Ko Hono Mapuleʻi ʻo e Ngaahi Meʻa Mahuʻinga ʻOku Feʻauʻauhí: Sālini Maina

Ko e ngaahi meʻa mahuʻinga taha kiate aú ko e ʻofa ki he ʻOtuá mo e ʻofa ki he niʻihi kehé. Naʻe pehē ʻe Palesiteni Penisoni, ʻi he taimi ʻoku tau fakamuʻomuʻa ai ʻa e ʻOtuá, ʻe tuʻu ʻa e meʻa kotoa pē ʻi hono tuʻunga totonú. Ko hono moʻoní, ʻoku tau ʻi ha ngaahi tūkunga kehekehe. ʻOku ʻi ai hatau niʻihi ʻoku tau poupouʻi hotau ngaahi fāmilí, niʻihi ʻoku teʻeki mali, ko ha niʻihi ʻoku maʻu fānau, niʻihi ʻoku nofo toko taha pē, pea fatongia ʻaki ʻe ha niʻihi ha ngaahi fāmili makehe mei heʻenau fānaú. Ko e meʻa kuó u akó kapau te tau fakamuʻomuʻa ʻa e ʻOtuá, ʻe tuʻu ʻa e meʻa kotoa pē ʻi hono tuʻunga totonú. Naʻe pehē ʻe Palesiteni ʻOakesi, “ʻOku hā mahino ʻa e ngaahi meʻa ʻoku tau fakamuʻomuʻá ʻi he anga ʻo ʻetau fakaʻaongaʻi hotau taimí.” Kuó u ʻiloʻi ʻi heʻeku vakaiʻi ʻa e founga ʻoku ou fakaʻaongaʻi ai hoku taimí, te u lava ʻo ʻiloʻi lelei ange pe ʻoku fakafenāpasi ʻeku moʻuí mo e ngaahi meʻa ʻoku ou fakamuʻomuʻá.

Ko ha toketā au ki he meʻa fakatuʻupakeé, pea ʻoku ou tokangaʻi ʻa kinautolu ʻoku haʻu ki he falemahakí ʻoku puke pe mamahi pe toki mamatea pē pe mole ha ʻofaʻanga ʻi ha fakatuʻutāmaki fakamamahi. Ko ʻeku taumuʻá ke ʻuluaki ʻofa ki he ʻOtuá pea ʻofa ki he niʻihi kehé. Pea ʻi ha kiʻi vahaʻataimi nounou, kuo pau ke u fokotuʻu ha vā fetuʻutaki ʻo e falalá pea kuo pau ke u tokoniʻi ʻa e kakai kehé ke nau ongoʻi e ʻofa ʻa e ʻOtuá. ʻI heʻeku ʻalu ki he ngāué, ʻoku ʻikai ke u fakakaukau, “Te u lava fēfē ʻo fakalakalaka ʻi heʻeku ngāue maʻuʻanga moʻuí lolotonga ʻeku ʻi he ngāué ʻi he ʻaho ní?" Ko ʻeku lotu ʻi he ʻaho kotoa kimuʻa peá u ʻalu ki he ngāué ko e, “Te u lava fēfē ʻo tokoniʻi ʻa e kau mahakí ke nau ongoʻi ʻa e ʻofa ʻa Sīsū Kalaisí?” ʻOku toe mahuʻinga foki, ko e taimi ʻoku mavahe ai ʻa e kakaí mei he tafaʻaki ki he meʻa fakatuʻupakeé hili ʻenau feohi mo aú, ʻoku nau ongoʻi ʻa e ʻofa ʻa Sīsū Kalaisí. ʻOku ʻikai ke u haohaoa ai, ʻi heʻeku ʻalu kotoa pē ki he ngāué, ʻi heʻeku ʻā hake ʻi he pongipongi kotoa pē, ʻi he taimi kotoa pē te u feohi ai mo ʻeku fānaú, ko ʻeku lotú ia, ke nau lava ʻo ongoʻi e ʻofa ʻa e Tamai Hēvaní ʻiate aú.

ʻOku ou fakamoʻoni ʻoku ʻofa ʻa e Tamai Hēvaní ʻiate koe. ʻOkú Ne ʻofa ʻi Heʻene fānau kotoa pē. ʻOku ou fakamoʻoni foki ko e taimi ʻoku tau feinga ai ke vahevahe ʻa e ʻofa ʻa Sīsū Kalaisí mo e niʻihi kehé, ʻe fonu hotau lotó. ʻE fakafonu kitautolu ʻaki ʻa e maama ʻo Sīsū Kalaisí, pea te nau lava ʻo ongoʻi ʻEne ʻofá ʻo fakafou ʻiate kitautolu.