirmeng ingon niini nga paagi, nga ang tanan maayong tan-awon ug sayon ra ang kinabuhi alang namo. Tingali sa uban, apan dili sa kadaghanan.

Elder Godoy: Dili sayon alang namo.

Sister Godoy: Ang kinabuhing minyo usa ka kasinatian sa pagkat-on nga unta mahimong mas mamaayo samtang kita naglambo. Ang gugma naa na sukad sa pagsugod, apan ang pagsinabtanay sa matag adlaw maugmad sa hinayhinay. Kinahanglang mopahiangay kita sa usag usa, mokatawa ug mohilak karon ug unya; ang mga anak maghatag og kalipay ug sakit sa ulo, ang sakit motakboy usahay, ug mahutdan og kwarta usahay. Apan kahibalo ba mo? Ingon gayod niini ang kinabuhi.

Elder Godoy: Apan usa ka butang ang segurado. Kon atong dad-on ang ebanghelyo ni Jesukristo ngadto niini nga pamaagi, ang kinabuhing minyo mas sayon ug mas malipayon.

Sister Godoy: Mao nga, ikaduhang pangutana. Unsaon man kadtong walay kahigayonan nga maminyo niini nga kinabuhi? Duna ka bay isulti nila?

Elder Godoy: Duna. Ganahan ko sa tambag ni Presidente Hinckley ngadto sa mga sister nga sa akong pagtuo magamit sa tanan. Tan-awon nato unsay iyang gisulti:

Bidyo: “Pipila ninyo, walay swerte, dili gayod maminyo niini nga kinabuhi. Ingon niana ang sitwasyon usahay. Kon mahitabo kana, ayaw igahin ang inyong kinabuhi nga magbangotan tungod niini. Ang kalibotan nagkinahanglan gihapon sa inyong mga talento. Nagkinahanglan kini sa inyong kontribusyon. Ang Simbahan nagkinahanglan sa inyong hugot nga pagtuo. Nagkinahanglan kini sa inyong lig-on, matinabangon nga kamot. Ang kinabuhi dili gayod pakyas gawas kon tawagon nato kini nga pakyas. Daghan kaayo ang nagkinahanglan sa inyong matinabangon nga mga kamot, inyong mahigugmaon nga pahiyom, inyong malumong kamanggihunahunaon. Daghan kaayo kog nakita nga makahimo, gwapa, talagsaong mga babaye nga wala nay panahon sa romantiko nga gugma. Dili ko makasabot niini, apan kahibalo ko nga sa plano sa Labawng Makagagahom, ang mahangtorong plano nga atong gitawag og plano sa Dios sa kalipay, adunay oportunidad ug ganti sa tanang nagtinguha niini.”

Elder Godoy: Usa ka kasulatan nga nagpahayag sa samang mga saad makita diha sa Mosiah 2:41.

“Ug dugang pa niini, ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtod sa kataposan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay kataposan ang kalipay. O hinumdomi, hinumdomi nga kini nga mga butang tinuod; kay ang Ginoong Dios namulong niini.”

Sa kinatibuk-an, ang mensahe mao, gamit ang mga pulong ni Elder Bednar, kamo kinahanglan lang nga mahimong buotan nga babaye o lalaki, mosunod sa mga sugo, ug ang Ginoo na ang bahala sa tanang butang. Sa kataposan, ang tanang panalangin ihatag ngadto sa matinud-anon.

Môni, duna ka bay panapos nga mga komentaryo?

Sister Godoy: Oo. Gusto ko nga motapos pinaagi sa akong pagpamatuod.

Nasayod ako nga kita mga anak nga lalaki ug mga anak nga babaye sa mahigugmaon nga Langitnong Amahan. Nasayod ko nga si Jesus mao ang Kristo ug Siya buhi. Nasayod ko nga kini nga kinabuhi mao ang panahon sa pagpangandam sa pagsugat sa Dios. Nasayod ko nga Siya mogiya ug moandam sa dalan. Wala kita mag-inusara. Nahibalo ko nga ang templo mao ang balay sa Ginoo dinhi sa yuta. Adunay dapit diin makadawat kita og kahibalo ug inspirasyon sa atong mga kinabuhi. Nasayod ko nga kita adunay propeta sa atong panahon karon, ug siya nagtudlo kanato ug naggiya kanato.

Sa ngalan ni Jesukristo, amen.

Elder Godoy: Salamat kaayo. Ganahan kong makig-uban nimo sa pagtudlo. Ug gihigugma ko ikaw.

Unsa man mga Gilbert? Duna bay mga komentaryo o mga pagtulun-an para niining matahom nga mga naminaw?